ក្រសួងសុខាភិបាល ប្រកាសពីករណីក្មេងប្រុសអាយុ ៣ឆ្នាំម្នាក់មានទីលំនៅក្នុងភូមិតាប្រុយ ឃុំព្រែកពោន ស្រុកកំពង់ត្របែក ខេត្តព្រៃវែង រកឃើញវិជ្ជមានវីរុសផ្ដាសាយបក្សីប្រភេទ H5N1 ពីវិទ្យាស្ថានជាតិសុខភាពសាធារណៈ និងវិទ្យាស្ថានប៉ាស្ទ័រកម្ពុជា។
សេចក្តីប្រកាសព័ត៌មានរបស់ក្រសួងសុខាភិបាល បានឱ្យដឹងនៅថ្ងៃទី២៦ ខែមករា នេះថា ក្មេងប្រុសរូបនោះមានទីលំនៅក្នុងភូមិតាប្រុយ ឃុំព្រែកពោន ស្រុកកំពង់ត្របែក ខេត្តព្រៃវែង ហើយបច្ចុប្បន្ន អ្នកជំងឺទទួលបានការថែទាំយ៉ាងយកចិត្តទុកដាក់ពីសំណាក់ក្រុមគ្រូពេទ្យ។
ប្រភពដដែលបានអះអាងថា តាមការសាកសួរបង្ហាញថា ប្រហែល ១០ថ្ងៃមុនមានមាន់ទាងាប់នៅក្នុងភូមិ និងនៅជុំវិញផ្ទះអ្នកជំងឺ។ បច្ចុប្បន្ន ក្រុមការងារក្រសួងសុខាភិបាល ក្រសួងកសិកម្ម រុក្ខាប្រមាញ់ និងនេសាទ ក្រសួងទេសចរណ៍ អាជ្ញាធរមូលដ្ឋាន និងអង្គការដៃគូ កំពុងសហការគ្នាដើម្បីអង្កេតស្រាវជ្រាវលើការកើតឡើងនូវជំងឺផ្ដាសាយបក្សី ព្រមទាំងចែកជូនឱសថ Tamiflu ដល់អ្នកប៉ះពាល់ជិតស្និទ្ធផងដែរ។
ក្រសួងសុខាភិបាលបានដាស់តឿនថា ប្រសិនបើមានអាការៈក្តៅខ្លួន ក្អក ហៀរសំបោរ ឬពិបាកដកដង្ហើម និងមានប្រវត្តិធ្លាប់បានប៉ះពាល់ជាមួយមាន់ទាឈឺ ឬស្លាប់ក្នុងអំឡុង ១៤ថ្ងៃមុនថ្ងៃចាប់ផ្ដើមមានរោគសញ្ញា សូមកុំទៅជួបជុំ ឬទីប្រជុំជនដែលមានមនុស្សច្រើន និងត្រូវស្វែងរកការពិគ្រោះយោបល់ និងការពិនិត្យព្យាបាលនៅតាមមូលដ្ឋានសុខាភិបាលដែលនៅជិតលោកអ្នកបំផុតឱ្យបានឆាប់ទាន់ពេលវេលា។
ក្រសួងសុខាភិបាល កាលពីថ្ងៃទី២៣ ខែវិច្ឆិកា ឆ្នាំ២០២៣ កន្លងមក បានប្រកាសរកឃើញជំងឺផ្ដាសាយបក្សីប្រភេទ H5N1 លើស្ត្រីអាយុ ២១ឆ្នាំ ដែលរស់នៅស្រុកដងទង់ ខេត្តកំពត។
ក្រសួងសុខាភិបាល បានឲ្យដឹងថា ចំពោះរបៀបចម្លងជំងឺផ្ដាសាយបក្សី H5N1 គឺជាជំងឺផ្ដាសាយមួយដែលជាធម្មតាចម្លងរវាងសត្វបក្សីឈឺទៅបក្សីផ្សេងទៀត ប៉ុន្តែជួនកាល វាអាចចម្លងពីបក្សីទៅមនុស្សតាមការប៉ះពាល់ជិតស្និទ្ធជាមួយបក្សីដែលឈឺ ឬស្លាប់។ ជំងឺផ្ដាសាយបក្សីលើមនុស្សជាជំងឺធ្ងន់ធ្ងរ ដែលតម្រូវឱ្យមានការធ្វើការព្យាបាលនៅមន្ទីរពេទ្យទាន់ពេលវេលា។ ទោះបីជាវាមិនងាយឆ្លងពីមនុស្សទៅមនុស្ស ប៉ុន្តែបើវាអាចបំប្លែងខ្លួនអាចឆ្លងដូចនឹងជំងឺផ្ដាសាយតាមរដូវកាលផងដែរ។ នេះបើតាមក្រសួងសុខាភិបាល បញ្ជាក់បន្ថែម។
ទាក់ទងទៅនឹងបញ្ហានេះ រាជរដ្ឋាភិបាលបានចេញសារអប់រំ រួមមាន៖
- លាងដៃឱ្យបានញឹកញាប់ជាមួយសាប៊ូ និងទឹក មុនពេលបរិភោគ និងបន្ទាប់ពីប៉ះពាល់ជាមួយបក្សី
- ដាក់កុមារនៅឆ្ងាយពីសត្វបក្សី និងដាក់សត្វបក្សីនៅឱ្យឆ្ងាយពីកន្លែងរស់នៅ
- កុំបរិភោគសត្វបក្សីឈឺ ឬងាប់
- និងរាល់សត្វបក្សីដែលត្រូវធ្វើសម្រាប់បរិភោគ ត្រូវចម្អិនឱ្យឆ្អិនល្អ៕