រដ្ឋមន្ត្រីក្រសួងមហាផ្ទៃ លោក ស សុខា សម្រេចបណ្ដេញមន្ត្រីនគរបាល ៤រូបទៀតដែលបំពេញការងារនៅក្នុងគណៈកម្មាធិការប្រយុទ្ធប្រឆាំងផលិតផលក្លែងក្លាយ ចេញពីក្របខ័ណ្ឌនគរបាលជាតិចាប់ពីខែមេសា ឆ្នាំ២០២៤ ដោយសារល្មើសវិន័យកងកម្លាំង។
យោងតាមសេចក្តីប្រកាសរបស់លោក ស សុខា ចុះថ្ងៃទី១៨ មករា ដែលទើបតែផ្សព្វផ្សាយជាសាធារណៈនៅថ្ងៃទី២៣ មករា នេះ បានឲ្យដឹងថា លោកបានសម្រេចដកហូតតំណែង ឋានន្តរស័ក្តិ និងបណ្ដេញមន្ត្រី ៤រូបពីក្របខ័ណ្ឌនគរបាលដោយសារល្មើសវិន័យកងកម្លាំង។
ប្រភពដដែលបានឲ្យដឹងថា មន្ត្រីទាំង ៤រូបនេះរួមមានលោកពលបាលត្រី ទូច យុទ្ធា អនុប្រធានលេខាធិការដ្ឋាន លោកពលបាលត្រី តាំង គង់ អនុប្រធានលេខាធិការដ្ឋាន លោកពលបាលត្រី ជូ ផល្លីឌីន អនុប្រធានលេខាធិការដ្ឋាន និងលោកពលបាលត្រី ខៃ វណ្ណៈ អនុប្រធានលេខាធិការដ្ឋាន។
សេចក្តីប្រកាសរបស់លោក ស សុខា បានឲ្យដឹងទៀតថា ប្រាក់បៀវត្សរ៍ និងរបបឧបត្ថម្ភផ្សេងៗទៀត ត្រូវបានកាត់ផ្ដាច់ និងលុបចេញពីក្របខ័ណ្ឌមន្ត្រីនគរបាលជាតិចាប់ពីខែមេសា ឆ្នាំ២០២៤ តទៅ។
អ្នកនាំពាក្យក្រសួងមហាផ្ទៃ លោក ទូច សុខៈ បានឱ្យដឹងកន្លងមកថា ការដកតំណែងមន្ត្រីនគរបាលទាំងនោះ គឺដោយសារពួកគេធ្វើការមិនត្រូវនឹងជំនាញរបស់ខ្លួន ខុសពីតួនាទី ភារកិច្ច មិនឆ្លងយោបល់តាមឋានានុក្រម ហើយមិនរាយការណ៍តាមឋានានុក្រម។
នៅថ្ងៃទី២២ ខែធ្នូ ឆ្នាំ២០២៣ ដដែល លោក ស សុខា ក៏បានសម្រេចផ្ទេរភារកិច្ចមន្ត្រីនគរបាលជាតិចំនួន ៥០នាក់ដែលមានឋានន្តរសក្តិចាប់ពីអនុសេនីយ៍ឯករហូតដល់វរសេនីយ៍ត្រី ចេញពីគណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ ឱ្យទៅបម្រើការនៅនាយកដ្ឋានផ្សេងវិញ បន្ទាប់ពីអនុប្រធានគណៈកម្មាធិការប្រឆាំងផលិតផលក្លែងក្លាយលោក គឹម ជាតិ ត្រូវបានចោទប្រកាន់ពីបទប្រព្រឹត្តអំពើពុករលួយកាលពីពេលថ្មីៗនេះ។
អ្នកប្រឹក្សាយោបល់ដើម្បីអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ បានប្រាប់សារព័ត៌មាន The Cambodia Daily កន្លងមកថា វិធានការរបស់ក្រសួងមហាផ្ទៃដែលបានព្យួរតួនាទី និងបណ្តេញចេញពីក្របខ័ណ្ឌចំពោះមន្ត្រីក្រោមឱវាទដែលជាប់ពាក់ព័ន្ធនឹងគ្រឿងញៀននៅពេលនេះ គ្រាន់តែជាចំណាត់ការមួយជ្រុងតូចប៉ុណ្ណោះ បើប្រៀបធៀបនឹងបទល្មើសគ្រឿងញៀនដែលបានកើតមាននៅកម្ពុជា។
លោកបន្តថា ឱ្យតែមន្ត្រីរដ្ឋាភិបាលមានឆន្ទៈក្នុងការបង្ក្រាបបទល្មើសគ្រឿងញៀននេះដោយសុទ្ធចិត្ត ដោយគ្មានការរើសអើង ក្រោមគោលការណ៍ច្បាប់ មិនខ្លាចញញើតអ្នកមានអំណាច ឬសាច់ញាតិ បក្ខពួកខ្លួនឯង នោះការប្រយុទ្ធប្រឆាំងនឹងគ្រឿងញៀននឹងអាចឈានទៅដល់ការលុបបំបាត់ទាំងស្រុងជាមិនខាន ប៉ុន្តែប្រសិនបើអនុវត្តច្បាប់ដើម្បីធ្វើប្រជាភិថុតិ ឬគ្រាន់តែដើម្បីឱ្យល្អមើល ទោះវិធានការនោះធំកម្រិតណាក៏ដោយ ក៏មិនអាចលុបបំបាត់បញ្ហានេះបានដែរ។
របាយការណ៍របស់ក្រសួងមហាផ្ទៃ នៅក្នុងឆ្នាំ២០២២ បានឲ្យដឹងថា ក្រសួងមួយនេះបានបណ្តេញមន្ត្រីនគរបាលជាតិចំនួន ១១៧នាក់ចេញពីក្របខ័ណ្ឌ ហើយក៏មានការដកហូតមុខតំណែង ការកាត់បន្ថយឋានន្តរស័ក្ដិ និងការផ្អាកការងារមន្ត្រីនគរបាលជាតិប្រមាណ ៩០នាក់ផ្សេងទៀតផងដែរ។ គិតត្រឹមថ្ងៃទី២៣ ខែមករា នេះ ក្រោមការដឹកនាំរបស់លោក ស សុខា រដ្ឋមន្ត្រីនៃក្រសួងមហាផ្ទៃ គឺមានមន្ត្រីនគរបាលជាង ៥០នាក់ហើយដែលបានរងពិន័យ ដកតួនាទី និងតំណែង។
គិតត្រឹមឆ្នាំ២០២២ ស្ថិតិក្របខ័ណ្ឌមន្ត្រីនគរបាលជាតិសរុបមានចំនួនជាង ៦ម៉ឺននាក់ (៦២៦១៧នាក់) ក្នុងនោះមន្ត្រីនគរបាលថ្នាក់ជាតិមានចំនួនជាង ២ម៉ឺននាក់ (២១៩៥៥នាក់) និងមន្ត្រីនគរបាលថ្នាក់ក្រោមជាតិមានចំនួនជិត ៤ម៉ឺននាក់ (៣៩៦៦២នាក់)៕