រុស្ស៊ី បានបើកការឈ្លានពានអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២ ដែលនៅពេលនេះនៅសល់តែមួយថ្ងៃទៀតប៉ុណ្ណោះ សង្គ្រាមរុស្ស៊ីឈ្លានពានអ៊ុយក្រែន នឹងឈានចូលឆ្នាំទីបី។
ក្នុងស្ថានភាពដែលរុស្ស៊ី ចាប់ផ្ដើមមានប្រៀបជាងអ៊ុយក្រែន នៅលើសមរភូមិ ការស្ទង់មតិមួយរបស់ក្រុមប្រឹក្សាអឺរ៉ុបនៃទំនាក់ទំនងអន្តរជាតិ បានបង្ហាញថា ភាពឈ្នះសង្គ្រាមរបស់អ៊ុយក្រែន មានឱកាសតិចតួចណាស់។
ការស្ទង់មតិរបស់ក្រុមប្រឹក្សាអឺរ៉ុប បាននិយាយថា ពលរដ្ឋក្នុងទ្វីបអឺរ៉ុបមានជំនឿត្រឹមតែ ១០% ទេ ដែលថាអ៊ុយក្រែន អាចឈ្នះសង្គ្រាមលើរុស្ស៊ី ហើយជិត ២០% និយាយថា រុស្ស៊ីនឹងឈ្នះលើសង្គ្រាមក្នុងទឹកដីអ៊ុយក្រែន ប៉ុន្តែ ៣៧% ឆ្លើយថាសង្គ្រាមនឹងបញ្ចប់ទៅវិញបានដោយសារតែមានការធ្វើសម្បទានទឹកដីពីអ៊ុយក្រែន។
ការស្ទង់មតិរបស់ក្រុមប្រឹក្សាអឺរ៉ុប ធ្វើឡើងទៅលើពលរដ្ឋជាង ១ម៉ឺន ៧ពាន់នាក់នៅ ១២ប្រទេស ហើយធ្វើឡើងកាលពីខែមករា ឆ្នាំ២០២៤។ នេះបើតាមសារព័ត៌មានសហរដ្ឋអាមេរិក Politico ដែលបានចុះផ្សាយនៅថ្ងៃទី២២ កុម្ភៈ។
ការស្ទង់មតិនេះ ធ្វើឡើងបន្ទាប់ពីអ៊ុយក្រែន ទទួលស្គាល់នូវភាពស្វិតស្វាញលំបាកនៅលើសមរភូមិក្នុងស្ថានភាពនៃជំនួយយោធារបស់ពួកបស្ចិមប្រទេស និងសហរដ្ឋអាមេរិកមិនមានភាពរលូនដូចបណ្ដាខែមុនៗ។
ចំពេលនេះទៀត រុស្ស៊ីបានបង្កើនការវាយប្រហារដណ្តើមយកទីតាំងមួយដ៏សំខាន់ គឺទីក្រុង Avdiivka នៅក្នុងតំបន់ដុនបាសភាគខាងកើត។ ការបាត់បង់ទីក្រុងដ៏សំខាន់នេះ មានសេចក្តីរាយការណ៍ថា កងទ័ពអ៊ុយក្រែន ប្រមាណពី ៨៥០ ដល់ ១ពាន់នាក់ បានបាត់ខ្លួន និងត្រូវបានចាប់ជាឈ្លើយសឹក ខណៈត្រូវកងទ័ពរុស្ស៊ី វាយខ្ទប់យ៉ាងខ្លាំង។
ការបាត់ខ្លួនកងទ័ពអ៊ុយក្រែនជាច្រើនរយនាក់នេះ នៅមុនខួបគម្រប់ ២ឆ្នាំនៃការឈ្លានពានរបស់រុស្ស៊ី ឈានចូលឆ្នាំទី៣ នៅថ្ងៃទី២៤ កុម្ភៈ។
ការចូលគ្រប់គ្រងរបស់រុស្ស៊ី ក្នុងក្រុង Avdiivka ត្រូវគេចាត់ទុកថាជាការបាត់បង់យុទ្ធសាស្ត្ររបស់កងទ័ពអ៊ុយក្រែន។
ការបាត់បង់ទីក្រុង Avdiivka បាននាំឱ្យមានការរិះគន់ខ្លាំងទៅលើសហរដ្ឋអាមេរិក ជាពិសេសក្រុមសមាជិកសភាមកពីបក្សសាធារណរដ្ឋ ដែលធ្វើឱ្យរាំងស្ទះជំនួយ ៦១ពាន់លានដុល្លាររបស់រដ្ឋការលោក ចូ បៃដិន សម្រាប់អ៊ុយក្រែន ហើយខណៈនេះទៀត គម្រោងជំនួយនេះកំពុងជាប់គាំងក្នុងស្ថាប័នសភាតំណាងរាស្ត្រ។
ការបាត់បង់ទីក្រុង Avdiivka បាននាំឱ្យមានក្តីបារម្ភនូវរូបភាពមិនច្បាស់លាស់នៃគោលដៅវាយបករបស់កងទ័ពអ៊ុយក្រែន ដើម្បីបន្តប្រយុទ្ធក្នុងឆ្នាំទីបី។
តែជាមួយគ្នានេះ សហភាពអឺរ៉ុបបានអនុម័តនូវការដាក់ចេញនូវកញ្ចប់ទណ្ឌកម្មទី១៣ ប្រឆាំងរុស្ស៊ី ដោយកំណត់គោលដៅលើក្រុមបុគ្គល និងអាជីវកម្មដែលជួយរបបក្រុងមូស្គូ ធ្វើសង្គ្រាមនៅអ៊ុយក្រែន។ ការសម្រេចនេះ ធ្វើឡើងខណៈដែលជិតដល់ខួប ២ឆ្នាំនៃការឈ្លានពានរបស់រុស្ស៊ី ថ្ងៃទី២៤ ខែកុម្ភៈ ឆ្នាំ២០២២។
នៅឆ្នាំ២០២៤ នេះ ប្រទេសបែលហ្សិក កាន់តំណែងជាប្រធាននៃក្រុមសហគមន៍អឺរ៉ុប ២៧ប្រទេស។ ប្រទេសបែលហ្សិក បាននិយាយថា នេះជាកញ្ចប់ទណ្ឌកម្មដ៏ធំមួយដែលអនុម័តដោយសហភាពអឺរ៉ុប។ បើតាមក្រុមអ្នកការទូត ឯកអគ្គរដ្ឋទូតនៃបណ្តាប្រទេសជាសមាជិកសហភាពអឺរ៉ុប បានយល់ស្របគ្នាដាក់ចេញនូវទណ្ឌកម្មលើក្រុមហ៊ុន និងបុគ្គលប្រហែល ២០០ ក្នុងនោះក៏មានក្រុមហ៊ុនចិនមួយចំនួនដែលសង្ស័យថាបានជួយរុស្ស៊ី ធ្វើការឈ្លានពានអ៊ុយក្រែន។
កញ្ចប់ទណ្ឌកម្មថ្មីនេះ នឹងពង្រឹងការរឹតត្បិតលើពាណិជ្ជកម្មប្រឆាំងនឹងអង្គភាពដែលពាក់ព័ន្ធនឹងឧស្សាហកម្មយោធារុស្ស៊ី ជាមួយនឹងការបន្ថែមការហាមឃាត់លើការនាំចេញទៅកាន់រុស្ស៊ី ដូចជាសម្ភារៈបច្ចេកវិទ្យាទំនើបសម្រាប់ផលិតយន្តហោះដ្រូន ជាដើម។
អ្នកស្រី Ursula von der Leyen ប្រធានគណៈកម្មការអឺរ៉ុប បានបញ្ជាក់ថា អ្នកស្រីសូមស្វាគមន៍ចំពោះការព្រមព្រៀងគ្នាលើទណ្ឌកម្មទី១៣ នេះ ហើយត្រូវបន្តរារាំងដល់ដំណើរការសង្គ្រាមរបស់លោក ពូទីន រហូតរុស្ស៊ី បិទបញ្ចប់ការឈ្លានពានអ៊ុយក្រែន។
សហភាពអឺរ៉ុប បានចេញនូវទណ្ឌកម្មជាច្រើនប្រឆាំងរុស្ស៊ី ចាប់តាំងពីសង្គ្រាមនៅអ៊ុយក្រែន ផ្ទុះឡើងដោយកំណត់គោលដៅលើវិស័យថាមពល ធនាគារ ក្រុមហ៊ុនជីកយករ៉ែពេជ្រដ៏ធំរបស់រុស្ស៊ី អាជីវកម្ម និងទីផ្សារ រួមទាំងការបង្កកទ្រព្យសម្បត្តិ និងហាមឃាត់ការធ្វើដំណើររបស់មន្ត្រីសំខាន់ៗរុស្ស៊ី។
ក្នុងពេលនេះ សហភាពអឺរ៉ុបក៏បានអនុម័តនូវវិធានផ្លូវច្បាប់ដែលនឹងរឹបអូសទ្រព្យសម្បត្តិរបស់រុស្ស៊ី ដែលមាននៅលើទឹកដីអឺរ៉ុប ហើយគិតជាទំហំសាច់ប្រាក់ប្រមាណជា ៣០០ពាន់លានដុល្លារអាមេរិក។
ស្របពេលនេះទៀត សហរដ្ឋអាមេរិក និងប្រទេសឧស្សាហកម្ម G-7 ក៏បានសម្រេចថានឹងបង្កើតច្បាប់ទណ្ឌកម្មថ្មីប្រឆាំងនឹងរុស្ស៊ី ដោយបង្កក និងរឹបអូសទ្រព្យសម្បត្តិរបស់រុស្ស៊ីទាំងអស់ដែលមាននៅបណ្ដាប្រទេស G-7។ ប្រទេស G-7 មានសហរដ្ឋអាមេរិក អាល្លឺម៉ង់ អង់គ្លេស ជប៉ុន បារាំង កាណាដា និងអ៊ីតាលី។
វិធានការនេះ សំដៅជួយអ៊ុយក្រែន ឱ្យមានលទ្ធភាពប្រើប្រាស់ទ្រព្យសម្បត្តិរបស់រុស្ស៊ី និងលើកទឹកចិត្តអ៊ុយក្រែន ក្លាយជាដៃគូផលិតអាវុធដើម្បីធ្វើសង្គ្រាមប្រឆាំងនឹងការឈ្លានពានរបស់រុស្ស៊ី៕