 ដែលមានឈ្មោះពិតថា យ៉ង់ ប៉ាក់ ឱ្យមានសេរីភាពឡើងវិញ បន្ទាប់ពីបុគ្គលរូបនេះរងនូវការចោទប្រកាន់ពីបទបរិហារកេរ្តិ៍ និងត្រូវបានចាប់ខ្លួនទាំងអយុត្តិធម៌តាមបណ្តឹងអតីតប្រធានអង្គការតម្លាភាពកម្ពុជាលោក ព្រាប កុល កាលពីចុងខែមករា ឆ្នាំ២០២៤ ពាក់ព័ន្ធនឹងករណីបាត់លុយជិត ១០០លានដុល្លារអាមេរិកក្នុងក្រុមហ៊ុន CIC Partner។){kind=link}
ក្រុមអ្នកឃ្លាំមើលសង្គម អំពាវនាវឱ្យអាជ្ញាធរកម្ពុជាដោះលែងម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) ដែលមានឈ្មោះពិតថា យ៉ង់ ប៉ាក់ ឱ្យមានសេរីភាពឡើងវិញ បន្ទាប់ពីបុគ្គលរូបនេះរងនូវការចោទប្រកាន់ពីបទបរិហារកេរ្តិ៍ និងត្រូវបានចាប់ខ្លួនទាំងអយុត្តិធម៌តាមបណ្តឹងអតីតប្រធានអង្គការតម្លាភាពកម្ពុជាលោក ព្រាប កុល កាលពីចុងខែមករា ឆ្នាំ២០២៤ ពាក់ព័ន្ធនឹងករណីបាត់លុយជិត ១០០លានដុល្លារអាមេរិកក្នុងក្រុមហ៊ុន CIC Partner។
អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ បានសរសេរនៅលើគណនីហ្វេសប៊ុករបស់ខ្លួននៅថ្ងៃទី២៦ មីនា នេះថា មុននឹងបើកការស៊ើបអង្កេតលើក្រុមហ៊ុន ខេមបូឌាន អ៊ិនវេសស្ទ័រ ឃែភីថល ផាតនើរ (Cambodian Investment Capital Partner) ដែលហៅកាត់ថា CIC Partner ជុំវិញការបាត់លុយចំនួន ៨០លានដុល្លារអាមេរិក និងភាពមិនប្រក្រតីជុំវិញការមិនបង់ការប្រាក់ឱ្យម្ចាស់ភាគហ៊ុនដែលលោក យ៉ង់ ប៉ាក់ បានទម្លាយកាលពីពេលកន្លងទៅនោះ អាជ្ញាធរត្រូវដោះលែងបុគ្គលរូបនេះឱ្យមានសេរីភាពឡើងវិញនៅពេលនេះជាមុនសិន។
លោកបន្ថែមថា ពេលនេះរឿងដែលលោក យ៉ង់ ប៉ាក់ បានលើកឡើង ត្រូវបានបែកធ្លាយជាសាធារណៈហើយ ដូច្នេះលោកអាចបញ្ជាក់បានថា ករណីនេះមិនមែនជាការចោទប្រកាន់ដោយគ្មានភស្តុតាងនោះទេ ដូច្នេះគណៈមេធាវីដែលបានបង្កើតឡើងដើម្បីជួយពលរដ្ឋរងគ្រោះក្នុងករណីឆបោករបស់ក្រុមហ៊ុន CIC Partner នេះ គួរតែធានាឱ្យលោក យ៉ង់ ប៉ាក់ នៅក្រៅឃុំបណ្ដោះអាសន្នសិន មុននឹងធ្វើយុទ្ធការបើកការស៊ើបអង្កេតរកខុសត្រូវលើអ្នកដែលពាក់ព័ន្ធក្នុងករណីឆបោកនេះ។
លោក គឹម សុខ លើកឡើងថា លោក យ៉ង់ ប៉ាក់ គឺជាជនរងគ្រោះចាញ់បោកក្រុមហ៊ុន CIC Partner នេះដែរ ដូច្នេះតាមផ្លូវច្បាប់ គាត់ត្រូវមានឱកាសរកយុត្តិធម៌ឱ្យខ្លួនគាត់ផង ហើយក៏ជាសាក្សីសំខាន់មួយរូបក្នុងដំណើរការស៊ើបអង្កេតលើក្រុមហ៊ុនផងដែរ។
លោកបន្ថែមថា ការចាប់ខ្លួនលោក យ៉ង់ ប៉ាក់ ដាក់គុកតាមបណ្តឹងរបស់លោក ព្រាប កុល កន្លងមក មិនមានភាពយុត្តិធម៌ក្នុងការអនុវត្តច្បាប់ឡើយ ដោយសារការចាប់ខ្លួននេះសំអាងតែទៅលើលិខិតបំភ្លឺរបស់ក្រុមហ៊ុន CIC Partner តែម្ខាងដែលអះអាងថា លោក ព្រាប កុល មិនពាក់ព័ន្ធនឹងក្រុមហ៊ុនខាងលើដូចការលើកឡើងរបស់លោក យ៉ង់ ប៉ាក់ នោះ។
ជាងនេះទៅទៀត តុលាការក៏មិនបានបង្ហាញភស្តុតាងអំពីការស៊ើបអង្កេតរឹងមាំណាមួយដោយតម្លាភាពដែរ ត្បិតបើយោងតាមផ្លូវច្បាប់ នោះសំណុំរឿងព្រហ្មទណ្ឌត្រូវតែវិនិច្ឆ័យដោយផ្អែកទៅលើការស៊ើបអង្កេតហ្មត់ចត់ មិនមែនសំអាងទៅលើការបញ្ជាក់របស់ភាគីតែម្ខាងណាមួយនោះទេ។
អ្នកវិភាគនយោបាយរូបនេះបញ្ជាក់ថា នៅមុនការចាប់ខ្លួន លោក យ៉ង់ ប៉ាក់ បានអះអាងថាលោកមានភស្តុតាងបញ្ជាក់ពីទង្វើរបស់លោក ព្រាប កុល ដែលលួចលុយក្រុមហ៊ុន CIC Partner ដូច្នេះតុលាការត្រូវតែផ្ដល់ឱកាសឱ្យអ្នកទាំងពីរតតាំងគ្នាដោយចំហ និងមិនត្រូវប្រញាប់ចាប់លោក យ៉ង់ ប៉ាក់ ដាក់គុកនោះទេ ពីព្រោះថាជាគោលការណ៍យុត្តិធម៌ ភាគីជម្លោះត្រូវមានសិទ្ធិ និងឱកាសស្មើគ្នាក្នុងការលាតត្រដាងការពិត ចំណែកការបិទមាត់ភាគីណាមួយ មិនមែនជាក្របខ័ណ្ឌច្បាប់ឡើយ ត្បិតការបន្តឃុំលោក យ៉ង់ ប៉ាក់ កន្លងមក ត្រូវគេមើលឃើញជាទូទៅថា គឺជាការធ្វើតាមការចង់បានរបស់លោក ព្រាប កុល និងអ្នកមានឥទ្ធិពលផ្សេងទៀតដែលប្រាសចាកពីការអនុវត្តច្បាប់ដើម្បីធានាភាពយុត្តិធម៌ប៉ុណ្ណោះ។
លោក គឹម សុខ គូសបញ្ចាក់ថា សំណុំរឿងឆបោករបស់ក្រុមហ៊ុន CIC Partner និងការបាត់លុយក្នុងក្រុមហ៊ុននេះ ត្រូវតែធ្វើការស៊ើបអង្កេតរកអ្នកពាក់ព័ន្ធដែលរងនូវការសង្ស័យ ឬការចោទប្រកាន់ពីម្ចាស់ភាគហ៊ុនរងគ្រោះទាំងអស់ ដើម្បីរកភាពស្អាតស្អំ និងរកភាពយុត្តិធម៌ឱ្យជនរងគ្រោះទាំងនោះ ខណៈលោក ព្រាប កុល ត្រូវរាប់បញ្ចូលក្នុងការស៊ើបអង្កេតនេះដែរ។
ការអះអាងនេះ ធ្វើឡើងបន្ទាប់ពីក្រុមហ៊ុន CIC Partner កំពុងត្រូវបានដាក់ឱ្យស្ថិតក្នុងការស៊ើបអង្កេតពីករណីឆបោក និងការបាត់លុយជិត ១០០លានដុល្លារអាមេរិកនាពេលកន្លងមក ខណៈជនរងគ្រោះពីការបោកប្រាស់នេះ ត្រូវបានចោទប្រកាន់ពីបទបរិហារកេរ្តិ៍ ដែលកំពុងត្រូវបានឃុំខ្លួនក្នុងពន្ធនាគារទៅវិញ។
កាលពីថ្ងៃទី១៥ ខែមករា ឆ្នាំ២០២៤ ម្ចាស់គណនីហ្វេសប៊ុកឈ្មោះ ប៉ែន ជីវ័ន្ត (Chivann Pen) ដែលមានឈ្មោះពិតថា យ៉ង់ ប៉ាក់ បានរៀបរាប់លើបណ្ដាញសង្គមហ្វេសប៊ុកថា អ្នកក្លាហានម្នាក់ឈ្មោះ ព្រាប កុល ដែលធ្លាប់តស៊ូមតិខាង «តម្លាភាពសង្គម» បានកសាងស្នាដៃដ៏ធំមួយដោយបង្កើតក្រុមហ៊ុនអចលនទ្រព្យខ្នាតយក្សមួយដែលមានឈ្មោះថា Zillenium Group។
ប្រភពដដែលបញ្ជាក់ថា មុននឹងបង្កើតក្រុមហ៊ុនអចលនទ្រព្យខ្នាតយក្សឈ្មោះ Zillenium Group នេះ លោក ព្រាប កុល ក៏ត្រូវគេសង្ស័យថាបានលួចយកលុយប្រមាណ ៨០លានដុល្លារអាមេរិកពីក្រុមហ៊ុន CIC Partner ដែលក្រុមហ៊ុននេះមានទឹកប្រាក់សរុបប្រមាណ ១៣០លានដុល្លារអាមេរិក ហើយបញ្ហានេះបានធ្វើឱ្យអ្នកវិនិយោគជាង ៥០០នាក់ (៥៤៦នាក់) ដែលបានបោះទុនវិនិយោគក្នុងក្រុមហ៊ុននេះ បាត់បង់ទ្រព្យធន លុយកាក់ និងក្ស័យធនគ្រប់គ្នា។
យ៉ាងណាក៏ដោយ ក្រោយការលើកឡើងនេះ សាលាដំបូងរាជធានីភ្នំពេញ បានចេញដីកាបញ្ជាឱ្យចាប់ខ្លួនលោក យ៉ង់ ប៉ាក់ ភ្លាមៗក្រោមបទចោទ ញុះញង់ឱ្យមានការរើសអើង និងបរិហារកេរ្តិ៍ជាសាធារណៈ បន្ទាប់ពីរដ្ឋមន្ត្រីប្រតិភូអមនាយករដ្ឋមន្ត្រីលោក ព្រាប កុល បានដាក់ពាក្យបណ្ដឹងទៅតុលាការជុំវិញករណីនេះកាលពីថ្ងៃទី១៩ ខែមករា ឆ្នាំ២០២៤ កន្លងទៅ ហើយនៅពេលនេះ លោក យ៉ង់ ប៉ាក់ កំពុងត្រូវបានឃុំខ្លួនក្នុងពន្ធនាគារនៅឡើយ។
កាលពីថ្ងៃទី២៥ ខែមីនា ឆ្នាំ២០២៤ និយ័តករមូលបត្រកម្ពុជា (ន.ម.ក.) បានចេញសេចក្តីប្រកាសព័ត៌មានដោយបានដាក់ចេញវិធានការជាបន្តបន្ទាប់ ដោយតម្រូវឱ្យក្រុមហ៊ុន CIC កែទម្រង់ ពិនិត្យ និងរៀបចំគ្រប់គ្រងចំនួនប្រាក់វិនិយោគរបស់វិនិយោគិនស្របច្បាប់។
លើសពីនេះ ន.ម.ក បានតម្រូវឱ្យ CIC Partner ចាត់ចែងទ្រព្យដែលកាត់កងបាននោះឱ្យបានត្រឹមត្រូវ តាមគោលការណ៍ច្បាប់ ក្នុងគោលដៅអភិវឌ្ឍ ដើម្បីធានាប្រយោជន៍ដល់វិនិយោគិនដែលដាក់ប្រាក់វិនិយោគជាមួយក្រុមហ៊ុននេះ។ បច្ចុប្បន្ន នេះទ្រព្យសកម្មរបស់ក្រុមហ៊ុន CIC ត្រូវបាន ន.ម.ក ប្រមូលមកវិញប្រមាណ ៩០% នៃចំនួនទឹកប្រាក់សរុប។
ទាក់ទិននឹងបញ្ហានេះ តំណាងរាស្ត្រគណបក្សសង្គ្រោះជាតិលោក អ៊ុំ សំអាន សរសេរលើទំព័រហ្វេសប៊ុករបស់ខ្លួននៅថ្ងៃទី២៦ មីនា នេះថា កុំថាឡើយពលរដ្ឋសាមញ្ញ សូម្បីតែឧកញ៉ា គួច ម៉េងលី ក៏ចាញ់បោកគ្រូជោគជ័យ និងក្រុមហ៊ុន CIC Partner អស់ជិត ៣សែនដុល្លារអាមេរិកដែរ ដូច្នេះការអះអាងរបស់លោក យ៉ង់ ប៉ាក់ កាលពីអំឡុងខែមករា ឆ្នាំ២០២៤ កន្លងទៅ ជុំវិញរឿងបាត់លុយ ៨០លានដុល្លារអាមេរិកក្នុងក្រុមហ៊ុន CIC Partner ក៏មិនមែនជាការអះអាងខុសការពិតដែរ។
លោក អ៊ុំ សំអាន លើកឡើងថា មកទល់នឹងពេលនេះ អតីតប្រធានអង្គការតម្លាភាពកម្ពុជា លោក ព្រាប កុល ក៏មិនទាន់រួចផុតពីការសង្ស័យនៅឡើយទេ ហើយការចុះចូលជាមួយរដ្ឋាភិបាលរបស់លោកកាលពីពេលកន្លងទៅ ក៏ទំនងជាដើម្បីគេចយករួចខ្លួនពីអំពើឆបោកនេះដែរ ខណៈលុយ ៨០លានដុល្លារអាមេរិកនោះ គ្មានសមាជិកក្រុមប្រឹក្សាភិបាលណាម្នាក់ហ៊ានចេញមុខមកទទួលខុសត្រូវទាល់តែសោះរហូតមកទល់នឹងពេលនេះ។
ចំណែកប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា បានសរសេរលើទំព័រហ្វេសប៊ុករបស់ខ្លួនកាលពីថ្ងៃទី២៥ ខែមីនា នេះថា សង្គមខ្មែរមិនអាចបណ្ដែតបណ្ដោយឱ្យជនបោកប្រាស់បន្តសកម្មភាពដោយរួចផុតពីសំណាញ់ច្បាប់បានជាដាច់ខាត ពីព្រោះបើដូច្នេះ វានឹងបង្កទៅជាវិបត្តិសង្គមដ៏ធ្ងន់ធ្ងរទៅថ្ងៃក្រោយ គឺវិបត្តិទំនុកចិត្ត វិបត្តិសីលធម៌ វិបត្តិធនាគារ វិបត្តិហិរញ្ញវត្ថុ វិបត្តិផ្លូវចិត្ត វិបត្តិសន្តិសុខ វិបត្តិវណ្ណៈ ហើយចុងក្រោយ គឺវិបត្តិនយោបាយដែលនាំឱ្យសង្គមចលាចលពិបាកគ្រប់គ្រងជាមិនខាន។
មន្ត្រីជាន់ខ្ពស់រដ្ឋាភិបាលកម្ពុជារូបនេះបញ្ជាក់ថា ច្បាប់ត្រូវតែកាត់ផ្តាច់ ជីកឫស រំលើងគល់ជនឈ្លើងសង្គមឱ្យអស់ ទើបប្រទេសកម្ពុជាមានសន្តិភាព និងស្ថិរភាពយូរអង្វែង មានវិបុលភាព និងការអភិវឌ្ឍពិតប្រាកដ មានយុត្តិធម៌សង្គមពេញលេញ និងមានភាពសុខដុមរមនារឹងមាំ។
បណ្ឌិត គិន ភា សង្កត់ធ្ងន់ថា បើមិនដូច្នោះទេ ផ្លូវទៅកាន់ឆ្នាំ២០៣០ ដែលរំពឹងថាកម្ពុជានឹងក្លាយជាប្រទេសមានចំណូលមធ្យមកម្រិតខ្ពស់ គឺពិតជាលំបាកជាមិនខាន ហើយផ្លូវទៅកាន់ឆ្នាំ២០៥០ ដែលរំពឹងថាកម្ពុជានឹងក្លាយជាប្រទេសមានចំណូលកម្រិតខ្ពស់ គឺកាន់តែវែងឆ្ងាយថែមទៀត៕