អតីតមេដឹកនាំបក្សប្រឆាំងលោក សម រង្ស៊ី ជំរុញឱ្យនាយករដ្ឋមន្ត្រីបន្តពូជថ្មីរបស់កម្ពុជាលោក ហ៊ុន ម៉ាណែត ចាប់ខ្លួនលោក ហ៊ុន សែន ដែលជាឪពុកដាក់គុក ប្រសិនបើគាត់ពិតជាមានបំណងពិតប្រាកដក្នុងការអនុវត្តវិធានការច្បាប់បិទបនល្បែងស៊ីសងនៅទូទាំងប្រទេសពិតប្រាកដមែននោះ ព្រោះថាបនល្បែងទាំងអស់នោះបានកើតឡើងដោយសារលោក ហ៊ុន សែន ជាអ្នកបើកដៃឲ្យរកស៊ីនាពេលកន្លងមក។
អតីតមេដឹកនាំគណបក្សសង្គ្រោះជាតិលោក សម រង្ស៊ី សរសេរលើទំព័រហ្វេសប៊ុករបស់ខ្លួនកាលពីថ្ងៃទី១៥ ខែកុម្ភៈ ថា ការអនុញ្ញាតឱ្យបើក និងការប្រកាសបិទបនល្បែងគ្រប់ប្រភេទទាំងអស់នៅក្នុងប្រទេសកម្ពុជានៅពេលនេះ គ្រាន់តែជាល្បិចកលកេងចំណេញនយោបាយរបស់ឪពុក និងកូននៃត្រកូលហ៊ុនតែប៉ុណ្ណោះ ព្រោះថាបើលោក ហ៊ុន ម៉ាណែត ចិត្តសឿងមែន គាត់ត្រូវតែបញ្ជាឱ្យចាប់ខ្លួនលោក ហ៊ុន សែន នៅពេលនេះតែម្តង ត្បិតភស្តុតាងគឺមានគ្រប់គ្រាន់ដែលបញ្ជាក់ពីបទល្មើសជាក់ស្តែងរបស់អតីតនាយករដ្ឋមន្ត្រីខ្មែររូបនេះ។
អតីតមេដឹកនាំបក្សប្រឆាំងរូបនេះអះអាងថា គ្រប់ទីតាំង និងក្រុមហ៊ុនល្បែងស៊ីសងទាំងអស់ រួមទាំងកាស៊ីណូផងដែលកំពុងប្រតិបត្តិការប្រមូលលុយនៅក្នុងប្រទេសកម្ពុជាសព្វថ្ងៃនេះ សុទ្ធតែបានស្នើសុំ និងមានការអនុញ្ញាតពីមេដឹកនាំបក្សកាន់អំណាចលោក ហ៊ុន សែន ដូច្នេះលោក ហ៊ុន ម៉ាណែត មានភស្តុតាងគ្រប់គ្រាន់អាចចាប់ខ្លួនលោក ហ៊ុន សែន ពេលណាក៏ដោយដោយយោងតាមលិខិតស្នើសុំទាំងនោះ។
លោក សម រង្ស៊ី បញ្ជាក់ថា ផ្អែកតាមលិខិតស្នើសុំទាំងនោះ បង្ហាញថា មេដឹកនាំបក្សកាន់អំណាចលោក ហ៊ុន សែន គឺជាអ្នកអនុញ្ញាតឱ្យបើកបនល្បែងគ្រប់ប្រភេទនាពេលកន្លងមកក្នុងឋានៈជានាយករដ្ឋមន្ត្រី ប៉ុន្តែនៅពេលដែលកូនគាត់ គឺលោក ហ៊ុន ម៉ាណែត បែរជាប្រកាសឱ្យបិទបនល្បែងទាំងនោះវិញ ស្របពេលដែលលោក ហ៊ុន ម៉ាណែត នៅក្រោមបញ្ជាឪពុកគាត់នោះ ដូច្នេះមានន័យថា នេះគ្រាន់តែជាល្បិចកលប្រជាភិថុតិនយោបាយរបស់ឪពុក និងកូនទាំងពីរនាក់នេះ ដើម្បីបោកបញ្ឆោតពលរដ្ឋតែប៉ុណ្ណោះ ដែលមានន័យថា ពួកគេមិនបានបិទបនល្បែងទាំងនោះដោយពិតប្រាកដនោះទេ។
កាលពីថ្ងៃទី១៥ ខែកុម្ភៈ ឆ្នាំ២០២៤ អតីតមេដឹកនាំបក្សប្រឆាំងលោក សម រង្ស៊ី បានបង្ហោះលិខិតស្នើសុំបើកបនល្បែងស៊ីសងមួយចំនួនលើទំព័រហ្វេសប៊ុករបស់លោក ក្នុងនោះរួមមាន លិខិតរបស់រដ្ឋលេខាធិការទីស្ដីការគណៈរដ្ឋមន្ត្រី បានស្នើសុំទៅលោក ហ៊ុន សែន កាលពីអំឡុងខែមីនា ឆ្នាំ២០១៧ ក្នុងការសាងសង់មជ្ឈមណ្ឌលកម្សាន្ត ដូចជា សណ្ឋាគារ រីហ្ស៊ត រង្គសាលទំនើប ក្លឹបល្បែងផ្សងសំណាង ដូចជា កាស៊ីណូ ឆ្នោតឡូតូ ឆ្នោតកោស ល្បែងប្រណាំងសេះ ប្រណាំងឆ្កែ ល្បែងកូនហ្គោល និងល្បែងភ្នាល់តាមអ៊ីនធឺណិតទាំងក្នុង និងក្រៅប្រទេស ជាដើម។
ជាងនេះទៀត មានដូចជាស្លុតម៉ាស៊ីន បាការ៉ាត់ ហ្គេមលេងតាមតុ ម៉ាស៊ីនអេឡិចត្រូនិក និងកីឡាភ្នាល់ ដែលបានកំណត់យកទីតាំងក្នុងខេត្តព្រះសីហនុ ដែលជាសំណើរបស់ក្រុមហ៊ុន លី ហុងផឹង អីនដាសស្ទ្រី ឯ.ក (LY HONG PHENG INDUSTRY) របស់លោក លី ហុងផឹង ដែលជាជនជាតិចិន ទទួលបានសញ្ជាតិខ្មែរកាលពីថ្ងៃទី៣ ខែមីនា ឆ្នាំ២០១៧ កន្លងទៅនោះ។
ក្រោយការស្នើសុំបាន ៤សប្តាហ៍ នៅថ្ងៃទី២៨ ខែមីនា ឆ្នាំ២០១៧ ទីស្ដីការគណៈរដ្ឋមន្ត្រីបានចេញលិខិតបញ្ជាក់ថា លោក ហ៊ុន សែន បានអនុញ្ញាតឱ្យដំណើរការបនល្បែងដែលមានក្រុមហ៊ុន លី ហុងផឹង ជាអ្នកស្នើសុំ។ បន្ថែមពីនេះ ក្រុមហ៊ុន ថៃយ៉ាង ឈិន អ៊ីឡឹ ឯ.ក របស់លោក លូ វេ ក៏បានដាក់សំណើទៅលោក ហ៊ុន សែន បើកបនល្បែងស៊ីសងកាលពីឆ្នាំ២០០១ កន្លងទៅដែរ។
ទាក់ទិននឹងបញ្ហានេះ កាលពីថ្ងៃទី១៤ ខែកុម្ភៈ ឆ្នាំ២០២៤ នាយករដ្ឋមន្ត្រីកម្ពុជាលោក ហ៊ុន ម៉ាណែត បានបញ្ជាឱ្យអភិបាលរាជធានីខេត្តទាំង ២៥ ចាត់វិធានការត្រួតពិនិត្យស្រាវជ្រាវរកទីតាំងអាជីវកម្មល្បែងផ្សងសំណាងនានាក្នុងមូលដ្ឋានរបស់ខ្លួន ដើម្បីចាត់វិធានការដកហូតអាជ្ញាបណ្ណពីម្ចាស់ក្រុមហ៊ុនល្បែងទាំងនោះ ក្នុងករណីម្ចាស់អាជីវកម្មល្បែងផ្សងសំណាងទាំងនោះបើកទីតាំងល្បែងថ្មីៗបន្តទៀត។
លោក ហ៊ុន ម៉ាណែត ព្រមានថា ក្នុងករណីមានការបើកទីតាំងផ្សងសំណាងថ្មីៗ អាជ្ញាធរត្រូវតែបិទទីតាំងទាំងនោះជាបន្ទាន់ និងរាយការណ៍ទៅនាយករដ្ឋមន្ត្រីដោយផ្ទាល់ ព្រោះថាដំណាក់កាលនេះ គឺជាពេលវេលាដែលត្រូវចូលរួមទាំងអស់គ្នាក្នុងការអនុវត្តគោលនយោបាយរបស់រាជរដ្ឋាភិបាល ដើម្បីបង្កើនការអភិវឌ្ឍ មិនមែនជាពេលវេលាដែលត្រូវពង្រាយទីតាំងល្បែងនោះទេ។
ទាក់ទិននឹងបញ្ហានេះ កាលពីថ្ងៃទី១៧ ខែកញ្ញា ឆ្នាំ២០២២ អតីតនាយករដ្ឋមន្ត្រីលោក ហ៊ុន សែន ក៏ធ្លាប់បានចេញបទបញ្ជាឱ្យបង្ក្រាបល្បែងស៊ីសងគ្រប់ប្រភេទ រាប់តាំងពីឡូតូ និងកន្ទុយលេខ ដោយភ្ជាប់សារព្រមានដកតំណែងអភិបាលរាជធានី-ខេត្ត ខណ្ឌ ក្រុង ស្រុក ដែលអសកម្មលើបញ្ហានេះផងដែរ ប៉ុន្តែគេមិនដែលឃើញលោក ហ៊ុន សែន ដកតំណែងមន្ត្រីណាម្នាក់ជុំវិញករណីនេះម្តងឡើយ ខណៈល្បែងស៊ីសងទាំងនោះនៅតែបន្តប្រតិបត្តិការរហូតមកដល់ពេលនេះ។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ លើកឡើងថា បើចង់បង្ក្រាបល្បែងស៊ីសងនៅកម្ពុជាឱ្យមានប្រសិទ្ធភាព ទាល់តែលោក ហ៊ុន ម៉ាណែត ហ៊ានអនុវត្តច្បាប់ចាប់សមាជិកគ្រួសារហ៊ុនដែលពាក់ព័ន្ធចូលគុក ដូចជាលោក ហ៊ុន តូ ជាដើម ព្រោះថានៅកម្ពុជាគ្មានជំនួញអបាយមុខណាមួយទាំងតូចទាំងធំ អាចដំណើរការរលូនទៅបានក្រៅក្រសែភ្នែកគ្រួសារហ៊ុនឡើយ ទោះល្បែងស៊ីសងប្រភេទណា និងកម្រិតណាក៏ដោយ៕