ការរបូតទីក្រុង Avdiivka នៅក្នុងដៃរបស់កងទ័ពរុស្ស៊ី បានក្លាយជាប្រធានបទនៃការលើកមកជជែកគ្នាក្នុងចំណោមអ្នកនយោបាយសហរដ្ឋអាមេរិក ក្រោយពីមជ្ឈដ្ឋានមួយចំនួនរិះគន់ថា ដោយសារសហរដ្ឋអាមេរិក ជាពិសេសសមាជិកសភាមកពីបក្សសាធារណរដ្ឋ ធ្វើឱ្យមានឧបសគ្គនៃការទម្លាក់កញ្ចប់ជំនួយយោធាដើម្បីផ្គត់ផ្គង់អាវុធជាបន្ទាន់ទៅឱ្យអ៊ុយក្រែន។
រដ្ឋការរបស់លោក ចូ បៃដិន បានដាក់កញ្ជប់ជំនួយយោធានូវសាច់ប្រាក់ ៦០ពាន់លានដុល្លារសម្រាប់ជួយដល់អ៊ុយក្រែន តែគម្រោងជំនួយនេះត្រូវបានបក្សសាធារណរដ្ឋធ្វើឱ្យខកខានជាង ៣ខែ ហើយឥឡូវនេះនៅតែជាប់គាំងក្នុងដៃរដ្ឋសភា ដែលគណបក្សសាធារណរដ្ឋគ្រប់គ្រងស្ថាប័នសភាជាន់ទាបនេះ។
កាលពីសប្ដាហ៍មុន សមាជិកព្រឹទ្ធសភាដែលមកពីបក្សប្រជាធិបតេយ្យគ្រប់គ្រង បានអនុម័តឱ្យអ៊ុយក្រែន ទទួលបានជំនួយយោធា និងជំនួយផ្សេងៗទៀតដល់ទៅ ៦១ពាន់លានដុល្លារអាមេរិក។ នៅក្នុងការអនុម័តនេះ សមាជិកព្រឹទ្ធសភាមកពីបក្សសាធារណរដ្ឋដល់ ២២នាក់ បានគាំទ្រ ដែលធ្វើឱ្យសំឡេងគាំទ្រមានរហូតដល់ទៅ ៧០ ក្នុងចំណោមសមាជិកព្រឹទ្ធសភា ១០០រូប។
ក្រុមអ្នកសង្កេតការណ៍មើលឃើញថា សមាជិករដ្ឋសភាទំនងនឹងមិនបង្កឱ្យមានឧបសគ្គរាំងខ្ទប់សេចក្ដីសម្រេចរបស់ព្រឹទ្ធសភានោះទេ ព្រោះស្ថានភាពពេលនេះវាជារឿងចាំបាច់ដែលសហរដ្ឋអាមេរិកត្រូវពង្រឹងតួនាទីខ្លួនឡើងវិញស័ក្ដិសមជាប្រទេសមហាអំណាចទីមួយនៃពិភពលោក ដែលត្រូវជួយប្រទេសទន់ខ្សោយរងគ្រោះដោយសារសង្គ្រាមឈ្លានពានពីប្រទេសមានអំណាច។
ក្នុងកញ្ចប់ថវិកាទំហំ ៩៥ពាន់ ៣៤០លានដុល្លារ អ៊ុយក្រែនទទួលបាន ៦១ពាន់លានដុល្លារតាមគម្រោងរបស់លោក ចូ បៃដិន ហើយថវិកា ១៤ពាន់លានដុល្លារសម្រាប់អ៊ីស្រាអែល ដែលកំពុងធ្វើសង្គ្រាមសងសឹកនឹងពួកសកម្មប្រយុទ្ធហាម៉ាស-ប៉ាឡេស្ទីន ហើយ ៤ពាន់ ៨៣០លានដុល្លារទៀត គាំទ្រប្រទេសក្នុងតំបន់អាស៊ីប៉ាស៊ីហ្វិក ដែលទប់ទល់កម្លាំងបំពានពីសំណាក់ប្រទេសចិន មានសម្រាប់កោះតៃវ៉ាន់ ផងដែរ។
ចំណែកឯថវិកាចំនួន ៩ពាន់ ១៥០លានដុល្លារជាជំនួយមនុស្សធម៌សម្រាប់ប្រជាជនប៉ាឡេស្ទីន ដែលរងគ្រោះនៅតំបន់ហ្កាហ្សា និងតំបន់ west bank និងសម្រាប់ប្រជាជនអ៊ុយក្រែន រួមទាំងជួយដល់វិបត្តិទាំងឡាយរបស់ប្រជាជននៅទូទាំងពិភពលោក។
ជុំវិញការរបូតទីក្រុង Avdiivka ទៅក្នុងដៃកងទ័ពរុស្ស៊ី បាននាំឱ្យមជ្ឈដ្ឋានមួយចំនួន រួមទាំងសមាជិកសភា និងសមាជិកព្រឹទ្ធសភាមកពីបក្សប្រជាធិបតេយ្យ វាយប្រហារគណបក្សសាធារណរដ្ឋ ដោយបានហៅថាជាកំហុសមួយដែលនាំឱ្យអ៊ុយក្រែន ជួបផលវិបាកក្នុងការវាយរុញច្រានទ័ពរុស្ស៊ី គឺមិនថាតែសមរភូមិនៃទីក្រុង Avdiivka នោះទេ គឺសមរភូមិភាគច្រើននៅភាគខាងកើត និងខាងត្បូង ក៏រុស្ស៊ី កំពុងមានប្រៀបជាងអ៊ុយក្រែន។
សម្រាប់លោក ចូ បៃដិន ប្រធានាធិបតីមកពីបក្សប្រជាធិបតេយ្យ ក៏បានសម្ដែងការសោកស្ដាយផងដែរ។ លោកទទូចថា សហរដ្ឋអាមេរិកមិនត្រូវធ្វើឱ្យមានកំហុសចំពោះប្រជាជនអ៊ុយក្រែន នោះទេ ហើយមិនត្រូវផ្ដល់ឱកាសឱ្យរុស្ស៊ី ឈ្នះអ៊ុយក្រែន នោះទេ។ លោកបញ្ជាក់ថា អ៊ុយក្រែន ជាកម្លាំងមួយសម្រាប់ប្រជាធិបតេយ្យនៅអឺរ៉ុប។ លោកព្រមានថា បើរុស្ស៊ី វាយយកបានអ៊ុយក្រែន គឺអឺរ៉ុប ជាពិសេសអឺរ៉ុបខាងកើត នឹងត្រូវរងការឈ្លានពានពីរុស្ស៊ី។
តែយ៉ាងណា លោក ចូ បៃដិន សង្ឃឹមថា សមាជិករដ្ឋសភានឹងគិតពិចារណាម្ដងទៀតនូវកំហុសបង្កឧបសគ្គចំពោះការអនុម័តជំនួយយោធាទៅឱ្យអ៊ុយក្រែន។
លោក បៃដិន បានប្រាប់លោក ហ្សេឡេនស្គី ថា លោកត្រូវមានជំនឿចិត្តលើសហរដ្ឋអាមេរិក ដែលលោកថា ក្រុងវ៉ាស៊ីនតោន នឹងមិនបោះបង់អ៊ុយក្រែន ដាច់ខាត ទោះកាលៈទេសៈណាក៏ដោយ។ លោក បៃដិន អះអាងថា លោកសង្ឃឹមថាសមាជិកសភានឹងប្រជុំអនុម័តលើកញ្ចប់ជំនួយសម្រាប់យោធាអ៊ុយក្រែន និងជំនួយផ្សេងៗទៀតនៅពេលឆាប់ៗនេះ។
លោក បៃដិន បានបញ្ជាក់ដូចនេះអំឡុងលោកសន្ទនាគ្នាតាមទូរសព្ទជាមួយលោក ហ្សេឡេនស្គី កាលពីថ្ងៃសៅរ៍ ទី១៧ ខែកុម្ភៈ ក្រោយពីការរបូតទីក្រុង Avdiivka ធ្លាក់នៅក្នុងដៃកងទ័ពរុស្ស៊ី។
សម្រាប់លោក វ៉្លាឌីមៀ ពូទីន ប្រធានាធិបតីរុស្ស៊ី បានថ្លែងសារអបអរសាទរកងទ័ពរបស់លោក ដែលវាយយកបានទីក្រុង Avdiivka។ លោក ពូទីន ចាត់ទុកជាជោគជ័យមួយដ៏សំខាន់សម្រាប់ប្រទេសរុស្ស៊ី។
រដ្ឋាភិបាលលោក ហ្សេឡេនស្គី និងអគ្គបញ្ជាការកងទ័ពអ៊ុយក្រែន បានសម្រេចឱ្យកងទ័ពដែលប្រយុទ្ធនៅទីក្រុង Avdiivka ដកទ័ពចេញពីសមរភូមិមួយនេះ ដោយតាមក្បួនយុទ្ធសាស្ត្ររបស់កងទ័ព គឺជាការបញ្ចៀសការស្លាប់កងទ័ពច្រើនហួសប្រមាណ។
ទីក្រុង Avdiivka ស្ថិតនៅក្នុងខេត្តដូណេត នៅភាគខាងកើត។ វាជាសមរភូមិយុទ្ធសាស្ត្រក្នុងខេត្តនេះដែលរុស្ស៊ី ព្យាយាមវាយកាន់កាប់ជាង ៩ខែមកហើយពីកងទ័ពអ៊ុយក្រែន។ តាមសេចក្ដីរាយការណ៍របស់បណ្ដាញផ្សាយព័ត៌មាន BBC ទីក្រុងមួយនេះបានធ្លាក់ក្នុងដៃកងទ័ពរុស្ស៊ី នៅថ្ងៃទី១៦ កុម្ភៈ។
តែជាមួយគ្នានេះ សារព័ត៌មាននៃប្រទេសអ៊ុយក្រែន ដែលបានស្រង់តួលេខចេញពីកងទ័ពអ៊ុយក្រែន បានឱ្យដឹងថា មុននឹងរុស្ស៊ី វាយយកបានទីក្រុង Avdiivka រុស្ស៊ីបានបាត់បង់រថក្រោះ រថពាសដែក និងកាំភ្លើងធំដល់ទៅ ៤០០គ្រឿង និងបាត់បង់កងទ័ពជាច្រើនម៉ឺននាក់៕