រដ្ឋាភិបាលកម្ពុជា អះអាងថា រយៈពេលជាង ១០ខែក្នុងឆ្នាំ២០២៣ នេះ ខ្លួនបានបង្ក្រាបករណីប្រើប្រាស់ និងជួញដូរគ្រឿងញៀនបានជិត ៧ពាន់ករណី (៦៨៤៧ករណី) ក្នុងនោះក៏បានឃាត់ខ្លួនអ្នកពាក់ព័ន្ធ ទាំងអ្នកប្រើប្រាស់ និងអ្នកជួញដូរគ្រឿងញៀនបានជិត ១ម៉ឺន ៧ពាន់នាក់ផងដែរ (១៦៩៦៣នាក់) ដែលមានស្ត្រីរហូតដល់ជាង ១ពាន់នាក់ឯណោះ (ស្រី ១០៩០នាក់)។
រដ្ឋាភិបាលកម្ពុជា បានបង្ហាញនៅថ្ងៃទី៧ វិច្ឆិកា នេះថា រយៈពេលត្រឹមតែមួយថ្ងៃ គឺនៅថ្ងៃទី៦ ខែវិច្ឆិកា ឆ្នាំ២០២៣ សមត្ថកិច្ចបានបង្ក្រាបករណីដឹកជញ្ជូន រក្សាទុក និងជួញដូរគ្រឿងញៀនបាន ៦ករណី រួមទាំងឃាត់ខ្លួនជនសង្ស័យបានជិត ៣០នាក់ផងដែរ (២៨នាក់) ក្នុងនោះ គឺមានករណីដឹកជញ្ជូន រក្សាទុក ៥ករណី និងករណីជួញដូរចំនួន ១ករណី។
របាយការណ៍នេះធ្វើឡើងស្របពេលដែលគេមើលឃើញថា គ្រឿងញៀនកំពុងតែលុកលុយប្រទេសកម្ពុជាធ្ងន់ធ្ងររហូតជាប់ពាក់ព័ន្ធដល់មន្ត្រីកងកម្លាំងប្រដាប់អាវុធរបស់កម្ពុជាទាំងការប្រើប្រាស់ និងជួញដូរថែមទៀត។
កាលពីចុងខែសីហា ឆ្នាំ២០២៣ មន្ទីរប្រយុទ្ធប្រឆាំងគ្រឿងញៀន បានបង្ហាញរបាយការណ៍របស់ខ្លួនថា ក្នុងរយៈពេល ៨ខែក្នុងឆ្នាំ២០២៣ នេះ សមត្ថកិច្ចកម្ពុជាបានបង្ក្រាបករណីជួញដូរ និងប្រើប្រាស់គ្រឿងញៀនបានជាង ៥ពាន់ករណី (៥០៦០ករណី) ដោយឃាត់ខ្លួនជនសង្ស័យបានជាង ១ម៉ឺននាក់ (១២៣៥៦នាក់) ក្នុងនោះ គឺរកឃើញករណីជួញដូរចំនួនជិត ៧០០ករណី (៦៩៤ករណី) ករណីប្រើប្រាស់គ្រឿងញៀនជិត ២ពាន់ករណី (១៧៩៦ករណី) ករណីផលិតកែច្នៃចំនួន ៩ករណី ករណីចាត់ចែងសម្រួល ២០ករណី និងករណីដាំដុះ ១៥ករណីផងដែរ។
ទាក់ទិននឹងបញ្ហានេះ កាលពីចុងខែកញ្ញា ឆ្នាំ២០២៣ អគ្គស្នងការរងទទួលផែនប្រឆាំងបទល្មើសគ្រឿងញៀននៃអគ្គស្នងការដ្ឋាននគរបាលជាតិលោក ម៉ក់ ជីតូ បានអះអាងថា អាជ្ញាធរកម្ពុជាបានដុតបំផ្លាញ និងកម្ទេចវត្ថុតាងគ្រឿងញៀនប្រមាណ ១៣តោន និងសារធាតុគីមីផ្សំជាង ៣០០តោន (៣៤២តោន) ដើម្បីអបអរសាទរទិវាអន្តរជាតិប្រឆាំងគ្រឿងញៀនឆ្នាំ២០២៣ នេះ។
ទាក់ទិននឹងបញ្ហានេះ អតីតរដ្ឋមន្ត្រីក្រសួងមហាផ្ទៃលោក ស ខេង ធ្លាប់បានលើកឡើងកាលពីអំឡុងឆ្នាំ២០២២ ថា ប្រទេសកម្ពុជាកំពុងមានបញ្ហាទ្វេដងដោយសារគ្រឿងញៀន និងករណីនាំចូលគ្រឿងញៀនពីប្រទេសជិតខាង ហើយបច្ចុប្បន្ននេះ កម្ពុជាស្ថិតក្នុងចំណុចក្តៅនៃអ្នកប្រើប្រាស់គ្រឿងញៀន ក្នុងនោះក្នុងចំណោមទណ្ឌិតជិត ៤ម៉ឺននាក់ (៣៨០០០នាក់) ដែលស្មើនឹង ៥៤,៥២% គឺជាប់ពន្ធនាគារដោយករណីពាក់ព័ន្ធនឹងគ្រឿងញៀន។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៧ វិច្ឆិកា នេះថា បើផ្អែកតាមរបាយការណ៍ស្ដីពីការបង្ក្រាបគ្រឿងញៀនរបស់រដ្ឋាភិបាលកម្ពុជានៅពេលនេះ បង្ហាញឱ្យឃើញថា ការចរាចរណ៍គ្រឿងញៀននៅកម្ពុជាបានឈានដល់ដំណាក់កាលប្រកាសអាសន្នហើយនៅពេលនេះ ព្រោះថាយុវជនកម្ពុជាបច្ចុប្បន្ននេះត្រូវគេរកឃើញថា បានជាប់ពាក់ព័ន្ធនឹងគ្រឿងញៀនក្នុងកម្រិតខ្ពស់បំផុត។
លោក សេក សុជាតិ លើកឡើងថា ប្រសិនបើរដ្ឋាភិបាលមិនមានវិធានការទប់ស្កាត់ឱ្យបានទាន់ពេល និងប្រកបដោយប្រសិទ្ធភាពទេ ធនធានមនុស្សរបស់កម្ពុជានឹងត្រូវបំផ្លាញធ្ងន់ធ្ងរ។ ជាងនេះទៀត សេដ្ឋកិច្ចរបស់កម្ពុជាក៏នឹងរងនូវការបំផ្លាញផងដែរ ដែលកើតចេញពីកត្តាផ្សេងៗដែលពាក់ព័ន្ធនឹងបញ្ហាគ្រឿងញៀននេះ។
ទាក់ទិននឹងបញ្ហានេះ កាលពីថ្ងៃទី២ ខែវិច្ឆិកា ឆ្នាំ២០២៣ ស្នងការដ្ឋាននគរបាលខេត្តព្រៃវែង បានចេញសេចក្ដីប្រកាសព័ត៌មានក្រោយយុទ្ធនាការធ្វើតេស្ដស្វែងរកសារធាតុគ្រឿងញៀនចាប់តាំងពីដើមខែតុលា ឆ្នាំ២០២៣ នៅក្នុងស្រុកទាំង ១៣ ប៉ុស្តិ៍នគរបាលរដ្ឋបាលទាំង ១១៦ លើមន្ត្រីនគរបាលទូទាំងខេត្តព្រៃវែង ដែលជាលទ្ធផលបានរកឃើញមន្ត្រីនគរបាលចំនួន ១១នាក់បានក្លាយជាអ្នកប្រើប្រាស់គ្រឿងញៀន។
ជាងនេះទៀត កាលពីថ្ងៃទី២៩ ខែតុលា ឆ្នាំ២០២៣ កងរាជអាវុធហត្ថលើផ្ទៃប្រទេសក៏បានបង្ក្រាបបទល្មើសគ្រឿងញៀនដោយរកឃើញនាយទាហាននៃកងរាជអាវុធហត្ថខេត្តកំពង់ស្ពឺ ចំនួន ៦នាក់ រួមមានលោក ទិត្យ វណ្ណៈ ជាមេបញ្ជាការរងកងរាជអាវុធហត្ថខេត្តកំពង់ស្ពឺ លោក យស ឌីណា មេបញ្ជាការមូលដ្ឋានកងរាជអាវុធហត្ថស្រុកភ្នំស្រួច រួមទាំងគ្នីគ្នា ៤នាក់ផ្សេងទៀតផងដែរ។
ទាក់ទិននឹងបញ្ហានេះ មន្ត្រីនគរបាលជាន់ខ្ពស់នៃក្រសួងមហាផ្ទៃ បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះកាលពីពេលកន្លងទៅថា ហាង ខារ៉ាអូខេ ក្លឹបរាត្រី និងរង្គសាលដែលនៅតាមខេត្ត និងរាជធានីភ្នំពេញ បានក្លាយជាទីតាំងចែកចាយគ្រឿងញៀនយ៉ាងអនាធិបតេយ្យ ក្នុងនោះមានក្លឹបមួយឈ្មោះ ទ្រូហ្វេស (True Face) ត្រូវគេស្គាល់ថាជាក្លឹបរកលុយឱ្យគ្រួសារត្រកូលហ៊ុន ហើយក្លឹបនេះគ្មានសមត្ថកិច្ចណាម្នាក់ ឬថ្នាក់ដឹកនាំរដ្ឋាភិបាលណាមួយហ៊ានប៉ះពាល់ឡើយ៕