គ្រួសារដែលមានកូនរងគ្រោះពីការប្រើប្រាស់ម្សៅទឹកដោះគោ នូទ្រីលេត (Nutrilatt) ជាង ២០គ្រួសារ (២១គ្រួសារ) អង្វរសុំឱ្យនាយករដ្ឋមន្ត្រីកម្ពុជា លោក ហ៊ុន ម៉ាណែត ជួយអន្តរាគមន៍ឱ្យម្ចាស់ក្រុមហ៊ុន នូទ្រីលេត ម៉ាស្ទ័រ អិលអឹម (Nutrilatt Master LM Co. LTD) អ្នកស្រី ខុន កែវកេសី ផ្តល់សំណងជំងឺចិត្តដល់ពួកគេ ក្រោយពីសំណុំរឿងនេះអូសបន្លាយអស់ជិត ៤ឆ្នាំ និងជាប់គាំងនៅតុលាការកំពូលសព្វថ្ងៃនេះ។
អាណាព្យាបាលទារករងគ្រោះពីការប្រើម្សៅទឹកដោះគោ នូទ្រីលេត (Nutrilatt) របស់ក្រុមហ៊ុន នូទ្រីលេត ម៉ាស្ទ័រ អិលអឹម បានដាក់ញត្តិជូននាយករដ្ឋមន្ត្រីកម្ពុជាលោក ហ៊ុន ម៉ាណែត កាលពីថ្ងៃទី២២ ខែកុម្ភៈ ឆ្នាំ២០២៤ ដែលភ្ជាប់នូវលទ្ធផលនៃការធ្វើតេស្ដម្សៅទឹកដោះគោចិញ្ចឹមទារកនូទ្រីលេត និងសាលក្រមតុលាការ ដោយអះអាងថា ក្រោយកូនៗរបស់ពួកគេប្រើប្រាស់ម្សៅទឹកដោះគោនូទ្រីលេត តាំងពីឆ្នាំ២០១៩ មក បានធ្វើឱ្យទារកទាំងនោះខ្វះគ្រាប់ឈាមក្រហម ខ្វះជាតិដែក និងខ្វះជាតិស័ង្កសីធ្ងន់ធ្ងរ។
ប្រភពដដែលរៀបរាប់ថា នៅអំឡុងឆ្នាំ២០២០ អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (កបប) បានចុះទៅបង្ក្រាបក្រុមហ៊ុនម្សៅទឹកដោះគោ នូទ្រីលេត (Nutrilatt) ដែលជាទីតាំងចែកចាយម្សៅទឹកដោះគោនេះ និងបានរកឃើញថា ម្សៅទឹកដោះគោនេះពិតជាផលិតផលក្លែងក្លាយប្រាកដមែន ក្នុងនោះអាណាព្យាបាលទារករងគ្រោះទាំងជាង ២០គ្រួសារ (២១គ្រួសារ) ក៏បានដាក់ពាក្យបណ្តឹងទៅសាលាដំបូងរាជធានីភ្នំពេញ កាលពីដើមខែធ្នូ ឆ្នាំ២០២០ ដើម្បីរកយុត្តិធម៌ផងដែរ។
ក្រុមអាណាព្យាបាលនៃទារករងគ្រោះអះអាងថា ក្រោយទទួលបានពាក្យបណ្តឹង តុលាការក៏បន្តនីតិវិធីជាបន្តបន្ទាប់រហូតដល់ថ្ងៃទី១ ខែមេសា ឆ្នាំ២០២២ និងបានប្រកាសសាលក្រមផ្ដន្ទាទោសម្ចាស់ក្រុមហ៊ុនម្សៅទឹកដោះគោ នូទ្រីលេត (Nutrilatt) អ្នកស្រី ខុន កែវកេសី ឱ្យជាប់ពន្ធនាគារ ១០ខែ និងពិន័យជាប្រាក់ ៨លានរៀនចូលរដ្ឋ និងតម្រូវឱ្យសងជំងឺចិត្តដល់គ្រួសាររងគ្រោះចាប់ពី ១ម៉ឺនដុល្លារដល់ ២ម៉ឺនដុល្លារអាមេរិក តាមភាពជាក់ស្តែង ទៅដល់គ្រួសារទាំង ២១គ្រួសារនេះផងដែរ ដែលគិតជាទឹកប្រាក់សរុបមានចំនួនជាង ៣០ម៉ឺនដុល្លារអាមេរិក (៣៤៩៣៩៣ដុល្លារអាមេរិក)។
អាណាព្យាបាលទារករងគ្រោះទាំង ២១គ្រួសារ ក៏បានអំពាវនាវសុំឱ្យស្ថាប័នតុលាការពន្លឿនសំណុំរឿងនេះ ដើម្បីជួយរកយុត្តិធម៌ឱ្យពួកគេដែលបានរងគ្រោះដោយការខូចខាតទាំងទ្រព្យសម្បត្តិ លុយកាក់ ពេលវេលា និងសុខភាពកូនៗរបស់ពួកគេ ក្រោយបរិភោគម្សៅទឹកដោះគោ នូទ្រីលេត (Nutrilatt) របស់ក្រុមហ៊ុន នូទ្រីលេត ម៉ាស្ទ័រ អិលអឹម នេះ។ ជាងនេះទៀត ក៏ដើម្បីបង្ហាញអំពីការរួមចំណែកក្នុងការជួយពង្រឹងការអនុវត្តច្បាប់លើសុវត្ថិភាពផលិតផលទារក និងកុមារដែលបាននាំចូលមកចែកចាយក្នុងប្រទេសកម្ពុជាផងដែរ។
ការអំពាវនាវនេះ ធ្វើឡើងបន្ទាប់ពីតុលាការកំពូលពន្យារពេលប្រកាសសាលក្រមលើសំណុំរឿងព្រហ្មទណ្ឌម្សៅទឹកដោះគោ នូទ្រីលេត តាំងពីចុងឆ្នាំ២០២៣ រហូតដល់ពេលនេះ។
កាលពីថ្ងៃទី១ ខែមេសា ឆ្នាំ២០២២ សាលាដំបូងរាជធានីភ្នំពេញ បានប្រកាសសាលក្រមឱ្យម្ចាស់ក្រុមហ៊ុនម្សៅទឹកដោះគោ នូទ្រីលេត ម៉ាស្ទ័រ អិលអឹម អ្នកស្រី ខុន កែវកេសី ចាញ់ក្តី ដោយសម្រេចដាក់ពន្ធនាគាររយៈពេល ១០ខែ និងពិន័យថវិកាចូលរដ្ឋ ៨លានរៀល ព្រមទាំងតម្រូវឱ្យផ្តល់សំណងជំងឺចិត្តដល់គ្រួសារកុមាររងគ្រោះចំនួន ២១នាក់ ចាប់ពីជាង ១ម៉ឺនដុល្លារអាមេរិករហូតដល់ជាង ២ម៉ឺនដុល្លារអាមេរិក សម្រាប់គ្រួសាររងគ្រោះនីមួយៗ តាមមាត្រា២១ និងមាត្រា៦៣ នៃច្បាប់ស្ដីពីការគ្រប់គ្រងគុណភាព សុវត្ថិភាពលើផលិតផលទំនិញ និងសេវា បន្ទាប់ពីរកឃើញថាក្រុមហ៊ុនម្សៅទឹកដោះគោ នូទ្រីលេត ផ្សាយពាណិជ្ជកម្មកុហក ក្លែងបន្លំសុវត្ថិភាពផលិតផលរបស់ខ្លួនកាលពីអំឡុងឆ្នាំ២០១៩។
ទាក់ទិននឹងបញ្ហានេះ កាលពីថ្ងៃទី២៧ ខែមេសា ឆ្នាំ២០២៣ សាលាឧទ្ធរណ៍ក្រុងភ្នំពេញ ក៏បានប្រកាសសាលក្រមដោយចាត់ទុកសាលក្រមសាលាដំបូងទុកជាបានការដែរ ប៉ុន្តែនៅថ្ងៃទី២៦ ខែឧសភា ឆ្នាំ២០២៣ អ្នកស្រី ខុន កែវកេសី បានប្តឹងជំទាស់នឹងសាលដីកាសាលាឧទ្ធរណ៍ ទៅតុលាការកំពូល ខណៈតុលាការកំពូល ក៏គ្រោងនឹងបើកសវនាការលើសំណុំរឿងនេះនៅថ្ងៃទី១៣ ខែធ្នូ ឆ្នាំ២០២៣ ដែរ ប៉ុន្តែសវនាការនេះ ត្រូវពន្យារពេលទៅវិញ បន្ទាប់ពីមេធាវីតំណាងឱ្យចុងចោទបានចោទប្រកាន់ករណីនេះទៅកាន់ក្រសួងសុខាភិបាល ថាជាដើមហេតុដែលបានអនុញ្ញាតឱ្យក្រុមហ៊ុនកូនក្ដីរបស់ខ្លួនចែកចាយផលិតផលម្សៅទឹកដោះគោ នូទ្រីលេត នេះ រួមទាំងករណីមួយចំនួនទៀត ដែលជាហេតុបានធ្វើឱ្យតុលាការកំពូលពន្យារពេលប្រកាសសាលក្រមលើសំណុំរឿងនេះរហូតមកដល់ពេលនេះ។
ទាក់ទិននឹងបញ្ហានេះ កាលពីអំឡុងខែកញ្ញា ឆ្នាំ២០២០ ម្ចាស់ក្រុមហ៊ុនម្សៅទឹកដោះគោ នូទ្រីលេត ម៉ាស្ទ័រ អិលអឹម អ្នកស្រី ខុន កែវកេសី បានចេញលិខិតសុំទោសមួយច្បាប់ទៅកាន់អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (កបប) ថា ខ្លួនពិតជាសោកស្តាយជាពន់ពេកចំពោះកំហុសអចេតនារបស់ក្រុមហ៊ុន ពាក់ព័ន្ធនឹងគុណភាពនៃសមាសធាតុផ្សំក្នុងម្សៅទឹកដោះគោម៉ាក នូទ្រីលេត ដែលបានផលិត និងចែកចាយកន្លងមក។
សារព័ត៌មាន The Cambodia Daily មិនអាចទាក់ទងម្ចាស់ក្រុមហ៊ុន ម្សៅទឹកដោះគោ នូទ្រីលេត អ្នកស្រី ខុន កែវកេសី ដើម្បីសុំការបំភ្លឺជុំវិញករណីនេះបាននៅឡើយទេរហូតដល់ម៉ោងផ្សាយនេះ៕