ពលករខ្មែរដែលកំពុងរងនូវការរំលោភសិទ្ធិការងារក្នុងប្រទេសជប៉ុន អំពាវនាវឱ្យរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ជួយយកចិត្តទុកដាក់ការពារសិទ្ធិការងារពលករខ្មែរដែលកំពុងបម្រើការនៅប្រទេសជប៉ុន ក្នុងឈ្មោះជាសិក្ខាកាមសព្វថ្ងៃនេះ ដើម្បីកុំឱ្យពួកគេរងនូវការធ្វើបាបពីថៅកែរោងចក្របន្តទៀត។
ពលករខ្មែរជាច្រើននាក់ដែលកំពុងបម្រើការនៅប្រទេសជប៉ុន បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះនៅថ្ងៃទី១៥ ធ្នូ ថា ពលករខ្មែរដែលកំពុងបម្រើការក្នុងឈ្មោះជាសិក្ខាកាមសព្វថ្ងៃនេះ ភាគច្រើនបានរងនូវការរំលោភសិទ្ធិការងារពីថៅកែរោងចក្រក្នុងប្រទេសជប៉ុនធ្ងន់ធ្ងរ ខណៈក្រុមហ៊ុនដែលបានបញ្ជូនពួកគេមកធ្វើការតាមរោងចក្រក្នុងប្រទេសជប៉ុន កន្លងមកនោះ ក៏មិនបានជួយការពារសិទ្ធិការងាររបស់ពួកគេដែរ។
ពលកររងគ្រោះទាំងនោះ អះអាងថា រាល់ពេលដែលពួកគេស្នើឱ្យក្រុមហ៊ុនបញ្ជូនពលករជួយនិយាយឱ្យថៅកែរោងចក្របញ្ឈប់ការធ្វើបាបពួកគេ ឬស្នើសុំឱ្យក្រុមហ៊ុនជួយផ្លាស់ប្ដូរកន្លែងការងារថ្មី ខាងក្រុមហ៊ុនតែងតែគំរាមបញ្ជូនពួកគេត្រឡប់ទៅកម្ពុជាវិញ និងត្រូវចេញសំណងធ្ងន់ធ្ងរដល់ក្រុមហ៊ុនរបស់ពួកគេថែមទៀត។ ចំណែកពលករដែលរងនូវការគំរាមកំហែងបែបនេះ គឺមានតែទ្រាំធ្វើការទាំងវេទនាផ្លូវកាយ និងផ្លូវចិត្តប៉ុណ្ណោះ រហូតមានពលករខ្លះសុខចិត្តធ្វើអត្តឃាតក៏មានដែរកន្លងមកនោះ។
ក្រុមពលកររងគ្រោះទាំងនេះបញ្ជាក់ថា នៅពេលដែលពួកគេមិនអាចទ្រាំនឹងការធ្វើបាបរបស់ថៅកែរោងចក្របាន ពួកគេមានជម្រើសតែមួយគត់ គឺត្រូវរត់ចេញពីកន្លែងធ្វើការទៅរកកន្លែងការងារថ្មីដោយខ្លួនឯង ហើយការធ្វើបែបនេះ ធ្វើឱ្យពួកគេប្រឈមនឹងឧបសគ្គធ្ងន់ធ្ងរ ជាពិសេសគឺការផុតកំណត់វីសារ ដែលធ្វើឱ្យខ្លួនក្លាយជាពលករខុសច្បាប់តែម្តង ខណៈមន្ត្រីស្ថានទូតខ្មែរប្រចាំប្រទេសជប៉ុន ក៏មិនបានយកចិត្តទុកដាក់លើករណីទាំងនេះដែរ ទោះបីពួកគេធ្លាប់ទាក់ទងសុំឲ្យជួយពួកគេបែបណាក៏ដោយ។
កាលពីថ្ងៃទី១៤ ខែធ្នូ ឆ្នាំ២០២៣ លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានជួបពិភាក្សាការងារជាមួយលោក Muri Yoshiiro អភិបាលខេត្តមីយ៉ាហ្គី ប្រទេសជប៉ុន និងបានស្នើឱ្យលោក Muri Yoshiiro ជំរុញការផ្សព្វផ្សាយ និងជំរុញឱ្យសហគ្រាសនៅក្នុងខេត្តនេះជ្រើសរើសកម្មសិក្សាការី និងពលករជំនាញពីកម្ពុជាបន្ថែមទៀតផងដែរ។
លោក ហេង សួរ បានលើកឡើងនៅក្នុងជំនួបនោះថា ក្នុងនាមជារដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោករីករាយនឹងសហការជាមួយខេត្តមីយ៉ាហ្គី ក្នុងការបណ្តុះបណ្តាលជំនាញ ដើម្បីឲ្យចំតម្រូវការឧស្សាហកម្មរបស់ខេត្តបន្តទៀត ស្របពេលដែលខេត្តមីយ៉ាហ្គី នេះ មានកម្មសិក្សាការី និងពលករជំនាញរបស់កម្ពុជាត្រឹមតែជាង ១០០នាក់ (១០៩នាក់) ប៉ុណ្ណោះ ដែលកំពុងហាត់ការងារ និងបំពេញការងារសព្វថ្ងៃនេះ។
ទាក់ទិននឹងករណីនេះ សារព័ត៌មាន The Cambodia Daily បានរកឃើញថា មានពលករខ្មែរម្នាក់កំពុងសម្រាកព្យាបាលនៅមន្ទីរពេទ្យក្នុងប្រទេសជប៉ុន នៅពេលនេះ។ ជនរងគ្រោះដែលកំពុងស្នាក់នៅមន្ទីរពេទ្យរូបនោះ គឺជាពលករខ្មែរដែលបានទៅបម្រើការងារនៅប្រទេសជប៉ុន ក្នុងនាមជាសិក្ខាកាម ប៉ុន្តែក្រោយមក រូបគេត្រូវបានក្រុមហ៊ុនធ្វើបាបទាំងរូបរាងកាយ និងផ្លូវចិត្ត ហើយក៏សម្រេចរត់ចេញពីកន្លែងធ្វើការងារតែម្តង។
ក្រោយរត់ចេញពីកន្លែងការងារ រូបគេបានធ្វើការងារជាពលករខុសច្បាប់ ប៉ុន្តែដោយសារតែរងនូវសម្ពាធផ្លូវចិត្តធ្ងន់ធ្ងរ បានធ្វើឱ្យប៉ះពាល់ដល់សរសៃប្រសាទរហូតត្រូវបញ្ជូនទៅសម្រាកព្យាបាលនៅមន្ទីរពេទ្យតាំងអំឡុងខែកញ្ញា ឆ្នាំ២០២៣ មក ដែលរូបគេទើបមានសភាពធូរស្រាលកាលពីពេលថ្មីៗនេះ។
ក្រោយពីបានធូរស្រាលពីជំងឺ រូបគេក៏នៅប្រឈមនឹងបញ្ហាមួយកម្រិតទៀតដែលត្រូវបង់ថ្លៃព្យាបាលរាប់ម៉ឺនដុល្លារអាមេរិក ខណៈរូបគេគ្មានលុយសូម្បីមួយរៀល។ ចំណែកប្រពន្ធរបស់ជនរងគ្រោះរូបនេះ ក៏ត្រូវបានរដ្ឋាភិបាលជប៉ុន ចាប់បញ្ជូនឱ្យត្រឡប់ទៅប្រទេសកម្ពុជាវិញថែមទៀត បន្ទាប់ពីរូបគេបានផុតកំណត់វីសារ ក្រោយរត់ចេញពីកន្លែងការងារ ខណៈមន្ត្រីស្ថានទូតខ្មែរក៏ហាក់មិនខ្វល់ខ្វាយពីរឿងនេះដែរ ទោះមានការសុំអង្វរករឲ្យជួយពីពលរដ្ឋខ្មែរនៅទីនោះក៏ដោយ។
ជុំវិញបញ្ហានេះ មន្ត្រីជាន់ខ្ពស់ទទួលបន្ទុកផ្នែកការងារនៃអង្គការសង់ត្រាល់ លោក ឃុន ថារ៉ូ ធ្លាប់បានលើកឡើងកាលពីពេលថ្មីៗនេះថា បច្ចុប្បន្ននេះ ពលករខ្មែរខុសច្បាប់កំពុងមានការកើនឡើងជាបន្តបន្ទាប់ ដែលពួកគេកំពុងប្រឈមនឹងវិធានការច្បាប់ពីការរស់នៅដោយខុសច្បាប់យ៉ាងធ្ងន់ធ្ងរ។
លោក ឃុន ថារ៉ូ លើកឡើងថា បញ្ហានេះតម្រូវឱ្យរាជរដ្ឋាភិបាលកម្ពុជាធ្វើកំណែទម្រង់ជាបន្ទាន់ជុំវិញកិច្ចសន្យារវាងទីភ្នាក់ងារបញ្ជូនពលករ និងទីភ្នាក់ងារទទួលពលករនៅឯប្រទេសជប៉ុន ព្រោះថាសព្វថ្ងៃនេះ រដ្ឋាភិបាលជប៉ុនបានអនុម័តយកគោលនយោបាយអនុលោមទៅតាមយន្តការច្បាប់លើកកម្ពស់សិទ្ធិមនុស្ស និងសិទ្ធិពលករបរទេស ប៉ុន្តែវិធានការនេះមិនទាន់ត្រូវបានអនុវត្តពេញលេញនៅឡើយទេ ខណៈការកេងប្រវ័ញ្ចកម្លាំងពលកម្មពីសំណាក់ថៅកែក្រុមហ៊ុនលើពលករបរទេស បានបន្តកើតមានជាបន្តបន្ទាប់នាពេលកន្លងមក៕