នាយករដ្ឋមន្ត្រីតពូជលោក ហ៊ុន ម៉ាណែត ប្ដេជ្ញាទប់ស្កាត់គ្រឿងញៀនឲ្យអស់ពីកម្ពុជា តាមរយៈកំណែទម្រង់អាជ្ញាធរប្រយុទ្ធប្រឆាំងគ្រឿងញៀន ខណៈគ្រួសាររបស់លោកត្រូវគេរកឃើញថាជាអ្នកនៅពីក្រោយនៃការចរាចរគ្រឿងញៀនដ៏ធំនៅតាមក្លឹបរាត្រីក្នុងប្រទេសកម្ពុជា។
ការប្ដេជ្ញាចិត្តនេះ បន្ទាប់ពីលោក ហ៊ុន ម៉ាណែត បានតែងតាំងលោក នេត សាវឿន អតីតអគ្គស្នងការនគរបាលជាតិ និងជាក្មួយប្រសាអតីតនាយករដ្ឋមន្ត្រីលោក ហ៊ុន សែន ជាប្រធានអាជ្ញាធរប្រយុទ្ធប្រឆាំងគ្រឿងញៀនជំនួសលោក កែ គឹមយ៉ាន កាលពីថ្ងៃទី១២ ខែកញ្ញា ឆ្នាំ២០២៣។
ក្នុងពិធីសម្ពោធអគាររដ្ឋបាលថ្មី និងសមិទ្ធផលនៅខេត្តកំពង់ស្ពឺ និងប្រកាសជាខេត្តអស់មីននាថ្ងៃទី៣០ ខែតុលា ឆ្នាំ២០២៣ លោក ហ៊ុន ម៉ាណែត ថាការកែសម្រួលក្បាលម៉ាស៊ីនអាជ្ញាធរជាតិគ្រឿងញៀនដោយតែងតាំងលោក នេត សាវឿន លោក ស សុខា និងលោក ទៀ សីហា រួមទាំងលោក កើត រិទ្ធ នេះ ដើម្បីប្រសិទ្ធភាពក្នុងការបង្ក្រាប និងទប់ស្កាត់គ្រឿងញៀននៅកម្ពុជា។
លោកថាការតែងតាំងមន្ត្រីជាន់ខ្ពស់ទាំង ៤រូបខាងលើនេះ បង្ហាញពីទម្ងន់នៃការទប់ស្កាត់បទល្មើសគ្រឿងញៀន និងការបញ្ចេញសារទៅពលរដ្ឋផងដែរ។
នាយករដ្ឋមន្ត្រីលើកបន្តុបរូបនេះអះអាងថា វិធានការដែលរដ្ឋាភិបាលអាណត្តិទី៧ ដាក់ចេញនាពេលនេះ វាមិនមែនគ្រាន់តែជាទ្រឹស្ដីនោះទេ ប៉ុន្តែជាការអនុវត្តជាក់ស្ដែងដោយការស្ដាប់តម្រូវការរបស់ពលរដ្ឋ។
លោក ហ៊ុន ម៉ាណែត ថាទោះបីជាវិធានការដាក់ចេញដើម្បីទប់ស្កាត់គ្រឿងញៀន មិនទាន់អនុវត្តបានភ្លាមៗក៏ដោយ ប៉ុន្តែកំណែទម្រង់ក្បាលម៉ាស៊ីនអាជ្ញាធរជាតិប្រយុទ្ធប្រឆាំងគ្រឿងញៀននេះ ដើម្បីកាត់បន្ថយ និងលុបបំបាត់ការជួញដូរ ចែកចាយ និងប្រើប្រាស់គ្រឿងញៀនឲ្យអស់ពីកម្ពុជា។
លោក ហ៊ុន ម៉ាណែត បានប្រកាសដូច្នេះបន្ទាប់ពីការដឹកនាំកម្ពុជារបស់លោក ហ៊ុន សែន រយៈពេលជិត ៤០ឆ្នាំ បានបរាជ័យក្នុងការទប់ស្កាត់បទល្មើសគ្រឿងញៀននៅកម្ពុជា ដែលធ្វើឲ្យប្រទេសកម្ពុជាបានក្លាយជាទីតាំង និងកន្លែងជួញដូរ ចរាចរ ចែកចាយ និងផលិតគ្រឿងញៀនផងដែរ។
ការផលិត និងចែកចាយគ្រឿងញៀន ត្រូវគេរកឃើញថាកំពុងតែចរាចរយ៉ាងអនាធិបតេយ្យក្នុងចំណោមសែស្រឡាយ សាច់ញាតិ បក្ខពួក ទាំងមន្ត្រីក្នុងជួររដ្ឋាភិបាល និងអ្នកជំនួញធំៗ ដូចជាក្រុមឧកញ៉ា ជាដើម ដែលនៅក្រោមការគ្រប់គ្រងរបស់ក្រុមគ្រួសារនៃមេដឹកនាំបក្សកាន់អំណាចលោក ហ៊ុន សែន បច្ចុប្បន្ននេះ។
អតីតមន្ត្រីជាន់ខ្ពស់រដ្ឋាភិបាលកម្ពុជា លោក មុំ អស្សនី បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កន្លងមកថា គ្រួសាររបស់លោកនាយករដ្ឋមន្ត្រីមិនត្រឹមតែពាក់ព័ន្ធក្នុងការរកស៊ីគ្រឿងញៀននោះទេ សូម្បីតែកូនប្រុសពៅរបស់លោក ហ៊ុន សែន គឺលោក ហ៊ុន ម៉ានី ក៏ជាមនុស្សដែលចូលចិត្តស្វែងរកការសប្បាយជាមួយស្រីផ្សេងក្រៅពីប្រពន្ធរបស់ខ្លួននៅតាមក្លឹបកម្សាន្តជាញឹកញាប់ និងចូលចិត្តប្រើថ្នាំញៀនដើម្បីពង្វក់អារម្មណ៍ជាប្រចាំផងដែររាល់ពេលដែលគាត់ចេញទៅសប្បាយនៅតាមក្លឹបម្តងៗ។
រដ្ឋាភិបាលកម្ពុជាបរាជ័យទប់ស្កាត់នេះ សារព័ត៌មានអន្តរជាតិចុះផ្សាយថា គ្រួសារលោក ហ៊ុន សែន ជាអ្នកនៅពីក្រោយនៃការចរាចរគ្រឿងញៀនដ៏ធំបំផុតនៅកម្ពុជា ដែលកំពុងចែកចាយយ៉ាងអនាធិបតេយ្យនៅតាមក្លឹបរាត្រី រង្គសាល ហាងខារ៉ាអូខេ និងផ្ទះសំណាក់ ហើយអ្នកដែលចែកចាយធំគឺជាជនជាតិវៀតណាម និងជនជាតិចិន៕