នៅទីបំផុត សភានៃប្រទេសតួកគី ត្រូវបានគេដឹងថា កំពុងជជែកដេញដោលគ្នាទៅលើការអនុញ្ញាតឱ្យប្រទេសស៊ុយអែត ចូលជាសមាជិកភាពរបស់អង្គការណាតូ ក្រោយពីបានជាប់គាំងក្នុងការពិភាក្សា និងសម្រេចចិត្តអស់រយៈពេលដ៏យូរ។
ទីភ្នាក់ងារបារាំង AFP បានធ្វើការចុះផ្សាយថា ការបោះឆ្នោតអាចនឹងធ្វើឡើងនៅថ្ងៃព្រហស្បតិ៍ នេះ។
គណៈកម្មាធិការកិច្ចការបរទេសរបស់សភាបានអនុម័តនូវពិធីសារស្ដីពីការចូលជាសមាជិក NATO របស់ប្រទេសស៊ុយអែត ក្នុងខែធ្នូ ឆ្នាំ២០២៣ រួចទៅហើយ ក៏ប៉ុន្ដែករណីនេះបានប្រឈមដល់ទៅរយៈពេល ១៩ខែនៃការដែលមិនអាចសម្រេចចិត្តបាន ដោយសារតែការជំទាស់របស់ប្រទេសតួកគី។ ក្នុងខណៈដែលទំនាក់ទំនងរវាងតួកគី និងស៊ុយអែត មានភាពតានតឹងជាខ្លាំងរហូតដល់ថ្នាក់សម្ព័ន្ធមិត្តណាតូដទៃទៀតត្រូវធ្វើការសម្របសម្រួលឱ្យប្រទេសតួកគី បន្ទន់ឥរិយាបថ និងមានការគិតវិជ្ជមានសម្រាប់ការចូលជាសមាជិករបស់ស៊ុយអែត ទៅក្នុងណាតូ។
ទីក្រុងអង់ការ៉ា បានខឹងសម្បាជាខ្លាំងចំពោះការដែលប្រទេសស៊ុយអែត អត់ឱនដល់ក្រុមភេរវករ PKK ដែលក្រុមនេះបានបើកយុទ្ធនាការប្រយុទ្ធបង្ហូរឈាមប្រឆាំងនឹងរដ្ឋតួកគី ចាប់តាំងពីទសវត្សរ៍១៩៨០ មកម្ល៉េះ ហើយបានសម្លាប់ជនស៊ីវិលជាង ៤ម៉ឺននាក់ និងរៀបចំការប៉ុនប៉ងធ្វើរដ្ឋប្រហារបង្ហូរឈាមក្នុងឆ្នាំ២០១៦ ដើម្បីផ្ដួលអំណាចរបស់ប្រធានាធិបតី អែរដូហ្កាន់ ទៀតផងនោះ។
យ៉ាងណាមិញ ប្រទេសស៊ុយអែត បានរឹតបន្តឹងច្បាប់ប្រឆាំងភេរវកម្មរបស់ខ្លួន ដើម្បីឆ្លើយតបទៅនឹងសម្ពាធរបស់តួកគី ជាថ្នូរនឹងការចូលជាសមាជិករបស់អង្គការណាតូ។
ក្រោយមកគេក៏បានឃើញលោក Erdogan ហាក់បីដូចជាមិនសូវជំទាស់ចំពោះការដាក់ពាក្យស្នើសុំរបស់ប្រទេសស៊ុយអែត កាលពីក្នុងកិច្ចប្រជុំកំពូលរបស់អង្គការណាតូ ក្នុងខែកក្កដា ឆ្នាំ២០២៣ នោះទេ។
យ៉ាងណាគេយល់ឃើញថា ដោយសារមានថ្នូរជាមួយសហរដ្ឋអាមេរិកដែលនាំឲ្យតួកគី សម្រេចចិត្តបើកភ្លើងខៀវឱ្យស៊ុយអែត ចូលជាសមាជិករបស់ណាតូ ផងដែរ តាមរយៈការសម្រេចលក់យន្តហោះចម្បាំងទំនើប F-16 ចំនួន ៤០គ្រឿងរបស់អាមេរិកឲ្យទៅតួកគី។
ឥឡូវនេះ វាសនាស៊ុយអែត អាចចូលជាសមាជិករបស់ណាតូបាន ស្ថិតក្នុងការសម្រេចចិត្តរបស់តួកគី ដែលជាប្រទេសសមាជិកសកម្មផ្នែកយោធាបំផុតគេមួយរបស់ណាតូ។ តាមធម្មនុញ្ញណាតូ ដើម្បីអាចឱ្យប្រទេសមួយចូលជាសមាជិកបាន លុះត្រាមានសំឡេងឯកច្ឆន្ទទាំង ៣១ប្រទេស ដែលហ្វាំងឡង់ ទើបក្លាយជាប្រទេសទី៣១ ថ្មីៗនេះ។
ករណីនេះ ត្រូវមានពិធីសារបង្គ្រប់ពីប្រទេសជាសមាជិកទាំងអស់។ ពិធីសារនេះសម្រាប់ករណីប្រទេសតួកគី គឺត្រូវឆ្លងកាត់ដោយការបោះឆ្នោតដោយមហាសន្និបាតពេញអង្គចំនួន ៦០០អាសនៈ។
អ្វីដែលលំបាក គឺបក្សសម្ព័ន្ធប្រជាជនដែលកំពុងកាន់អំណាចរបស់ប្រធានាធិបតី Recep Tayyip Erdogan កាន់កាប់ភាគច្រើន។
បើឆ្លងកាត់រួចពីសភាអនុម័តហើយនោះ គឺប្រធានាធិបតីនឹងត្រូវចុះហត្ថលេខាជាច្បាប់។
ទោះជាបែបណាក៏ដោយក្ដី ក៏មានក្ដីសង្ឃឹមមួយ នោះដោយមើលឃើញថា គណបក្សចលនាជាតិនិយម (MHP) ដែលជាដៃគូរបស់គណបក្សយុត្តិធម៌ និងអភិវឌ្ឍន៍ (AK Party) របស់លោក Erdogan បានប្រកាសកាលពីថ្ងៃអង្គារ ថា ខ្លួននឹងគាំទ្រច្បាប់នេះនៅឯការបោះឆ្នោតសភា។
សមាជិកភាពរបស់អង្គការនេះបានកើនឡើងទ្វេដង ហើយការកើនឡើងនេះដោយសារតែប្រទេសនៅតាមបណ្ដោយព្រំដែនរបស់ណាតូជាមួយរុស្ស៊ី សម្រេចពង្រឹងការការពារប្រទេសរបស់ខ្លួន ក្រោយសហភាពសូវៀតដួលរលំ។ តែក្នុងអំឡុងពេលនោះ ប្រទេសស៊ុយអែត និងហ្វាំងឡង់ នៅតែបន្តគោលនយោបាយមិនចូលបក្សសម្ព័ន្ធក្នុងសម័យសង្គ្រាមត្រជាក់រវាងទីក្រុងមូស្គូ និងវ៉ាស៊ីនតោន ទេ។
ទើបតែដល់ពេលដែលមានការលុកលុយរបស់រុស្ស៊ីទៅលើប្រទេសជិតខាង គឺអ៊ុយក្រែន ហើយបានមើលឃើញភាពឃោរឃៅរបស់រុស្ស៊ីកាន់តែខ្លាំងក្លានៅអឺរ៉ុប ចាប់តាំងពីសង្គ្រាមលោកលើកទី២ និងការកើនឡើងកម្ដៅភូមិសាស្ត្រនយោបាយ ប្រទេសទាំងពីរក៏បានប្ដូរជំហរភ្លាមៗ។
ការតស៊ូរបស់លោក Erdogan ចំពោះការចូលជាសមាជិករបស់អង្គការណាតូរបស់ប្រទេសស៊ុយអែត បានឆ្លុះបញ្ចាំងពីជំហរមិនច្បាស់លាស់របស់លោកដែលមានចំពោះទីក្រុងមូស្គូ ដែរ ព្រោះគេដឹងថា លោកនៅតែចង់រក្សាទំនាក់ទំនងជិតស្និទ្ធជាមួយប្រធានាធិបតីរុស្ស៊ីលោក Vladimir Putin។
ថ្មីៗនេះទៀតសោត ប្រព័ន្ធផ្សព្វផ្សាយតួកគី បានរាយការណ៍ថា នៅខែក្រោយនេះ លោក ពូទីន អាចនឹងទៅធ្វើទស្សនកិច្ចជាលើកដំបូងលើទឹកដីតួកគី បើទោះបីបុរសខ្លាំងរូបនេះជាប់ដីកាចាប់ខ្លួនដោយតុលាការឧក្រិដ្ឋកម្មសង្គ្រាមក៏ដោយ។
ព្រោះតែករណីនេះផងដែរ ទើបប្រធានាធិបតីតួកគី អែរដូហ្កាន់ ត្រូវបានចោទថាជាមេដឹកនាំដែលមានភាពលម្អៀង ដោយលោកបានថ្កោលទោសលើប្រទេសអ៊ីស្រាអែល ដែលបើកការប្រយុទ្ធលើក្រុមហាម៉ាស នៅហ្កាហ្សា ថាបានបណ្ដាលឱ្យប្រជាជនប៉ាឡេស្ទីន រាប់ម៉ឺននាក់បាត់បង់ជីវិត ប៉ុន្តែជាក់ស្ដែង លោកនៅតែជិតស្និទ្ធនឹងបុរសម្នាក់ដែលជាមេដឹកនាំពិភពលោកបើកប្រតិបត្តិការសឹកសម្លាប់ប្រជាជនអ៊ុយក្រែន រាប់ម៉ឺននាក់ទៅវិញ៕