ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ លោក ស សុខា បណ្តេញមន្ត្រីនគរបាលចំនួន ១២រូបទៀតចេញពីក្របខ័ណ្ឌមន្ត្រីនគរបាលជាតិ បន្ទាប់ពីរកឃើញថា មន្ត្រីនគរបាលទាំងនោះមិនគោរពបទបញ្ជា និងតួនាទីភារកិច្ចការងារក្នុងនាមជាកងកម្លាំងនគរបាលជាតិ។
យោងតាមប្រកាសរបស់ក្រសួងមហាផ្ទៃ ស្ដីពីការបណ្តេញចេញពីក្របខ័ណ្ឌមន្ត្រីនគរបាលជាតិ ចុះថ្ងៃទី០៣ ខែមករា ឆ្នាំ២០២៤ ដែលទើបតែទទួលបាននៅថ្ងៃទី៥ មករា នេះ បានឲ្យដឹងថា មន្ត្រីចំនួន ១២នាក់នោះមានដូចជា៖
- វរសេនីយ៍ទោ ស ពិសិដ្ឋ នាយរងការិយាល័យប្រឆាំងការជួញដូរមនុស្ស និងការពារអនីតិជន
- វរសេនីយ៍ត្រី គង់ ចាន់រស្មី នាយផ្នែកអក្សរសម្ងាត់នៃអធិការដ្ឋាននគរបាលខណ្ឌដង្កោ
- អនុសេនីយ៍ឯក ឌួង ចាន់សិត្សា នាយរងផ្នែកនៃការិយាល័យបង្ការពន្លត់អគ្គិភ័យ និងសង្គ្រោះ
- អនុសេនីយ៍ទោ ថា សោភ័ណ នាយរងផ្នែករដ្ឋបាលនៃការិយាល័យប្រឆាំងបទល្មើសបច្ចេកវិទ្យា
- អនុសេនីយ៍ឯក រស់ ឧត្តម នាយរងផ្នែកប្រឆាំងគ្រឿងញៀននៃអធិការដ្ឋាននគរបាលខណ្ឌ៧មករា
- អនុសេនីយ៍ឯក ស៊ីម ប៊ុនធឿន នាយរងផ្នែកការពារ និងអន្តរាគមន៍ នៃអធិការដ្ឋាននគរបាលខណ្ឌមានជ័យ
- អនុសេនីយ៍ទោ ផាន់ ឯម នាយរងផ្នែកអន្តោប្រវេសន៍នៃអធិការដ្ឋាននគរបាលខណ្ឌកំបូល
- អនុសេនីយ៍ឯក ជុំ ម៉ៅ មន្ត្រីនៃការិយាល័យអន្តរាគមន៍
- អនុសេនីយ៍ឯក អេង ស៊ីណាត មន្ត្រីនៃស្នងការដ្ឋាននគរបាលរាជធានីភ្នំពេញ
- អនុសេនីយ៍ឯក ជិន សុខា មន្ត្រីផ្នែកនគរបាលយុត្តិធម៌ នៃអធិការដ្ឋាននគរបាលខណ្ឌព្រែកព្នៅ
- ព្រឹន្ទបាលឯក ហាក់ មុនីរិទ្ធ មន្ត្រីប៉ុស្តិ៍នគរបាលរដ្ឋបាលស្រះចក នៃអធិការដ្ឋាននគរបាលខណ្ឌដូនពេញ
- ព្រឹន្ទបាលទោ ហេង គីមលេង មន្ត្រីប៉ុស្តិ៍នគរបាលរដ្ឋបាលផ្សារដេប៉ូទី១ នៃអធិការដ្ឋាននគរបាលខណ្ឌទួលគោក។
ជុំវិញករណីនេះ អ្នកនាំពាក្យរងក្រសួងមហាផ្ទៃ លោក ទូច សុខៈ បញ្ជាក់ថា ការបណ្តេញមន្ត្រីនគរបាលជាតិនៃស្នងការដ្ឋាននគរបាលរាជធានីភ្នំពេញទាំង ១២នាក់នេះចេញពីក្របខ័ណ្ឌ ដោយអនុវត្តតាមបទបញ្ជារបស់លោក ស សុខា រដ្ឋមន្ត្រីក្រសួងមហាផ្ទៃ បន្ទាប់ពីអ្នកទាំង ១២នាក់នេះអវត្តមាននៅក្នុងការបំពេញតួនាទីភារកិច្ច គ្មានច្បាប់ គ្មានទម្លាប់ មិនគោរពអង្គភាព មិនគោរពបទបញ្ជា មិនអនុវត្តតួនាទីឱ្យបានត្រឹមត្រូវ ហើយព្រងើយកន្តើយ ឬមិនទទួលខុសត្រូវនៅក្នុងភារកិច្ចផ្សេងៗជារួម មានន័យថា មិនចាត់ទុកថាតួនាទីភារកិច្ចជាកាតព្វកិច្ចរបស់ខ្លួន។
កាលពីថ្ងៃទី២២ ខែធ្នូ ឆ្នាំ២០២៣ ក្រសួងមហាផ្ទៃបានចេញសេចក្ដីប្រកាសមួយដកហូតមុខតំណែង ឋានន្តរស័ក្ដិ និងបណ្ដេញមន្ត្រីនគរបាលចំនួន ១២នាក់នៃស្នងការដ្ឋាននគរបាលខេត្តព្រៃវែង ចេញពីក្របខ័ណ្ឌ ពាក់ព័ន្ធនឹងប្រើប្រាស់សារធាតុញៀន។
ប្រភពដដែលថា ប្រាក់បៀវត្សរ៍ និងរបបឧបត្ថម្ភផ្សេងៗរបស់មន្ត្រីនគរបាលដែលត្រូវបណ្ដេញចេញនោះ នឹងត្រូវបានកាត់ផ្ដាច់ និងលុបចេញទាំងអស់ចាប់ពីខែមីនា ឆ្នាំ២០២៤ ខាងមុខតទៅ។
នៅថ្ងៃទី២២ ខែធ្នូ ឆ្នាំ២០២៣ ដដែល លោក ស សុខា ក៏បានសម្រេចផ្ទេរភារកិច្ចមន្ត្រីនគរបាលជាតិចំនួន ៥០នាក់ដែលមានឋានន្តរសក្តិចាប់ពីអនុសេនីយ៍ឯករហូតដល់វរសេនីយ៍ត្រី ចេញពីគណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ ឱ្យទៅបម្រើការនៅនាយកដ្ឋានផ្សេងវិញ បន្ទាប់ពីអនុប្រធានគណៈកម្មាធិការប្រឆាំងផលិតផលក្លែងក្លាយលោក គឹម ជាតិ ត្រូវបានចោទប្រកាន់ពីបទប្រព្រឹត្តអំពើពុករលួយកាលពីពេលថ្មីៗនេះ។
អ្នកប្រឹក្សាយោបល់ដើម្បីអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ បានប្រាប់សារព័ត៌មាន The Cambodia Daily កន្លងមកថា វិធានការរបស់ក្រសួងមហាផ្ទៃដែលបានព្យួរតួនាទី និងបណ្តេញចេញពីក្របខ័ណ្ឌចំពោះមន្ត្រីក្រោមឱវាទដែលជាប់ពាក់ព័ន្ធនឹងគ្រឿងញៀននៅពេលនេះ គ្រាន់តែជាចំណាត់ការមួយជ្រុងតូចប៉ុណ្ណោះ បើប្រៀបធៀបនឹងបទល្មើសគ្រឿងញៀនដែលបានកើតមាននៅកម្ពុជាកន្លងមក។
លោកបន្តថា ទោះចំណាត់ការនេះតូចក្តី ធំក្តី ប៉ុន្តែឱ្យតែមន្ត្រីរដ្ឋាភិបាលមានឆន្ទៈក្នុងការបង្ក្រាបបទល្មើសគ្រឿងញៀននេះដោយសុទ្ធចិត្ត ដោយគ្មានការរើសអើង ក្រោមគោលការណ៍ច្បាប់ មិនខ្លាចញញើតអ្នកមានអំណាច ឬសាច់ញាតិ បក្ខពួកខ្លួនឯង នោះការប្រយុទ្ធប្រឆាំងនឹងគ្រឿងញៀននឹងអាចឈានទៅដល់ការលុបបំបាត់ទាំងស្រុងជាមិនខាន ប៉ុន្តែប្រសិនបើអនុវត្តច្បាប់ដើម្បីធ្វើប្រជាភិថុតិ ឬគ្រាន់តែដើម្បីឱ្យល្អមើល ទោះវិធានការនោះធំកម្រិតណាក៏ដោយ ក៏មិនអាចលុបបំបាត់បញ្ហានេះបានដែរ។
របាយការណ៍របស់ក្រសួងមហាផ្ទៃ នៅក្នុងឆ្នាំ២០២២ បានឲ្យដឹងថា ក្រសួងមួយនេះបានបណ្តេញមន្ត្រីនគរបាលជាតិចំនួន ១១៧នាក់ចេញពីក្របខ័ណ្ឌ ហើយក៏មានការដកហូតមុខតំណែង ការកាត់បន្ថយឋានន្តរស័ក្ដិ និងការផ្អាកការងារមន្ត្រីនគរបាលជាតិប្រមាណ ៩០នាក់ផ្សេងទៀតផងដែរ។
គិតត្រឹមឆ្នាំ២០២២ ក្របខ័ណ្ឌមន្ត្រីនគរបាលជាតិសរុបមានចំនួន ៦២៦១៧នាក់ ក្នុងនោះមន្ត្រីនគរបាលថ្នាក់ជាតិមានចំនួន ២១៩៥៥នាក់ និងមន្ត្រីនគរបាលថ្នាក់ក្រោមជាតិមានចំនួន ៣៩៦៦២នាក់៕