ទីក្រុងពាណិជ្ជកម្មដ៏សំខាន់មួយក្នុងប្រទេសភូមា ជាប់នឹងប្រទេសចិន បានធ្លាក់ក្នុងការវាយកាន់កាប់ដោយកម្លាំងប្រឆាំងពួកយោធាភូមាហើយ ក្រោយពីប្រយុទ្ធគ្នាយ៉ាងសាហាវជាច្រើនថ្ងៃមកនេះ។
នេះបើតាមសេចក្តីប្រកាសពីអ្នកនាំពាក្យរដ្ឋាភិបាលភូមា។ ក្នុងស្ថានភាពបែបនេះ ចិនបានចេញសេចក្តីអំពាវនាវភ្លាមឱ្យភាគីទាំងពីរបញ្ឈប់ការប្រយុទ្ធគ្នា ប៉ុន្តែបើយោងតាមទីភ្នាក់ងារសារព័ត៌មាន AFP ដែលបានធ្វើសេចក្ដីថ្លែងការណ៍នៅថ្ងៃព្រហស្បតិ៍ ទី២ ខែវិច្ឆិកា បានឱ្យដឹងថា ទីក្រុងពាណិជ្ជកម្មដ៏សំខាន់ធ្វើជំនួញរវាងរដ្ឋាភិបាលនៃរបបសឹក និងប្រទេសចិន គឺទីក្រុង Chinshwehaw ដែលស្ថិតជាប់របងខេត្តយូណាន ខាងចិន ត្រូវបានកម្លាំងប្រឆាំងរួបរួមវាយកាន់កាប់បានហើយ។
អ្នកនាំពាក្យរបបសឹកភូមា បានឱ្យដឹងថា រដ្ឋាភិបាលបានបាត់បង់ការគ្រប់គ្រងលើក្រុងយុទ្ធសាស្ត្រមួយនៅភាគខាងជើងជាប់ព្រំប្រទល់ជាមួយប្រទេសចិន បន្ទាប់ពីមានការប្រយុទ្ធគ្នាអស់ជាច្រើនថ្ងៃជាមួយក្រុមប្រដាប់អាវុធជនជាតិភាគតិច។
តាមប្រភពព័ត៌មានដដែលនេះ ចាប់តាំងតែពីថ្ងៃសុក្រសប្តាហ៍មុនមក ការប្រយុទ្ធគ្នាបានផ្ទុះឡើងនៅពាសពេញទឹកដីមួយផ្នែកធំនៃរដ្ឋ Shan ភាគខាងជើងប្រទេសភូមា ជាកន្លែងដែលមានគម្រោងតភ្ជាប់ផ្លូវដែកមានទឹកប្រាក់ពាន់លានដុល្លារ ស្ថិតក្នុងគម្រោងសាងសង់ និងកំពុងសាងសង់ក្រោមក្របខ័ណ្ឌនៃគម្រោងហេដ្ឋារចនាសម្ព័ន្ធខ្សែក្រវាត់មួយផ្លូវមួយនៃប្រទេសចិន។
ការវាយយកបានទីក្រុង Chinshwehaw កើតឡើងដោយកម្លាំងរួមគ្នាមកពីក្រុមប្រដាប់អាវុធនៃកងទ័ពរំដោះជាតិ Ta’ang សហការជាមួយកងទ័ព Arakan Army និងកម្លាំងសម្ព័ន្ធជាតិប្រជាធិបតេយ្យភូមា មកពីក្រុមរដ្ឋាភិបាលឯកភាពជាតិនៃក្រុមសភាជាប់ឆ្នោតកាលពីឆ្នាំ២០២០ ហើយត្រូវពួកយោធាធ្វើរដ្ឋប្រហារដណ្ដើមអំណាច។
៦ថ្ងៃចុងក្រោយមកនេះ កម្លាំងសម្ព័ន្ធភាពប្រដាប់អាវុធបីក្រុមបានរួមដៃគ្នាបើកការវាយប្រហារ និងប្រយុទ្ធជាមួយកងកម្លាំងយោធាភូមានៅ ១០កន្លែងផ្សេងគ្នានៃរដ្ឋ Shan ភាគខាងជើង។
សេចក្ដីថ្លែងការណ៍ពីក្រុមកម្លាំងប្រឆាំងរបបសឹក បានប្រកាសតាំងពីថ្ងៃទី៣១ ខែតុលា ឆ្នាំ២០២៣ ពីការដណ្តើមកាន់កាប់បាននូវទីតាំងយោធាភូមាជាច្រើន និងត្រួតត្រាផ្លូវយុទ្ធសាស្ត្រសម្រាប់ផ្លាស់ប្ដូរពាណិជ្ជកម្មជាមួយចិន ដែលជាដៃគូដ៏ចម្បងសម្រាប់របបសឹក ដែលមានទឹកប្រាក់ទំហំ ១៨០០លានដុល្លារ។
អ្នកនាំពាក្យរដ្ឋាភិបាលយោធា បានប្រាប់ថា រដ្ឋាភិបាលនិងកងកម្លាំងសន្តិសុខលែងមានវត្តមាននៅក្រុង Chinshwehaw។
បើតាមប្រព័ន្ធផ្សព្វផ្សាយរបស់ពួកយោធាភូមា កាលពីខែកញ្ញា ឆ្នាំនេះ គឺជាង ១ភាគ៤ នៃការធ្វើពាណិជ្ជកម្មឆ្លងព្រំដែនរបស់ភូមាជាមួយចិន ចាប់ពីខែមេសា ដល់ខែកញ្ញា ដោយបានឆ្លងកាត់ទីក្រុង Chinshwehaw។
ចិនជាប្រទេសតែមួយគត់ដែលបន្តមានទំនាក់ទំនងរឹងមាំជាមួយរបបសឹកភូមា តែក្រុងប៉េកាំង ក៏រក្សាចំណងទាក់ទងល្អជាមួយក្រុមប្រដាប់អាវុធជនជាតិភាគតិចភូមា នៅជាប់ព្រំដែនដែរ ព្រោះចិន បានគិតយូរណាស់ហើយថា លទ្ធភាពនៃក្រុមសម្ព័ន្ធភាពអាចនឹងមានប្រៀបខ្លាំងជាងពួកយោធានៃរបបសឹក។
នៅពេលទទួលដំណឹងថា ក្រុងពាណិជ្ជកម្មមួយនេះបានធ្លាក់ក្នុងដៃកម្លាំងប្រឆាំង ក្រុងប៉េកាំងចាត់បញ្ជូនរដ្ឋមន្ត្រីក្រសួងសន្តិសុខសាធារណៈចិន ឱ្យទៅបានជួបឧត្តមសេនីយ៍ មីន អ៊ុងឡាំង មេដឹកនាំរបបសឹកភូមា នៅរដ្ឋធានីណៃពិដោ កាលពីថ្ងៃទី១ វិច្ឆិកា។
គេថាមន្ត្រីចិនរូបនេះបានពិភាក្សាអំពីការវាយកាន់កាប់បានដោយក្រុមប្រដាប់អាវុធ ដែលចិនបារម្ភពីការបង្កការប៉ះពាល់យ៉ាងខ្លាំងដល់សន្តិភាព និងស្ថិរភាពតាមតំបន់ព្រំដែនរួមជាមួយចិន។
បើតាមការចុះផ្សាយរបស់សារព័ត៌មានភូមា នៅថ្ងៃព្រហស្បតិ៍នេះ ចិនព្រួយបារម្ភយ៉ាងខ្លាំង ហើយក៏បានចេញសេចក្តីអំពាវនាវនៅថ្ងៃព្រហស្បតិ៍នេះឱ្យភាគីទាំងពីរបញ្ឈប់ការប្រយុទ្ធគ្នាជាបន្ទាន់ ហើយងាកមកដោះស្រាយជម្លោះដោយសន្តិវិធី។
ទោះជាយ៉ាងណាក៏ដោយ មិនមែនមានតែតំបន់ជាប់ព្រំដែនចិន ដូចជាក្រុង Chinshwehaw នោះទេដែលជាគោលដៅនៃការប្រយុទ្ធគ្នា គឺសឹងតែនៅទូទាំងប្រទេស គឺមានទាំងជាប់ព្រំដែនឥណ្ឌា ជាប់ព្រំដែនថៃ ហើយមានទាំងតំបន់ជាច្រើននៅកណ្ដាលប្រទេស ក៏កំពុងក្លាយជាសមរភូមិផងដែរ។
ក្រុមប្រដាប់អាវុធជនជាតិភាគតិចនេះបានតស៊ូប្រឆាំងនឹងរដ្ឋាភិបាលភូមាជាច្រើនទសវត្សរ៍មកហើយ ដើម្បីការពារស្វ័យភាព និងការគ្រប់គ្រងធនធានធម្មជាតិរបស់ពួកគេ ប៉ុន្តែនៅពេលពួកយោធាភូមា ធ្វើរដ្ឋប្រហារប្លន់អំណាចពីរដ្ឋាភិបាលប្រជាធិបតេយ្យដែលដឹកនាំដោយអ្នកស្រី អ៊ុងសាន ស៊ូជី ក្រុមប្រដាប់អាវុធជនជាតិភាគតិចទាំងអស់បានចងសម្ព័ន្ធភាពជាមួយគ្នា ដោយឈរលើគោលដៅរួម គឺត្រូវផ្ដួលរំលំរបបសឹក។
ប្រទេសភូមាដែលស្ថិតក្នុងតំបន់អាស៊ីអាគ្នេយ៍ បានចាប់ផ្ដើមធ្លាក់ក្នុងសង្គ្រាមវិញក្រោយពីពួកយោធាប្លន់អំណាចបានពីរដ្ឋាភិបាលស៊ីវិលនៅខែកុម្ភៈ ឆ្នាំ២០២១។ ស្ថានភាពប្រទេសដែលធ្លាក់ក្នុងសង្គ្រាមស៊ីវិលនេះ បានបណ្ដាលឱ្យមានជនភៀសខ្លួនរាប់សែននាក់ រត់ទៅនៅប្រទេសជិតខាង ជាពិសេសគឺប្រទេសថៃ៕