ប្រទេសចិន ដែលតែងតែរិះគន់សហរដ្ឋអាមេរិក និងក្រុមបស្ចិមប្រទេសថាជាអ្នកផ្ចុងផ្ដើមឱ្យមានសង្គ្រាមនៅអ៊ុយក្រែន នៅទីបំផុត បង្ហាញជម្រើសគឺការគាំទ្រសង្គ្រាមរុស្ស៊ី ឈ្លានពានអ៊ុយក្រែន តែម្តង។
អ្វីដែលក្រុងប៉េកាំង ខំលាក់បាំងនៅពេលនេះ បានស្ដែងឃើញហើយតាមរយៈការបង្ហើបព័ត៌មានមួយចេញពីរដ្ឋាភិបាលរុស្ស៊ី ក្រោយពីជំនួបតាមវីដេអូ Call រវាងរដ្ឋមន្ត្រីការពារជាតិរុស្ស៊ី លោក Sergei Shoigu និងរដ្ឋមន្ត្រីការពារជាតិចិន ដែលទើបតែងតាំង គឺលោក Dong Jun កាលពីពេលថ្មីៗនេះ។
តាមសារព័ត៌មាន News Week រដ្ឋមន្ត្រីការពារជាតិចិន លោក Dong Jun បានថ្លែងថា ចិនសូមគាំទ្រពេញទំហឹងចំពោះសង្គ្រាមរុស្ស៊ី នៅលើទឹកដីអ៊ុយក្រែន។ ក្នុងកិច្ចសន្ទនាគ្នានេះ ប្រមុខការពារជាតិនៃប្រទេសទាំងពីរ បានលើកឡើងអំពីកិច្ចសហប្រតិបត្តិការយោធាទ្វេភាគីដែលក្រុងប៉េកាំង ត្រូវឈរជាមួយរុស្ស៊ី ចំពោះសង្គ្រាមនៅអ៊ុយក្រែន។
ជាមួយគ្នានេះ លោករដ្ឋមន្ត្រីការពារជាតិចិន ក៏បានលើកឡើងពីការគាំទ្ររបស់ចិន ចំពោះវិស័យសេដ្ឋកិច្ច ដោយមិនចូលរួមដាក់ទណ្ឌកម្មទៅលើក្រុងមូស្គូ នោះទេ។
សាររបស់ប្រមុខការពារជាតិចិន បានលើកឡើងថា រយៈពេលប៉ុន្មានឆ្នាំចុងក្រោយនេះ សហរដ្ឋអាមេរិក និងក្រុមបស្ចិមប្រទេស ពួកគេបានធ្វើឱ្យរុស្ស៊ី ឯកា ដើរឆ្ងាយពីពិភពលោក ប៉ុន្តែក្រុងប៉េកាំង មិនធ្វើដូច្នេះទេ។ ក្រុងប៉េកាំង គាំទ្ររុស្ស៊ី គឺគាំទ្រយុត្តិធម៌ដែលក្រុងមូស្គូ កំពុងទាមទារ។ ក្រុងប៉េកាំង គាំទ្រក្រុងមូស្គូ ក្នុងជម្លោះជាមួយអ៊ុយក្រែន បើទោះជាក្រុមបស្ចិមប្រទេសដាក់សម្ពាធលើក្រុងប៉េកាំង ក៏ដោយ។ ក្រុងប៉េកាំង មិនបោះបង់ជំហរគាំទ្រក្រុងមូស្គូ ដាច់ខាត ទោះនៅលើវេទិកាណាក៏ដោយ។ ទាំងក្រុងប៉េកាំង និងក្រុងមូស្គូ នៅតែសហការជាមួយគ្នាដើម្បីដោះស្រាយវិបត្តិពិភពលោក។
នៅក្នុងកាលៈទេសៈនេះ គេសង្កេតឃើញរុស្ស៊ី និងចិន ចោទសហរដ្ឋអាមេរិក ថាកំពុងដុតបញ្ឆេះភាពតានតឹងកាន់តែខ្លាំងនៅមជ្ឈិមបូព៌ា។
អំឡុងកិច្ចប្រជុំមួយរបស់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃចន្ទ ទី៥ ខែកុម្ភៈ តំណាងចិន និងរុស្ស៊ី បានចោទសហរដ្ឋអាមេរិកថាជាអ្នកដុតបញ្ឆេះភាពតានតឹងកាន់តែខ្លាំងនៅក្នុងតំបន់មជ្ឈិមបូព៌ា ជាមួយការវាយប្រហារសងសឹកលើចលនាប្រដាប់អាវុធគាំទ្រដោយអ៊ីរ៉ង់ នៅក្នុងប្រទេសស៊ីរី និងអ៊ីរ៉ាក់ កាលពីពេលថ្មីៗនេះ។
កាលពីយប់ថ្ងៃសុក្រសប្ដាហ៍មកនេះ សហរដ្ឋអាមេរិកបានវាយប្រហារតាមផ្លូវអាកាសលើគោលដៅជាច្រើននៅក្នុងប្រទេសស៊ីរី និងអ៊ីរ៉ាក់ ជាការសងសឹកទៅនឹងការវាយប្រហារដោយយន្តហោះដ្រូនដែលសម្លាប់ទាហានអាមេរិក ៣នាក់នៅក្នុងប្រទេសហ្សកដានី កាលពីថ្ងៃទី២៨ ខែមករា។
ការវាយប្រហារតាមផ្លូវអាកាសនេះដែលមានគោលដៅលើកងកម្លាំងអ៊ីរ៉ង់ និងចលនាប្រដាប់អាវុធគាំទ្រដោយអ៊ីរ៉ង់។ មិនតែប៉ុណ្ណោះ សេតវិមាន កាលពីថ្ងៃអាទិត្យ ក៏បានបញ្ជាក់ដែរថា សហរដ្ឋអាមេរិកមានផែនការបើកការវាយប្រហារសងសឹកបន្ថែមទៀត។
ក្នុងសំណុំរឿងនេះ ឯកអគ្គរដ្ឋទូតរុស្ស៊ី ប្រចាំអង្គការសហប្រជាជាតិ លោក Vasily Nebenzia ដែលប្រទេសរបស់លោកជាអ្នកកោះប្រជុំក្រុមប្រឹក្សាសន្តិសុខ បានលើកឡើងថា ការវាយប្រហារតាមផ្លូវអាកាសរបស់សហរដ្ឋអាមេរិក គឺជាចេតនាដុតបញ្ឆេះជម្លោះបន្ថែមទៀតនៅមជ្ឈិមបូព៌ា។
ចំណែកឯកអគ្គរដ្ឋទូតចិន លោក Jun Zhang ក៏បានធ្វើការកត់សម្គាល់ដែរថា សកម្មភាពរបស់សហរដ្ឋអាមេរិក នឹងបង្កទៅជាការសងសឹកដាក់គ្នាទៅវិញទៅមកនៅក្នុងតំបន់មជ្ឈិមបូព៌ា ដែលកាន់តែរាលដាលនូវអំពើហិង្សានៅក្នុងតំបន់។
យ៉ាងណាក៏ដោយ សាររបស់លោក Dong Jun រដ្ឋមន្ត្រីការពារជាតិចិន ដែលតំណាងប្រទេសចិន គាំទ្រសង្គ្រាមរបស់រុស្ស៊ី ឈ្លានពានអ៊ុយក្រែន បើទោះជាមិនមែនជារឿងចម្លែកពិតមែន តែយ៉ាងហោចណាស់បង្ហាញថា ក្រុងប៉េកាំង លាក់បាំងលែងជិតទៀតហើយនូវអត្តចរិតរបស់ខ្លួនក្នុងការប្រកាសថា ជាមហាអំណាចមួយជួយស្ដារសន្តិភាពពិភពលោក បែរជាមិនប្រឆាំងអ្នកបង្កសង្គ្រាម ហើយរឹតតែគាំទ្រសង្គ្រាមនេះទៅវិញ។
ដូច្នេះហើយបានជាចិន នៅគ្រប់វេទិកាអន្តរជាតិទាំងអស់ តែងតែបង្ហាញចរិតមិនច្បាស់លាស់ គឺពេលខ្លះប្រកាន់ជំហរថាខ្លួនជាអ្នកអព្យាក្រឹត្យ ពេលខ្លះក៏បង្ហាញជំហរបែបលម្អៀងបន្តិចទៅរករុស្ស៊ី ដែរ ដូចជានៅឯមហាសន្និបាតអង្គការសហប្រជាជាតិ ចិនព្យាយាមលាក់បាំងចរិតរបស់ខ្លួន ដោយបោះឆ្នោតជំទាស់នៅពេលដែលប្រទេសភាគច្រើនបំផុតថ្កោលទោសរុស្ស៊ី ឈ្លានពានអ៊ុយក្រែន។
នៅពេលមហាសន្និបាតបោះឆ្នោតទាមទាររុស្ស៊ី ដកទ័ពចេញពីអ៊ុយក្រែន ក្រុងប៉េកាំង ក៏បោះឆ្នោតអនុប្បវាទដែរ។ ចំណែកឯនៅក្រុមប្រឹក្សាសន្តិសុខអង្គការសហប្រជាជាតិ តំណាងរបស់ចិនតែងតែពោលពាក្យទាមទារឲ្យពួកបស្ចិមប្រទេសសម្រេចអ្វីមួយដោយឈរលើគោលការណ៍ច្បាប់អន្តរជាតិជាធំ ដូចជាការដាក់ទណ្ឌកម្មទៅលើរុស្ស៊ី ហើយទីបំផុត ក្រុងប៉េកាំង បោះឆ្នោតជំទាស់ ដែលមិនបានធ្វើឱ្យមានដំណោះស្រាយជាផ្លូវការរបស់ស្ថាប័នមួយនេះប្រឆាំងនឹងរុស្ស៊ី នោះទេ។
មកដល់ពេលនេះ ក្រុងប៉េកាំង នៅតែមានទំនាក់ទំនងគ្រប់ជ្រុងជ្រោយទាំងអស់ ទាំងវិស័យយោធា វិស័យពាណិជ្ជកម្ម និងការទូតជាមួយនឹងរុស្ស៊ី។ នៅពេលដែលតុលាការឧក្រិដ្ឋកម្មអន្តរជាតិ ICC ចេញដីកាចាប់ខ្លួនលោក ពូទីន ទីក្រុងប៉េកាំងបង្ហាញការខកចិត្តដែលថាដើម្បីឲ្យមានដំណោះស្រាយសង្គ្រាមនៅអ៊ុយក្រែន គឺមិនត្រូវមានយុត្តាធិការផ្លូវច្បាប់ទៅលើមេដឹកនាំដែលមានបុព្វសិទ្ធិនោះទេ។
ការដែលតំណាងរបស់ចិន ថ្លែងគាំទ្រសង្គ្រាមរបស់រុស្ស៊ី ឈ្លានពានអ៊ុយក្រែន ដូចនេះ វាមិនខុសអីដែលសហរដ្ឋអាមេរិក តែងតែបារម្ភថា ចិនទៅថ្ងៃមុខច្បាស់ជានឹងបញ្ជូនអាវុធទៅឲ្យរុស្ស៊ី ក្នុងការធ្វើសង្គ្រាមនៅលើទឹកដីអ៊ុយក្រែន នោះទេ៕