ប្រធានាធិបតីចិនលោក Xi Jinping ដែលបានធ្វើដំណើរទស្សនៈទៅជួបមេដឹកនាំកំពូលនៃរដ្ឋាភិបាលកុម្មុយនីស្តវៀតណាម កាលពីថ្ងៃចន្ទដើមសប្តាហ៍នេះ គឺជាទស្សនកិច្ចផ្លូវរដ្ឋលើកទី២ ហើយចាប់តាំងពីទស្សនកិច្ចលើកដំបូងរបស់លោកក្នុងឆ្នាំ២០១៧ មក។
ដំណើរទស្សនកិច្ចពីរលើកដែលធ្វើឡើងក្នុងរយៈពេល ៦ឆ្នាំមកនេះ តែងមានគោលដៅពីរធំៗនៅពីក្រោយ គឺការពង្រឹងឥទ្ធិពលនៃភូមិសាស្ត្រនយោបាយផង និងកិច្ចសហការទ្វេភាគីផងដែរ ព្រោះថា ប្រទេសកុម្មុយនីស្តទាំងពីរនេះ ពិតមែនតែមានព្រំដែនជាប់គ្នា ប៉ុន្តែពួកគេមិនមានប្រវត្តិរួមរស់ជាមួយគ្នាដោយសន្តិភាពរឹងមាំនោះទេតាំងពីដើមរៀងមក។
ទស្សនកិច្ចរបស់លោក ស៊ី ជីនពីង ទៅកាន់ទីក្រុងហាណូយ ធ្វើឡើងកាលពីថ្ងៃអង្គារ ទី១២ ធ្នូ នេះ គឺមានរយៈពេលត្រឹមតែ ៣ខែប៉ុណ្ណោះបន្ទាប់ពីដំណើរទស្សនកិច្ចរបស់ប្រធានាធិបតីសហរដ្ឋអាមេរិក លោក ចូ បៃដិន ទៅកាន់ប្រទេសសង្គមនិយមមួយនេះ ក្នុងគោលដៅពង្រឹងឥទ្ធិពលសហរដ្ឋអាមេរិកក្នុងភូមិសាស្ត្រតំបន់អាស៊ីអាគ្នេយ៍ផងដែរនោះ។
ក្នុងដំណើរទស្សនកិច្ចនេះ លោក ស៊ី ជីនពីង បានជួបជាមួយមេដឹកនាំវៀតណាមកំពូលៗមួយចំនួន ដូចជា អគ្គលេខាបក្សកុម្មុយនីស្តវៀតណាមលោក Nguyen Phu Trong ប្រធានាធិបតីវៀតណាម លោក Vo Van Thuong និងនាយករដ្ឋមន្ត្រីវៀតណាមលោក Pham Minh Chinh ទៀតផង ខណៈលោក ចូ បៃដិន ដែលបានទៅធ្វើទស្សនកិច្ចនៅប្រទេសវៀតណាម កាលពីខែកញ្ញា កន្លងទៅនោះ ក៏បានជួបជាមួយមេដឹកនាំវៀតណាម ទាំងបីរូបនេះផងដែរ។
ពេលឈានជើងជាន់ទឹកដីវៀតណាមភ្លាម លោក ស៊ី ជីនពីង បាននិយាយនៅពេលលោកធ្វើដំណើរចុះពីលើយន្តហោះថា វត្តមានរបស់លោក គឺដើម្បីលើកទឹកចិត្តបន្ថែមទៀតក្នុងការពង្រឹងកិច្ចសហប្រតិបត្តិការជាយុទ្ធសាស្ត្រទ្វេភាគី បញ្ហាតំបន់ និងបញ្ហាសកលដែលនឹងធ្វើឱ្យប្រទេសទាំងពីរដើរដល់ដំណាក់កាលថ្មីមួយ។ នេះបើតាមប្រព័ន្ធផ្សព្វផ្សាយរបស់ចិន ដែលបានចេញផ្សាយជុំវិញដំណើរទស្សនកិច្ចនេះ។
ទស្សនកិច្ចលើកទីពីររបស់លោក ស៊ី ជីនពីង នេះ មានកិច្ចព្រមព្រៀងចំនួន ៣៧ ត្រូវបានចុះហត្ថលេខា ដែលក្នុងនោះមានទាំងការស្ថាបនាផ្លូវរថភ្លើងឆ្លងកាត់ព្រំដែន និងពាណិជ្ជកម្មផងដែរ។ លើសពីនេះ ប្រទេសទាំងពីរក៏បានព្រមព្រៀងល្បាតសមុទ្ររួមគ្នាថែមទៀតនៅឈូងសមុទ្រតុងកឹង ដែលមេដឹកនាំចិនរូបនេះបានហៅទំនាក់ទំនងចិន-វៀតណាម ថាជាទំនាក់ទំនងដូចជាដើមឫស្សី ដែលបណ្ដុះទំពាំងដូច្នោះដែរ។
អ្នកនាំពាក្យក្រសួងការបរទេសចិនលោក Wang Wenbin បាននិយាយថា ទស្សនកិច្ចរបស់លោក ស៊ី ជីនពីង បាននាំមកនូវការបន្ថែមសាមគ្គីភាពមិត្តភាពកាន់តែរឹងមាំថែមទៀត ដែលសំដៅដល់ការពង្រឹងកិច្ចសហប្រតិបត្តិការកាន់តែស៊ីជម្រៅរវាងចិន និងវៀតណាមទៅថ្ងៃមុខ។
អំឡុងដំណើរទស្សនកិច្ចផ្លូវរដ្ឋរយៈពេល ២ថ្ងៃនេះ ត្រូវគេមើលឃើញថា ក្រុងប៉េកាំងព្យាយាមទាក់ទាញក្រុងហាណូយ សំដៅកាត់បន្ថយការកើនឡើងឥទ្ធិពលសហរដ្ឋអាមេរិកក្នុងប្រទេសវៀតណាម ផង និងក្នុងតំបន់ផងដែរ។
វៀតណាមត្រូវបានគេមើលឃើញថាកំពុងតែមានទំនោរកាន់តែងាកទៅរកប្រទេសលោកខាងលិច ជាពិសេសសហរដ្ឋអាមេរិកតែម្តង ដោយសារតែវៀតណាម មានការព្រួយបារម្ភពីមហិច្ឆតារបស់ចិន លើដែនសមុទ្រចិនខាងត្បូងសព្វថ្ងៃនេះ។
លោក Zachary Abuza ជាអ្នកជំនាញម្នាក់ខាងកិច្ចការអាស៊ីមកពីសាកលវិទ្យាល័យ National War College ក្នុងទីក្រុងវ៉ាស៊ីនតោន បាននិយាយថា ចិននៅតែជាប្រទេសដែលគំរាមកំហែងដល់រដ្ឋាភិបាលវៀតណាម ករណីជម្លោះនៅសមុទ្រចិនខាងត្បូង ប៉ុន្តែចិនវិញនៅតែចង់ឱ្យវៀតណាម ងាកចេញពីអាមេរិក ដោយព្យាយាមពន្យល់ថា ចិន និងវៀតណាម មានប្រព័ន្ធដឹកនាំរដ្ឋដូចគ្នាដែលអាចធ្វើឱ្យប្រទេសទាំងពីរមានទំនាក់ទំនងជិតស្និទ្ធនឹងគ្នាដែលអាចរស់នៅជាមួយគ្នាបានជារៀងរហូត។
លោក Le The My អតីតប្រធាននាយកដ្ឋានគោលនយោបាយការបរទេសនៃវិទ្យាស្ថានសិក្សាអំពីចិន ក្នុងទីក្រុងហាណូយ បាននិយាយថា តាមរយៈដំណើរទស្សនកិច្ចរបស់លោក ស៊ី ជីនពីង ចិនពិតជាចង់ប្រាប់មេដឹកនាំវៀតណាម ថា ចិននឹងមិនបោះបង់ចោល ឬដើរចេញពីវៀតណាមនោះទេ ហើយចិនក៏ចង់រក្សាទំនាក់ទំនងល្អជាមួយវៀតណាម ដែរ ដរាបណាវៀតណាមនៅតែរក្សាបានតុល្យការនៃកិច្ចសហការទ្វេភាគីកាន់តែរឹងមាំ។
ប្រទេសនៅក្នុងតំបន់អាស៊ីអាគ្នេយ៍ដែលមានជម្លោះជាមួយចិនករណីសមុទ្រចិនខាងត្បូង មានវៀតណាម ហ្វីលីពីន ម៉ាឡេស៊ី ឥណ្ឌូនេស៊ី និងប្រ៊ុយណេ។ ប្រទេស៥នេះ រួមទាំងឥណ្ឌា និងកោះតៃវ៉ាន់ កំពុងតែប្រឆាំងចិនដែលបានគូសផែនទីថ្មីមួយដែលហៅថាផែនទី ៩ឆ្នូតនៃសមុទ្រចិនខាងត្បូង ដោយចោទក្រុងប៉េកាំង ថាព្យាយាមរំលោភដែនទឹករបស់ប្រទេសទាំង ៧ នេះ ហើយបានទាមទារឱ្យចិន បោះបង់ចោលផែនទីនេះ ដោយតម្រូវឱ្យចិនគោរពច្បាប់សមុទ្រអន្តរជាតិឆ្នាំ១៩៨២ UNCLOS។
ចំណែកសហរដ្ឋអាមេរិក បានហៅសមុទ្រចិនខាងត្បូងថាជាតំបន់ផ្លូវនាវាចរអន្តរជាតិ ដែលប្រទេសចិនពុំមានសិទ្ធិកាន់កាប់ផ្ដាច់មុខឡើយ។ ភាពតានតឹងនៅតំបន់សមុទ្រចិនខាងត្បូង បានកើនឡើងគួរឱ្យកត់សម្គាល់ក្នុងរយៈពេលប៉ុន្មានឆ្នាំចុងក្រោយនេះ ជាពិសេសរវាងចិន និងហ្វីលីពីន រួមទាំងចិន និងវៀតណាម ផងដែរ។
ទស្សនកិច្ចរបស់លោក ស៊ី ជីនពីង ទៅវៀតណាមលើកទីពីរនេះ ពិតណាស់ក្រុងប៉េកាំងមិនចង់ឱ្យវៀតណាមកាន់តែដើរទៅរកសហរដ្ឋអាមេរិក ដែលនៅក្រៅតំបន់នោះទេ ប៉ុន្តែទង្វើរបស់ចិនដែលចេះតែបំពានដែនទឹកវៀតណាម និងប្រទេសជិតខាង ទំនងជាក្រុងប៉េកាំងក៏មិនអាចចាប់យកភូមិសាស្ត្រនយោបាយផ្ដាច់មុខពីសហរដ្ឋអាមេរិកបានដែរ៕