ពីរឆ្នាំជាប់គ្នាហើយ ការប្រារព្ធពិធីបុណ្យធំៗនៃពិភពលោករាប់ទាំងបុណ្យណូអែល ធ្វើឡើងក្រោមស្ថានភាពភ័យខ្លាច ឈឺចាប់ ព្រោះតែពិភពលោកគ្មានសន្តិភាព។
ក្រោយពីជំងឺកូវីដ-១៩ រាតត្បាតពិភពលោកក្នុងរយៈពេល ៣ឆ្នាំ ខណៈជំងឺនេះបិទបញ្ចប់វិញ ពិភពលោកក៏ជួបវិបត្តិធ្ងន់ធ្ងរមួយទៀត គឺសង្គ្រាមផ្ទុះនៅអ៊ុយក្រែន ជាសង្គ្រាមមហាអំណាចរុស្ស៊ី ឈ្លានពានប្រទេសជិតខាងរបស់ខ្លួន។
ឥឡូវនេះ សង្គ្រាមផ្ទុះនៅតំបន់មួយទៀត គឺនៅមជ្ឈិមបូព៌ា ជាសង្គ្រាមអ៊ីស្រាអែល សងសឹកទៅលើពួកហាម៉ាស-ប៉ាឡេស្ទីន ដែលបានលួចវាយប្រហារបាញ់គ្រាប់រ៉ុក្កែតយ៉ាងតិច ៥ពាន់គ្រាប់ចូលទៅទឹកដីអ៊ីស្រាអែល ហើយភ្លាមៗ សម្លាប់ប្រជាជនអ៊ីស្រាអែល ជាង ១៤០០នាក់។
នៅឆ្នាំនេះកាន់តែអាក្រក់ជាងឆ្នាំទៅមិញទៅទៀត បុណ្យធំៗរបស់ពិភពលោកស្ថិតក្នុងភាពក្រៀមក្រំ ជាពិសេសគឺបុណ្យណូអែល ឬបុណ្យគ្រិស្ដស្មាសឆ្នាំនេះ។ អឺរ៉ុបទាំងមូលបានប្រារព្ធពិធីបុណ្យនេះដោយការឈឺចាប់ ដោយសារតែសង្គ្រាមផ្ទុះពេញទំហឹងនៅអ៊ុយក្រែន។ ប្រទេសនៅអឺរ៉ុប ប្រារព្ធពិធីបុណ្យនេះឡើងនឹកឃើញដល់ភាពទុគ៌តនៃជនទាំងឡាយដែលកំពុងធ្លាក់ក្នុងវិបត្តិនៃសង្គ្រាមនៅអ៊ុយក្រែន និងនៅតំបន់ហ្កាហ្សា នៃដែនដីប៉ាឡេស្ទីន។
នៅសហរដ្ឋអាមេរិក ការប្រារព្ធបុណ្យគ្រិស្ដស្មាស ឬណូអែលនេះ ក៏ត្រូវបានធ្វើឡើងដើម្បីឧទ្ទិសដល់ពិភពលោកឱ្យមានសន្តិភាពឡើងវិញផងដែរ។ នៅបុរីវ៉ាទីកង់ ជាទីស្នាក់ការកណ្ដាលរបស់សាសនាគ្រិស្ដ បើទោះបីជាមានការប្រារព្ធពិធីបុណ្យប្រពៃណីនេះក្ដី ប៉ុន្តែសម្ដេចប៉ាប ហ្វ្រង់ស៊ីស ធ្វើសេចក្ដីថ្លែងការណ៍ក៏ទទូចឱ្យមានការផ្សះផ្សាជាតិជុំវិញជម្លោះសាសនាទាំងអស់ និងសូមឱ្យពិភពលោកមានសន្តិភាពឡើងវិញ។
ព្រះអង្គទទូចសុំឱ្យបិទបញ្ចប់សង្គ្រាមនៅហ្កាហ្សា និងអ៊ុយក្រែន។
ទីក្រុងយេរ៉ុយសាឡឹម នៃប្រទេសអ៊ីស្រាអែល ដែលជាទីកន្លែងកំណើតរបស់ព្រះយេស៊ូ ក៏កំពុងតែជាផ្នែកមួយស្ថិតក្នុងសង្គ្រាមនៅមជ្ឈិមបូព៌ាផងដែរ គឺសង្គ្រាមអ៊ីស្រាអែល វាយប្រហារសងសឹកទៅលើពួកហាម៉ាស-ប៉ាឡេស្ទីន។
ពិធីបុណ្យណូអែលប្រព្រឹត្តទៅនៅពេលដែលស្នូលគ្រាប់កាំភ្លើងនៅហ្កាហ្សាស្ទ្រីប នៅអ៊ុយក្រែន គឺយ៉ាងសន្ធោសន្ធៅបំផុត។ ការប្រយុទ្ធគ្នារវាងពួកហាម៉ាស-ប៉ាឡេស្ទីន និងអ៊ីស្រាអែល បណ្ដាលឱ្យប្រជាជនប៉ាឡេស្ទីន ស្លាប់មួយថ្ងៃមាន ១០០នាក់ក៏មានផងដែរ។
ចាប់តាំងពីសង្គ្រាមផ្ទុះឡើងថ្ងៃទី០៧ តុលា មកនោះ ប្រជាជនប៉ាឡេស្ទីន ស្លាប់ជាង ២ម៉ឺននាក់ របួសជាង ៦ម៉ឺននាក់ និងរត់ភៀសខ្លួនជាង ២លាននាក់ ដែលរត់ចេញពីសមរភូមិនៅហ្កាហ្សាស្ទ្រីប។
មកដល់ពេលនេះ តំបន់ហ្កាហ្សាស្ទ្រីប សឹងក្លាយជាផេះទៅហើយ ដោយសារតែការវាយប្រយុទ្ធគ្នារវាងកងទ័ពទាំងពីរនេះ។ អ្នកជំងឺគ្មានមន្ទីរពេទ្យព្យាបាលនោះទេ ហើយក៏ត្រូវស្លាប់ក្នុងមន្ទីរពេទ្យទៀតផង ដោយសារតែការវាយប្រហាររបស់កងទ័ពទាំងពីរក្រុមនេះ។ កុមាររាប់ពាន់នាក់ត្រូវបានសម្លាប់ ស្ត្រីក៏ត្រូវបានសម្លាប់។ នេះនិយាយចំពោះសង្គ្រាមអ៊ីស្រាអែល និងពួកហាម៉ាស។
ចំណែកសង្គ្រាមរុស្ស៊ី-អ៊ុយក្រែន ជាប្រទេសកាន់សាសនាគ្រិស្ដដូចគ្នានេះ កំពុងតែប្រយុទ្ធសម្លាប់គ្នាយ៉ាងសាហាវបំផុត។ ប្រជាជនអ៊ុយក្រែន ស្លាប់ជាច្រើននាក់រៀងរាល់ថ្ងៃ ខណៈជាង ១៤លាននាក់ក្លាយជាជនភៀសខ្លួន។ កុមាររាប់ម៉ឺននាក់បាត់បង់ឪពុកម្ដាយ និងត្រូវបានចាប់ពង្រត់។ ស្ត្រីមួយចំនួនដែលមានផ្ទៃពោះ សម្រាលកូននៅក្នុងសមរភូមិក៏មានផងដែរ។
សោកនាដកម្មទាំងនេះ បានញាំញីពិភពលោកឱ្យធ្លាក់ក្នុងការបែកបាក់ ស្អប់ខ្ពើម និងប្រកាន់ជាតិសាសន៍។ ជាមួយគ្នានេះ តំបន់មួយចំនួនកំពុងតែគំរាមកំហែង និងធ្វើដំណើរទៅរកសង្គ្រាមទៀតផង មានដូចជា នៅសមុទ្រចិនខាងត្បូង ឧបទ្វីបកូរ៉េ និងកោះតៃវ៉ាន់ ជាដើម។
ប្រទេសខ្លះរំលោភសិទ្ធិមនុស្សធ្ងន់ធ្ងរ ហើយឈានដល់ការសម្លាប់មនុស្សយ៉ាងរង្គាលទៀតផង។ សេរីភាពរបស់ប្រជាជនត្រូវបានរឹតត្បិត និងគាបសង្កត់។ ជនណាងើបឡើងការពារសេរីភាព ត្រូវបានបង្ក្រាបចាប់ដាក់គុក។
នៅតំបន់អាស៊ីអាគ្នេយ៍ក៏មានចម្បាំងរាំងជល់ផងដែរ គឺនៅប្រទេសភូមា ដែលកំពុងធ្លាក់នៅក្នុងរបបសឹក។ សង្គ្រាមស៊ីវិលផ្ទុះទូទាំងប្រទេស បណ្ដាលឱ្យស្លាប់ប្រជាជនរាប់ម៉ឺននាក់។ ជនភៀសខ្លួនជាង ២លាននាក់ដោយសារតែសង្គ្រាម។
របបសឹកភូមា ក៏ចាប់អ្នកនយោបាយប្រឆាំង អ្នកប្រជាធិបតេយ្យជាងមួយម៉ឺនប្រាំមួយពាន់នាក់ ចាប់ឃុំខ្លួនក្នុងពន្ធនាគារ ដោយធ្វើទារុណកម្មយ៉ាងសាហាវទៀតផង។ និយាយទៅ ការប្រារព្ធពិធីបុណ្យធំៗរបស់ពិភពលោកដូចជាបុណ្យចូលឆ្នាំសកល បុណ្យណូអែល ជាដើមនេះ ធ្វើឡើងក្នុងស្ថានភាពតក់ស្លុត និងឈឺចាប់បំផុត។
បើស្ថានភាពនេះនៅបន្តទៅមុខទៀត ហើយពិភពលោកអាចផ្ទុះសង្គ្រាមនៅតំបន់ណាផ្សេងទៀត គឺពិភពលោកគ្មានទេសន្តិភាពរឹងមាំសម្រាប់មនុស្សជាតិ សម្រាប់កុមារ និងស្ត្រី៕