ក្រុមតស៊ូមតិនៅប្រទេសកម្ពុជា ថាសៀវភៅដែលមានចំណងជើងថា «សម្តេចពុកសន្តិភាព» ដែលពណ៌នាអំពីការដឹកនាំរបស់មេដឹកនាំបក្សកាន់អំណាចលោក ហ៊ុន សែន ដែលឆ្លុះបញ្ចាំងឲ្យឃើញថា ប្រទេសកម្ពុជាមានមេដឹកនាំដ៏ខ្លាំងក្លា ដែលអាចរំដោះសង្គមជាតិមួយនេះបាន តែមិនបានរៀបរាប់ពីការបញ្ចេញមតិដោយហិង្សា និងរបៀបដឹកនាំដ៏សែនអនាធិបតេយ្យ និងឃោរឃៅក្នុងរបបដឹកនាំរបស់គាត់នោះទេ។
ក្រុមតស៊ូមតិកម្ពុជា សរសេរលើទំព័រហ្វេសប៊ុកផ្លូវការរបស់ខ្លួនកាលពីថ្ងៃទី២៤ ខែមីនា ឆ្នាំ២០២៤ នេះថា មានរបាយការណ៍ជាច្រើនដែលបានផ្សព្វផ្សាយពីរូបភាពដ៏សែនអនាធិបតេយ្យដែលត្រូវបានប្រព្រឹត្តក្នុងរបបដឹកនាំរបស់គ្រួសារត្រកូលហ៊ុន ដែលមិនត្រូវបានចុះផ្សាយក្នុងសៀវភៅ «សម្តេចពុកសន្តិភាព» ដែលមន្ត្រីគណបក្សប្រជាជនកម្ពុជាបានរៀបរៀង និងបោះពុម្ពផ្សាយនៅពេលនេះ។
ប្រភពខាងលើដដែលលើកឡើងថា ក្រៅពីការនិពន្ធសៀវភៅលើកសរសើរគ្រួសារត្រកូលហ៊ុន ក៏មានការនិយាយបញ្ចើចបញ្ចើពីមន្ត្រីរាជរដ្ឋាភិបាលដែលគ្រប់គ្រងដោយត្រកូលហ៊ុនជាហូរហែដែរ។
អ្នកនិយាយកោតសរសើរត្រកូលហ៊ុន មានដូចជា អតីតប្រធានវិទ្យុបារាំងអន្តរជាតិ RFI លោក ហ្សង់ ហ្វ្រង់ស័រ តាន់ ដែលតែងតែលើកសរសើរពីការដឹកនាំរបស់លោក ហ៊ុន ម៉ាណែត សព្វថ្ងៃនេះ ជាដើម ដែលការសរសើរទាំងនេះប្រៀបដូចជាបទចម្រៀងដែលគេតែងរួចជាស្រេច ដើម្បីច្រៀងសរសើរលើកជើងចៅហ្វាយនាយរបស់ខ្លួនដូច្នោះដែរ។
ក្រុមតស៊ូមតិកម្ពុជា បញ្ជាក់ថា ជាងនេះទៀត ប្រធានអ្នកនាំពាក្យរាជរដ្ឋាភិបាលអាណត្តិថ្មី លោក ប៉ែន បូណា ដែលជាអតីតនិពន្ធនាយកវិទ្យុបារាំង RFI ជាភាសាខ្មែរ ក៏បានសរសើរលោក ហ៊ុន សែន ដែរថាជាអ្នកកសាងប្រទេសកម្ពុជាល្អបំផុតក្នុងរយៈពេល ៥០០ឆ្នាំចុងក្រោយនេះ ដែលការសរសើរបែបនេះ គឺគ្រាន់តែជាការនិយាយដើម្បីស្វែងរកផលប្រយោជន៍ផ្ទាល់ខ្លួនណាមួយពីលោក ហ៊ុន សែន ប៉ុណ្ណោះ ព្រោះការនិយាយនោះមិនមែនជាការពិតនោះទេ។
សៀវភៅថ្មីមួយក្បាលមានចំណងជើងថា «សម្តេចពុកសន្តិភាព» ត្រូវបាននិពន្ធដោយលោក ចាន់ សេរីរ័ត្ន ដែលត្រូវបានដាក់បង្ហាញកាលពីពាក់កណ្តាលខែកុម្ភៈ ឆ្នាំ២០២៤ កន្លងទៅ ហើយសៀវភៅនេះត្រូវបានរៀបរៀង និងចងក្រងពីរូបភាពប្រវត្តិជាកងទ័ព និងសម្ដីរបស់លោក ហ៊ុន សែន នាពេលកន្លងមក។
ខ្លឹមសារក្នុងសៀវភៅ «សម្តេចពុកសន្តិភាព» បញ្ជាក់ថា សៀវភៅនេះបានប្រមូលផ្ដុំនូវរាល់សម្ដីមាសសំខាន់ៗពោរពេញដោយអត្ថន័យដ៏មានតម្លៃរបស់លោក ហ៊ុន សែន ដើម្បីទុកជាឯកសារឆ្លុះបញ្ចាំងឲ្យឃើញថា កម្ពុជាមានមេដឹកនាំដ៏ខ្លាំងក្លាដែលអាចរំដោះសង្គមជាតិមួយនេះឲ្យបានរួចផុតពីរណ្តៅងងឹតរបស់ ប៉ុល ពត យ៉ាងសាហាវបំផុត។
សៀវភៅខាងលើបញ្ជាក់ថា រាល់សម្រង់សម្ដីមាសរបស់លោក ហ៊ុន សែន ទាំងប៉ុន្មាននៅក្នុងសៀវភៅនេះ ប្រៀបបានទៅនឹងការផ្តល់ចំណេះដឹង មេរៀនល្អៗ បទពិសោធន៍ដែលមានតម្លៃសម្រាប់ការចងចាំរបស់ប្រជាជនកម្ពុជា ឲ្យនឹកឃើញពីមហាគុណដ៏ធំធេងដែលមិនអាចកាត់ថ្លៃបាន និងគោរពនូវទឹកចិត្តដ៏មោះមុតអង់អាចក្លាហានរបស់លោក ហ៊ុន សែន ចំពោះការធ្វើឲ្យបាននូវសន្តិសុខលើទឹកដីសុវណ្ណភូមិដ៏កម្សត់មួយនេះ។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ ប្រាប់សារព័ត៌មាន The Cambodia Daily នៅថ្ងៃទី២៥ មីនា នេះថា របៀបដឹកនាំរបស់ពួកកុម្មុយនីស្តផ្ដាច់ការ គេតែងតែប្រើវិធីឃោសនាលើកសរសើរពីការដឹកនាំរបស់ពួកគេគ្រប់រូបភាព ដោយផ្តល់ផលប្រយោជន៍ឱ្យអ្នកនៅក្រោមបង្គាប់ ជាថ្នូរឱ្យអ្នកទាំងនោះចេញមុខកុហកប្រជាពលរដ្ឋជំនួសពួកគេ ក្នុងបំណងឱ្យពលរដ្ឋខ្មែរគាំទ្រឱ្យពួកគេបន្តកាន់កាប់អំណាចក្នុងវង្សត្រកូលរបស់គេប៉ុណ្ណោះ ប៉ុន្តែការពិត មិនដូចអ្វីដែលគេបានសរសេរនោះទេចំពោះប្រវត្តិដឹកនាំរបស់លោក ហ៊ុន សែន ជាង ៤០ឆ្នាំមកនេះ។
លោក គឹម សុខ លើកឡើងថា ក្រោយថ្ងៃរំដោះ ៧មករា ឆ្នាំ១៩៧៩ កងទ័ពវៀតណាមបានលើកបន្តុបលោក ហ៊ុន សែន ឱ្យធ្វើជានាយករដ្ឋមន្ត្រីរបស់កម្ពុជានៅឆ្នាំ១៩៨៥ បន្ទាប់ពីមេដឹកនាំខ្មែររូបនេះយល់ព្រមបម្រើផែនការវៀតណាម បញ្ជូនបុរសខ្មែរពេញវ័យជាង ២សែននាក់ ឱ្យទៅស្លាប់ក្នុងផែនការ «ក៥» របស់វៀតណាម ជាថ្នូរនឹងការជួយជ្រោមជ្រែងអំណាចពីកងទ័ពវៀតណាម នាសម័យនោះ។
អ្នកវិភាគរូបនេះអះអាងថា ក្រៅពីសម្លាប់ពលរដ្ឋខ្មែរក្នុងផែនការ «ក៥» របស់វៀតណាម ជាង ២សែននាក់ លោក ហ៊ុន សែន ក៏ជាប់ឈ្មោះក្នុងឧក្រិដ្ឋកម្មក្រៅប្រព័ន្ធច្បាប់ផ្សេងទៀតដែរ ដូចជា ការសម្លាប់នាដការីរបាំព្រះរាជទ្រព្យអ្នកស្រី ពិសិដ្ឋ ពិលីកា ពាក់ព័ន្ធនឹងរឿងស្នេហាត្រីកោណ ជាដើម។
ជាងនេះទៀត ការសម្លាប់ប្រធានអង្គការការពារធនធានធម្មជាតិ លោក ឈុត វុទ្ធី ពាក់ព័ន្ធនឹងរឿងឧក្រិដ្ឋកម្មកាប់បំផ្លាញព្រៃឈើខុសច្បាប់ ការសម្លាប់ប្រធានសហជីពសេរីកម្មករលោក ជា វិជ្ជា និងការបោកគ្រាប់បែកសម្លាប់ហ្វូងបាតុករក្នុងឆ្នាំ១៩៩៧ ដែលពាក់ព័ន្ធនឹងការប្រឆាំងបេក្ខភាពជានាយករដ្ឋមន្ត្រីរបស់លោក ហ៊ុន សែន ការសម្លាប់ព្រះភិក្ខុ សំ ប៊ុនធឿន ពាក់ព័ន្ធនឹងរឿងនយោបាយ ការបាញ់សម្លាប់បណ្ឌិត កែម ឡី ពាក់ព័ន្ធនឹងរឿងលាតត្រដាងអាណាចក្រមុខជំនួញត្រកូលហ៊ុននៅកម្ពុជា និងការធ្វើរដ្ឋប្រហារបង្ហូរឈាមនៅដើមខែកក្កដា ឆ្នាំ១៩៩៧ ពាក់ព័ន្ធនឹងការដណ្តើមអំណាចទម្លាក់ព្រះអង្គម្ចាស់ នរោត្តម រណឫទ្ធិ ពីនាយករដ្ឋមន្ត្រីទី១ ជាដើម សុទ្ធសឹងតែជាប់ពាក់ព័ន្ធនឹងក្រុមហ៊ុនគ្រួសារត្រកូល ហ៊ុន យ៉ាងខ្លាំង។
អ្នកវិភាគនយោបាយរូបនេះបញ្ជាក់ថា រឿងឧក្រិដ្ឋកម្មរបស់លោក ហ៊ុន សែន ដែលលោកបានរៀបរាប់ខាងលើនេះ ក៏គួរតែត្រូវបានសរសេរ និងធ្វើអត្ថាធិប្បាយក្នុងសៀវភៅ «សម្តេចពុកសន្តិភាព» នេះដែរ ដើម្បីផ្តល់ការពិតទៅដល់អ្នកអានសៀវភៅ។ ផ្ទុយទៅវិញ បើអ្នកនិពន្ធមិនសរសេររឿងទាំងនេះចូលក្នុងសៀវភៅនេះទេ នោះគ្រាន់តែជាល្បិចកលបន្លំប្រវត្តិសាស្ត្រដែលគ្រួសារត្រកូលហ៊ុនរៀបចំដើម្បីកុហកពលរដ្ឋខ្មែរទៅថ្ងៃមុខប៉ុណ្ណោះ។
ទាក់ទិននឹងការកាន់អំណាចរបស់លោក ហ៊ុន សែន ជាង ៤០ឆ្នាំមកនេះ អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) បានចេញសេចក្តីរាយការណ៍កាលពីពេលកន្លងទៅថា ប្រទេសកម្ពុជាក្រោមការដឹកនាំរបស់លោក ហ៊ុន សែន បានបង្កើតឲ្យមានការសម្លាប់ និងការរំលោភសិទ្ធិមនុស្សធ្ងន់ធ្ងររាប់មិនអស់ ដែលបានប្រព្រឹត្តទៅដោយពុំមានទោសទណ្ឌ ក្នុងនោះ លោក ហ៊ុន សែន បានដំឡើងបុណ្យស័ក្តិ និងផ្តល់រង្វាន់ដល់ពួកឃាតករទាំងនោះជាច្រើននាក់ ឱ្យដឹកនាំក្នុងរដ្ឋាភិបាលរបស់លោករហូតដល់ពេលនេះ។
ទោះជាយ៉ាងណាក៏ដោយ អ្នកសរសេរសៀវភៅអំពីអ្នកដឹកនាំតាមរបៀបរបបផ្ដាច់ការនៅទីណាក៏ដោយ មិនហ៊ាននិយាយការពិតទាំងស្រុងអំពីអ្នកដឹកនាំនោះទេ។ អ្នកនិពន្ធត្រូវតែច្នៃ គេចវាងការពិត ពាក្យបុរាណខ្មែរថា ពាក្យពិតរែងស្លែង ពោលគឺវាល្វីង ជូរចត់ លេបមិនរួច ប៉ុន្តែអ្នកដឹង ទើបដឹងអំពីលោក ហ៊ុន សែន៕