របាយការណ៍របស់ភ្នាក់ងារចារកម្មសហរដ្ឋអាមេរិក ដែលបានបញ្ជូនទៅកាន់សមាជិកសភា បានឱ្យដឹងថា ក្នុងសង្គ្រាមចាប់ពីថ្ងៃទី២៤ ខែកុម្ភៈ ឆ្នាំ២០២២ ដល់ខែវិច្ឆិកា ឆ្នាំ២០២៣ ទ័ពរបស់រុស្ស៊ីបាត់បង់ប្រមាណ ៨៧% ហើយសុទ្ធសឹងតែជាទ័ពប្រយុទ្ធ ក្នុងនោះបើគិតជាតួលេខមានចំនួន ៣សែន ១ម៉ឺន ៥ពាន់នាក់។
របាយការណ៍របស់ទីភ្នាក់ងារចារកម្មរបស់សហរដ្ឋអាមេរិក បានលម្អិតទៀតថា បើនិយាយពីតួលេខដែលលើសពីនេះទៅទៀត គឺកងទ័ពរុស្ស៊ីមាននៅលើសមរភូមិជាក់ស្ដែងមានចំនួន ៣សែន ៦ម៉ឺននាក់។ ប៉ុន្តែការបាត់បង់ទ័ពរហូតដល់ចំនួន ៣សែន ១ម៉ឺន ៥ពាន់នាក់នេះ គឺជាតួលេខដែលបង្ហាញអំពីទ័ពប្រយុទ្ធរបស់រុស្ស៊ី ដែលត្រូវដឹកយកទៅសមរភូមិនៅលើទឹកដីអ៊ុយក្រែន ហើយពួកគេភាគច្រើនបានស្លាប់បាត់បង់ជីវិតនៅលើសមរភូមិផ្ទាល់តែម្ដង។ ក្នុងចំនួននេះ មួយភាគធំទៀតនោះ ពួកគេក្លាយជាជនពិការ ខណៈខ្លះទៀតបានបាត់ខ្លួន។
បណ្ដាញទូរទស្សន៍ CNN បានចុះផ្សាយកាលពីថ្ងៃទី១៣ ខែធ្នូ ឱ្យដឹងថា បើនិយាយពីរថក្រោះធុនធ្ងន់ គឺរុស្ស៊ីបាត់បង់ប្រមាណជា ២២០០គ្រឿងក្នុងចំណោមសព្វាវុធធុនធ្ងន់ដែលរុស្ស៊ីអូសយកទៅធ្វើសង្គ្រាមនៅលើទឹកដីអ៊ុយក្រែន ចំនួន ៣៥០០គ្រឿង។ ចំណែករថពាសដែកវិញ រុស្ស៊ីបាត់បង់ចំនួន ៤៤០០គ្រឿង ស្របពេលដែលរុស្ស៊ីនៅសល់អាវុធប្រភេទនេះចំនួន ១៣០០គ្រឿងទៀតប៉ុណ្ណោះ។
តួលេខនេះបើគិតជាភាគរយ គឺរុស្ស៊ីបានបាត់បង់អាវុធទ្រទ្រង់ទ័ពថ្មើរជើងចំនួន ៣២%។
បណ្ដាញផ្សាយព័ត៌មាន CNN បានចុះផ្សាយទៀតថា រុស្ស៊ីមានទ័ពបម្រុង និងទ័ពប្រយុទ្ធនៅមុនសង្គ្រាមផ្ទុះឡើងមានមានចំនួន ៩សែននាក់ ប៉ុន្តែក្នុងចំនួននេះ ទ័ពប្រយុទ្ធរបស់រុស្ស៊ីមានប្រមាណជា ៤សែននាក់ប៉ុណ្ណោះ។
លោក វ៉្លាឌីមៀរ ពូទីន ប្រធានាធិបតីរុស្ស៊ី បាននិយាយកាលពីពេលថ្មីៗនេះថា រុស្ស៊ីមានទ័ពកំពុងប្រយុទ្ធនៅលើទឹកដីអ៊ុយក្រែន ជាង ៧សែន ៥ម៉ឺននាក់។ រុស្ស៊ីមានផែនការពង្រីកទ័ពបម្រុងរបស់ខ្លួនរហូតដល់ទៅ ១លាន ៥សែននាក់។
យ៉ាងណា បើនិយាយពីតួលេខដែលចេញផ្សាយដោយក្រសួងការពារជាតិអ៊ុយក្រែន ឯណោះវិញ រុស្ស៊ីបាត់បង់ទ័ពគិតមកដល់ថ្ងៃទី១៣ ខែធ្នូ នេះ គឺមានចំនួនជាង ៣សែន ៤ម៉ឺននាក់ រថក្រោះធុនធ្ងន់ជិត ៥៦៦០គ្រឿង រថពាសដែកជាង ១០៥០០គ្រឿង (១០៥៦០គ្រឿង) រថយន្តដឹកភស្តុភារជាង ១ម៉ឺនគ្រឿង (១០៦៤០គ្រឿង) កាំភ្លើងធំជាង ៨ពាន់គ្រឿង (៨០៧០គ្រឿង) កាំភ្លើងរ៉ុក្កែតជិត ១ពាន់គ្រឿង (៩១៩គ្រឿង) ប្រព័ន្ធមីស៊ីលការពារដែនអាកាសជាង ៦០០គ្រឿង (៦០៥គ្រឿង) យន្តហោះចម្បាំងជាង ៣០០គ្រឿង (៣២៤គ្រឿង) ឧទ្ធម្ភាគចក្រជាង ៣០០គ្រឿង (៣២៤គ្រឿង) បាញ់ទម្លាក់ដ្រូនជាង ៦ពាន់គ្រឿង (៦១៥៤គ្រឿង) បាញ់កម្ទេចនាវាចម្បាំងតូចធំចំនួន ២២គ្រឿង និងនាវាមុជទឹកមួយគ្រឿង។
តែយ៉ាងណា សារព័ត៌មាន THE KYIV INDEPENDECE របស់អ៊ុយក្រែន មិនបានធ្វើការផ្ទៀងផ្ទាត់ទៅក្រសួងការពារជាតិរុស្ស៊ីនោះទេ។
ជាមួយគ្នានេះ ប្រធានាធិបតីអ៊ុយក្រែន វូឡូឌីមៀរ ហ្សេឡេនស្គី បានបញ្ជាក់នៅតាមបណ្ដាញសង្គមតេឡេក្រាមថា អ៊ុយក្រែនមានទ័ពកំពុងតែប្រយុទ្ធនៅលើសមរភូមិមានចំនួនជិត ៦សែននាក់។ លោក ហ្សេឡេនស្គី អះអាងថា យុទ្ធជនរបស់លោកទាំងឧត្តមសេនីយ៍ដឹកនាំការប្រយុទ្ធផងដែរ ពួកគេកំពុងតែប្រយុទ្ធយ៉ាងក្លាហាននៅលើសមរភូមិភាគខាងកើត ភាគខាងត្បូង និងភាគឥសានប្រទេស។
លោក ហ្សេឡេនស្គី បញ្ជាក់ថា ចំនួនកងទ័ពរបស់អ៊ុយក្រែន ជិត ៦០សែននាក់នេះ សុទ្ធសឹងតែជាទ័ពប្រយុទ្ធ ហើយអ៊ុយក្រែន មានទ័ពបម្រុងប្រមាណ ៧សែននាក់ផ្សេងទៀត។ យ៉ាងណា តួលេខនៃចំនួនទ័ពរបស់អ៊ុយក្រែនដូចនេះ គឺលោក ហ្សេឡេនស្គី ទំនងចង់ប្រាប់ទៅពួកបស្ចិមប្រទេស និងសហរដ្ឋអាមេរិកថា អ៊ុយក្រែនពិតជាមានលទ្ធភាពក្នុងការធ្វើសង្គ្រាមជាមួយនឹងរុស្ស៊ីរាប់សិបខែទៅមុខទៀត ឱ្យតែអ៊ុយក្រែន នៅតែទទួលបានការផ្ដល់អាវុធ និងជំនួយផ្សេងៗពីពួកបស្ចិមប្រទេស និងសហរដ្ឋអាមេរិក។
លោក ហ្សេឡេនស្គី ដែលធ្វើដំណើរទៅជួបលោក ចូ បៃដិន ប្រធានាធិបតីអាមេរិកជាថ្មីម្ដងទៀតនៅសេតវិមាន បើទោះជាធ្វើឡើងតាមការអញ្ជើញរបស់លោក ចូ បៃដិន ក៏ដោយ តាមមើលទៅវីរជនសង្គ្រាមរបស់អ៊ុយក្រែនរូបនេះ កំពុងតែទទូចឲ្យសហរដ្ឋអាមេរិក ជាពិសេសគឺសមាជិកសភាគណបក្សសាធារណរដ្ឋ បន្ថែមជំនួយមកឱ្យអ៊ុយក្រែន បន្តទៀត។
លោក ចូ បៃដិន និងរដ្ឋការរបស់លោក បានធ្វើសេចក្ដីព្រាងកញ្ចប់ជំនួយសម្រាប់ប្រទេសអ៊ុយក្រែន គឺសម្រាប់ឆ្នាំ២០២៤ ក្នុងទំហំសាច់ប្រាក់ជាង ៦០ពាន់លានដុល្លារអាមេរិក ក្នុងទំហំសាច់ប្រាក់សរុបចំនួន ១១០ពាន់លានដុល្លារ ដែលក្នុងនោះមួយផ្នែកធំជាជំនួយសម្រាប់ប្រទេសអ៊ីស្រាអែល។
ប៉ុន្តែគម្រោងជំនួយរបស់រដ្ឋការលោក បៃដិន ត្រូវបានព្រឹទ្ធសភាគណបក្សសាធារណរដ្ឋផ្អឹបទុក ព្រោះតែសមាជិកសភាគណបក្សសាធារណរដ្ឋទាមទារឱ្យរដ្ឋការរបស់លោក ចូ បៃដិន កាត់បន្ថយជំនួយទៅឱ្យអ៊ុយក្រែន ទាំងជំនួយសាច់ប្រាក់សុទ្ធ និងជំនួយយោធា ដែលថាជំនួយកន្លងមកបានប៉ះពាល់ដល់វិស័យសេដ្ឋកិច្ច និងសន្តិសុខរបស់សហរដ្ឋអាមេរិក។
ប៉ុន្តែទស្សនកិច្ចរបស់លោក ហ្សេឡេនស្គី ទៅកាន់សហរដ្ឋអាមេរិកលើកនេះ គឺលោកបានជួបលោក ចូ បៃដិន ហើយក៏បានជួបនឹងមេដឹកនាំកំពូលៗនៃរដ្ឋសភា និងព្រឹទ្ធសភាផងដែរ ជាពិសេសមេដឹកនាំសភាមកពីគណបក្សសាធារណរដ្ឋ។ លោក ហ្សេឡេនស្គី ព្យាយាមពន្យល់ និងលើកហេតុផលអំពីសេចក្ដីត្រូវការចាំបាច់របស់រដ្ឋាភិបាលអ៊ុយក្រែន ក្នុងការប្រើប្រាស់ជំនួយ និងអាវុធទាំងនោះដើម្បីធ្វើសង្គ្រាមប្រឆាំងនឹងការឈ្លានពានរបស់រុស្ស៊ី។
លោក ហ្សេឡេនស្គី បានថ្លែងទៅកាន់វេទិកាមួយនៅសហរដ្ឋអាមេរិកថា បើអាមេរិកផ្អាកជំនួយ ឬក៏កាត់បន្ថយជំនួយសម្រាប់អ៊ុយក្រែន ក្នុងកាលៈទេសៈនេះ គឺមានតែហុចកាដូទៅឱ្យលោក ពូទីន ហើយអ៊ុយក្រែន អាចនឹងចាញ់សង្គ្រាម។
លោកបន្តថា បើរុស្ស៊ីឈ្នះសង្គ្រាមមានន័យថា រុស្ស៊ីអាចឈ្លានពានប្រទេសនៅអឺរ៉ុបផ្សេងទៀត ហើយអាចប៉ះពាល់ខ្លាំងដល់អំណាចរបស់សហរដ្ឋអាមេរិកដែលជាប្រទេសមហាអំណាចធំជាងគេក្នុងការជួយការពារយុត្តិធម៌ និងសន្តិភាពសម្រាប់ប្រទេសទន់ខ្សោយ៕