ឃាតកម្មនយោបាយ និងគំនុំនយោបាយនៅប្រទេសប៉ាគីស្ថាន ទៅលើមេដឹកនាំកំពូលៗ គឺជារឿងផុយស្រួយបំផុត។ ប្រទេសអាស៊ីខាងត្បូងមួយនេះ បានដើរឆ្លងកាត់រដ្ឋប្រហារ និងការកាត់ទោសមេដឹកនាំកំពូលក៏ជារឿងងាយបំផុត។
តុលាការកំពូលរបស់ប្រទេសនេះហ៊ានជល់ជាមួយប្រធានាធិបតី និងនាយករដ្ឋមន្ត្រី ឲ្យតែស្រាវជ្រាវរកឃើញកំហុសរំលោភរដ្ឋធម្មនុញ្ញ និងករណីពុករលួយ ក្បត់ជាតិ ដែលកន្លងមកមេដឹកនាំនយោបាយកំពុងកាន់អំណាចជាច្រើននាក់ហើយត្រូវបានតុលាការរបស់ប្រទេសនេះកាត់ទោស ហើយរុញឲ្យធ្លាក់ពីអំណាចតែម្ដង។
ជាក់ស្ដែង នាយករដ្ឋមន្ត្រី Imran Khan បានខ្ទាតចេញពីអំណាចកាលពីខែមេសា ឆ្នាំ២០២២ ដោយញត្តិស្ដីបន្ទោសលោកធ្លាក់ចូលរដ្ឋសភា គឺមួយថ្ងៃបន្ទាប់ពីតុលាការកំពូលចេញដីកាបង្គាប់ឲ្យសភាបោះឆ្នោតសម្ដែងសេចក្ដីទុកចិត្តលោកជាថ្មីមានឋានៈនាយករដ្ឋមន្ត្រី។
នៅពេលនោះ សភាក្រុមប្រឆាំងប្រមូលកម្លាំងគ្នាក៏រុញលោកធ្លាក់ពីអំណាចតែម្ដង ដោយសារគេបន្ទោសលោកថាដឹកនាំប្រទេសកើនបំណុលគរដូចភ្នំ ហើយភាគច្រើនជាប់បំណុលរបស់ចិន។ លើសពីនេះទៅទៀតនោះ លោកត្រូវបានចោទថាមាននិន្នាការជ្រុលនិយមទៅរកប្រទេសចិន ដែលគេចោទថាលោកមានផែនការជួលដីឲ្យចិនស្ថាបនាមូលដ្ឋានទ័ពចិននៅលើទឹកដីប៉ាគីស្ថាន ហើយមួយទៀត គឺសំណុំរឿងពុករលួយ។
សំណុំរឿងទាំងនេះហើយបានរុញឱ្យតុលាការកំពូលរបស់ប្រទេសនេះបង្គាប់ឱ្យពិនិត្យឡើងវិញនូវគោលជំហរនយោបាយរបស់លោក Imran Khan។ ក្រោយពីធ្លាក់ពីអំណាចភ្លាម លោក Imran Khan បានប្រកាសធ្វើសកម្មភាពនយោបាយសងសឹក ទោះជាគណៈកម្មការបោះឆ្នោតប៉ាគីស្ថានបានសម្រេចហាមមិនឲ្យលោកឈរឈ្មោះបោះឆ្នោតរយៈពេល ៥ឆ្នាំក៏ដោយ។
ការសម្រេចរបស់គណៈកម្មការបោះឆ្នោត បានរុញឲ្យអ្នកគាំទ្រលោក Imran Khan ផ្ទុះកំហឹងដោយសងសឹកវាយបំផ្លាញរថយន្តនៅខាងក្រៅការិយាល័យរបស់គណៈកម្មការបោះឆ្នោត។ នៅពេលនោះ ប៉ូលិសប៉ាគីស្ថានបានចាប់ឃាត់ខ្លួនមនុស្សជាច្រើននាក់។
លោក Imran Khan បានផ្តើមធ្វើសកម្មភាពនយោបាយឡើងវិញដោយដឹកនាំក្បួនតវ៉ាពេញផ្ទៃប្រទេស តាំងពីថ្ងៃសុក្រសប្តាហ៍មុន ហើយក្បួននេះសំដៅទៅទីក្រុងអ៊ីស្លាម៉ាបាត ដើម្បីដាក់សម្ពាធឱ្យរដ្ឋាភិបាលចម្រុះរៀបចំការបោះឆ្នោតមុនអាណត្តិ ប៉ុន្តែនៅពេលជួបជុំនៅក្រុង Gujranwala ភាគខាងកើតប្រទេស ស្រាប់តែមានហេតុការណ៍បាញ់កាំភ្លើងក្នុងហ្វូងបាតុករដែលបានធ្វើឱ្យលោក Imran Khan រងរបួសជាច្រើនគ្រាប់នៅត្រង់ជើង។
បើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters ដែលស្រង់សម្ដីលោក Asad Umar ជាជំនួយការរបស់លោក Khan បាននិយាយថា បុរសម្នាក់បានបើកការបាញ់ប្រហារដោយអាវុធស្វ័យប្រវត្តិ បណ្ដាលឲ្យមនុស្សជាច្រើននាក់បានរងរបួស។ លោក Imran Khan ក៏រងរបួសផងដែរ ហើយភ្លាមៗនោះ លោក Khan ត្រូវបានបញ្ជូនទៅកាន់មន្ទីរពេទ្យ។
លោក Imran Khan វ័យ ៧០ឆ្នាំជាអតីតកីឡាករគ្រីឃីតដ៏ល្បីរូបនេះ លោកបានចោទនាយករដ្ឋមន្ត្រីដែលយកតំណែងពីលោក គឺ Shehbaz Sharif ថាជាអ្នកនៅពីក្រោយការវាយប្រហារនេះ។ យ៉ាងណាក៏ដោយ លោក Shehbaz Sharif បានថ្កោលទោសការបាញ់ប្រហារនេះ ហើយបានបញ្ជាឱ្យរដ្ឋមន្ត្រីក្រសួងមហាផ្ទៃបើកការស៊ើបអង្កេតជាបន្ទាន់។
លោក Imran Khan បានជាប់ឆ្នោតក្លាយជានាយករដ្ឋមន្ត្រីប៉ាគីស្ថាន នៅឆ្នាំ២០១៨ ក្រោយពីបក្សរបស់លោកបានទទួលជោគជ័យក្នុងការបោះឆ្នោតសភា។
ការប៉ុនប៉ងធ្វើឃាតអតីតនាយករដ្ឋមន្ត្រី Imran Khan នាំឲ្យមានការគិតទៅរកការធ្វើឃាតអ្នកស្រី Benazir Bhutto កាលពីចុងឆ្នាំ២០០៧។ ការធ្វើឃាតនេះ កើតឡើងនៅពេលស្ត្រីអ្នកនយោបាយដ៏មានប្រជាប្រិយភាពរូបនេះកំពុងឃោសនារកសំឡេងឆ្នោត។ នាយករដ្ឋមន្ត្រីភេទស្រីដំបូងគេរបស់ប៉ាគីស្ថានរូបនេះ ត្រូវគេធ្វើឃាតនៅក្នុងស្ថានភាពជាភេរវកម្មមួយ។
អ្នកស្រី Bhutto គឺជាស្ត្រីទីមួយដែលបានជាប់ឆ្នោតជាអ្នកដឹកនាំប្រទេសក្នុងពិភពអីស្លាម ហើយបានក្លាយជានាយករដ្ឋមន្ត្រីប៉ាគីស្ថានចំនួនពីរលើក គឺរវាងឆ្នាំ១៩៨៨-១៩៩០ និងឆ្នាំ១៩៩៣-១៩៩៦។ អ្នកស្រី Bhutto បានស្បថចូលកាន់តំណែងជានាយករដ្ឋមន្ត្រីប៉ាគីស្ថានជាលើកដំបូងនៅឆ្នាំ១៩៨៨ នៅអាយុ ៣៥ឆ្នាំ ប៉ុន្តែអ្នកស្រីត្រូវបានបណ្ដេញចេញពីតំណែងក្នុងរយៈពេល ២០ខែក្រោយមក ដោយសារលោកប្រធានាធិបតី Ghulam Ishaq Khan បានចោទអ្នកស្រីពីបទប្រព្រឹត្តអំពើពុករលួយ។
នៅឆ្នាំ១៩៩៣ អ្នកស្រីបានជាប់ឆ្នោតជានាយករដ្ឋមន្ត្រីសាជាថ្មី ប៉ុន្តែអ្នកស្រីត្រូវបានបណ្ដេញពីតំណែងម្ដងទៀត ដោយរងបទចោទប្រកាន់ដូចមុនដោយប្រធានាធិបតី Farooq Leghai។
អ្នកស្រីបានធ្វើការនិរទេសដោយខ្លួនឯងទៅទីក្រុង Dubai នៅឆ្នាំ១៩៩៨។ អ្នកស្រី Benazir Bhutto បានធ្វើមាតុភូមិនិវត្តន៍មកកាន់មាតុប្រទេសវិញនៅថ្ងៃទី១៨ ខែតុលា ឆ្នាំ២០០៧ ក្រោយពីមានការយល់ព្រមពីលោកប្រធានាធិបតី Pervez Musharraf។ ពេលនោះ អ្នកស្រីបានទាមទារឱ្យមានការលើកលែងទោស និងដកចេញនូវរាល់បទចោទប្រកាន់ទាំងឡាយដែលប្រឆាំងនឹងអ្នកស្រី។
អ្នកស្រីត្រូវបានគេធ្វើឃាតនៅថ្ងៃទី២៧ ខែធ្នូ ឆ្នាំ២០០៧ ក្រោយពីការចាកចេញពីកិច្ចប្រជុំដ៏ធំរបស់គណបក្សប្រជាជនប៉ាគីស្ថាន ដែលអ្នកស្រីជាប្រធានបក្សនេះ។ អ្នកស្រីបានស្លាប់នៅក្នុងយុទ្ធនាការឃោសនាស្វែងរកបោះឆ្នោតនៅទីក្រុង Rawalpindi តែពីរសប្ដាហ៍ប៉ុណ្ណោះមុនការបោះឆ្នោតសភា ឈានចូលមកដល់នៅថ្ងៃទី០៨ ខែមករា ឆ្នាំ២០០៨ ហើយអ្នកស្រីផ្ទាល់គឺជាបេក្ខជននាយករដ្ឋមន្ត្រីនៃគណបក្សប្រឆាំងដ៏ធំជាងគេនេះ។ ទីបំផុត បក្សរបស់អ្នកស្រីបានឈ្នះឆ្នោត ហើយអនុប្រធានបក្សរបស់អ្នកស្រី គឺលោក Yousaf Raza Gillani បានឡើងកាន់តំណែងនាយករដ្ឋមន្ត្រី៕