អតីតមន្ត្រីជំនិតរបស់គណបក្សប្រជាជនកម្ពុជា ទម្លាយថា ទង្វើបោកប្រាស់លុយកាក់រាប់សិបលានដុល្លារអាមេរិករបស់ឧកញ៉ា ឡេង ចាន់ណា ពីពលរដ្ឋក្រីក្រ គឺមាននាយករដ្ឋមន្ត្រីកម្ពុជាលោក ហ៊ុន ម៉ាណែត ជាអ្នកនៅពីក្រោយខ្នង ហើយការចាប់ខ្លួនឧកញ៉ារូបនេះ ដែលធ្វើឡើងនៅពេលនេះ ក៏ដើម្បីបំបិទមាត់កុំឱ្យបែកធ្លាយដល់សមាសភាពអ្នកនៅពីក្រោយខ្នងនៃអំពើឆបោកនេះតែប៉ុណ្ណោះ។
អតីតមន្ត្រីគណៈកម្មាធិការជាតិសន្តិសុខលំហសមុទ្រប្រចាំខេត្តកោះកុង លោក មុំ អស្សនី បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃចន្ទ ទី១៨ មីនា នេះថា នៅអំឡុងឆ្នាំ២០១៧ ខណៈលោកធ្វើកិច្ចការឱ្យលោក ហ៊ុន សែន និងលោក ហ៊ុន ម៉ាណែត រូបលោកក៏ធ្លាប់ត្រូវបានលោក ហ៊ុន ម៉ាណែត ស្នើឱ្យទៅសហការជាមួយឧកញ៉ា ឡេង ចាន់ណា ដោយការបង្កើតសមាគម និងក្រុមហ៊ុនឯកជន ដើម្បីទាក់ទាញពលករខ្មែរនៅប្រទេសកូរ៉េខាងត្បូង ដែរ ប៉ុន្តែលោកបានបដិសេធសំណើនេះ។
លោក មុំ អស្សនី លើកឡើងថា ការចាប់ខ្លួនឧកញ៉ា ឡេង ចាន់ណា គឺដោយសារតែឧកញ៉ារូបនេះបាននិយាយធ្លាយដល់រឿងផ្ទៃក្នុងដែលនាំឱ្យមានការពាក់ព័ន្ធដល់លោក ហ៊ុន ម៉ាណែត ដែលជាមេរបស់ខ្លួនប៉ុណ្ណោះ ហើយការលើកឡើងរបស់ឧកញ៉ា ឡេង ចាន់ណា កន្លងមក ក៏ជាហេតុផលនាំឱ្យគណបក្សប្រជាជនកម្ពុជា ព្រួយបារម្ភពីការប៉ះពាល់ដល់ផលប្រយោជន៍នយោបាយ ជាពិសេសគឺប៉ះពាល់ដល់មុខមាត់របស់លោក ហ៊ុន ម៉ាណែត តែម្តង ស្របពេលដែលពលរដ្ឋកំពុងតែផ្ទុះការតវ៉ាកាន់តែខ្លាំងឡើងនោះ។
អតីតមន្ត្រីជាន់ខ្ពស់បក្សកាន់អំណាចរូបនេះ បង្ហាញថា ចំណុចដែលបញ្ជាក់ថាការចាប់ខ្លួននេះ ធ្វើឡើងដើម្បីបំបិទមាត់ឧកញ៉ា ឡេង ចាន់ណា នោះគឺនៅត្រង់ថា ការចាប់ខ្លួននេះមិនមែនធ្វើឡើងដោយសារសមត្ថកិច្ចអនុវត្តច្បាប់ចំពោះការបោកប្រាស់របស់ឧកញ៉ារូបនេះនោះទេ គឺដោយសារតែការតវ៉ារបស់ពលរដ្ឋរងគ្រោះដែលមានចំនួនរាប់រយនាក់តែប៉ុណ្ណោះ ហើយឧកញ៉ា ឡេង ចាន់ណា ក៏មិនទាន់ទទួលទោសពីការចាប់ខ្លួននេះដែរ គឺពួកគេគ្រាន់តែធ្វើប្រជាភិថុតិឱ្យពលរដ្ឋស្ងប់ចិត្តប៉ុណ្ណោះ។
លោកបន្ថែមថា ជាទម្លាប់បណ្ដាញរបស់លោក ហ៊ុន ម៉ាណែត នឹងរៀបចំឱ្យឧកញ៉ា ឡេង ចាន់ណា ទៅរស់នៅកន្លែងមានសុវត្ថិភាពមួយរយៈ ហើយក្រោយមកក៏ប្រកាសលើកលែងទោសវិញដូចមនុស្សមួយចំនួនដែលពួកគេធ្លាប់ចាប់ខ្លួនកន្លងមក ក្នុងនោះមានដូចជា អតីតអភិបាលខេត្តតាកែវ លោក ឡាយ វណ្ណៈ អតីតអគ្គសេនាធិការរងនៃកងរាជអាវុធហត្ថលើផ្ទៃប្រទេស អ្នកស្រី ជា រដ្ឋា និងលោក ឈូក បណ្ឌិត អតីតអភិបាលក្រុងស្វាយរៀង ជាដើម។
លោក មុំ អស្សនី បញ្ជាក់ថា ក្រោយការចាប់ខ្លួនឧកញ៉ា ឡេង ចាន់ណា តុលាការមិនបានបើកការស៊ើបអង្កេតស្រាវជ្រាវរកលុយដែលឧកញ៉ា ឡេង ចាន់ណា បានប្រមូលពីពលរដ្ឋកន្លងមក ដើម្បីឱ្យដឹងថាតើលុយទាំងនោះកំពុងស្ថិតនៅទីណា ឬវិនិយោគទៅអ្វីនោះទេ។
ជាងនេះទៀត តុលាការក៏មិនបានស្រាវជ្រាវរកឱ្យឃើញថា តើអ្នកណាខ្លះបានជាប់ពាក់ព័ន្ធនឹងការប្រមូលលុយទាំងអស់នោះក៏អត់ដែរ ខណៈអង្គការចាត់តាំងនៅពីក្រោយឧកញ៉ា ឡេង ចាន់ណា ដែលតុលាការបានចោទប្រកាន់នោះ មានប្រភពមកពីណា ក៏មិនត្រូវបានតុលាការបញ្ជាក់ថែមទៀត ដូច្នេះចំណុចទាំងនេះសុទ្ធសឹងតែជារឿងដែលស្ថិតក្នុងការសង្ស័យទាំងអស់។
ការអះអាងនេះ ធ្វើឡើងបន្ទាប់ពីឧកញ៉ា ឡេង ចាន់ណា ត្រូវបានសមត្ថកិច្ចចាប់ខ្លួនពីបទល្មើសឆបោកលុយរាប់សិបលានដុល្លារអាមេរិកកាលពីពេលថ្មីៗនេះ ខណៈមជ្ឈដ្ឋាននានាដាក់ការសង្ស័យថាមានជាប់ពាក់ព័ន្ធនឹងនាយករដ្ឋមន្ត្រីកម្ពុជាលោក ហ៊ុន ម៉ាណែត ជុំវិញអំពើឆបោកនេះ។
កាលពីថ្ងៃទី១២ ខែមីនា ឆ្នាំ២០២៤ សមត្ថកិច្ចបានចាប់ខ្លួនឧកញ៉ា ឡេង ចាន់ណា និងបក្ខពួកបញ្ជូនទៅសាលាដំបូងខេត្តសៀមរាប ក្រោយទទួលបានបណ្តឹងរបស់អ្នកស្រី រ៉េត សុធីតា ដែលជាតំណាងពលរដ្ឋរងគ្រោះ ក្រោយអ្នកស្រីបានដាក់ពាក្យបណ្ដឹងទៅតុលាការកាលពីថ្ងៃទី១៤ ខែកុម្ភៈ ឆ្នាំ២០២៤ កន្លងទៅនោះ។
ក្រោយការចាប់ខ្លួន និងសួរចម្លើយ នៅថ្ងៃទី១៣ ខែមីនា ឆ្នាំ២០២៤ ឧកញ៉ា ឡេង ចាន់ណា និងបក្ខពួក ២នាក់ផ្សេងទៀត ត្រូវបានតុលាការចោទប្រកាន់ពីបទ «ឆបោកមានស្ថានទម្ងន់ទោស (ជាក្រុមមានការចាត់តាំង)» តាមបញ្ញត្តិមាត្រា៣៧៧ និងមាត្រា៣៨០ នៃក្រមព្រហ្មទណ្ឌ ពីបទ «សម្អាតប្រាក់» តាមបញ្ញត្តិមាត្រា៣៨ នៃច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម និងពីបទ «មិនបំពេញកាតព្វកិច្ចចំពោះឧបករណ៍អាចជួញដូរបាន» ឬ ចេញសែកស្អុយតាមបញ្ញត្តិមាត្រា២៣១ នៃច្បាប់ស្ដីពីឧបករណ៍អាចជួញដូរបាន និងប្រតិបត្តិការទូទាត់សងប្រាក់។
ទាក់ទងនឹងបញ្ហានេះ គេសង្កេតឃើញថា មុននឹងឈានដល់ការចាប់ឃុំខ្លួន មានវីដេអូបែកធ្លាយជាច្រើនត្រូវបានបង្ហោះលើបណ្ដាញសង្គមហ្វេសប៊ុកដែលឧកញ៉ា ឡេង ចាន់ណា បានលើកឡើងក្នុងវីដេអូខ្លីៗមួយចំនួនពាក់ព័ន្ធនឹងលោក ហ៊ុន ម៉ាណែត ដែលមានន័យថា រាល់សកម្មភាពរបស់ខ្លួនកន្លងមក គឺមានការគាំទ្រដោយនាយករដ្ឋមន្ត្រីខ្មែររូបនេះ។ ឧកញ៉ា ឡេង ចាន់ណា បានអះអាងថា លោក ហ៊ុន ម៉ាណែត គឺជាអ្នកបង្កើតសមាគមពលករ និងអតីតពលករដើម្បីសប្បុរសធម៌ ដែលខ្លួនកំពុងដឹកនាំធ្វើសកម្មភាពកន្លងមក ជាដើម។
បន្ទាប់វីដេអូមួយនេះត្រូវបានផ្សព្វផ្សាយកាន់តែខ្លាំង ខណៈការតវ៉ាក៏កាន់តែផ្ទុះឡើង ខុទ្ទកាល័យរបស់នាយករដ្ឋមន្ត្រី ហ៊ុន ម៉ាណែត បានចេញសេចក្ដីបំភ្លឺមួយកាលពីថ្ងៃទី២១ ខែកុម្ភៈ ឆ្នាំ២០២៤ ដោយអះអាងថា លោក ហ៊ុន ម៉ាណែត មិនបានពាក់ព័ន្ធនឹងក្រុមហ៊ុន ប្រ៊ីលាន ស៊ីធី តាមការលើកឡើងរបស់អ្នកស្រី ឡេង ចាន់ណា នោះទេ ខណៈឧកញ៉ា ឡេង ចាន់ណា ក៏បានបំភ្លឺកាលពីថ្ងៃទី២០ ខែកុម្ភៈ ឆ្នាំ២០២៤ ដែរ ដោយលើកឡើងថា ការអះអាងរបស់ខ្លួនកន្លងមក មិនបានពាក់ព័ន្ធនឹងលោក ហ៊ុន ម៉ាណែត នោះទេ។
យ៉ាងណាក៏ដោយ ក្រុមអ្នកសង្កេតការណ៍លើកឡើងថា តាមរយៈបទល្មើសដែលឧកញ៉ា ឡេង ចាន់ណា បានប្រព្រឹត្ត គាត់មិនអាចគេចផុតពីការចាប់ខ្លួនដាក់ពន្ធនាគារបានទេ ប៉ុន្តែមិនមែនចាប់ខ្លួនដោយគ្មានការស៊ើបអង្កេតរកបណ្ដាញបក្ខពួកខាងលើរបស់ឧកញ៉ារូបនេះឡើយ ព្រោះថាបើមិនធ្វើការស៊ើបអង្កេតរកខ្សែបណ្ដាញបក្ខពួកទាំងនោះទេ គឺនៅតែបន្តឱ្យមានការសង្ស័យជុំវិញអំពើឆបោកនេះ ទោះបីជាខុទ្ទកាល័យនាយករដ្ឋមន្ត្រីលោក ហ៊ុន ម៉ាណែត បានចេញសេចក្តីបំភ្លឺរឿងនេះហើយក៏ដោយ ក៏មិនអាចយកជាមូលដ្ឋានត្រឹមត្រូវតាមច្បាប់នោះដែរ។
ជុំវិញបញ្ហានេះ ប្រមុខរដ្ឋស្តីទីលោក សាយ ឈុំ បានចុះហត្ថលេខាលើព្រះរាជក្រឹត្យបញ្ចប់គោរមងារឧកញ៉ាពីឧកញ៉ា ឡេង ចាន់ណា តាមសំណើរបស់នាយករដ្ឋមន្ត្រីកម្ពុជាលោក ហ៊ុន ម៉ាណែត ហើយកាលពីថ្ងៃទី១៤ ខែមីនា កន្លងទៅ៕