តុលាការខេត្តព្រះសីហនុ សម្រេចផ្ដន្ទាទោសជនជាតិចិន ២នាក់ដែលផលិតវីដេអូបំផ្លើសការពិតពាក់ព័ន្ធនឹងការជួញដូរមនុស្សនៅកម្ពុជា ឱ្យជាប់ពន្ធនាគារពីរឆ្នាំ និងពិន័យជាប្រាក់ ៤លានរៀល ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សង្គម»។
យោងតាមសេចក្ដីប្រកាសព័ត៌មានរបស់តុលាការខេត្តព្រះសីហនុ បានឲ្យដឹងថា ជនជាតិចិនតៃវ៉ាន់ ២នាក់ បានចូលមកកម្ពុជាក្នុងគោលបំណងផលិតវីដេអូបំផ្លើសការពិតពាក់ព័ន្ធនឹងការជួញដូរមនុស្ស ការបង្ខាំងធ្វើទារុណកម្ម អំពើចាប់រំលោភ និងការលក់សរីរាង្គមនុស្ស។
ប្រភពដដែលអះអាងថា កាលពីថ្ងៃទី១២ ខែកុម្ភៈ ជនជាតិចិនតៃវ៉ាន់ទាំងពីរនាក់នោះ បានចូលទៅអគារមួយកន្លែងក្នុងក្រុងព្រះសីហនុ ហើយពួកគេបានថតសម្ដែងដោយផ្សាយលើគណនីហ្វេសប៊ុក WA AN XIAO JI ថាពួកគេត្រូវបានសន្តិសុខចាប់ខ្លួន និងវាយដំ។ លុះដល់ថ្ងៃទី១៣ ខែកុម្ភៈ ពួកគេបានផ្សាយផ្ទាល់ជាថ្មីម្ដងទៀតនៅម្ដុំឆៃណាថោន ក្នុងក្រុងព្រះសីហនុ ពីសកម្មភាពរត់គេចខ្លួន ហើយសម្ដែងពីការធ្វើជាភ័យខ្លាច និងស្រែកឱ្យគេជួយ។
អភិបាលខេត្តព្រះសីហនុ លោក គួច ចំរើន បានធ្វើសន្និសីទកាសែតមួយនៅរសៀលថ្ងៃទី១៥ ខែកុម្ភៈ ថា ជនជាតិចិនតៃវ៉ាន់ទាំង ២នាក់ត្រូវបានស្នងការដ្ឋាននគរបាលខេត្តព្រះសីហនុ ចាប់ខ្លួនក្នុងថ្ងៃទី១៤ ខែកុម្ភៈ បន្ទាប់ពីរកឃើញថា ពួកគេបានផលិតវីដេអូញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
លោក គួច ចំរើន បានបញ្ជាក់ថា យោងតាមចម្លើយសារភាព បុរសជនជាតិចិនតៃវ៉ាន់ទាំង ២នាក់នេះពិតជាមានគំនិតមកប្រទេសកម្ពុជាដើម្បីថតរូបភាពវីដេអូពាក់ព័ន្ធនឹងឧក្រិដ្ឋកម្ម ការចាប់ជំរិត និងការបង្ខាំងមនុស្ស ដោយបានគិតគូររៀបចំទុកជាមុនតាំងពីពាក់កណ្តាលខែមករា មកម្ល៉េះ។ ពួកគេបានមកដល់ប្រទេសកម្ពុជានៅថ្ងៃទី១១ ខែកុម្ភៈ និងបានថតវីដេអូបំភ្លៃមួយផ្សព្វផ្សាយនៅក្នុងបណ្ដាញសង្គម។
ប្រតិបត្តិការតាមចាប់ជនជាតិចិនតៃវ៉ាន់ទាំង ២នាក់នេះ បានធ្វើឡើងបន្ទាប់ពីពួកគេបានផ្សាយវីដេអូបន្តផ្ទាល់មួយនៅលើបណ្ដាញសង្គមហ្វេសប៊ុកតាមរយៈគណនីឈ្មោះ Goodnight Chicken កាលពីថ្ងៃទី១២ ខែកុម្ភៈ។
គណនីឈ្មោះ Goodnight Chicken ជារបស់ជនសង្ស័យម្នាក់ដែលមានឈ្មោះពិត Chen Neng Chuan ក្នុងចំណោមជនសង្ស័យ ២នាក់ដែលអាជ្ញាធរខេត្តព្រះសីហនុ ចាប់ខ្លួន។ នៅក្នុងវីដេអូដែលផ្សាយបន្តផ្ទាល់ Goodnight Chicken ដែលរាងកាយមានសភាពរងរបួសពីការវាយដំ បានប្រាប់អ្នកទស្សនារាប់ពាន់នាក់ថា ខ្លួនកំពុងស្ថិតក្នុងអគារមួយនៅខេត្តព្រះសីហនុ និងកំពុងរត់គេចចេញពីការចាប់ជំរិតដោយក្រុមជនទុច្ចរិត។
ព័ត៌មានរបស់ពួកគេក៏បានចុះផ្សាយដោយសារព័ត៌មាន Taiwan News នៅថ្ងៃទី១៤ កុម្ភៈ ដោយលើកឡើងថាមិនមែនជាលើកទីមួយទេដែលបុរសជនជាតិតៃវ៉ាន់ Chen Neng Chuan ត្រូវប្រឈមនឹងបណ្តឹងផ្លូវច្បាប់ក្នុងទង្វើបំផ្លាញទ្រព្យសម្បត្តិអ្នកដទៃ បំផ្លើស និងបំភ្លៃសាច់រឿង ដោយធ្វើការផ្សាយវីដេអូរបស់ខ្លួនតាមបណ្ដាញសង្គម។
សារព័ត៌មាន Taiwan News បានសរសេរថា ជនជាតិតៃវ៉ាន់ឈ្មោះ Chen Neng Chuan ឬ Goodnight Chicken ធ្លាប់ត្រូវបានម្ចាស់អគារក្នុងក្រុង Changhua និងកោះ Kinmen ដាក់ពាក្យបណ្តឹងពីបទបានបំផ្លាញទ្រព្យសម្បត្តិរបស់ពួកគេ ដើម្បីថតវីដេអូផ្សេងៗសម្រាប់ផ្សាយផ្ទាល់តាមហ្វេសប៊ុក ដូចជាហេតុការណ៍ជួបខ្មោចលង ឬហេតុការណ៍គេចចេញពីឃាតកម្ម ជាដើម។
កាលពីដើមខែសីហា ឆ្នាំ២០២៣ ខ្សែភាពយន្តខ្នាតធំរបស់ចិនឈ្មោះ No More Bets ដែលមានន័យថា សូមបញ្ឈប់ការភ្នាល់ បានធ្វើឱ្យអ្នកទស្សនាមានការភ័យខ្លាច និងមិនហ៊ានទៅលេងប្រទេសកម្ពុជា ព្រោះតែខ្សែភាពយន្តមួយនេះបានបញ្ជាក់ជាភាសាអង់គ្លេសថា Base On Real Case ដែលមានន័យថា ផ្អែកតាមរឿងពិត ១សែនករណីនៃអំពើជួញដូរមនុស្ស ខណៈរដ្ឋាភិបាលចិន ក៏កំពុងធ្វើយុទ្ធនាការផ្សព្វផ្សាយឱ្យមានការយល់ដឹងជាសាធារណៈអំពីការឆបោកដែលបានរៀបរាប់ក្នុងខ្សែភាពយន្តរឿង No More Bets នេះផងដែរ។
ខ្សែភាពយន្តនេះបានតម្រូវឱ្យតួអង្គក្នុងរឿងពាក់អាវដែលមានអក្សរខ្មែរ និងរថយន្តក្នុងសាច់រឿងនេះក៏មានបិទអក្សរខ្មែរផងដែរ ដែលទំនងជាមានបំណងលាតត្រដាងអំពីការជួញដូរមនុស្សនៅកម្ពុជា ហើយសាច់រឿងនេះក៏បានបង្ហាញពីការធ្វើទារុណកម្មរបស់ក្រុមឧក្រិដ្ឋជនទៅលើជនរងគ្រោះយ៉ាងព្រៃផ្សៃដែរ ដូចជាការលក់មនុស្សឱ្យបម្រើសេវាកម្មផ្លូវភេទ ការចាក់បញ្ចូលថ្នាំញៀនឱ្យទទួលភ្ញៀវ ការបាញ់សម្លាប់ជនរងគ្រោះដែលមានបំណងលួចរត់ ការដកក្រចក ការយកស្គុតរុំច្រមុះឱ្យថប់ដង្ហើម កាត់ស្លឹកត្រចៀក ច្រានជនរងគ្រោះទម្លាក់ពីលើអគារ និងការវះយកគ្រឿងក្នុងជនរងគ្រោះទៅលក់ក្នុងទីផ្សារងងឹត ជាដើម ដែលធ្វើឱ្យអ្នកទស្សនាភ័យខ្លាច និងព្រឺព្រួចជាខ្លាំង។
ទាក់ទិននឹងបញ្ហានេះ ក្រសួងការបរទេសអាមេរិក កាលពីចុងឆ្នាំ២០២២ បានបញ្ចេញរបាយការណ៍របស់ខ្លួនស្ដីពីការជួញដូរមនុស្ស ដោយបានដាក់ប្រទេសកម្ពុជាចូលក្នុងបញ្ជីខ្មៅស្ថិតក្រោមការឃ្លាំមើលកម្រិត៣ (Tier 3 Watch List) ដែលបញ្ជាក់ថា កម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរនៅឡើយសព្វថ្ងៃនេះ៕