 ជំរុញឱ្យរដ្ឋាភិបាលកម្ពុជាដោះលែងអ្នកជំនាញកសិកម្ម និងជាសកម្មជនសង្គមដែលរិះគន់រដ្ឋាភិបាលមិនសំចៃមាត់លោក នី ណាក់ ជាបន្ទាន់ និងដោយឥតលក្ខខណ្ឌ។){kind=link}
អង្គការឃ្លាំមើលសិទ្ធិមនុស្សអន្តរជាតិ (Human Rights Watch) ជំរុញឱ្យរដ្ឋាភិបាលកម្ពុជាដោះលែងអ្នកជំនាញកសិកម្ម និងជាសកម្មជនសង្គមដែលរិះគន់រដ្ឋាភិបាលមិនសំចៃមាត់លោក នី ណាក់ ជាបន្ទាន់ និងដោយឥតលក្ខខណ្ឌ។
នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្សអន្តរជាតិ (Human Rights Watch) លោក ហ្វីល រ៉ូប៊ឺតសុន (Phil Robertson) សរសេរលើទំព័រហ្វេសប៊ុករបស់ខ្លួននៅថ្ងៃទី២៤ ខែមករា ឆ្នាំ២០២៤ នេះថា អាជ្ញាធរកម្ពុជាគួរតែទម្លាក់ចោលរាល់ការចោទប្រកាន់លើលោក នី ណាក់ ឱ្យមានសេរីភាពពេញលេញឡើងវិញ ព្រោះថាការរិះគន់របស់សកម្មជនសង្គមរូបនេះ ធ្វើឡើងក្នុងក្របខ័ណ្ឌនៃសេរីភាពបញ្ចេញមតិប៉ុណ្ណោះ។
នាយករងប្រចាំតំបន់អាស៊ីរូបនេះបញ្ជាក់ថា លោក នី ណាក់ កំពុងត្រូវឃុំខ្លួនបណ្ដោះអាសន្នក្នុងពន្ធនាគារព្រៃស (ម១) ក្រោមបទចោទប្រកាន់ពីបទញុះញង់ឲ្យមានការរើសអើង និងបរិហារកេរ្តិ៍ ដែលពាក់ព័ន្ធនឹងការរិះគន់លោក ហេង សួរ រដ្ឋមន្ត្រីក្រសួងការងារកម្ពុជា កាលពីពេលថ្មីៗនេះ។
លោកបន្ថែមថា អាជ្ញាធរកម្ពុជាគួរតែគោរពសិទ្ធិបញ្ចេញមតិដោយសេរីដែលមានចែងក្នុងច្បាប់ និងទម្លាក់រាល់បទចោទប្រកាន់លើលោក នី ណាក់ ទាំងអស់ ដើម្បីបើកលំហសេរីភាពបញ្ចេញមតិនៅកម្ពុជា។
ការអះអាងនេះ ធ្វើឡើងបន្ទាប់ពីសកម្មជនសង្គមលោក នី ណាក់ កំពុងត្រូវបានតុលាការកម្ពុជាឃុំខ្លួនពីបទញុះញង់ និងបទបរិហារកេរ្តិ៍ បន្ទាប់ពីអ្នកជំនាញកសិកម្មរូបនេះរិះគន់រដ្ឋមន្ត្រីក្រសួងការងារ កាលពីពេលថ្មីៗនេះ។
នៅថ្ងៃទី៥ ខែមករា ឆ្នាំ២០២៤ នេះ សមត្ថកិច្ចក្រសួងមហាផ្ទៃ បានចាប់ខ្លួនអ្នកជំនាញកសិកម្មលោក នី ណាក់ ដោយចោទពីបទបរិហារកេរ្តិ៍ និងញុះញង់ បន្ទាប់ពីផ្សព្វផ្សាយលើបណ្ដាញសង្គមហ្វេសប៊ុករបស់លោក ពាក់ព័ន្ធនឹងរាជរដ្ឋាភិបាលកាត់ដីឱ្យលោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានប៉ុន្មានថ្ងៃប៉ុណ្ណោះ។
ក្រោយពីចាប់ខ្លួន សាលាដំបូងរាជធានីភ្នំពេញបានចេញសេចក្តីប្រកាសព័ត៌មាន កាលពីថ្ងៃទី៧ ខែមករា ឆ្នាំ២០២៤ ថា ការចាប់ និងឃុំខ្លួនលោក នី ណាក់ ដោយសារតែគាត់ប្រើប្រាស់បណ្ដាញទំនាក់ទំនងសង្គមឈ្មោះ Iman-KH បង្ហោះ និងចែកចាយព័ត៌មានមិនពិតកាលពីថ្ងៃទី១២ ខែធ្នូ ឆ្នាំ២០២៣ ដែលមានខ្លឹមសារថា៖ «រដ្ឋាភិបាលបានកាត់ដីឱ្យរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ប្រហែលជាទុកសង់រោងចក្រចំនួន ២០០០ និងធ្វើការិយាល័យឱ្យមន្ត្រីក្រសួងការងារហើយមើលទៅ ព្រោះឃើញគាត់ប្រាប់ថា ធ្វើការរហូតគ្មានថ្ងៃសៅរ៍ ឬអាទិត្យឡើយ»។
ជុំវិញបញ្ហានេះ អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily កាលពីពេលថ្មីៗនេះថា បើពិនិត្យលើទិដ្ឋភាពច្បាប់ សមត្ថកិច្ចត្រូវតែអនុវត្តតួនាទីដោយការឃាត់ខ្លួនជនណាម្នាក់ទៅតាមបណ្តឹងរបស់ភាគីណាមួយ ដោយផ្អែកលើភស្តុតាងពិតមែន ប៉ុន្តែសមត្ថកិច្ចក៏គួរតែពិនិត្យទៅលើភស្តុតាងនោះដែរ ថាតើវានឹងនាំឱ្យប៉ះពាល់ដល់សន្តិសុខជាតិ ឬក៏អត់ មុននឹងឃាត់ខ្លួនបុគ្គលដែលត្រូវគេប្តឹងនោះ។
មន្ត្រីជាន់ខ្ពស់សង្គមស៊ីវិលទទួលបន្ទុកសិទ្ធិមនុស្សរូបនេះលើកឡើងថា ការបញ្ចេញមតិរបស់លោក នី ណាក់ មិនមានអ្វីធ្ងន់ធ្ងររហូតនាំឱ្យប៉ះពាល់ដល់សន្តិសុខជាតិដែលបង្កទៅជាភាពវឹកវរ ឬជាការញុះញង់ដូចការចោទប្រកាន់ឡើយ ដូច្នេះសមត្ថកិច្ចក៏មិនគួរឃាត់ខ្លួនគាត់ជុំវិញការលើកឡើងរបស់គាត់ដែរ ត្បិតសេរីភាពបញ្ចេញមតិ គឺជាធាតុសំខាន់មួយដែលត្រូវធានាការពារក្នុងសង្គមប្រជាធិបតេយ្យ។
មាត្រា៣៥ នៃរដ្ឋធម្មនុញ្ញ ចែងថា ពលរដ្ឋខ្មែរទាំងពីរភេទមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គមកិច្ច និងវប្បធម៌របស់ប្រទេសជាតិ។ សេចក្តីស្នើទាំងឡាយរបស់ពលរដ្ឋ ត្រូវបានទទួលការពិនិត្យ និងដោះស្រាយយ៉ាងហ្មត់ចត់ពីអង្គការរដ្ឋ ប៉ុន្តែកម្ពុជាស្ថិតក្រោមការដឹកនាំរដ្ឋាភិបាលរបស់គណបក្សប្រជាជនកម្ពុជាសព្វថ្ងៃនេះ បានធ្វើទុក្ខបុកម្នេញលើសកម្មជននយោបាយ និងសកម្មជននានា ដោយការចោទប្រកាន់ និងចាប់ឃុំខ្លួនទាំងអយុត្តិធម៌ជាបន្តបន្ទាប់។
ទាក់ទិននឹងការអនុវត្តច្បាប់នៅកម្ពុជា គម្រោងយុត្តិធម៌ពិភពលោក (The World Justice Project) បានចេញរបាយការណ៍របស់ខ្លួនស្ដីពីនីតិរដ្ឋសម្រាប់ឆ្នាំ២០២៣ ថា កម្ពុជាបានជាប់ចំណាត់ថ្នាក់លេខទី១៤១ ក្នុងចំណោម ១៤២ប្រទេស ដែលមាននីតិរដ្ឋទាបបំផុត ដោយសារតែគេរកឃើញថា ការដឹកនាំរបស់រដ្ឋាភិបាលកម្ពុជាគ្មានតម្លាភាព មានការគំរាមកំហែងសិទ្ធិជាមូលដ្ឋានរបស់ពលរដ្ឋ និងការមិនធានាបាននូវប្រព័ន្ធយុត្តិធម៌របស់ខ្លួន ជាដើម៕