មេដឹកនាំខ្មែរដែលហ៊ុមព័ទ្ធទៅដោយក្រុមឧក្រិដ្ឋជន និងក្រុមម៉ាហ្វៀ លោក ហ៊ុន សែន សម្រេចតែងតាំងឧក្រិដ្ឋជនដែលកំពុងជាប់ទោសក្រោមអំណាចសាលដីកាតុលាការកំពូល គឺអ្នកស្រី ជា រដ្ឋា ជាទីប្រឹក្សា បន្ទាប់ពីទណ្ឌិតរូបនេះរត់គេចខ្លួនគេចវេះពីការទទួលទោសអស់រយៈពេលជាង ១០ឆ្នាំ។
មេដឹកនាំបក្សកាន់អំណាចលោក ហ៊ុន សែន បានចេញលិខិតមួយកាលពីថ្ងៃទី២៣ ខែកុម្ភៈ ឆ្នាំ២០២៤ សម្រេចតែងតាំងអ្នកស្រី ជា រដ្ឋា ជាទីប្រឹក្សារបស់ខ្លួន ទោះបីជាបុគ្គលរូបនេះកំពុងមានទោសក្រោមអំណាចសាលក្រមសាលាឧទ្ធរណ៍ក្រុងភ្នំពេញ និងតុលាការកំពូល ដែលបានកាត់ទោសដោយអវត្តមានកាលពីឆ្នាំ២០០៩ ឱ្យជាប់ពន្ធនាគារ ១៨ឆ្នាំ ពីបទមនុស្សឃាតគិតទុកជាមុន និងរំលោភលើសិទ្ធិបុគ្គល ដែលមកទល់នឹងពេលនេះ នៅមិនទាន់រួចទោសនៅឡើយក៏ដោយ។
ការតែងតាំងអ្នកស្រី ជា រដ្ឋា ដែលជាទណ្ឌិតកំពុងមានទោសនៅពេលនេះ ត្រូវគេមើលឃើញថាជាទង្វើរំលោភច្បាប់ធ្ងន់ធ្ងរក្នុងនាមលោក ហ៊ុន សែន ជាមេដឹកនាំបក្សកាន់អំណាចដែលកំពុងដឹកនាំរដ្ឋាភិបាលសព្វថ្ងៃនេះ។
កាលពីថ្ងៃទី២៦ ខែកុម្ភៈ ឆ្នាំ២០២៣ សារព័ត៌មានហ្វ្រេសញូវ (Fresh News) ដែលគាំទ្ររដ្ឋាភិបាល បានចុះផ្សាយថា ក្រៅពីមានមុខនាទីជាទីប្រឹក្សាឲ្យប្រធានគណបក្សប្រជាជនកម្ពុជា លោក ហ៊ុន សែន អ្នកស្រី ជា រដ្ឋា ក៏មានមុខនាទីជាទីប្រឹក្សារដ្ឋាភិបាលផងដែរ។
កាលពីដើមខែឧសភា ឆ្នាំ២០០៨ អ្នកស្រី យ៉ា សុខនីម ដែលត្រូវជាម្តាយមីងរបស់កញ្ញា អ៊ិន សូលីដា អតីតបវរកញ្ញាទេសចរណ៍អន្តរជាតិឆ្នាំ២០០២ បានរងការវាយប្រហារដោយទឹកអាស៊ីតក្នុងក្រុងភ្នំពេញ ដោយជនដៃដល់ចំនួន ២នាក់ និងអ្នកសមគំនិតមួយចំនួនទៀតសរុបទាំងអស់ ៧នាក់ រាប់ទាំងអ្នកស្រី ជា រដ្ឋា ដែលមានឋានៈជាឧត្តមសេនីយ៍ត្រីនៃកងរាជអាវុធហត្ថជាតិផងដែរ។
ការវាយប្រហារដោយទឹកអាស៊ីតនោះ គឺបណ្តាលមកពីការបែកបាក់ទំនាក់ទំនងស្នេហាភេទដូចគ្នារវាងនាង អ៊ិន សូលីដា ដែលត្រូវជាក្មួយបង្កើតអ្នកស្រី យ៉ា សុខនីម និងអ្នកស្រី ជា រដ្ឋា ក្នុងចន្លោះឆ្នាំ២០០៥ និងឆ្នាំ២០០៨ កន្លងទៅនោះ។
ក្រោយផ្ទុះប្រើអំពើឃាតកម្មនេះ ជនរងគ្រោះបានប្តឹងទៅតុលាការ ប៉ុន្តែត្រូវចាញ់ក្តីនៅសាលាដំបូង។ ក្រោយពីជនរងគ្រោះប្តឹងបន្តទៅតុលាការថ្នាក់កណ្តាល សាលាឧទ្ធរណ៍ក្រុងភ្នំពេញ បានទាត់ចោលសាលក្រមសាលាដំបូងដែលបានលើកលែងការចោទប្រកាន់ និងដោះលែងជនសង្ស័យចំនួន ៧នាក់នោះ ដោយកាត់ទោសជនដៃដល់ និងអ្នកសមគំនិតដោយអវត្តមានចំនួន ៧នាក់នោះ ដែលបានរត់គេចខ្លួនកាលពីដើមខែសីហា ឆ្នាំ២០០៩ ឱ្យជាប់ពន្ធនាគារពី ១៥ឆ្នាំដល់ ១៨ឆ្នាំ។
បន្ថែមលើនេះទៀត សាលាឧទ្ធរណ៍ក៏បានបង្គាប់ឲ្យអ្នកទាំង ៧នាក់នោះរួមគ្នាបង់ប្រាក់ចំនួន ១០ម៉ឺនដុល្លារអាមេរិក សម្រាប់ការព្យាបាលជនរងគ្រោះ ព្រមទាំងបានបង្គាប់ឲ្យសមត្ថកិច្ចតាមចាប់ខ្លួនពិរុទ្ធជនដែលបានរត់គេចខ្លួនទាំងនោះទៅដាក់គុកជាកំហិតថែមទៀត ខណៈតុលាការកំពូល ក៏បានតម្កល់សាលក្រមសាលាឧទ្ធរណ៍ទុកជាបានការដែរ នៅដើមខែតុលា ឆ្នាំ២០១០ កន្លងទៅនោះ។
ទាក់ទិននឹងបញ្ហានេះ កាលពីថ្ងៃទី១៧ ខែឧសភា ឆ្នាំ២០០៨ តុលាការក្រុងភ្នំពេញបានចេញដីកាចាប់ខ្លួនអតីតនាយរងសេនាធិការនៃកងរាជអាវុធហត្ថផ្ទៃប្រទេស និងជាអតីតស្នងការរងរាជធានីភ្នំពេញ អ្នកស្រី ជា រដ្ឋា ដែរ ប៉ុន្តែជនល្មើសរូបនេះបានរត់ភៀសខ្លួនបាត់ស្រមោលសូន្យឈឹង។
ជាងនេះទៀត ទោះបីជាអាជ្ញាធរប្រទេសកម្ពុជា ស្នើឱ្យប៉ូលិសអន្តរជាតិ Interpol ដែលមាន ១៨៦ប្រទេសជាសមាជិកតាមចាប់ខ្លួនតាំងពីឆ្នាំ២០០៨ មកក៏ដោយ ក៏ឧក្រិដ្ឋជនរូបនេះនៅតែរួចខ្លួនដដែល ហើយបើគិតមកទល់នឹងពេលនេះ អ្នកស្រី ជា រដ្ឋា មិនដែលបានអនុវត្តទោសជាប់ពន្ធនាគារសូម្បីតែ ១ថ្ងៃ ពីបទល្មើសរបស់ខ្លួនដែលបានជាប់ទាក់ទងក្នុងប្រព្រឹត្តិការណ៍កាលពីជាង ១០ឆ្នាំមុននោះឡើយ។
រាជរដ្ឋាភិបាលខ្មែរដែលស្ថិតក្រោមការគ្រប់គ្រងរបស់គណបក្សប្រជាជនកម្ពុជា ដឹកនាំដោយលោក ហ៊ុន សែន ត្រូវគេសង្កេតឃើញថា មេដឹកនាំបក្សកាន់អំណាចរូបនេះតែងផ្តល់មុខនាទីខ្ពស់ៗក្នុងជួររដ្ឋាភិបាល និងក្នុងគណបក្សប្រជាជនកម្ពុជា ឱ្យពួកឧក្រិដ្ឋជនជាបន្តបន្ទាប់ ក្រៅពីផ្តល់តួនាទីឱ្យទណ្ឌិតខាងលើជាទីប្រឹក្សារបស់ខ្លួននោះ ក្នុងនោះរួមមាន ឧក្រិដ្ឋជនព្រៃឈើឧកញ៉ា លី យ៉ុងផាត់ ហៅស្តេចកោះកុង ដែលមានមុខនាទីជាសមាជិកព្រឹទ្ធសភាសព្វថ្ងៃនេះ។
ជាងនេះទៀត ឧក្រិដ្ឋជនព្រៃឈើឧកញ៉ា ទ្រី ភាព ហៅស្តេចគ្រញូង ក៏មានតួនាទីជាក្រុមការងារគណបក្សប្រជាជនកម្ពុជាចុះជួយខេត្តកំពង់ធំ ដែរ ខណៈឧក្រិដ្ឋជនព្រៃឈើឧកញ៉ា មិក សាផាណារ៉េត ក៏មានតួនាទីជាទីប្រឹក្សាលោក ហ៊ុន សែន ថែមទៀត។
ចំណែកឧក្រិដ្ឋជនព្រៃឈើឧកញ៉ា លីម ប៊ុណ្ណា ហៅខ្នា ក៏មានមុខនាទីជាជំនួយការរបស់លោក ហ៊ុន សែន ដែរ។ លើសពីនេះ គេក៏បានរកឃើញដែរថា មហាសេដ្ឋីដើមកំណើតចិនចូលសញ្ជាតិខ្មែរ លោក ចេន ហ្ស៊ី (Chen Zhi) ដែលរដ្ឋអំណាចចិនតាមចាប់ខ្លួន ក៏ត្រូវបានលោក ហ៊ុន សែន តែងតាំងធ្វើជាទីប្រឹក្សារបស់គាត់សព្វថ្ងៃនេះថែមទៀតដែរ។
ទាក់ទិននឹងបញ្ហានេះ អតីតមេដឹកនាំបក្សប្រឆាំងលោក សម រង្ស៊ី ធ្លាប់បានលើកឡើងកាលពីពេលកន្លងទៅថា ប្រទេសកម្ពុជាបានក្លាយទៅជាឋានសួគ៌ដ៏សុខសាន្តសម្រាប់ក្រុមចោរ និងឧក្រិដ្ឋជនគ្រប់ប្រភេទដែលមករស់នៅក្រោមការការពារពីរដ្ឋអំណាចពុករលួយ ដែលកំពុងដឹកនាំដោយលោក ហ៊ុន សែន សព្វថ្ងៃ៕