ក្រុមអ្នកសង្កេតការណ៍ ព្រមានថា ប្រសិនបើរដ្ឋាភិបាលគ្មានវិធានការត្រួតពិនិត្យឱ្យបានច្បាស់លាស់ពិតប្រាកដលើការអនុវត្តការងាររបស់គ្រឹះស្ថានហិរញ្ញវត្ថុមួយចំនួនទេ កម្ពុជាអាចនឹងជួបវិបត្តិសេដ្ឋកិច្ចធ្ងន់ធ្ងរទៅថ្ងៃក្រោយ បន្ទាប់ពីបំណុលរបស់ពលរដ្ឋខ្មែរដែលបានខ្ចីគ្រឹះស្ថានមីក្រូហិរញ្ញវត្ថុ ហក់ឡើងកាន់តែខ្ពស់នៅឆ្នាំ២០២៣។
អ្នកផ្តល់ប្រឹក្សាផ្នែកអភិវឌ្ឍផ្នត់គំនិត និងការស្រាវជ្រាវលោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៣០ តុលា នេះថា ដើម្បីស្វែងរកការពិតជុំវិញដំណើរការការងាររបស់គ្រឹះស្ថានមីក្រូហិរញ្ញវត្ថុ រដ្ឋាភិបាលមានជម្រើសល្អទាំងសងខាង គឺត្រូវសហការជាមួយអង្គការសម្ព័ន្ធខ្មែរជំរឿន និងសិទ្ធិមនុស្ស ដែលហៅកាត់ថា លីកាដូ សហការជាមួយប្រជាពលរដ្ឋដែលជាកូនបំណុល និងសហការជាមួយគ្រឹះស្ថានមីក្រូហិរញ្ញវត្ថុដែលជាស្ថាប័នសាមី ដើម្បីស៊ើបអង្កេតរកការពិតលើរឿងនេះ។
លោក សេក សុជាតិ អះអាងថា ការសហការគ្នាតាមវិធីនេះ រដ្ឋាភិបាលមិនត្រឹមតែទទួលបាននូវរបាយការណ៍ពិតប្រាកដដើម្បីដោះស្រាយបញ្ចប់បញ្ហាដែលបានកើតឡើងលើពលរដ្ឋ ជុំវិញបំណុលទាក់ទិននឹងគ្រឹះស្ថានមីក្រូហិរញ្ញវត្ថុទេ ថែមទាំងអាចបញ្ចប់នូវទស្សនៈរបស់សមាគមមីក្រូហិរញ្ញវត្ថុកម្ពុជាដែលបានចោទថា អង្គការលីកាដូជាអង្គការដែលគ្មានវិជ្ជាជីវៈថែមទៀត ព្រោះថារបាយការណ៍របស់អង្គការលីកាដូ ជារបាយការណ៍ដែលសមហេតុសមផល និងអាចទទួលយកបានជុំវិញការស៊ើបអង្កេតទាក់ទងនឹងរឿងបំណុលនេះ មិនមែនជាអង្គការដែលគ្មានវិជ្ជាជីវៈដូចសមាគមមីក្រូហិរញ្ញវត្ថុកម្ពុជាចោទប្រកាន់នោះឡើយ។
អ្នកស្រាវជ្រាវការអភិវឌ្ឍសង្គមរូបនេះ បញ្ជាក់ថា អង្គការលីកាដូ បានបង្ហាញទិន្នន័យស្រាវជ្រាវរបស់ខ្លួនជាសាធារណៈជុំវិញបំណុលរបស់ពលរដ្ឋខ្មែរដែលបានខ្ចីគ្រឹះស្ថានមីក្រូហិរញ្ញវត្ថុ ប៉ុន្តែខាងសមាគមមីក្រូហិរញ្ញវត្ថុកម្ពុជាដែលចោទថាអង្គការលីកាដូជាអង្គការគ្មានវិជ្ជាជីវៈ មិនបានបង្ហាញរបាយការណ៍ ឬទិន្នន័យចំពោះសកម្មភាពរបស់ខ្លួនជុំវិញការទារបំណុលពីពលរដ្ឋដែលជាកូនបំណុលរបស់ខ្លួនឡើយ ដូច្នេះចំណុចដែលគួរឱ្យស៊ើបអង្កេត គឺត្រូវធ្វើលើដំណើរការរបស់គ្រឹះស្ថានមីក្រូហិរញ្ញវត្ថុឱ្យកាន់តែស៊ីជម្រៅ ព្រោះថាពួកគេគឺជាស្ថាប័នសាមីដែលបានធ្វើសកម្មភាពជិតស្និទ្ធជាមួយពលរដ្ឋដែលជាកូនបំណុលរបស់ខ្លួន។
កាលពីថ្ងៃទី២៨ ខែតុលា ឆ្នាំ២០២៣ សមាគមមីក្រូហិរញ្ញវត្ថុកម្ពុជាបានចេញសេចក្តីថ្លែងការណ៍មួយ ដោយចោទថា អង្គការសម្ព័ន្ធខ្មែរជំរឿន និងសិទ្ធិមនុស្ស ដែលហៅកាត់ថា លីកាដូ ជាអង្គការដែលគ្មានវិជ្ជាជីវៈជុំវិញការចេញរបាយការណ៍ទាក់ទិននឹងបំណុលរបស់ពលរដ្ឋដែលបានជំពាក់គ្រឹះស្ថានមីក្រូហិរញ្ញវត្ថុ ក្នុងនោះ សមាគមមីក្រូហិរញ្ញវត្ថុកម្ពុជាក៏បានចោទប្រកាន់លើម្ចាស់ទំព័រហ្វេសប៊ុក The Kanitha Show ថាបានបកស្រាយជុំវិញបំណុលរបស់ពលរដ្ឋជាមួយគ្រឹះស្ថានមីក្រូហិរញ្ញវត្ថុនេះ ដោយគ្មានមូលដ្ឋានចំណេះដឹងពីវិស័យមីក្រូហិរញ្ញវត្ថុផងដែរ។
យ៉ាងណាក៏ដោយ ម្ចាស់ទំព័រហ្វេសប៊ុក The Kanitha Show បានឆ្លើយតបទៅកាន់សមាគមមីក្រូហិរញ្ញវត្ថុកម្ពុជាផងដែរកាលពីថ្ងៃទី២៩ ខែតុលា ឆ្នាំ២០២៣ នេះ ដោយអះអាងថា ប្រធានសមាគមមីក្រូហិរញ្ញវត្ថុកម្ពុជា លោក កាំង តុងងី បានលាបពណ៌មកខ្លួនជុំវិញការបកស្រាយរឿងបំណុលនេះ ដូចជាការចោទម្ចាស់ទំព័រហ្វេសប៊ុកមួយនេះថាបានណែនាំពលរដ្ឋដែលបានជំពាក់បំណុលគ្រឹះស្ថានមីក្រូហិរញ្ញវត្ថុ កុំសងលុយដែលខ្លួនបានជំពាក់ត្រឡប់ទៅគ្រឹះស្ថានទាំងនោះវិញ ជាដើម។
ជុំវិញការចោទប្រកាន់នេះ ម្ចាស់ទំព័រហ្វេសប៊ុក The Kanitha Show បានច្រានចោលនូវការចោទប្រកាន់នេះទាំងស្រុង និងធ្វើការពន្យល់ក្នុងឃ្លានីមួយៗត្រឡប់ទៅវិញផងដែរ ហើយមកទល់នឹងពេលនេះ ប្រធានសមាគមមីក្រូហិរញ្ញវត្ថុកម្ពុជា លោក កាំង តុងងី មិនទាន់បានធ្វើការស្រាយបំភ្លឺមកកាន់ម្ចាស់ទំព័រហ្វេសប៊ុកនេះវិញនៅឡើយទេ។
ការចោទប្រកាន់នេះ ធ្វើឡើងបន្ទាប់ពីម្ចាស់ទំព័រហ្វេសប៊ុក The Kanitha Show បានចេញផ្សាយវីដេអូឃ្លីបស្ដីពីបំណុលរបស់ពលរដ្ឋខ្មែរ ដែលបានជំពាក់គ្រឹះស្ថានមីក្រូហិរញ្ញវត្ថុ កាលពីថ្ងៃទី២៦ ខែតុលា ឆ្នាំ២០២៣ កន្លងទៅ ក្នុងនោះក៏មានការលើកឡើងពីរបាយការណ៍របស់អង្គការលីកាដូ ផងដែរ បន្ទាប់ពីអង្គការនេះបានចេញផ្សាយរបាយការណ៍ស្រាវជ្រាវស្ថានភាពបំណុលរបស់ពលរដ្ឋក្នុងខេត្តកំពង់ស្ពឺ កាលពីអំឡុងខែសីហា ឆ្នាំ២០២៣ កន្លងទៅនេះ។
កាសែតអន្តរជាតិ The Guardian កាលពីថ្ងៃទី២៣ ខែតុលា ឆ្នាំ២០២៣ បានចុះផ្សាយអំពីការធ្វើអត្តឃាតរបស់ពលរដ្ឋជនជាតិដើមភាគតិច បន្ទាប់ពីពួកគេបានជំពាក់បំណុលធនាគារ និងគ្រឹះស្ថានមីក្រូហិរញ្ញវត្ថុវ័ណ្ឌក ក្នុងនោះក៏មានអ្នកជំពាក់បំណុលផ្សេងទៀតដែលប៉ុនប៉ងធ្វើអត្តឃាតដែរ ដោយសារតែខ្លួនគ្មានលទ្ធភាពរកប្រាក់ចំណូលសងត្រឡប់ទៅគ្រឹះស្ថានមីក្រូហិរញ្ញវត្ថុទាំងនោះវិញ ខណៈស្ថាប័នទាំងនោះបានបង្ខំឱ្យពួកគេត្រូវតែសងលុយត្រឡប់ទៅវិញ ទោះដឹងថាកូនបំណុលរបស់ខ្លួនមិនទាន់មានលទ្ធភាពសងក៏ដោយ។
ទិន្នន័យសង្គមស៊ីវិល បង្ហាញថា ក្នុងឆ្នាំ២០២៣ នេះ កម្ចីមីក្រូហិរញ្ញវត្ថុរបស់ពលរដ្ឋខ្មែរបានហក់ឡើងទៅដល់ប្រមាណ ១៦ពាន់លានដុល្លារអាមេរិកហើយ ខណៈឆ្នាំ២០២១ និងឆ្នាំ២០២២ កន្លងទៅ គឺមានត្រឹមតែប្រមាណ ១០ពាន់លានដុល្លារអាមេរិកប៉ុណ្ណោះ ហើយទំហំកម្ចី ១៦ពាន់លានដុល្លារអាមេរិកនេះ គឺជាទំហំលើសពីពាក់កណ្តាលផលិតផលក្នុងស្រុក (GDP) របស់ប្រទេសកម្ពុជាទៅហើយ ហើយបំណុលនេះក៏ជាសញ្ញានៃការបំផ្លាញសេដ្ឋកិច្ចរបស់ប្រទេសកម្ពុជាទាំងមូលដែរនាពេលអនាគត។
របាយការណ៍ខាងលើបង្ហាញថា ក្នុងចំណោមប្រជាពលរដ្ឋខ្មែរសរុប ១៧លាននាក់ គឺមានអ្នកដែលមានគ្រួសារចំនួនជាង ៣លាន ៦សែនគ្រួសារ ខណៈបំណុលដែលកើតចេញពីកម្ចីមីក្រូហិរញ្ញវត្ថុគឺមានដល់ទៅ ៣លានកម្ចីឯណោះ ហើយតួលេខនេះបានបង្ហាញថា កម្ពុជាបានជាប់ចំណាត់ថ្នាក់លេខ១ លើពិភពលោក ដែលបានជំពាក់បំណុលច្រើនជាងគេក្នុងចំណោមស្ថាប័នមីក្រូហិរញ្ញវត្ថុជាង ៨០ស្ថាប័ន (៨៦ស្ថាប័ន) ដែលកំពុងរកប្រាក់ចំណេញក្នុងប្រទេសកម្ពុជាសព្វថ្ងៃនេះ។
ទាក់ទិននឹងបញ្ហានេះ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ដែលហៅកាត់ថា សង់ត្រាល់ បានអះអាងថា កាលពីថ្ងៃទី២៩ ខែតុលា ឆ្នាំ២០២៣ កម្មករកម្ពុជា ៩០% ជំពាក់បំណុលធនាគារ ខណៈ ៧០% កំពុងប្រឈមនឹងបំណុលកើនឡើង ដោយឡែក ១០% ទៀត បានជាប់បំណុលចំនួន ៣កន្លែងក្នុងពេលដំណាលគ្នា៕