មន្ទីរបរិស្ថានខេត្តសៀមរាប ចោទសកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន និងកញ្ញា កឹង សោភា ថាមានចេតនាបំផុសឱ្យមានការប្រព្រឹត្តបទល្មើសរំលោភដីរដ្ឋនៅចំណុចវាលតាឡោ ស្ថិតក្នុងសហគមន៍តំបន់ការពារធម្មជាតិព្រៃធំពពេល ភូមិពពេល ឃុំខ្នងភ្នំ ស្រុកស្វាយលើ ខេត្តសៀមរាប។
មន្ទីរបរិស្ថានខេត្តសៀមរាប បានចេញប្រកាសព័ត៌មានកាលពីថ្ងៃទី១០ ខែមីនា ឆ្នាំ២០២៤ ដោយអះអាងថា ការផ្សព្វផ្សាយលើទំព័រហ្វេសប៊ុកឈ្មោះ សន្ធិសញ្ញាសន្តិភាពទីក្រុងប៉ារីសស្ដីពីកម្ពុជា ដែលបានរៀបចំដោយលោក ស្រ៊ុន ស្រ៊ុន និងកញ្ញា កឹង សោភា កាលពីថ្ងៃទី៨ ខែមីនា ឆ្នាំ២០២៤ កន្លងទៅថ្មីៗនេះ ដោយការប្រកាសរៀបចំកន្លែងដាំដុះដំណាំ និងចិញ្ចឹមសត្វនៅលើដីរបស់លោក ពុំ សែន ប្រមាណជា ៤ហិកតាក្នុងភូមិ-ឃុំនោះ សម្រាប់ធ្វើជាភូមិ-ឃុំពាណិជ្ជកម្ម និងសាងសង់ហេដ្ឋារចនាសម្ព័ន្ធ ដើម្បីរៀបចំជាកន្លែងសិក្សាសង្គមច្បាប់ គឺជាចលនាមករុករានដីព្រៃសហគមន៍ដោយខុសច្បាប់សម្រាប់ធ្វើជាប្រយោជន៍បក្សពួករបស់ខ្លួន ដែលទង្វើបែបនេះគឺជាការប្រព្រឹត្តខុសច្បាប់យ៉ាងធ្ងន់ធ្ងរ។
ប្រភពដដែលលើកឡើងថា លោក ពុំ សែន ពុំមានដីកម្មសិទ្ធិដូចការប្រកាសរបស់លោក ស្រ៊ុន ស្រ៊ន និងកញ្ញា កឹង សោភា នោះទេ ព្រោះថាបុគ្គលឈ្មោះ ពុំ សែន ធ្លាប់បានធ្វើកិច្ចសន្យាឈប់កាប់រុករានដីសហគមន៍មកធ្វើជាកម្មសិទ្ធិខុសច្បាប់ និងប្រគល់ជូនមករដ្ឋវិញរួចអស់ហើយ កាលពីថ្ងៃទី២១ ខែមេសា ឆ្នាំ២០២១ កន្លងទៅ ហើយកន្លងមក មន្ត្រីឧទ្យានុរក្សក៏បានសហការជាមួយប្រជាសហគមន៍ អាជ្ញាធរភូមិ-ឃុំ ដាំដុះស្ដារព្រៃឈើឡើងវិញបានចំនួន ៣០០០ដើមលើផ្ទៃដីទំហំ ២ហិកតាកន្លះ (២,៥ហិកតា) ផងដែរ។
សេចក្តីប្រកាសព័ត៌មានដដែលបញ្ជាក់ថា ទីតាំងដីរៀបរាប់មកនេះ គឺស្ថិតនៅក្នុងទីតាំងដីរដ្ឋគ្រប់គ្រងដោយសហគមន៍តំបន់ការពារធម្មជាតិព្រៃធំពពេល ដែលបានបង្កបង្កើតឡើងក្នុងឆ្នាំ២០០៨ កាលពីថ្ងៃទី១៩ ខែតុលា ឆ្នាំ២០២០ ដាក់ជារបស់ក្រសួងបរិស្ថាន ដែលមានទំហំផ្ទៃដីជិត ៨០០ហិកតា (៧៩៨ហិកតា) នៃឧទ្យានជាតិព្រះជ័យវរ្ម័ន-នរោត្តម “ភ្នំគូលែន“ មិនមែនដីកម្មសិទ្ធិរបស់បុគ្គលឈ្មោះ ពុំ សែន ឡើយ។
ការអះអាងនេះ ធ្វើឡើងបន្ទាប់ពីសកម្មជនកិច្ចព្រមព្រៀងសន្តិភាពទីក្រុងប៉ារីស លោក ស្រ៊ុន ស្រ៊ន និងកញ្ញា កឹង សោភា បានលើកឡើងអំពីការប្រើប្រាស់ដោយឈ្មោះ ពុំ សែន ដើម្បីដាំដុះសម្រាប់បម្រើសហគមន៍ក្នុងភូមិពពេល កាលពីពេលថ្មីៗនេះ។
កាលពីថ្ងៃទី៨ ខែមីនា ឆ្នាំ២០២៤ លោក ស្រ៊ុន ស្រ៊ុន និងកញ្ញា កឹង សោភា បានធ្វើការផ្សាយផ្ទាល់លើទំព័រហ្វេសប៊ុកឈ្មោះ សន្ធិសញ្ញាសន្តិភាពទីក្រុងប៉ារីសស្ដីពីកម្ពុជា ក្រោមប្រធានបទ សិក្សាពីភូមិ-ឃុំពាណិជ្ជកម្មនៅភ្នំគូលែន ដោយលើកឡើងពីការប្រើប្រាស់ដីរបស់លោក ពុំ សែន ក្នុងការដាំដំណាំ និងចិញ្ចឹមសត្វ ដើម្បីបម្រើសេចក្តីត្រូវការក្នុងសហគមន៍ បន្ទាប់ពីដីរបស់លោក ពុំ សែន នៅតំបន់នេះរងនូវការធ្វើទុក្ខបុកម្នេញពីជនខិលខូចដោយការដុតបំផ្លាញ ដែលមិនអាចឱ្យគាត់បង្កបង្កើនផលបាននាពេលកន្លងមក។ បន្ទាប់ពីលោក ស្រ៊ុន ស្រ៊ន លើកឡើងពីការដាំដំណាំ និងការចិញ្ចឹមសត្វលើដីនេះ មន្ទីរបរិស្ថានខេត្តសៀមរាប ក៏បានចោទរូបលោក ស្រ៊ុន ស្រ៊ន និងកញ្ញា កឹង សោភា ថាមានចេតនាបំផុសឱ្យមានការប្រព្រឹត្តបទល្មើសរំលោភយកដីរដ្ឋតែម្តង។
ទោះជាបែបនេះក្តី លោក ពុំ សែន ដែលជាម្ចាស់ដីបានអះអាងក្នុងការផ្សាយផ្ទាល់លើទំព័រហ្វេសប៊ុកសន្ធិសញ្ញាសន្តិភាពទីក្រុងប៉ារីសស្ដីពីកម្ពុជានៅថ្ងៃទី១១ មីនា នេះថា លោកបានទិញដីនេះតាំងពីឆ្នាំ២០១៥ មកម្ល៉េះ ហើយក៏មានការទទួលស្គាល់ពីអាជ្ញាធរភូមិ-ឃុំដែរ ប៉ុន្តែក្រោយពេលដែលលោកចាប់ផ្តើមបង្កបង្កើនផល ដូចជា ការដាំស្វាយចន្ទី និងដំណាំផ្សេងទៀត ជាដើម ត្រូវគេដុតបំផ្លាញជាបន្តបន្ទាប់ ខណៈអាជ្ញាធរឃុំបានបដិសេធថា ពួកគេក៏មិនដឹងថាត្រូវធ្វើដូចម្តេចដែរចំពោះរឿងនេះ។
លោក ពុំ សែន បញ្ជាក់ថា បន្ទាប់មកទៀត ក៏មានមន្ត្រីបរិស្ថានមកហៅរូបលោកឱ្យផ្ដិតស្នាមមេដៃលើកិច្ចសន្យាឱ្យប្រគល់ដីមួយចំណែកក្នុងចំណោមដីសរុបដែលលោកបានទិញនោះ ប្រគល់ទៅឱ្យមន្ទីរបរិស្ថានខេត្ត ដើម្បីដាំកូនឈើ ចំណែកមេឃុំខ្នងឃុំ មិនហ៊ានជំទាស់នឹងការទាមទារពីមន្ទីរបរិស្ថានដែរ ដូច្នេះនៅទីបំផុត លោក ពុំ សែន ក៏បានផ្ដិតស្នាមមេដៃប្រគល់ដីនោះឱ្យមន្ទីរបរិស្ថានខេត្តតែម្តង ដើម្បីបញ្ចប់រឿងកុំឱ្យមានការដុតបំផ្លាញដំណាំរបស់លោកបន្តទៀត ប៉ុន្តែរហូតដល់ពេលនេះ លោកបែរជាត្រូវរងនូវការចោទប្រកាន់ថាបានរំលោភដីសហគមន៍ទៅវិញ។
ចំណែកលោក ស្រ៊ុន ស្រ៊ន ក៏បានលើកឡើងនៅថ្ងៃទី១១ មីនា នេះដែរថា បើយោងតាមឯកសារផ្លូវច្បាប់ដែលចេញដោយអាជ្ញាធរភូមិ-ឃុំបញ្ជាក់ថា លោក ពុំ សែន ពិតជាម្ចាស់កម្មសិទ្ធិលើដីដែលគាត់បានអះអាងប្រាកដមែន ក្នុងនោះ លោក ពុំ សែន ក៏មានបណ្ណស្នាក់នៅក្នុងភូមិពពេល ឃុំខ្នងភ្នំ ស្រុកស្វាយលើ ខេត្តសៀមរាប ពីអាជ្ញាធរមូលដ្ឋានដែរ ដូច្នេះការចោទប្រកាន់របស់មន្ទីរបរិស្ថានខេត្តសៀមរាប ថាលោកមានចេតនាបំផុសឱ្យមានការប្រព្រឹត្តបទល្មើសរំលោភដីរដ្ឋ ក្នុងភូមិ-ឃុំខាងលើនេះ គឺជាការចោទប្រកាន់ដែលគ្មានមូលដ្ឋានផ្លូវច្បាប់ទាំងស្រុង។
ទាក់ទិននឹងបញ្ហានេះ ប្រធានសមាគមការពារសិទ្ធិមនុស្ស និងអភិវឌ្ឍន៍នៅកម្ពុជា លោក នី សុខា លើកឡើងកាលពីពេលថ្មីៗនេះថា រយៈពេលជាង ៣០ឆ្នាំមកនេះ រដ្ឋាភិបាលមិនដែលបានផ្សព្វផ្សាយពីសិទ្ធិលំនៅឋានទៅដល់អាជ្ញាធរ និងប្រជាពលរដ្ឋឱ្យមានការយល់ដឹងនោះទេ ដែលនេះគឺជាបញ្ហាមួយក្នុងការធានានូវសិទ្ធិលំនៅឋានរបស់ប្រជាពលរដ្ឋដោយសមរម្យ ខណៈការបណ្ដេញពីលំនៅឋាន និងការហាមឃាត់សិទ្ធិកាន់កាប់លំនៅក្រោមវិធានការរបស់អាជ្ញាធរ តែងតែកើតមានលើប្រជាពលរដ្ឋជាបន្តបន្ទាប់។
លោក នី សុខា អំពាវនាវឱ្យរាជរដ្ឋាភិបាលអាណត្តិថ្មី ក្រោមកិច្ចដឹកនាំលោក ហ៊ុន ម៉ាណែត ផ្សព្វផ្សាយពីសិទ្ធិលំនៅឋានសមរម្យ និងលក្ខខណ្ឌអប្បបរមាស្ដីពីសិទ្ធិលំនៅឋានដែលកំណត់ដោយអង្គការសហប្រជាជាតិឱ្យបានទូលំទូលាយទៅដល់អាជ្ញាធរមូលដ្ឋានគ្រប់លំដាប់ថ្នាក់ ដើម្បីធានាការរស់នៅរបស់ប្រជាពលរដ្ឋប្រកបដោយសុវត្ថិភាព៕