រដ្ឋមន្ត្រីអមនាយករដ្ឋមន្ត្រី និងជាអតីតប្រធានអង្គការតម្លាភាពកម្ពុជាលោក ព្រាប កុល ព្រមានប្តឹងម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) បន្ទាប់ពីម្ចាស់គណនីហ្វេសប៊ុករូបនេះចោទរូបលោកថា បានលួចដកលុយជិត ១០០លានដុល្លារអាមេរិក (៨០លានដុល្លារ) ពីក្រុមហ៊ុនគ្រប់គ្រងមូលធនវិនិយោគដ៏ធំមួយឈ្មោះ CIC។
មេធាវីរបស់លោក ព្រាប កុល គឺលោក សារ៉េត សារ៉េនឌី បានចេញលិខិតជូនដំណឹងមួយកាលពីថ្ងៃទី១៦ ខែមករា ឆ្នាំ២០២៤ ទៅកាន់ម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) ដោយព្រមានឱ្យលុបសំណេររបស់ខ្លួនដែលបានលើកឡើងពីការធ្វើប្រតិបត្តិប្រាក់របស់លោក ព្រាប កុល ដែលមេធាវីរូបនេះចាត់ទុកសំណេរនោះថាមានលក្ខណៈបរិហារកេរ្តិ៍ និងញុះញង់។
មេធាវីខាងលើលើកឡើងថា ផ្អែកតាមអង្គច្បាប់ មាត្រា៤៩៤ និងមាត្រា៤៩៥ ម្ចាស់គណនីហ្វេសប៊ុកខាងលើកំពុងប្រព្រឹត្តបទល្មើសព្រហ្មទណ្ឌដែលអាចប្រឈមមុខនឹងផ្លូវច្បាប់ធ្ងន់ធ្ងរ ប្រសិនបើកូនក្តីរបស់លោកដាក់ពាក្យបណ្តឹងទៅកាន់សមត្ថកិច្ច និងតុលាការ ជុំវិញបទបរិហារកេរ្តិ៍ចំពោះលោក ព្រាប កុល នៅពេលនេះ។
លោក សារ៉េត សារ៉េនឌី ព្រមានថា ប្រសិនបើម្ចាស់គណនីហ្វេសប៊ុកខាងលើមិនលុបសំណេររបស់ខ្លួនដែលបានលើកឡើងពីកូនក្តីរបស់ខ្លួន គឺលោក ព្រាប កុល និងសុំទោសជាសាធារណៈទេ លោក ព្រាប កុល នឹងដាក់ពាក្យប្តឹងឱ្យសមត្ថកិច្ចចាត់ការតាមនីតិវិធីច្បាប់ជាមិនខាន។
ការព្រមានប្តឹងផ្តល់នេះ ធ្វើឡើងបន្ទាប់ពីម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) បានចោទលោក ព្រាប កុល ថាបានលួចលុយក្រុមហ៊ុនវិនិយោគដ៏ធំមួយជិត ១០០លានដុល្លារអាមេរិក មុននឹងលោកចុះចូលជាមួយគណបក្សប្រជាជនកម្ពុជា។
កាលពីថ្ងៃទី១៥ ខែមករា ឆ្នាំ២០២៤ ម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) បានសរសេរលើគណនីហ្វេសប៊ុករបស់ខ្លួនថា អ្នកក្លាហានម្នាក់ឈ្មោះ ព្រាប កុល ដែលធ្លាប់តស៊ូមតិខាង «តម្លាភាពសង្គម» បានកសាងស្នាដៃដ៏ធំមួយដោយបង្កើតក្រុមហ៊ុនអចលនទ្រព្យខ្នាតយក្សមួយដែលមានឈ្មោះថា Zillenium Group។
ប្រភពខាងលើលើកឡើងថា មុននឹងបង្កើតក្រុមហ៊ុនអចលនទ្រព្យខ្នាតយក្ស Zillenium Group នេះ លោក ព្រាប កុល ក៏ត្រូវគេសង្ស័យថាបានលួចយកលុយប្រមាណ ៨០លានដុល្លារអាមេរិកពីក្រុមហ៊ុនគ្រប់គ្រងមូលធនវិនិយោគដ៏ធំមួយផ្សេងទៀតដែរ ដែលហៅកាត់ថា CIC ដែលក្រុមហ៊ុននេះមានទឹកប្រាក់សរុបប្រមាណ ១៣០លានដុល្លារអាមេរិក។ ដោយសារតែបញ្ហានេះ បានធ្វើឱ្យអ្នកវិនិយោគជិត ៥៥០នាក់ (៥៤៦នាក់) ដែលបានបោះទុនវិនិយោគក្នុងក្រុមហ៊ុននេះ បាត់បង់ទ្រព្យធន លុយកាក់ និងក្ស័យធនគ្រប់គ្នា។
ប្រភពដដែលអះអាងថា ការប្រតិបត្តិការយកលុយចេញពីក្រុមហ៊ុននេះបានដោយជោគជ័យ ដោយសារតែមានលោក ព្រាប កុល មានទំនាក់ទំនងយ៉ាងជិតស្និទ្ធជាមួយសមភាគីរបស់គាត់ គឺលោក គុយ វ៉ាត ដែលមានតួនាទីជាប្រធានក្រុមប្រឹក្សាភិបាលរបស់ក្រុមហ៊ុន CIC និងជាម្ចាស់ហាង Park Cafe បច្ចុប្បន្ននេះ រួមទាំងសមាជិកក្រុមប្រឹក្សាភិបាលជាង ១០នាក់ផ្សេងទៀតផងដែរ។
ម្ចាស់គណនីហ្វេសប៊ុកដដែលបញ្ជាក់ថា លុយជាង ៨០លានដុល្លារនេះ ត្រូវបានលោក ព្រាប កុល ចាត់ចែងក្នុងការវិនិយោគគម្រោងអចលនទ្រព្យផ្សេងៗក្នុងក្រុមហ៊ុន Zillenium Group យ៉ាងគគ្រឹកគគ្រេងនៅពេលនេះ។ ម្ចាស់សំណេរខាងលើគូសបញ្ជាក់ថា ខ្លួនក៏ជាជនរងគ្រោះក្នុងនាមជាអ្នកវិនិយោគក្នុងក្រុមហ៊ុន CIC នេះដែរ។
លោក ព្រាប កុល បានបញ្ចប់អាណត្តិជានាយកប្រតិបត្តិអង្គការតម្លាភាពកម្ពុជា កាលពីថ្ងៃទី១២ ខែមេសា ឆ្នាំ២០២០ បន្ទាប់ពីលោកបានដឹកនាំស្ថាប័នមួយនេះអស់រយៈពេល ៨ឆ្នាំ ឬ ២អាណត្តិ ជិត ១០ឆ្នាំ ប៉ុន្តែក្រោយចាកចេញពីអង្គការក្រៅរដ្ឋាភិបាល លោក ព្រាប កុល បានចាប់ផ្តើមហក់ចូលប្រឡូកក្នុងវិស័យជំនួញអចលនទ្រព្យវិញ ដែលលោកបានគ្រប់គ្រងក្រុមហ៊ុនអចលនទ្រព្យជាច្រើន ក្នុងនោះ លោកក៏ជាប្រធានក្រុមប្រឹក្សាភិបាល និងជាគ្រូបង្គោលនៃក្រុមហ៊ុន Century 21 Zillion Holding ផងដែរ។
ក្រោយជោគជ័យលើវិស័យអចលនទ្រព្យ លោក ព្រាប កុល ក៏បានប្រកាសចុះចូលជាមួយគណបក្សប្រជាជនកម្ពុជារបស់លោក ហ៊ុន សែន និងត្រូវបានលោក ហ៊ុន សែន តែងតាំងជារដ្ឋមន្ត្រីប្រតិភូអមនាយករដ្ឋមន្ត្រីតាំងពីអំឡុងខែឧសភា ឆ្នាំ២០២៣ ក្នុងរដ្ឋាភិបាលអាណត្តិទី៦ និងបន្តកាន់តំណែងនេះរហូតដល់រដ្ឋាភិបាលរបស់លោក ហ៊ុន ម៉ាណែត ក្នុងអាណត្តិទី៧ នេះ។
សារព័ត៌មាន The Cambodia Daily នៅមិនទាន់អាចទាក់ទងសុំការបកស្រាយពីលោក ព្រាប កុល ជុំវិញការចោទប្រកាន់នេះបាននៅឡើយទេរហូតដល់ម៉ោងផ្សាយនេះ៕