សមត្ថកិច្ចប្រទេសកម្ពុជា កំពុងត្រៀមបញ្ជូនជនរងគ្រោះជាក្មេងស្រីអាយុ ១៦ឆ្នាំដែលមានស្រុកកំណើតនៅខេត្តត្បូងឃ្មុំ មកស្រុកវិញ បន្ទាប់ពីបានសហការជាមួយសមត្ថកិច្ចចិន ជួយសង្គ្រោះយុវតីពីប្រទេសកម្ពុជា មួយរូបដែលត្រូវបានគេជួញដូរយកទៅលក់នៅប្រទេសចិន។
អ្នកនាំពាក្យក្រសួងមហាផ្ទៃ លោក ទូច សុឃៈ បានឱ្យដឹងថា កិច្ចអន្តរាគមន៍ជួយសង្គ្រោះបានធ្វើឡើងក្រោយពីក្មេងស្រីរូបនេះបានដង្ហោយរកការសង្គ្រោះពីរាជរដ្ឋាភិបាល តាមរយៈវីដេអូឃ្លីបបង្ហោះចែកចាយលើបណ្ដាញសង្គមរយៈពេលជាង ១នាទី។
ប្រភពដដែលបានលើកឡើងថា ក្រោយពីបានឃើញវីដេអូនោះ ឧបនាយករដ្ឋមន្ត្រី ស សុខា ជារដ្ឋមន្ត្រីក្រសួងមហាផ្ទៃ បានធ្វើអន្តរាគមន៍ទៅមន្ត្រីពាក់ព័ន្ធនៅក្រសួងការបរទេស និងសហប្រតិបត្តិការអន្តរជាតិ រួមទាំងមន្ត្រីទូតខ្មែរប្រចាំប្រទេសចិន ផងដែរ។ បន្ទាប់មក មន្ត្រីខ្មែរបានសហការគ្នាជាមួយសមត្ថកិច្ចចិន ចុះទៅដល់ទីតាំងជនរងគ្រោះដែលកំពុងរងការឃុំឃាំង ហើយក៏បានជួយសង្គ្រោះនៅរសៀលថ្ងៃទី១០ មីនា និងត្រៀមបញ្ជូនរូបគេមកប្រទេសកម្ពុជា វិញ។
កាលពីថ្ងៃទី៩ មីនា ជនរងគ្រោះបានបង្ហោះវីដេអូលើគណនីហ្វេសប៊ុករបស់ខ្លួនមានរយៈពេលជាង ១នាទី ដោយអះអាងថា ជាអ្នករស់នៅខេត្តត្បូងឃ្មុំ ហើយត្រូវបានគេនាំយកទៅលក់នៅប្រទេសចិន។ ជនរងគ្រោះបានរៀបរាប់នៅក្នុងវីដេអូឃ្លីបថា រូបគេបានចាញ់បោកមេខ្យល់ដែលសន្យាយកមកធ្វើការនៅប្រទេសចិន តែការពិតជាក់ស្តែង មេខ្យល់រូបនោះបានយករូបគេទៅលក់ឱ្យបុរសចិនម្នាក់ទៅវិញ។
តាមជនរងគ្រោះ បុរសជនជាតិចិនរូបនោះបានបង្ខាំងរូបគេក្នុងបន្ទប់មួយដែលស្ថិតនៅក្នុងខេត្តលីសួយ ជីញធាន អស់រយៈពេល ៦ខែ។
ការបញ្ជាក់ពីបងស្រីជនរងគ្រោះទៅកាន់រដ្ឋបាលខេត្តត្បូងឃ្មុំ បានឲ្យដឹងថា ជនរងគ្រោះជាអនីតិជនអាយុ ១៦ឆ្នាំ ដែលមានស្រុកកំណើតនៅស្រុកក្រូចឆ្មារ ខេត្តត្បូងឃ្មុំ បានចាកចេញពីស្រុកកំណើតមកធ្វើការងាររោងចក្រនៅភ្នំពេញនាដើមឆ្នាំ២០២៣ ហើយនៅក្នុងរយៈពេល ៥-៦ខែចុងក្រោយនេះ ក៏ស្រាប់តែបាត់ដំណឹងលែងទាក់ទងមកគ្រួសារតែម្តង។
ក្នុងឱកាសបិទសន្និបាតបូកសរុបលទ្ធផលការងារអាណត្តិទី១ និងលើកទិសដៅបន្តសម្រាប់គណៈកម្មាធិការជាតិប្រយុទ្ធប្រឆាំងអំពើទារុណកម្ម កាលពីខែតុលា ឆ្នាំ២០២៣ លោក ស សុខា រដ្ឋមន្ត្រីក្រសួងមហាផ្ទៃ បានបង្ហាញពីការព្រួយបារម្ភចំពោះពលករខ្មែរដែលចាញ់បោកមេខ្យល់ទៅធ្វើការនៅប្រទេសក្រៅដោយខុសច្បាប់ ហើយអាចធ្លាក់ចូលក្នុងអំពើជួញដូរមនុស្ស ឬការរំលោភបំពានតាមគ្រប់រូបភាព។ លោកបានណែនាំអាជ្ញាធរតាមព្រំដែនទាំងអស់ ត្រូវបន្តទប់ស្កាត់ការលួចនាំមនុស្សចេញពីក្នុងប្រទេស ដើម្បីទៅធ្វើការដោយខុសច្បាប់នៅក្រៅប្រទេស។
ក្រុមអ្នកឃ្លាំមើលសង្គមបានលើកឡើងថា នេះមិនមែនជាលើកទី១ ទេ ដែលស្ត្រីខ្មែរចាញ់បោកមេខ្យល់យកទៅលក់នៅក្រៅប្រទេសក្រោមរូបភាពទៅបម្រើការងារបានចំណូលខ្ពស់ ឬទៅរៀបការប្តីបរទេស។ មូលហេតុដែលនាំឱ្យជនរងគ្រោះធ្លាក់ខ្លួនចាញ់បោកគេ គឺដោយសារតែស្ថានភាពសេដ្ឋកិច្ច ពួកគេខ្វះការពិចារណាជឿតាមមេខ្យល់ដែលឃោសនាថាស្វែងរកការងារមានប្រាក់ខែច្រើន។
ប្រភពដដែលបានលើកឡើងថា ស្ថាប័នពាក់ព័ន្ធបង្កើនយន្តការជួយដល់ជនរងគ្រោះដែលត្រូវបានគេជួញដូរ ដោយជួយសង្គ្រោះឱ្យវិលត្រឡប់មកស្រុកកំណើតវិញ និងជួយពង្រឹងសមត្ថកិច្ចក្រោយជួយសង្គ្រោះ។ យន្តការពីអាជ្ញាធរបច្ចុប្បន្នមានច្រើន តែហាក់ដូចជាមិនទាន់ឆ្លើយតបគ្រប់គ្រាន់លើបញ្ហាដែលកំពុងកើតមាននៅឡើយ។
សេចក្តីរាយការណ៍ពីនាយកដ្ឋានប្រឆាំងអំពើជួញដូរមនុស្ស និងការពារអនីតិជន បង្ហាញថា ការបង្ក្រាបអំពើជួញដូរមនុស្ស និងអាជីវកម្មផ្លូវភេទមានជាង ១៣០ករណី ក្នុងរយៈពេល ១០ខែនៃឆ្នាំ២០២៣។
កាលពីខែកក្កដា ឆ្នាំ២០២២ ក្រសួងការបរទេសសហរដ្ឋអាមេរិក បានរាយការណ៍បញ្ជាក់ថា ប្រទេសកម្ពុជាមិនទាន់បានបំពេញកាតព្វកិច្ចក្នុងការលុបបំបាត់ការជួញដូរមនុស្សនៅឡើយទេ។ សហរដ្ឋអាមេរិកបានទម្លាក់ចំណាត់ថ្នាក់ប្រទេសកម្ពុជាពីលេខ២ ទៅលេខ៣ គឺជាចំណាត់ថ្នាក់ទាបបំផុតស្តីអំពីការជួញដូរមនុស្ស៕