ចិន បានបញ្ជាក់ជាថ្មីពីការបន្តគាំទ្រការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត ដើម្បីធានានូវកំណើនសេដ្ឋកិច្ច និងនាំមកនូវផ្លែផ្កាសម្រាប់ប្រទេស និងប្រជាជនកម្ពុជា។
ថ្លែងនៅក្នុងជំនួបមួយរវាងលោក ហ៊ុន សែន ប្រធានគណបក្សប្រជាជនកម្ពុជា និងលោកស្រី ស៊ិន យៀកយៀក (Shen Yueyue) អនុប្រធានសភាប្រឹក្សានយោបាយប្រជាជនចិន កាលពីថ្ងៃទី២៣ ខែវិច្ឆិកា នៅទីស្នាក់ការគណបក្សកាន់អំណាច ក្រុងភ្នំពេញ ដែលបានមកទស្សនកិច្ចនៅកម្ពុជា សម្ដែងនូវការគាំទ្រដល់ការដឹកនាំរបស់លោកនាយករដ្ឋមន្ត្រី ហ៊ុន ម៉ាណែត ដោយចិន លើកឡើងថា ដើម្បីធានានូវកំណើនសេដ្ឋកិច្ច និងនាំមកនូវផលប្រយោជន៍ជាផ្លែផ្កាដើម្បីប្រទេស និងប្រជាជនកម្ពុជា។
យោងតាមសេចក្តីប្រកាសព័ត៌មានរបស់គណបក្សប្រជាជនកម្ពុជា នៅថ្ងៃទី២៣ ខែវិច្ឆិកា ឆ្នាំ២០២៣ បានឲ្យដឹងថា នៅក្នុងជំនួបជាមួយលោក ហ៊ុន សែន អនុប្រធានសភាចិន បានឲ្យដឹងថា ទស្សនកិច្ចរបស់លោកស្រីនៅកម្ពុជា ជាការជំរុញបន្ថែមទៀតនូវការអនុវត្តកិច្ចសហប្រតិបត្តិការជាក់ស្តែងនៅក្នុងការកសាងសហគមន៍ជោគវាសនារួមកម្ពុជា-ចិន ដែលមានគុណភាពខ្ពស់ កម្រិតខ្ពស់ និងស្តង់ដារខ្ពស់នៅក្នុងយុគសម័យថ្មី។
ប្រភពដដែលបានឲ្យដឹងទៀតថា ប្រធានគណបក្សកាន់អំណាច និងអនុប្រធានសភាចិន បានបង្ហាញពីការប្ដេជ្ញាចិត្តបន្តគាំទ្រគ្នាទៅវិញទៅមក ដើម្បីរក្សាសន្តិភាព ស្ថិរភាព ការអភិវឌ្ឍ និងពង្រឹងនូវទំនាក់ទំនងរវាងប្រជាជន និងប្រជាជន ឲ្យកាន់តែស៊ីជម្រៅថែមទៀត។ ក្រៅពីនេះ ជំនួបនៃថ្នាក់ដឹកនាំជាន់ខ្ពស់នយោបាយប្រទេសទាំងពីរ បានរំលឹកក្នុងនាមមិត្តដែកថែបថា កិច្ចព្រមព្រៀងពាណិជ្ជកម្មសេរីកម្ពុជា-ចិន នៅតែបន្តដើរតួនាទីយ៉ាងសំខាន់ក្នុងការកសាងសហគមន៍ជោគវាសនារួម ការប្ដេជ្ញាបន្តបង្កើននូវសមិទ្ធផលផ្លែផ្កាជាក់ស្តែងលើ «ច្រករបៀងឧស្សាហកម្ម និងបច្ចេកវិទ្យា» និង «ច្រករបៀងមច្ឆា និងអង្ករ» ក្រោមកិច្ចសហប្រតិបត្តិការត្បូងពេជ្រ។
រដ្ឋាភិបាលតពូជថ្មីដែលមានអាយុ ៩០ថ្ងៃ លោក ហ៊ុន ម៉ាណែត បដិសេធថា រដ្ឋាភិបាលលោកមិនមែនជារដ្ឋាភិបាលដេកអេះពោះ ហើយដើរខ្ចីតែលុយបរទេសទេ ប៉ុន្តែជារដ្ឋាភិបាលដែលបានដាក់ចេញនូវគោលនយោបាយអភិវឌ្ឍន៍ និងសម្ពោធសមិទ្ធផលជាច្រើន ដើម្បីផ្តល់ផលប្រយោជន៍ឱ្យពលរដ្ឋ។
លោក ហ៊ុន ម៉ាណែត បានលើកឡើងក្នុងពិធីសម្ពោធកំណាត់ផ្លូវជាតិលេខ៥ ពីព្រែកក្តាម ដល់បាត់ដំបង នៅថ្ងៃទី២២ ខែវិច្ឆិកា ឆ្នាំ២០២៣ ថា រដ្ឋាភិបាលកម្ពុជាត្រូវការថវិកាច្រើនណាស់ដើម្បីយកទៅវិនិយោគលើវិស័យផ្សេងៗ រួមទាំងវិស័យហេដ្ឋារចនាសម្ព័ន្ធដែលជាសរសៃឈាមដ៏សំខាន់របស់ប្រទេសផងដែរ ដូច្នេះ បញ្ហានេះបានតម្រូវឲ្យរដ្ឋាភិបាលត្រូវតែខ្ចីលុយពីបរទេស ដើម្បីកសាងហេដ្ឋារចនាសម្ព័ន្ធចាំបាច់របស់ខ្លួន។
អតីតអ្នកទោសនយោបាយ និងជាមន្ត្រីជាន់ខ្ពស់អតីតគណបក្សសង្គ្រោះជាតិលោក មាជ សុវណ្ណារ៉ា បានប្រាប់សារព័ត៌មាន The Cambodia Daily កន្លងមកថា ចាប់ពីលោក ហ៊ុន ម៉ាណែត ឡើងកាន់តំណែងជានាយករដ្ឋមន្ត្រីអស់រយៈពេល ៣ខែមកនេះ លោកមិនទាន់ឃើញនាយករដ្ឋមន្ត្រីថ្មីនេះដាក់ចេញនូវផែនការអភិវឌ្ឍន៍ ដើម្បីស្ដារសេដ្ឋកិច្ចជាតិនៅឡើយទេ ក្រៅតែពីប្រើនយោបាយប្រជាភិថុតិដែលបន្សល់ពីឪពុករបស់គាត់នោះ។
លោក មាជ សុវណ្ណារ៉ា លើកឡើងថា បញ្ហាចំពោះមុខរបស់រដ្ឋាភិបាលថ្មីដែលត្រូវដោះស្រាយ គឺគ្មានអ្វីក្រៅពីស្ដារសេដ្ឋកិច្ចរបស់កម្ពុជាឱ្យល្អប្រសើរឡើងវិញទេ ដើម្បីជួយដល់ប្រជាពលរដ្ឋដែលកំពុងជំពាក់បំណុលធនាគារ ឱ្យពួកគាត់អាចស្ដារជីវភាពគ្រួសារឡើងវិញ ព្រោះថាមានពលរដ្ឋខ្លះដោយសារតែការជំពាក់បំណុលនេះ បានធ្វើឱ្យពួកគាត់បាត់បង់ និងខាតបង់នូវទ្រព្យសម្បត្តិយ៉ាងច្រើន ដូចជាការដែលគ្មានលទ្ធភាពបង់រំលស់ផ្ទះបន្តនៅតាមបុរីនានា ជាហេតុធ្វើឱ្យម្ចាស់បុរីរឹបអូសយកផ្ទះវិញ ជាដើម។
បន្ទាប់ពីឡើងធ្វើជានាយករដ្ឋមន្ត្រីកាលពីថ្ងៃទី២២ ខែសីហា ឆ្នាំ២០២៣ លោក ហ៊ុន ម៉ាណែត បានជួបលោកប្រធានាធិបតីចិន ស៊ី ជីនពីង ពីរលើកបន្តបន្ទាប់គ្នា។ នៅក្នុងជំនួបជាមួយនាយករដ្ឋមន្ត្រីថ្មីរបស់កម្ពុជា មេដឹកនាំកំពូលចិន តែងពោលពាក្យរឹតចំណង បង្កើន ពង្រីកកិច្ចសហប្រតិបត្តិការរវាងប្រទេសទាំងពីរ ដែលមានកម្រិតខ្ពស់រួចទៅហើយនោះ ឲ្យកាន់តែខ្ពស់បន្ថែមទៀត។ មេដឹកនាំចិន ក៏បានបង្ហាញនូវចំណុចជាវិជ្ជមាន ដែលប្រទេស និងប្រជាជនកម្ពុជាទទួលបាននូវអត្ថប្រយោជន៍ពីការចូលរួមជាមួយយុទ្ធសាស្ត្រ «ខ្សែក្រវាត់ និងផ្លូវ» របស់ចិន ខណៈដែលកម្ពុជាបន្តអះអាងតជំនាន់ពីការគាំទ្រឥតងាករេនូវនយោបាយចិនមួយ បើទោះណាជាប្រទេសនេះរងនូវការរិះគន់ពីលោកខាងលិចថាមានការលម្អៀងទៅរកចិន ក៏ដោយ៕