ក្រុមស្ត្រីថ្ងៃសុក្រជាច្រើននាក់ នាំគ្នាហែក្បួនក្នុងទីក្រុងភ្នំពេញ នៅថ្ងៃសុក្រ ទី១៧ វិច្ឆិកា នេះ ដើម្បីទាមទារឱ្យរដ្ឋាភិបាលកម្ពុជាដោះលែងអ្នកទោសនយោបាយ និងអ្នកទោសមនសិការ បន្ទាប់ពីសាច់ញាតិរបស់ពួកគេទទួលរងនូវការកាត់ទោសឱ្យជាប់ពន្ធនាគារទាំងអយុត្តិធម៌នាពេលកន្លងមក។
ក្រុមស្ត្រីប្រមាណជា ១០នាក់ ដែលសាច់ញាតិរបស់ពួកគេកំពុងរងនូវការឃុំខ្លួនទាំងអយុត្តិធម៌ នាំគ្នាប្រមូលផ្ដុំនៅស្ថានីយប្រេងឥន្ធនៈសូគីម៉ិច ក្បែរស្ពានស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ នៅថ្ងៃទី១៧ ខែវិច្ឆិកា ឆ្នាំ២០២៣ នេះ ដោយដង្ហែជាក្បួនមានកាន់បដាសរសេរជាអក្សរថា «ដោះលែងអ្នកទោសនយោបាយ និង ដោះលែងឪពុកខ្ញុំ គាត់គ្មានកំហុសទេ»។
ជាងនេះទៅទៀត ពួកគេក៏បានកាន់រូបថតអ្នកទោសមនសិការមួយចំនួន អមដោយសម្រែកទាមទារឲ្យមានការដោះលែងពួកគេឲ្យមានសេរីភាពឡើងវិញ។
ក្រុមស្ត្រីថ្ងៃសុក្រនាំគ្នាដើរជាក្បួនពីស្ថានីយប្រេងឥន្ធនៈសូគីម៉ិច រហូតដល់ផ្សារថ្មី និងបានរំសាយការដង្ហែក្បួននេះវិញនៅម៉ោងប្រមាណជា ១០ និង ៣០នាទីព្រឹក ដោយមានការឃ្លាំមើលពីសំណាក់កងសន្តិសុខប្រមាណជា ២០នាក់ ប៉ុន្តែគ្មានការរារាំង ឬប្រទូសរ៉ាយណាមួយពីសំណាក់កងសន្តិសុខទាំងនោះទេ។
ការចេញដង្ហែក្បួននេះ ធ្វើឡើងបន្ទាប់ពីសាច់ញាតិរបស់ពួកគេត្រូវបានតុលាការកាត់ទោសឱ្យជាប់ពន្ធនាគារទាំងអយុត្តិធម៌កាលពីពេលកន្លងទៅនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី១៧ វិច្ឆិកា នេះថា ក្នុងស្ថានភាពនយោបាយនៅកម្ពុជាដូចសព្វថ្ងៃនេះ លោកមិនមានសង្ឃឹមថាការទាមទាររបស់ជនរងគ្រោះទាំងនោះនឹងទទួលបានការដោះលែងឱ្យសាច់ញាតិរបស់ពួកគេដែលបានរងនូវការកាត់ទោសកន្លងមកនោះទេ។
លោក ស៊ឹង សែនករុណា លើកឡើងថា ទាំងមជ្ឈដ្ឋានជាតិ និងអន្តរជាតិ តែងតែព្រួយបារម្ភយ៉ាងខ្លាំងពីការលើកស្ទួយសិទ្ធិសេរីភាព និងសិទ្ធិនយោបាយរបស់ពលរដ្ឋ ត្បិតរូបភាពនៃការអនុវត្តច្បាប់ ដូចជា ការលើកលែងទោសដល់សកម្មជននយោបាយ ក៏ដូចជាសកម្មជនសង្គមដែលបានចុះចូលជាមួយបក្សកាន់អំណាច និងការបន្តអនុវត្តទោសទៅលើសកម្មជននយោបាយ ក៏ដូចជាសកម្មជនសង្គមនាពេលកន្លងមក បានបង្ហាញពីការអនុវត្តច្បាប់ដែលមានស្តង់ដារពីរ។
មន្ត្រីជាន់ខ្ពស់សង្គមស៊ីវិលរូបនេះ អំពាវនាវឱ្យអ្នកនយោបាយកំពូលៗរបស់កម្ពុជា ធ្វើការចរចាគ្នាដើម្បីធានានូវស្ថានភាពនយោបាយសម្រាប់ប្រទេសជាតិរបស់ខ្លួនឲ្យមានភាពល្អប្រសើរ ក្នុងបំណងលើកស្ទួយការអនុវត្តសិទ្ធិសេរីភាពបញ្ចេញមតិ អនុវត្តសិទ្ធិនយោបាយ ស្របតាមសង្គមប្រជាធិបតេយ្យ ទៅតាមនិន្នាការរៀងៗខ្លួនដែលមានច្បាប់ជាអ្នកកំណត់ ជាជាងការប្រើហេតុផលនយោបាយរៀងៗខ្លួនក្នុងការកំណត់សិទ្ធិសេរីភាពបញ្ចេញមតិ និងសិទ្ធិនយោបាយរបស់ពលរដ្ឋ។
ទាក់ទិននឹងបញ្ហានេះ ក្នុងជំនួបជាមួយមេដឹកនាំកម្ពុជាលោក ហ៊ុន សែន ក្នុងកិច្ចប្រជុំកំពូលអាស៊ានកាលពីថ្ងៃទី១២ ខែវិច្ឆិកា ឆ្នាំ២០២២ ប្រធានាធិបតីសហរដ្ឋអាមេរិកលោក ចូ បៃដិន បានជំរុញឲ្យលោក ហ៊ុន សែន បើកលំហសិទ្ធិនយោបាយសម្រាប់ពលរដ្ឋខ្មែរឡើងវិញមុនការបោះឆ្នោតឆ្នាំ២០២៣ និងអំពាវនាវឲ្យមានការដោះលែងសកម្មជននានាដែលត្រូវបានឃុំខ្លួនពីបទចោទប្រកាន់ពាក់ព័ន្ធនឹងរឿងនយោបាយផងដែរ ប៉ុន្តែមិនទទួលបានលទ្ធផលវិជ្ជមានឡើយ។
ដើម្បីស្វែងរកយុត្តិធម៌ឱ្យស្វាមីរបស់ខ្លួនដែលកំពុងជាប់ឃុំ ក្រុមស្ត្រីថ្ងៃសុក្រក៏បានដាក់ញត្តិនៅតាមស្ថានទូតនានាប្រចាំនៅកម្ពុជាដែរ ដូចជាស្ថានទូតអាមេរិក និងស្ថានទូតបារាំង ជាដើម ប៉ុន្តែរហូតដល់ពេលនេះ ពួកគេមិនទាន់ទទួលបានការអន្តរាគមន៍ណាមួយដើម្បីផ្តល់យុត្តិធម៌ជូនសាច់ញាតិរបស់ពួកគេដែលកំពុងជាប់ឃុំនៅឡើយទេ។
ស្ត្រីថ្ងៃសុក្រ គឺជាឈ្មោះរបស់ក្រុមស្ត្រីមួយក្រុមដែលតែងតែនាំគ្នាតវ៉ាជារៀងរាល់ថ្ងៃសុក្ររយៈពេល ៣ឆ្នាំមកហើយ ដើម្បីទាមទារយុត្តិធម៌ជូនក្រុមគ្រួសារពួកគេដែលត្រូវបានតុលាការកាត់ទោសឱ្យជាប់ពន្ធនាគារចន្លោះពី ៣ ទៅ ៧ឆ្នាំ ក្រោមបទចោទប្រកាន់ «ញុះញង់ និងរួមគំនិតក្បត់» ពាក់ព័ន្ធនឹងព្រឹត្តិការណ៍វិលចូលប្រទេសកម្ពុជារបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩។
ទាក់ទិននឹងបញ្ហានេះ សមាជិកស្ត្រីថ្ងៃសុក្រម្នាក់ឈ្មោះ អ្នកស្រី សោម ចន្ធូ វ័យ ៥៣ឆ្នាំ បានទទួលមរណភាពកាលពីថ្ងៃទី២០ ខែធ្នូ ឆ្នាំ២០២២ កន្លងទៅ ដោយសារជំងឺលើសសម្ពាធឈាម និងទឹកនោមផ្អែម រួមទាំងជំងឺផ្លូវចិត្តធ្ងន់ធ្ងរ ក្រោយទៅសួរសុខទុក្ខស្វាមីរបស់អ្នកស្រី គឺលោក សុខ ចិន្តា ដែលបានជាប់ពន្ធនាគារត្រពាំងផ្លុង ខេត្តត្បូងឃ្មុំ បានប្រហែលមួយសប្តាហ៍៕