ក្នុងរយៈពេលប៉ុន្មានថ្ងៃចុងក្រោយនេះ សង្គ្រាមវោហារសាស្ត្រពីមេដឹកនាំវិមានក្រឹមឡាំង និងក្រុមបស្ចិមប្រទេសកាន់តែឡើងកម្ដៅខ្លាំងឡើង រហូតប្រធានាធិបតីរុស្ស៊ី លោក វ្ល៉ាឌីមៀរ ពូទីន ជាបុរសខ្លាំងបំផុតនៅវិមានក្រឹមឡាំង ចេញសារគំរាមញឹកញាប់អំពីការអាចផ្ទុះសង្គ្រាមនុយក្លេអ៊ែរ ឬអាវុធប្រល័យលោកដ៏រង្គាល។
នៅក្នុងសប្ដាហ៍នេះទៀត លោក វ្ល៉ាឌីមៀរ ពូទីន បានប្រកាសថា ប្រទេសរុស្ស៊ី បន្តស្ថិតក្នុងស្ថានភាពត្រៀមប្រយុទ្ធជានិច្ច ហើយត្រៀមលក្ខណៈពេញលេញទាំងស្រុងក្នុងការបញ្ឆេះសង្គ្រាមនុយក្លេអ៊ែរ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters ចុះថ្ងៃព្រហស្បតិ៍ ទី១៤ ខែមីនា នេះ។
ក្នុងបទសម្ភាសន៍មួយជាមួយប្រព័ន្ធផ្សព្វផ្សាយរដ្ឋ រ៉ូស្ស៊ីយ៉ា១ លោក ពូទីន ដែលបានបញ្ជាមានសង្គ្រាមឈ្លានពានលើប្រទេសអ៊ុយក្រែន តាំងពីខែកុម្ភៈ ឆ្នាំ២០២២ បាននិយាយថា រុស្ស៊ីបានត្រៀមរួចរាល់ដើម្បីប្រើប្រាស់អាវុធនុយក្លេអ៊ែរ ប្រសិនបើអធិបតេយ្យជាតិរបស់ខ្លួនរងការគំរាមកំហែងធ្ងន់ធ្ងរបំផុត។
មេដឹកនាំរុស្ស៊ីរូបនេះបានបញ្ជាក់ថា បើទោះជាសព្វថ្ងៃនេះស្ថានភាពមិនសំដៅទៅរកការប្រឈមមុខគ្នានៃសង្គ្រាមនុយក្លេអ៊ែរពិតមែន ក៏ប៉ុន្តែប្រទេសរបស់លោកត្រៀមលក្ខណៈរួចជាស្រេចហើយ។
លោក ពូទីន បានព្រមានចំៗផ្ទាល់ទៅលើសហរដ្ឋអាមេរិក ដែលថាសង្គ្រាមនុយក្លេអ៊ែរ វាអាចផ្ទុះបាន ប្រសិនបើកងទ័ពសហរដ្ឋអាមេរិកមានវត្តមាននៅលើទឹកដីអ៊ុយក្រែន។
សេចក្ដីថ្លែងការណ៍របស់លោក ពូទីន គឺជាប្រតិកម្មចុងក្រោយមួយទៀតជាការឆ្លើយតបចំពោះការចុះផ្សាយរបស់សារព័ត៌មានបស្ចិមប្រទេស ដែលថាមានប្រទេសមួយចំនួននៃសមាជិកណាតូ ចង់បញ្ជូនទ័ពរបស់ពួកគេទៅអ៊ុយក្រែន ក្នុងគោលដៅជាទ័ពជំនួយការរបស់កងទ័ពអ៊ុយក្រែន ហើយបន្ថែមលើសពីនេះ ប្រធានាធិបតីបារាំង ក៏បានបង្ហើបពីលទ្ធភាពដែលអាចបញ្ជូនទ័ពបស្ចិមប្រទេសទៅអ៊ុយក្រែន ក្នុងកម្រិតណាមួយដែលមិនមែនទ័ពប្រយុទ្ធ។
ការថ្លែងរបស់មេដឹកនាំបារាំង Emmanuel Macron ដែលធ្វើឡើងនៅចំពោះមុខមេដឹកនាំអឺរ៉ុប ២០ប្រទេសក្នុងវេទិកាមួយកាលពីថ្ងៃទី២៦ កុម្ភៈ នៅទីក្រុងប៉ារីស ត្រូវបានគេមើលឃើញថា ជាការព្រមានរុស្ស៊ី ថាបើអ៊ុយក្រែន ធ្លាក់ដល់ដំណាក់កាលជិតធ្លាក់ក្នុងដៃរុស្ស៊ី គឺក្រុមណាតូអាចបញ្ជូនទ័ពទៅប្រទេសអ៊ុយក្រែន ហើយជាការស្របនឹងការព្រមានរបស់លោកប្រធានាធិបតីបារាំង ដែលថាក្រុមបស្ចិមប្រទេស នឹងមិនបណ្ដោយឱ្យរុស្ស៊ី ឈ្នះអ៊ុយក្រែន ដាច់ខាត។ ប្រការនេះហើយដែលក្រុមមេដឹកនាំវិមានក្រឹមឡាំង ផ្ទុះប្រតិកម្មគំរាមបញ្ឆេះសង្គ្រាមនុយក្លេអ៊ែរ។
តែជាមួយនឹងការគំរាមពីមេដឹកនាំវិមានក្រឹមឡាំង ក្រុមចារកម្មអាមេរិក CIA បានធ្វើការវាយតម្លៃថា ទោះជាមានការគំរាមបង្កសង្គ្រាមនុយក្លេអ៊ែរពីមេដឹកនាំរុស្ស៊ីក៏ដោយ តែមើលទៅ រុស្ស៊ីហ៊ានបញ្ឆេះសង្គ្រាមនុយក្លេអ៊ែរ ប្រហែលជា ៥០ភាគរយប៉ុណ្ណោះ ព្រោះថាអាវុធនុយក្លេអ៊ែរមិនមានតែរុស្ស៊ីនោះទេ គឺក្រុមណាតូក៏មានផងដែរ។
រុស្ស៊ីមានអាវុធនុយក្លេអ៊ែរដែលគេថាអាវុធប្រល័យលោកដ៏ប្រល័យនេះមានរហូតជិត ៦០០០គ្រាប់ សហរដ្ឋអាមេរិក មាន ៥៥៥០គ្រាប់ បារាំងមាន ២៨០គ្រាប់ និងអង់គ្លេស មាន ២២៥គ្រាប់។
សហរដ្ឋអាមេរិក បានដាក់ពង្រាយក្បាលគ្រាប់នុយក្លេអ៊ែរនៅអឺរ៉ុប មានប្រទេសតួកគី អ៊ីតាលី ហុឡង់ដ៍ អាល្លឺម៉ង់ និងបែលហ្ស៊ិក។ តែទោះជាយ៉ាងនេះក្ដី លោក ពូទីន អួតថា គ្រាប់នុយក្លេអ៊ែររបស់រុស្ស៊ី មានអានុភាពខ្លាំងជាងប្រទេសណាទាំងអស់ រាប់ទាំងសហរដ្ឋអាមេរិកផងដែរ។
លោក វ្ល៉ាឌីមៀរ ពូទីន បាននិយាយថា អាវុធនុយក្លេអ៊ែររបស់ប្រទេសរុស្ស៊ី មានទាំងប្រភេទបាញ់ចេញពីដីគោកទៅផ្ទៃសមុទ្រ និងពីអាកាស គឺខ្លាំងហើយទំនើប។ លោក ពូទីន បានបញ្ជាក់ថា នុយក្លេអ៊ែរ Nuclear Triad របស់រុស្ស៊ី ទំនើបជាងនុយក្លេអ៊ែរប្រទេសដទៃឆ្ងាយណាស់។
អំឡុងសង្គ្រាមជាង ២ឆ្នាំមកនេះនៅអ៊ុយក្រែន វិមានក្រឹមឡាំងធ្លាប់បានលើកឡើងអំពីអំណាចអាវុធនុយក្លេអ៊ែររបស់ខ្លួនម្តងហើយម្តងទៀត ហើយកាលពីខែកុម្ភៈ កន្លងទៅ ទីក្រុងមូស្គូ ទើបតែបានព្រមានក្រុមលោកខាងលិចថា វាមានហានិភ័យយ៉ាងពិតប្រាកដពីគ្រោះមហន្តរាយនុយក្លេអ៊ែរ ប្រសិនបើពួកគេហ៊ានបង្កើនស្ថានភាពជម្លោះឱ្យកាន់តែតានតឹងខ្លាំងថែមទៀត ប៉ុន្តែសាររបស់លោក ពូទីន ចុងក្រោយ បានប្រាប់ទៅក្រុមបស្ចិមប្រទេសថា ទោះបីទៅថ្ងៃខាងមុខមានការបញ្ជូនកងទ័ពជួយអ៊ុយក្រែន ដោយផ្ទាល់ក៏ដោយ វានឹងពុំអាចផ្លាស់ប្ដូរស្ថានការណ៍លើសមរភូមិបានឡើយ៕