រដ្ឋមន្ត្រីក្រសួងមហាផ្ទៃ លោក ស សុខា អះអាងថា កម្ពុជាសព្វថ្ងៃនេះកំពុងញាំញីដោយអំពើជួញដូរមនុស្សធ្ងន់ធ្ងរ ខណៈបញ្ហាគ្រឿងញៀនក៏បានក្លាយជាហានិភ័យដ៏ធំមួយទៀតដែរ ព្រោះក្រុមឧក្រិដ្ឋជនបានដើរមុនការអនុវត្តវិធានច្បាប់ក្នុងការទប់ស្កាត់របស់រដ្ឋាភិបាលបានមួយជំហានធំទៅហើយ។
រដ្ឋមន្ត្រីក្រសួងមហាផ្ទៃលោក ស សុខា លើកឡើងថា ក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៣ ក្នុងខេត្តបាត់ដំបង នៅថ្ងៃទី១៩ ខែធ្នូ ឆ្នាំ២០២៣ នេះថា ថ្វីត្បិតតែជនល្មើសប្រព្រឹត្តទង្វើឧក្រិដ្ឋនៅកម្ពុជា ប៉ុន្តែកម្រៃនៃអ្នកទទួលបាន មិនមែននៅកម្ពុជាទេ ចុងក្រោយគឺពួកគេបានផ្ទេរលុយទាំងនោះទៅប្រទេសប៉ែកខាងអឺរ៉ុបវិញទាំងអស់។
លោកបន្ថែមថា រដ្ឋាភិបាលនៅតែមិនអាចកំណត់ពីភាពជាក់លាក់ទៅលើក្រុមឧក្រិដ្ឋជនទាំងនោះបាននៅឡើយ ដោយសារតែពួកគេនៅទីងងឹត ខណៈរដ្ឋាភិបាលនៅទីភ្លឺ ស្របពេលដែលជនល្មើសទាំងនោះបានដើរមួយជំហានមុនរដ្ឋាភិបាលទៅហើយនោះ។
លោកបន្តថា ពួកគេបានធ្វើការលក់មនុស្សចាប់ពី ៥ឆ្នាំទៅ ១៥ឆ្នាំ ក្នុងមនុស្សម្នាក់ ជួនកាលពួកគេបានលក់មនុស្សម្នាក់នោះត្រឹមតែ ៤ឆ្នាំ ឬ ៥ឆ្នាំប៉ុណ្ណោះ ហើយក៏លក់បន្តទៅអ្នកដទៃទៀត ចំណែកអ្នកខ្លះទៀតត្រូវគេលក់រហូតដល់ទៅ ៤ ឬ ៥ដងឯណោះ។
លោក ស សុខា អះអាងថា ដោយសារតែបញ្ហានេះ រដ្ឋាភិបាលត្រូវតែទប់ស្កាត់គ្រប់ទម្រង់នៃការជួញដូរមនុស្ស ដោយការដាក់ទិសដៅផែនការយកចិត្តទុកដាក់ខ្ពស់លើការបង្ក្រាបបទល្មើសនានាឱ្យមានប្រសិទ្ធភាពថែមទៀត និងការបង្កើនសមត្ថភាពបំពេញតួនាទីរបស់កងកម្លាំងនគរបាល ប៉ុស្តិ៍រដ្ឋបាល និងចលនានានា ជាពិសេសប្រជាការពារតាមបណ្តាឃុំ-សង្កាត់ ដោយបន្តការគាំទ្រស្មារតី និងការលើកទឹកចិត្តឱ្យមានការចូលរួមទាំងអស់គ្នា ក្នុងគោលដៅភូមិ ឃុំ សង្កាត់ មានសុវត្ថិភាព។
រដ្ឋមន្ត្រីក្រសួងមហាផ្ទៃរូបនេះបញ្ជាក់ថា ក្រៅពីអំពើជួញដូរមនុស្ស បញ្ហាគ្រឿងញៀនក៏កំពុងញាំញីកម្ពុជាដែរ ដែលក្នុងរយៈពេលជាង ៣ខែចុងក្រោយនេះ សមត្ថកិច្ចបង្ក្រាបបានមិនត្រឹមតែរយគីឡូទេ គឺចូលដល់តោនឯណោះ ព្រោះថាកន្លងមក កម្ពុជាត្រូវបានប្រើប្រាស់ជាកន្លែងផលិតគ្រឿងញៀនយកទៅប្រទេសក្រៅផង ជាកន្លែងចរាចរសម្រាប់ឆ្លងកាត់ទៅប្រទេសទី៣ ផងដែរ ប៉ុន្តែពេលនេះ ក្រុមឧក្រិដ្ឋជនបាននាំគ្នាមកផលិតសម្រាប់ផ្គត់ផ្គង់ទីផ្សារនៅក្នុងប្រទេសកម្ពុជាតែម្តង។
កាលពីថ្ងៃទី១១ ខែធ្នូ ឆ្នាំ២០២២ សហរដ្ឋអាមេរិក ចក្រភពអង់គ្លេស និងកាណាដា បានកំណត់គោលដៅដាក់ទណ្ឌកម្មលើឧក្រិដ្ឋកម្មធំៗដែលកំពុងប្រតិបត្តិការឆបោកនៅតំបន់អាស៊ីអាគ្នេយ៍ ដែលគេរកមុខសញ្ញានៅក្នុងប្រទេសឡាវ កម្ពុជា និងមីយ៉ាន់ម៉ា សព្វថ្ងៃនេះ ដែលភាគច្រើនគេបានរកឃើញនៅទីក្រុងឆ្នេរសមុទ្រខេត្តព្រះសីហនុ និងក្រុងបាវិត ខេត្តស្វាយរៀង ជាប់ព្រំដែនប្រទេសវៀតណាម។
ទាក់ទិននឹងបញ្ហានេះ រដ្ឋមន្ត្រីការបរទេសអង់គ្លេស លោក David Cameron ព្រមានថា លោកនឹងមិនអត់ឱនឱ្យឧក្រិដ្ឋជន និងរបបដឹកនាំដែលធ្វើការគាបសង្កត់ ជាន់ឈ្លីលើសិទ្ធិ និងសេរីភាពជាមូលដ្ឋានរបស់មនុស្សសាមញ្ញនៅជុំវិញពិភពលោកជាដាច់ខាត សម្រាប់ការចូលរួមរបស់ពួកគេនៅក្នុងឧស្សាហកម្មបោកប្រាស់តាមអ៊ីនធឺណិតដ៏ធំដែលកំពុងប្រតិបត្តិការក្នុងប្រទេសឡាវ កម្ពុជា និងមីយ៉ាន់ម៉ា សព្វថ្ងៃនេះ។
ទាក់ទិននឹងបញ្ហានេះ មន្ត្រីជាន់ខ្ពស់ខាងអង្គភាពប្រយុទ្ធប្រឆាំងអំពើជួញដូរមនុស្ស ធ្លាប់បានទម្លាយប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះ ដើម្បីរក្សាសុវត្ថិភាពផ្ទាល់ខ្លួនកាលពីពេលថ្មីៗនេះថា ទីតាំងមួយកន្លែងដែលគ្រប់គ្រងដោយជនជាតិចិន ស្ថិតនៅផ្លូវ៤៩CC ភូមិដំណាក់ធំ សង្កាត់ស្ទឹងមានជ័យ ខណ្ឌពោធិ៍សែនជ័យ រាជធានីភ្នំពេញ កំពុងក្លាយជាទីតាំងប្រព្រឹត្តអំពើឆបោកតាមអនឡាញដ៏ធំបំផុតនៅកណ្តាលក្រុងភ្នំពេញយ៉ាងមានសុវត្ថិភាព។
ប្រភពខាងលើអះអាងថា ទីតាំងខាងលើនេះត្រូវបានប្រើប្រាស់ជាកន្លែងជួញដូរមនុស្សខុសច្បាប់ ដូចជា ជនជាតិខ្មែរ វៀតណាម ថៃ និងចិន ដែលត្រូវបានគេយកមកលក់ក្នុងតម្លៃចន្លោះពី ១ពាន់ដុល្លារអាមេរិក ទៅ ៥ពាន់ក្នុងដុល្លារអាមេរិកក្នុង ១នាក់ ដើម្បីយកមកប្រព្រឹត្តអំពើចាប់ជំរិត ឆបោកតាមប្រព័ន្ធអនឡាញនៅកម្ពុជា។
ប្រភពដដែលបញ្ជាក់ថា ទីតាំងខាងលើនេះបានដំណើរការជាង ១ឆ្នាំហើយ ដែលមានបុគ្គលិកធ្វើការប្រហែលជា ៦០០នាក់ ហើយបុគ្គលិកទាំងនោះមិនត្រូវបានអនុញ្ញាតឲ្យចេញមកខាងក្រៅទេ ប៉ុន្តែរាល់ការចេញចូលរបស់អ្នកគ្រប់គ្រងនៅទីតាំងនេះ គឺមានការប្រុងប្រយ័ត្នខ្ពស់ជាទីបំផុត។ ជាងនេះទៀត បុគ្គលិកដែលបម្រើការនៅទីនោះ តែងទទួលរងនូវទារុណកម្មធ្ងន់ធ្ងរ ប្រសិនបើពួកគេមិនអាចប្រើវិធីឆបោកតាមប្រព័ន្ធអនឡាញគ្រប់តាមផែនការកំណត់ទេនោះ។
ក្រសួងការបរទេសអាមេរិក កាលពីចុងឆ្នាំ២០២២ បានបញ្ចេញរបាយការណ៍របស់ខ្លួនស្ដីពីការជួញដូរមនុស្ស ដោយបានដាក់ប្រទេសកម្ពុជាចូលក្នុងបញ្ជីខ្មៅស្ថិតក្រោមការឃ្លាំមើលកម្រិត៣ (Tier 3 Watch List) ដែលបញ្ជាក់ថា កម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរនៅឡើយ៕