ព្រះមហាក្សត្រខ្មែរសម្តេចព្រះបរមនាថ សីហមុនី ត្រាស់បង្គាប់ផ្តល់សញ្ជាតិខ្មែរដល់ជនជាតិវៀតណាម ឈ្មោះ ហា វ៉ាន់ហៀវ (Ha Van Hieu) ដែលជាជនជាតិវៀតណាមដំបូងគេទទួលបានសញ្ជាតិខ្មែរតាមការស្នើសុំពីនាយករដ្ឋមន្ត្រីថ្មីលោក ហ៊ុន ម៉ាណែត ក្រោយពីឡើងកាន់តំណែងបានជាង ១ខែ (៤៤ថ្ងៃ)។
ព្រះមហាក្សត្រខ្មែរ ព្រះបាទសម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យកាលពីថ្ងៃទី៤ ខែតុលា ឆ្នាំ២០២៣ ដែលត្រូវបានផ្សព្វផ្សាយនៅថ្ងៃទី១៣ កុម្ភៈ នេះ សម្រេចផ្តល់សញ្ជាតិខ្មែរដល់ជនជាតិវៀតណាម ឈ្មោះ ហា វ៉ាន់ហៀវ (Ha Van Hieu) តាមសំណើទូលថ្វាយពីនាយករដ្ឋមន្ត្រី ហ៊ុន ម៉ាណែត ប៉ុន្តែជនជាតិវៀតណាមរូបនេះមិនបានប្តូរឈ្មោះមកជាលំនាំខ្មែរដូចជនជាតិវៀតណាម ដែលទទួលបានសញ្ជាតិខ្មែរមុនៗនោះទេ។
ព្រះរាជ្យក្រឹត្យខាងលើបញ្ជាក់ថា ការផ្តល់សញ្ជាតិខ្មែរឱ្យជនជាតិវៀតណាមរូបនេះ គឺធ្វើឡើងតាមរយៈអាពាហ៍ពិពាហ៍រវាងឈ្មោះ ហា វ៉ាន់ហៀវ នេះដែលមានដើមកំណើតជាជនជាតិគីញ សញ្ជាតិវៀតណាម កើតនៅទីក្រុងហាណូយ សាធារណរដ្ឋសង្គមនិយមវៀតណាម ឆ្នាំ១៩៨២ និងជនជាតិខ្មែរ។
ការផ្តល់សញ្ជាតិខ្មែរដល់ជនជាតិវៀតណាម ពីសំណាក់លោក ហ៊ុន ម៉ាណែត នេះ ធ្វើឡើងដូចគ្នាទៅនឹងលោក ហ៊ុន សែន ដែលតែងតែផ្តល់សញ្ជាតិខ្មែរដល់ជនជាតិវៀតណាម ក្នុងតំណែងជានាយករដ្ឋមន្ត្រីនាពេលកន្លងមកនោះដែរ។
ច្បាប់ស្ដីពីសញ្ជាតិឆ្នាំ១៩៩៦ ចែងថា ការទទួលបានសញ្ជាតិខ្មែរអាចកើតឡើងបាននៅក្នុងករណីដែលបុគ្គលណាម្នាក់ទទួលសញ្ជាតិខ្មែរពីកំណើត ឬតាមរយៈអាពាហ៍ពិពាហ៍ និងការសុំចូលសញ្ជាតិដែលហៅថា សញ្ជាតូបនីយកម្ម ជាដើម។
ទោះជាយ៉ាងណាក៏ដោយ ច្បាប់ស្ដីពីសញ្ជាតិនេះត្រូវបានព្រះមហាក្សត្រ នរោត្តម សីហមុនី ឡាយព្រះហស្តលេខាឱ្យប្រើប្រាស់ជាថ្មីកាលពីថ្ងៃទី២១ ខែមិថុនា ឆ្នាំ២០១៨ បន្ទាប់ពីរាជរដ្ឋាភិបាលបានផ្ដួចផ្ដើមកែប្រែនូវខ្លឹមសារមួយចំនួន ក្នុងនោះ ខ្លឹមសារថ្មីនៃច្បាប់ស្ដីពីសញ្ជាតិថ្មីនេះបានប្រគល់សិទ្ធិទាំងស្រុងទៅឲ្យនាយករដ្ឋមន្ត្រីជាអ្នកកំណត់ក្នុងអនុក្រឹត្យ ប្រសិនបើជនបរទេសទាំងឡាយណាដែលចង់ទិញសញ្ជាតិខ្មែរក្រៅពីរៀបអាពាហ៍ពិពាហ៍នោះ។
លោក ហ៊ុន ម៉ាណែត ចាប់ផ្តើមផ្តល់សញ្ជាតិខ្មែរលើកដំបូងឱ្យជនជាតិវៀតណាម តាមគន្លងលោក ហ៊ុន សែន ដែលជាឪពុក ក្រោយឡើងកាន់តំណែងជានាយករដ្ឋមន្ត្រីកម្ពុជាបានត្រឹមតែរយៈពេល ៤៤ថ្ងៃ ឬ ១ខែ ១៤ថ្ងៃប៉ុណ្ណោះ។
កាលពីថ្ងៃទី១១ ខែធ្នូ ឆ្នាំ២០២៣ ក្រោយពេលដែលលោកត្រូវបានតែងតាំងជាអនុប្រធានគណបក្សប្រជាជនកម្ពុជា មេដឹកនាំវៀតណាមជាច្រើន ដូចជានាយករដ្ឋមន្ត្រីវៀតណាម លោក ផាម ម៉ិញជីញ លោក ង្វៀន ហ្វូជុង អគ្គលេខាធិការមជ្ឈិមបក្សកុម្មុយនីស្តវៀតណាម លោក វ៉ វ៉ាន់ធឿង ប្រធានរដ្ឋវៀតណាម និងលោក វឿង ឌិញហ្វេ ប្រធានសភាប្រជាជនវៀតណាម បានស្នើឱ្យលោក ហ៊ុន ម៉ាណែត ជួយអនុវត្តនូវសំណើនានាពីរដ្ឋាភិបាលវៀតណាមគ្រប់បែបយ៉ាង ដូចជា ការផ្តល់សញ្ជាតិដល់ជនជាតិវៀតណាមដែលកំពុងរស់នៅលើទឹកដីខ្មែរដោយខុសច្បាប់ ឱ្យមកជារស់នៅដោយស្របច្បាប់ និងឱ្យជួយពន្លឿនការធ្វើឱ្យស្របច្បាប់នូវឯកសារនានាដែលលោក ហ៊ុន សែន ធ្លាប់បានយល់ព្រមជាមួយរដ្ឋាភិបាលវៀតណាម ខណៈសំណើទាំងនោះ លោក ហ៊ុន ម៉ាណែត មិនបដិសេធឡើយ។
ជុំវិញការស្នើសុំផ្តល់សញ្ជាតិខ្មែរឱ្យជនបរទេសនេះ កាលពីដើមឆ្នាំ២០២៣ មេដឹកនាំបក្សកាន់អំណាចលោក ហ៊ុន សែន ក៏បានស្នើព្រះមហាក្សត្រខ្មែរផ្តល់សញ្ជាតិខ្មែរដល់ជនជាតិវៀតណាម ជាច្រើននាក់ដែរ តាមច្បាប់សញ្ជាតូបនីយកម្ម។ លើសពីនេះ ជនជាតិវៀតណាមទាំងនោះបាននាំគ្នាប្តូរឈ្មោះតាមលំនាំខ្មែរគ្រប់ៗគ្នា ដូចជា ឈ្មោះ ណុង វ៉ាន់គីម ប្តូរមកជា រិទ្ធិ សម្បត្តិ ឈ្មោះ ង្វៀន វ៉ានទីវ ប្តូរឈ្មោះមកជា ហួរ សុធី ឈ្មោះ ហ្វាម ធានហ្វុក ប្តូរឈ្មោះមកជា ធេង ឧត្តម និងឈ្មោះ ង្វៀន ឈីវធីញហ៊ុង ប្តូរឈ្មោះមកជា មាន បញ្ញា ជាដើម និងមានជនជាតិវៀតណាមជាច្រើនទៀត។ ដទៃពីផ្តល់សញ្ជាតិ ព្រះអង្គក៏បានប្រទានងារឥស្សរិយយសដល់នាយទាហានយៀកណាមជាច្រើននាក់ផងដែរ។
មជ្ឈដ្ឋានពលរដ្ឋខ្មែរសួរថា តើការផ្តល់ប្រទានសញ្ជាតិខ្មែរឲ្យជនជាតិយៀកណាម ទោះជាដូរ ឬមិនដូរឈ្មោះក្តី រដ្ឋអំណាចមានសមត្ថកិច្ច បានស្រាវជ្រាវល្អិតល្អន់អំពីជីវប្រវត្តិមនុស្សម្នាក់ៗមុនចូលសញ្ជាតិដូចនៅប្រទេសគោរពច្បាប់ដែរ ឬក៏អត់នោះទេ។
កាលពីថ្ងៃទី២៦ ខែកុម្ភៈ ឆ្នាំ១៩៨៦ មេដឹកនាំខ្មែរដែលវៀតណាមលើកបន្តុប លោក ហ៊ុន សែន បានចុះហត្ថលេខាលើសារាចរណែនាំស្ដីពីការអនុវត្តគោលនយោបាយចំពោះអាណិកជន/និគមជនវៀតណាមនៅប្រទេសកម្ពុជា ដែលតម្រូវឲ្យរដ្ឋអំណាចនៃសាធារណរដ្ឋប្រជាមានិតកម្ពុជា ផ្តល់ដីធ្លី ទីជម្រក ផ្តល់អត្តសញ្ញាណប័ណ្ណ ថែរក្សា និងផ្គត់ផ្គង់ជីវភាពឲ្យបានត្រឹមត្រូវ។
សារាចរនេះនៅតែមានសុពលភាពរហូតដល់សព្វថ្ងៃនេះ ហើយប្រទេសកម្ពុជាក៏កំពុងតែអនុវត្តនូវការផ្តល់សិទ្ធិរស់នៅដល់ជនអន្តោប្រវេសន៍វៀតណាមខុសច្បាប់លើទឹកដីរបស់ខ្លួនជាបន្តបន្ទាប់ផងដែរនៅពេលនេះ។
ទាក់ទិននឹងបញ្ហានេះ កាលពីថ្ងៃទី២ ខែធ្នូ ឆ្នាំ២០២៣ ប្រធានរដ្ឋសភាប្រទេសកម្ពុជា អ្នកស្រី ឃួន សុដារី បានជួបពិភាក្សាទ្វេភាគីជាមួយមេដឹកនាំវៀតណាម ក្រោយអ្នកស្រីឡើងកាន់តំណែងជាប្រធានរដ្ឋសភាសម្រាប់អាណត្តិដឹកនាំដោយលោក ហ៊ុន ម៉ាណែត ក្នុងនោះ អ្នកស្រី ឃួន សុដារី បានសន្យាជាមួយប្រធានរដ្ឋសភាវៀតណាម លោក វឿង ឌិញហ្វេ (VUONG Dinh Hue) ថា រាជរដ្ឋាភិបាលកម្ពុជានឹងជួយសម្រួលឯកសារផ្លូវច្បាប់ដល់ពលរដ្ឋវៀតណាម ដែលកំពុងរស់នៅដោយខុសច្បាប់ក្នុងទឹកដីកម្ពុជាបន្តទៀត ខណៈពលរដ្ឋវៀតណាមប្រមាណជាង ១សែននាក់ បានទទួលបណ្ណស្នាក់អចិន្ត្រៃយ៍ ឬកាតលឿងទៅហើយនោះ៕