ក្រសួងព័ត៌មាន អះអាងថា ក្រោយពីបានពិនិត្យជាក់ស្ដែង គឺពិតជាមានអ្នកសារព័ត៌មានចំនួន ៨២៨រូប បានចូលទៅសុំលុយពីក្រុមហ៊ុនកាស៊ីណូ ថបដាយអឹម៉ិន (TOP DIAMOND CASINO) ប្រាកដមែន ប៉ុន្តែតួលេខនេះមិនមែនជាចំនួនអង្គភាពសារព័ត៌មានទេ តែជាចំនួនបុគ្គលដែលបានអះអាងថាខ្លួនជាអ្នកសារព័ត៌មាន ហើយបច្ចុប្បន្ន បញ្ជីឈ្មោះបុគ្គលទាំងនោះបានតម្កល់ទុកនៅក្រសួង ដើម្បីកំណត់អត្តសញ្ញាណពិតប្រាកដអំពីចំនួនអង្គភាពសារព័ត៌មានដែលបានចុះបញ្ជី និងមិនចុះបញ្ជីនៅក្រសួង ដើម្បីមានវិធានការបន្តតាមផ្លូវច្បាប់។
ក្រសួងព័ត៌មាន នៅថ្ងៃទី១៦ ខែវិច្ឆិកា ឆ្នាំ២០២៣ នេះ បានចេញសេចក្ដីប្រកាសព័ត៌មានបង្ហាញអំពីចំណាត់ការរបស់ខ្លួនយ៉ាងម៉ឺងម៉ាត់ទៅលើអ្នកសារព័ត៌មានមួយចំនួន ដែលពាក់ព័ន្ធករណីលុយកាក់ជាមួយក្រុមហ៊ុនកាស៊ីណូ ថបដាយអឹម៉ិន (TOP DIAMOND CASINO) នៅខេត្តតាកែវ។
ប្រភពដដែលបានលើកឡើងថា ករណីការចេញផ្សាយ និងការផ្តល់បញ្ជីឈ្មោះអ្នកសារព័ត៌មានរបស់ក្រុមហ៊ុនកាស៊ីណូ ថបដាយអឹម៉ិន ក្រសួងព័ត៌មានបានពិនិត្យជាក់ស្ដែងឃើញ គឺពិតជាមានអ្នកសារព័ត៌មានចូលទៅសុំលុយក្រុមហ៊ុននេះប្រាកដមែន។
ក្រោយពីការចេញលិខិតលេខ ៥៨ សជណ.ព.ម ចុះថ្ងៃទី៤ ខែតុលា ឆ្នាំ២០២៣ មានអ្នកសារព័ត៌មានចំនួន ៤៣រូបមកពីស្ថាប័នសារព័ត៌មានចំនួន ៣៤អង្គភាព បានចូលខ្លួនមកបំភ្លឺនៅអគ្គនាយកដ្ឋានព័ត៌មាន និងសោតទស្សន៍ថា ខ្លួនពិតជាបានទៅសុំលុយពីក្រុមហ៊ុនកាស៊ីណូ ថបដាយអឹម៉ិន ប្រាកដមែន។ ចំណែកអង្គភាពសារព័ត៌មានផ្សេងទៀត ក៏បានបញ្ជាក់ជូនក្រសួងព័ត៌មានអំពីការមិនពាក់ព័ន្ធនឹងករណីនេះផងដែរ។
សេចក្តីប្រកាសព័ត៌មានដដែលបានអះអាងថា ដើម្បីបន្តវិធានការចំពោះបុគ្គលដែលធ្វើឱ្យប៉ះពាល់ដល់សណ្ដាប់ធ្នាប់ស្ថាប័នព័ត៌មាន និងដើម្បីការពារភាពស្អាតស្អំចំពោះអ្នកសារព័ត៌មាន ក្រសួងព័ត៌មានតម្រូវឱ្យអ្នកសារព័ត៌មាន និងបុគ្គលដែលជាប់ពាក់ព័ន្ធករណីសុំលុយពីកាស៊ីណូ ថបដាយអឹម៉ិន ត្រូវមកផ្ទៀងផ្ទាត់ឈ្មោះ និងឆ្លើយបំភ្លឺនៅអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានរៀងរាល់ថ្ងៃធ្វើការ គិតចាប់ពីថ្ងៃចេញសេចក្តីប្រកាសព័ត៌មាន រហូតដល់ថ្ងៃទី២០ ខែធ្នូ ឆ្នាំ២០២៣ ជាកំហិត។
ក្រសួងព័ត៌មាន បញ្ជាក់ថា កន្លងទៅខ្លួនបានទទួលលិខិតឆ្លើយបំភ្លឺ និងសុំអភ័យទោសពីក្រុមហ៊ុនកាស៊ីណូ ថបដាយអឹម៉ិន លើករណីដែលក្រុមហ៊ុននេះបានចេញលិខិតធ្វើឱ្យប៉ះពាល់ និងជះឥទ្ធិពលមិនល្អដល់វិជ្ជាជីវៈសារព័ត៌មាន។
តាមរយៈលិខិតឆ្លើយបំភ្លឺ និងសុំអភ័យទោសនេះ ក្រុមហ៊ុនបានសន្យាបន្តសហការជាមួយក្រសួងព័ត៌មាន ដើម្បីដោះស្រាយបញ្ហាដែលបានកើតឡើងកន្លងមក ព្រមទាំងគាំទ្រចំពោះចំណាត់ការរបស់ក្រសួងព័ត៌មាន លើអ្នកសារព័ត៌មានដែលបំពានក្រមសីលធម៌ វិជ្ជាជីវៈ ដើម្បីពង្រឹងគុណភាពព័ត៌មាន និងសណ្ដាប់ធ្នាប់ស្ថាប័នព័ត៌មាននៅព្រះរាជាណាចក្រកម្ពុជា។
ជាមួយនឹងការឆ្លើយបំភ្លឺ និងសុំអភ័យទោស ក្រុមហ៊ុនកាស៊ីណូ ថបដាយអឹម៉ិន បានផ្តល់បញ្ជីឈ្មោះបុគ្គលចំនួន ៨២៨រូបជូនក្រសួងព័ត៌មាន ដែលក្រុមហ៊ុនកាស៊ីណូ ថបដាយអឹម៉ិន បានបញ្ជាក់ថាជាអ្នកសារព័ត៌មានដែលបានមកសុំលុយកាក់ពីក្រុមហ៊ុន។
ចំនួននេះប្រហាក់ប្រហែលទៅនឹងចំនួនអ្នកសារព័ត៌មានដែលក្រុមហ៊ុនកាស៊ីណូ ថបដាយអឹម៉ិន ចេញផ្សាយជាសាធារណៈកាលពីថ្ងៃទី៥ ខែកញ្ញា ឆ្នាំ២០២៣ ថា «មានអ្នកសារព័ត៌មានមកពីអង្គភាពប្រមាណ ៧០០ ទៅ ៩០០អង្គភាពមានការពាក់ព័ន្ធទៅនឹងការសុំលុយកាក់ និងបានទទួលការឧបត្ថម្ភជាហូរហែ»។
រដ្ឋាភិបាលកម្ពុជាបានបង្ហាញរបាយការណ៍របស់ខ្លួនកាលពីពេលកន្លងទៅថា សព្វថ្ងៃនេះ អង្គភាពសារព័ត៌មានជាតិ និងបរទេសដែលបានចុះបញ្ជីនៅក្រសួងព័ត៌មាន មានចំនួនជាង ២ពាន់អង្គភាព (២១៥៤អង្គភាព) ដែលកំពុងធ្វើសកម្មភាពផ្សព្វផ្សាយតាមបែបបុរាណ និងបែបទំនើបទៅតាមលទ្ធភាពរបស់ពួកគេរៀងៗខ្លួន។
ទាក់ទិននឹងបញ្ហានេះ ក្រុមអ្នកសង្កេតការណ៍លើកឡើងថា ទង្វើនេះបង្ហាញថា អំពើពុករលួយក្នុងវិស័យសារព័ត៌មាននៅកម្ពុជាកំពុងតែកើនឡើងធ្ងន់ធ្ងរ ខណៈបនល្បែងនានា និងកន្លែងប្រកបអាជីវកម្មមិនស្របច្បាប់ដទៃទៀត ក៏ច្បាស់ជាកើតមាននូវអំពើពុករលួយបែបនេះដូចគ្នាដែរ។
ប្រភពដដែលអះអាងថា អំពើពុករលួយទាំងនេះបានកើតឡើងដោយសារតែរដ្ឋាភិបាលកម្ពុជាប្រើយុទ្ធនាការបំបិទសំឡេងសារព័ត៌មានឯករាជ្យកន្លងមក និងបើកដៃឱ្យសារព័ត៌មានដែលមាននិន្នាការគាំទ្រខ្លួនធ្វើសកម្មភាពដោយសេរី ខណៈអង្គភាពសារព័ត៌មានខ្លះបានប្រើឥទ្ធិពល និងអំណាចរបស់ខ្លួនដែលមានសែស្រឡាយបក្ខពួកក្នុងជួររដ្ឋាភិបាល ជំរិតទារប្រាក់ពីកន្លែងប្រកបអាជីវកម្មនានា ជាថ្នូរនឹងការមិនចុះផ្សាយនូវអំពើខុសច្បាប់របស់ម្ចាស់អាជីវកម្មខុសច្បាប់ទាំងនោះ។
អង្គការអ្នកសារព័ត៌មានគ្មានព្រំដែន (Reporters Without Borders) បានដាក់ចំណាត់ថ្នាក់សេរីភាពសារព័ត៌មាននៅកម្ពុជាសម្រាប់ឆ្នាំ២០២២ ស្ថិតក្នុងលំដាប់លេខរៀងទី១៤២ ក្នុងចំណោមប្រទេស១៨០ ដែលចំណាត់ថ្នាក់នេះបង្ហាញអំពីសេរីភាពសារព័ត៌មាននៅកម្ពុជានៅតែមិនអាចងើបចេញពីចំណាត់ថ្នាក់មិនល្អដដែល ខណៈសារព័ត៌មានឯករាជ្យ វីអូឌី ដែលជាសារព័ត៌មានឯករាជ្យសេសសល់ចុងក្រោយ ក៏ត្រូវបានរដ្ឋាភិបាលកម្ពុជាបិទទាំងស្រុងនៅចុងឆ្នាំ២០២២ ផងដែរ៕