នៅថ្ងៃព្រហស្បតិ៍ ទី៨ ខែកុម្ភៈ ការបោះឆ្នោតសភានៅក្នុងប្រទេសប៉ាគីស្ថាន បានចាប់ផ្ដើមហើយដោយការិយាល័យបោះឆ្នោតជាង ៩ម៉ឺនកន្លែងនៅទូទាំងប្រទេស ដើម្បីឱ្យប្រជាជនប៉ាគីស្ថាន ដែលមានសិទ្ធិបោះឆ្នោតជាង ១២៨លាននាក់ ទម្លាក់សន្លឹកឆ្នោតរបស់ពួកគេចូលក្នុងហិបបោះឆ្នោត។
តាមទីភ្នាក់ងារព័ត៌មាន AFP ការិយាល័យបោះឆ្នោតបានបើកទ្វារម៉ោង ៨ព្រឹកនៅថ្ងៃព្រហស្បតិ៍ ទី៨ កុម្ភៈ ម៉ោងនៅក្នុងប្រទេសប៉ាគីស្ថាន ហើយនឹងត្រូវបិទទ្វារដើម្បីរាប់សន្លឹកឆ្នោតនៅម៉ោង ៦ល្ងាចថ្ងៃដដែល។
ការបោះឆ្នោតនេះដែរ ធ្វើឡើងចំពេលអ្នកនយោបាយដ៏មានប្រជាប្រិយភាពម្នាក់ គឺអតីតនាយករដ្ឋមន្ត្រី លោក Imran Khan កំពុងជាប់ឃុំក្នុងពន្ធនាគារ ហើយគណបក្ស Pakistan Muslim League-Nawaz ខាងលោក Nawaz Sharif ដែលមានការគាំទ្រពីយោធា ត្រូវគេរំពឹងថាអាចនឹងទទួលបានអាសនៈភាគច្រើននៅក្នុងការបោះឆ្នោតសភាអាណត្តិថ្មីនេះ។
ការបោះឆ្នោតសភាអាណត្តិថ្មីនៃប្រទេសប៉ាគីស្ថាន នឹងធ្វើការជ្រើសរើសនាយករដ្ឋមន្ត្រីថ្មី ហើយប្រសិនបើគ្មានគណបក្សណាមួយទទួលបានសំឡេងភាគច្រើនគ្រប់គ្រាន់ទេ នោះគណបក្សដែលទទួលបានអាសនៈច្រើនជាងគេក្នុងសភា អាចនឹងដឹកនាំការបង្កើតរដ្ឋាភិបាលចម្រុះមួយ។
ការបោះឆ្នោតនៅប៉ាគីស្ថាន គឺជាកំណត់ភូមិសាស្ត្រនយោបាយចិន និងអាមេរិក
អតីតប្រធានាធិបតីប៉ាគីស្ថាន Imran Khan ដែលជាប់ឆ្នោតកាលពីអាណត្តិមុន គឺជាអ្នកនយោបាយល្បីល្បាញដ៏ខ្លាំងក្នុងចំណោមអ្នកនយោបាយប៉ាគីស្ថាន ដទៃទៀត។ អ្នកនយោបាយរូបនេះនៅក្នុងការរកសំឡេងឆ្នោត គាត់បានសន្យាពង្រឹងប្រទេសប៉ាគីស្ថាន ឱ្យក្លាយទៅជាកម្លាំងនយោបាយមួយនៅអាស៊ីខាងត្បូងដែលប្រកាន់ប្រព័ន្ធប្រជាធិបតេយ្យរឹងមាំ តែនៅពេលដែលគាត់ឈ្នះឆ្នោតចូលកាន់តំណែងជានាយករដ្ឋមន្ត្រី បុរសនេះបានដោះដូរគោលជំហររបស់ខ្លួនយ៉ាងសន្សឹមៗងាកចេញពីសហរដ្ឋអាមេរិក ទៅរកប្រទេសចិន ជាមួយនឹងការដែលគាត់ខ្ចីប្រាក់ពីប្រទេសចិន រាប់ពាន់លានដុល្លារ មកធ្វើការអភិវឌ្ឍហេដ្ឋារចនាសម្ព័ន្ធផ្សេងៗដោយរាប់ទាំងការស្ដារហេដ្ឋារចនាសម្ព័ន្ធអគ្គិសនីជាមួយនឹងការផ្ដល់ឲ្យចិន ដាក់ទុនវិនិយោគលើវិស័យដ៏សំខាន់មួយនេះ។
រដ្ឋាភិបាលលោក Imran Khan បែរជាចាប់ផ្ដើមងាកទៅរកចិន ខ្លាំងមែនទែននៅពេលដែលចិន ក៏ចាប់ផ្ដើមទាមទារទាំងប្រាក់ដើម និងការប្រាក់ត្រឡប់មកវិញ។
ជាមួយសម្ពាធរបស់ចិន ដូចនេះ រដ្ឋាភិបាល Imran Khan រកច្រកចេញពុំរួច ហើយក៏ចាប់ផ្ដើមរកមធ្យោបាយដោះបំណុលជាមួយនឹងការផ្ដល់ឲ្យចិន ស្ថាបនាមូលដ្ឋានទ័ពរបស់ចិន នៅលើទឹកដីប៉ាគីស្ថាន ហើយទីបំផុត ក្រុមបក្សប្រឆាំងងើបឡើងបះបោរ ហើយបក្សនៅក្នុងរដ្ឋាភិបាលចម្រុះក៏ជំទាស់នឹងផែនការរបស់លោក Imran Khan។
ទីបំផុត លោក Irmran Khan ត្រូវបានសភាដកហូតអំណាច ព្រោះតែបុរសនេះមិនចូលខ្លួនមកកាន់សភា ដើម្បីឲ្យសភាបោះឆ្នោតទុកចិត្តឡើងវិញ។ នៅខណៈនោះ តុលាការកំពូលបានបង្គាប់ឲ្យលោកចូលខ្លួនទៅសភាម្ដងទៀត។ ទីបំផុត សភាដែលរួបរួមកម្លាំងជាមួយនឹងក្រុមបក្សដែលមាននិន្នាការទៅរកបក្សខាងលោក Irmran Khan ក៏បោះឆ្នោតទម្លាក់ Irmram Khan ពីអំណាច។
ឥឡូវនេះ លោក Imran Khan មានទោសជាច្រើនឆ្នាំដោយតុលាការរកកំហុសឃើញសំណុំរឿងច្រើនយ៉ាង ដូចជា ការដឹកនាំប្រទេសធ្វើឲ្យមានវិបត្តិសង្គម ការប្រព្រឹត្តអំពើពុករលួយ និងចុងក្រោយ តុលាការរកឃើញថា លោក Imran Khan រៀបមង្គលការដោយពុំឆ្លងកាត់តាមធម្មវិន័យក្នុងសាសនាឥស្លាម។
ប៉ុន្តែទាំងអស់នេះ លោក Imran Khan ច្រានចោល ហើយចាត់ទុកថាជាសំណុំរឿងនយោបាយប្រឆាំងនឹងរូបលោកដែលឃារឃាំងលោកមិនឲ្យចូលរួមការបោះឆ្នោត។
បេក្ខជននាយករដ្ឋមន្ត្រីដែលធ្លាប់កាន់តំណែងនាយករដ្ឋមន្ត្រីជាច្រើនអាណត្តិ ហើយទើបតែវិលចូលប្រទេសវិញ គឺជាអ្នកនយោបាយមាននិន្នាការទៅរកសហរដ្ឋអាមេរិក គឺលោក Nawaz Sharif។ បុរសនេះមាននិន្នាការខ្លាំងទៅរកពួកបស្ចិមប្រទេស និងសហរដ្ឋអាមេរិក។ លោកជាមេដឹកនាំបក្សនយោបាយម្នាក់ដែលគេរំពឹងថាអាចនឹងឈ្នះឆ្នោតច្រើនជាងមេដឹកនាំបក្សនយោបាយទាំងអស់។
អ្នកសង្កេតការណ៍មើលឃើញថា លោក Nawaz Sharif បើឈ្នះឆ្នោតនៅក្នុងការបោះឆ្នោតនៅថ្ងៃនេះ វាមិនខុសអីដែលប៉ាគីស្ថាន ដោះដូរភូមិសាស្ត្រនយោបាយ គឺងាកខ្លួនចេញពីចិន ទៅរកពួកបស្ចិមប្រទេស៕