នៅថ្ងៃទី១៣ ខែមករា ឆ្នាំ២០២៤ ខាងមុខនេះ ប្រជាជនតៃវ៉ាន់ ដែលមានសិទ្ធិបោះឆ្នោត ១៩លាន ៥សែននាក់ក្នុងចំនួនសរុបជិត ២៤លាននាក់ ដែលនឹងត្រូវទម្លាក់សន្លឹកឆ្នោតរបស់ពួកគេដើម្បីជ្រើសរើសប្រធានាធិបតីថ្មី និងអនុប្រធានាធិបតី រួមទាំងការបោះឆ្នោតសមាជិកសភាផងដែរ។
ស្ថានីយបោះឆ្នោតនឹងត្រូវបើកទ្វារចាប់ពីម៉ោង ៨ព្រឹករហូតដល់ ៤រសៀល ហើយលទ្ធផលនឹងត្រូវចេញផ្សាយបណ្ដើរៗចាប់ពីយប់ថ្ងៃបោះឆ្នោត គឺចាប់ពីម៉ោង ៨យប់។ គេរំពឹងថា រយៈពេល ៣ម៉ោងប៉ុណ្ណោះក្រោយការបោះឆ្នោតបិទបញ្ចប់ គេនឹងអាចដឹងថាបេក្ខជនណា មកពីបក្សណា ជាបេក្ខជនឈ្នះឆ្នោត។
តាមទម្លាប់ ប្រធានាធិបតីថ្មីរបស់តៃវ៉ាន់ នឹងត្រូវស្បថចូលកាន់តំណែងក្រោយការបោះឆ្នោត គឺរៀងរាល់ថ្ងៃទី២០ ខែឧសភា ប៉ុន្តែការបោះឆ្នោតប្រធានាធិបតីសម្រាប់ដែនដីកោះតៃវ៉ាន់លើកនេះ មានបេក្ខជនប្រធានាធិបតីដល់ទៅ ៣រូប ដែលអាណត្តិមុនៗមានតែ ២រូបប៉ុណ្ណោះ។
លោក Lai Ching-te ជាបេក្ខជនប្រធានាធិបតីតៃវ៉ាន់ មកពីគណបក្សប្រជាធិបតេយ្យចម្រើនជឿនលឿន (DPP) ដែលជាបក្សកាន់អំណាចតៃវ៉ាន់សព្វថ្ងៃដឹកនាំដោយអ្នកស្រី សៃ អ៊ឹងវិន។ ចំណែកលោក Hou Yu-ih ជាបេក្ខជនប្រធានាធិបតីមកពីគណបក្ស Kuomintang ជាគណបក្សប្រឆាំងធំបំផុតនៅតៃវ៉ាន់។ ចំពោះបេក្ខជនទី៣ គឺលោក Ko Wen-je មកពីគណបក្សប្រជាជនតៃវ៉ាន់ (TPP)។
ប៉ុន្តែបក្ស Kuomintang ជាគណបក្សដែលមានទំនាក់ទំនងជិតស្និទ្ធជាមួយចិន ចំណែកគណបក្សប្រជាជនតៃវ៉ាន់ ដែលទើបតែបង្កើតថ្មីត្រូវគេមើលឃើញថា ប្រកាន់ជំហរនៅកណ្ដាលចំពោះទីក្រុងប៉េកាំង។
ខណៈការបោះឆ្នោតកាន់តែខិតមកដល់ ប្រព័ន្ធឃោសនារបស់បក្សកុម្មុយនីស្តចិន បើកយុទ្ធនាការគំរាមកំហែង និងបង្កើតព័ត៌មានមិនពិតវាយលុកចូលកោះតៃវ៉ាន់។
ប្រព័ន្ធឃោសនារបស់ទីក្រុងប៉េកាំង បានហៅការបោះឆ្នោតជ្រើសរើសប្រធានាធិបតីថ្មីសម្រាប់ដែនដីកោះតៃវ៉ាន់លើកនេះ គឺជាការវាស់កម្រិតនៃកម្ដៅច្រកសមុទ្រតៃវ៉ាន់ ថាតើអនាគតដែនកោះនេះនៅតែជាតំបន់មួយនៅក្រោមរចនាសម្ព័ន្ធក្រៅច្បាប់ ឬក៏ដូចម្ដេច។
ការធ្វើអត្ថាធិប្បាយរបស់ប្រព័ន្ធឃោសនាឱ្យក្រុងប៉េកាំង បានដាក់ការគំរាមកំហែងទៅលើប្រជាជនតៃវ៉ាន់ ដែលត្រូវចេញទៅបោះឆ្នោតនៅថ្ងៃទី១៣ ខែមករា សប្ដាហ៍ក្រោយនេះ ដោយព្រមានថា ផ្លូវដើរពីរផ្ទុយពីគ្នាទាំងស្រុង គឺមួយរួមរស់ជាមួយទីក្រុងប៉េកាំង ក្នុងឋានៈជាសាច់ឈាមរួមជាតិតែមួយ និងទី២ ត្រូវតែទទួលយកសង្គ្រាមពីទីក្រុងប៉េកាំង។
ការធ្វើអត្ថាធិប្បាយរបស់ប្រព័ន្ធផ្សព្វផ្សាយបក្សកុម្មុយនីស្តចិន កើតឡើងទន្ទឹមនឹងពួកមន្ត្រីក្នុងជួរបក្សកុម្មុយនីស្តមួយចំនួនបានបញ្ចេញសង្គ្រាមវោហារសាស្ត្រគំរាមទៅលើប្រជាជនតៃវ៉ាន់ ថា ត្រូវគិតអំពីសន្តិភាព ជាជាងគិតទៅរកឯករាជ្យដែលជាអំពើខុសច្បាប់នោះ។
ក្នុងស្ថានភាពនេះ សូម្បីតែប្រធានាធិបតីចិន ស៊ី ជីនពីង ក៏ចេញសារគំរាមអាជ្ញាធរកោះតៃវ៉ាន់ផងដែរ។
លោក ស៊ី បានហៅការបោះឆ្នោតប្រធានាធិបតីរបស់ដែនកោះនេះថាជាកូនសោសម្រាប់សន្តិភាពនៅច្រកសមុទ្រតៃវ៉ាន់ ប៉ុន្តែលោក ស៊ី សង្ឃឹមថា មេដឹកនាំថ្មីតៃវ៉ាន់ទោះបុគ្គលណាក៏ដោយ គឺមិនត្រូវដឹកនាំដែនកោះនេះទៅរកតំបន់ពីរដាច់ពីគ្នាពីក្រុងប៉េកាំង ដាច់ខាត។ លោកព្រមានថា សន្តិភាព និងការបង្រួបបង្រួមនៅចំពោះមុខការបោះឆ្នោតនៅពេលនេះហើយ តែបើពុំនោះទេ វាមានតែបង្ខំឱ្យទីក្រុងប៉េកាំង ប្រើកម្លាំងដើម្បីបង្រួបបង្រួម។
ទោះជាយ៉ាងនេះក្ដី អ្នកនយោបាយ និងអ្នកស្រី សៃ អ៊ឹងវិន ប្រធានាធិបតីជិតផុតអាណត្តិ បានថ្លែងប្រាប់ប្រជាជនកោះតៃវ៉ាន់ ដែលគាំទ្រគណបក្សប្រជាធិបតេយ្យជឿនលឿន ឱ្យប្រើប្រាស់សិទ្ធិរបស់ខ្លួនឱ្យបានច្បាស់លាស់ គឺមិនត្រូវចាញ់ការគំរាមកំហែងរបស់ទីក្រុងប៉េកាំង នោះទេ។
អ្នកស្រី សៃ ដែលជាប្រធានគណបក្សកំពុងកាន់អំណាចផងដែរនេះ បានព្រមានប្រជាជនកោះតៃវ៉ាន់ ត្រូវមើលទីក្រុងហុងកុង ដែលពេលនេះធ្លាក់នៅក្រោមបន្ទាត់នយោបាយរបស់ចិន ហើយពេលនេះ ប្រជាជនហុងកុង ពុំមានសេរីភាពក្នុងការជ្រើសរើសអនាគតរបស់ខ្លួននោះទេ ខណៈដែលសន្តិសុខរឹតបន្តឹងយ៉ាងខ្លាំងពីសំណាក់ក្រុមសន្តិសុខដែលបញ្ជូនពីទីក្រុងប៉េកាំង។
អ្នកស្រីថាដែនដីហុងកុង បាត់បង់អធិបតេយ្យភាពប្រជាធិបតេយ្យរបស់ខ្លួនទាំងស្រុងហើយពេលនេះ ព្រោះតែប៉េកាំង នៅពីលើ។
យ៉ាងណា សហរដ្ឋអាមេរិកវិញដែលជាខ្នងបង្អែករបស់ទីក្រុងតៃប៉ិ ក៏បានចេញសេចក្ដីថ្លែងការណ៍ផងដែរថា ក្រុងវ៉ាស៊ីនតុន មិនលម្អៀងទៅលើបេក្ខជនប្រធានាធិបតីមកពីគណបក្សណានោះទេ ឱ្យតែបេក្ខជននោះតំណាងពិតប្រាកដនៃឆន្ទៈរបស់ប្រជាជនកោះតៃវ៉ាន់ ប៉ុន្តែសហរដ្ឋអាមេរិកក៏ព្រមានចិន កុំជ្រៀតជ្រែកចូលកិច្ចការផ្ទៃក្នុងតៃវ៉ាន់ ជាពិសេសកុំធ្វើឱ្យប៉ះពាល់ដល់លទ្ធផលបោះឆ្នោតនៅតៃវ៉ាន់ ឱ្យសោះ។
មកដល់ពេលនេះ តៃវ៉ាន់បានបិទការស្ទង់មតិរបស់ក្រុមហ៊ុនស្ទង់មតិទាំងឡាយដោយមិនអនុញ្ញាតឱ្យមានការស្ទង់មតិដាច់ខាត ប៉ុន្តែកន្លងមក ការស្ទង់មតិបានបង្ហាញអំពីប្រជាជនកោះតៃវ៉ាន់ ដល់ទៅជាង ៧០% មិនចង់រួមរស់ក្រោមដំបូលសន្តិភាពនៃបក្សកុម្មុយនីស្តចិន នៃទីក្រុងប៉េកាំង នោះទេ៕