 ប្រកាសបើកគម្រោងថ្មីមួយឈ្មោះថា «USAID អភិរក្ស» មានរយៈពេល ៥ឆ្នាំ និងមានទឹកប្រាក់ ២៤លានដុល្លារ ដើម្បីគាំទ្រដល់ការអភិរក្សជីវចម្រុះ ការពារប្រព័ន្ធអេកូឡូស៊ីសំខាន់ៗ និងលើកកម្ពស់ជីវភាពរបស់សហគមន៍នៅជុំវិញតំបន់ការពារធម្មជាតិក្នុងខេត្តព្រះវិហារ កំពង់ធំ ស្ទឹងត្រែង និងខេត្តក្រចេះ។){kind=link}
ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID) ប្រកាសបើកគម្រោងថ្មីមួយឈ្មោះថា «USAID អភិរក្ស» មានរយៈពេល ៥ឆ្នាំ និងមានទឹកប្រាក់ ២៤លានដុល្លារ ដើម្បីគាំទ្រដល់ការអភិរក្សជីវចម្រុះ ការពារប្រព័ន្ធអេកូឡូស៊ីសំខាន់ៗ និងលើកកម្ពស់ជីវភាពរបស់សហគមន៍នៅជុំវិញតំបន់ការពារធម្មជាតិក្នុងខេត្តព្រះវិហារ កំពង់ធំ ស្ទឹងត្រែង និងខេត្តក្រចេះ។
យោងតាមសេចក្តីប្រកាសព័ត៌មានរបស់ USAID Cambodia គម្រោង «USAID អភិរក្ស» នឹងពង្រីកការគាំទ្ររបស់ខ្លួនទៅដល់សហគមន៍ដែលរស់នៅក្នុង និងជុំវិញតំបន់ការពារធម្មជាតិក្នុងខេត្តព្រះវិហារ កំពង់ធំ ស្ទឹងត្រែង និងខេត្តក្រចេះ។ ក្រៅពីនោះ គម្រោងក៏នឹងអនុវត្តគំនិតផ្ដួចផ្ដើមថ្មីៗសម្រាប់សហគមន៍ទាំងឡាយដែលរស់នៅជុំវិញបឹងទន្លេសាប និងតាមតំបន់ឆ្នេរនៃខេត្តកោះកុង និងខេត្តព្រះសីហនុ ផងដែរ។
គម្រោងនេះនឹងបង្កើតយុទ្ធនាការផ្លាស់ប្ដូរឥរិយាបថសង្គមនៅថ្នាក់ជាតិ ខេត្ត ស្រុក និងឃុំ ដែលផ្ដោតលើការប្រយុទ្ធប្រឆាំងការជួញដូរសត្វព្រៃខុសច្បាប់។ USAID ក៏ប្ដេជ្ញាពង្រីកការគាំទ្របន្តទៅលើគម្រោងហិរញ្ញប្បទានកាបូនព្រៃឈើដែលធ្លាប់បានទទួលជោគជ័យកន្លងមក តាមរយៈការគាំទ្រដល់កិច្ចខិតខំប្រឹងប្រែងក្នុងការអភិវឌ្ឍគម្រោងប៊្លូកាបូននៅក្នុងតំបន់ព្រៃលិចទឹក និងតំបន់ឆ្នេរកម្ពុជា។
លោកស្រី Kerry Pelzman នាយិកាបេសកកម្មនៃ USAID បានលើកឡើងនៅក្នុងសេចក្តីប្រកាសព័ត៌មានថា គម្រោង «USAID អភិរក្ស» បានឆ្លុះបញ្ចាំងអំពីការប្ដេជ្ញាចិត្តចំពោះការធ្វើមូលដ្ឋានីយកម្មនៃជំនួយអភិវឌ្ឍន៍របស់អាមេរិក។
តាមរយៈគម្រោងនេះ USAID នឹងផ្ដល់ការគាំទ្រដល់សហគមន៍ក្នុងការបង្កើតការងារក្នុងស្រុក ដោយផ្អែកលើការប្រើប្រាស់ធនធានធម្មជាតិប្រកបដោយនិរន្តរភាព និងការប្រើប្រាស់ទុនឯកជនដើម្បីវិនិយោគក្នុងដំណោះស្រាយរយៈពេលវែងចំពោះវិបត្តិអាកាសធាតុ។ តាមរយៈវិធីសាស្ត្រនេះ គម្រោង «USAID អភិរក្ស» នឹងផ្តល់ការគាំទ្រដល់ការប្ដេជ្ញាចិត្តរបស់រដ្ឋាភិបាលកម្ពុជាក្នុងការសម្រេចបាននូវអព្យាក្រឹតកាបូននៅឆ្នាំ២០៥០។
កាលពីថ្ងៃទី១៧ ខែមិថុនា ឆ្នាំ២០២១ ស្ថានទូតសហរដ្ឋអាមេរិកប្រចាំនៅកម្ពុជា បានចេញសេចក្តីថ្លែងការណ៍របស់ខ្លួនថា អាមេរិកបានធ្វើការចំណាយថវិកាចំនួនជាង ១០០លានដុល្លារលើកម្មវិធីមួយចំនួនសម្រាប់ប្រយុទ្ធប្រឆាំងនឹងការកាប់បំផ្លាញព្រៃឈើខុសច្បាប់នៅកម្ពុជា ប៉ុន្តែវាជារឿងគួរឲ្យស្តាយដែលស្ថានភាពកាន់តែអាក្រក់ទៅៗ ដែលពុំមានការថមថយនៃបទល្មើសព្រៃឈើខ្មែរទាល់តែសោះ។
ប្រភពដដែលរិះគន់ថា ការកាប់ឈើខុសច្បាប់នៅកម្ពុជា នៅតែបន្តកើតមាននៅក្នុងតំបន់ និងជុំវិញដែនជម្រកសត្វព្រៃព្រៃឡង់ ប៉ុន្តែអាជ្ញាធរកម្ពុជាមិនបានធ្វើការកាត់ទោស ឬចាត់វិធានការច្បាប់ចំពោះឈ្មួញទុច្ចរិតដែលបានប្រព្រឹត្តបទល្មើសលើសត្វព្រៃ ឬបញ្ឈប់សកម្មភាពខុសច្បាប់ក្នុងតំបន់អភិរក្សព្រៃឡង់នោះឡើយ។
ស្ថានទូតសហរដ្ឋអាមេរិក អះអាងទៀតថា អាជ្ញាធរមិនមានវិធានការណាមួយជាក់លាក់លើបទល្មើសកាប់បំផ្លាញព្រៃឈើនោះទេ តែពួកគេបែរជាព្យាយាមបំបិទសំឡេងសកម្មជនបរិស្ថាន ហើយធ្វើទុក្ខបុកម្នេញសហគមន៍មូលដ្ឋាន និងសង្គមស៊ីវិលដែលជាដៃគូរបស់ខ្លួន ស្របពេលពួកគេបានបង្ហាញពីកង្វល់ដ៏សមហេតុផលលើការបាត់បង់ធនធានធម្មជាតិរបស់កម្ពុជាទៅវិញ។
សហរដ្ឋអាមេរិកបានចំណាយថវិកាអស់រាប់សិបលានដុល្លារលើកម្មវិធីមួយចំនួនសម្រាប់ប្រយុទ្ធប្រឆាំងនឹងបទល្មើសព្រៃឈើនៅកម្ពុជា តាមរយៈទីភ្នាក់ងារជំនួយអាមេរិក USAID អស់រយៈពេលជាច្រើនឆ្នាំកន្លងមកនេះ តែមិនមានប្រសិទ្ធភាពណាមួយនៃវិធានការអាជ្ញាធរកម្ពុជាលើបទល្មើសព្រៃឈើទាំងនោះនៅឡើយទេ។ សហរដ្ឋអាមេរិកបានប្រកាសសម្រេចបញ្ចប់ជំនួយចំពោះរដ្ឋាភិបាលកម្ពុជាលើគម្រោងព្រៃឡង់បៃតង បន្ទាប់ពីបទល្មើសព្រៃឈើទាំងនោះនៅតែបន្តកើតមានឥតឈប់ឈរ ខណៈអាជ្ញាធរកម្ពុជាក៏មិនមានផែនការជាក់លាក់ក្នុងការបង្ក្រាបបទល្មើសទាំងនោះដែរ។
របាយការណ៍ទីភ្នាក់ងារសហរដ្ឋអាមេរិក បង្ហាញថា តាំងពីឆ្នាំ២០១៦ មក ទោះបីជាមានការគាំទ្ររបស់ទីភ្នាក់ងារជំនួយអាមេរិក USAID ដើម្បីឲ្យមានការដើរល្បាត ការបណ្តុះបណ្តាលផ្នែកអនុវត្តច្បាប់ និងការរៀបចំបង្កើតប្រព័ន្ធគ្រប់គ្រងតំបន់ការពារថ្នាក់ជាតិក៏ដោយ ក៏តំបន់ដែនជម្រកសត្វព្រៃព្រៃឡង់នៅតែបាត់បង់ដដែលលើព្រៃឈើប្រមាណ ៣ម៉ឺន ៨ពាន់ហិកតារ ដែលជាគម្របព្រៃឈើនៅទីនោះ៕