ក្រុមអ្នកសង្កេតការណ៍ជំរុញឱ្យនាយករដ្ឋមន្ត្រីកម្ពុជាលោក ហ៊ុន ម៉ាណែត ប្រកាសដកកម្ពុជាចេញពីតំបន់អភិវឌ្ឍន៍ត្រីកោណ កម្ពុជា វៀតណាម ឡាវ ឬហៅថា CLV ជាបន្ទាន់ ក្រោមហេតុផលថា កម្ពុជានឹងមិនទទួលបានផលចំណេញពីគម្រោងនេះទេ ហើយថែមទាំងរងនូវការឈ្លានពានព្រំដែន សេដ្ឋកិច្ច និងនយោបាយប្រជាសាស្ត្រពីប្រទេសវៀតណាម ថែមទៀត។
អនុប្រធានវេទិកាពលរដ្ឋលោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី២៦ មីនា នេះថា កម្ពុជាត្រូវតែដកខ្លួនចេញពីគម្រោងតំបន់ត្រីកោណអភិវឌ្ឍន៍ (Development Triangle Area) ជាដាច់ខាត ព្រោះថាគម្រោងនេះគ្រាន់តែជាផែនការរបស់វៀតណាម ដើម្បីឈ្លានពានព្រំដែន សេដ្ឋកិច្ច និងនយោបាយប្រជាសាស្ត្រលើប្រទេសកម្ពុជាប៉ុណ្ណោះ ដូច្នេះកម្ពុជានឹងមិនទទួលបានផលចំណេញពីគម្រោងនេះឡើយ គឺមានតែខាតបង់ធ្ងន់ធ្ងរទៅវិញប៉ុណ្ណោះ។
លោក ម៉ែន ណាត អះអាងថា ខេត្តទាំង ៤ របស់ខ្មែរក្នុងតំបន់ត្រីកោណអភិវឌ្ឍន៍នេះ បានក្លាយទៅជាខេត្តដែលវៀតណាម គ្រប់គ្រងទាំងស្រុងរួចទៅហើយ ព្រោះឈ្មួញវៀតណាមដែលនៅពីក្រោយដោយរដ្ឋការក្រុងហាណូយ បានទទួលដីសម្បទានយ៉ាងច្រើនសន្ធឹកសន្ធាប់ពីរដ្ឋាភិបាលខ្មែរ។
លោកបន្ថែមថា ក្រោយពេលដែលអ្នកទាំងនោះទទួលបានសិទ្ធិកាន់កាប់ដីសម្បទានទាំងអស់នេះ ពួកគេបានកាប់បំផ្លាញព្រៃឈើខ្មែរយ៉ាងអនាធិបតេយ្យ និងដឹកជញ្ជូនទៅប្រទេសវៀតណាម តាមច្រកមួយចំនួននៃខេត្តទាំងនោះ ដោយគ្មានការទប់ស្កាត់ពីអាជ្ញាធរខ្មែរឡើយ។
អនុប្រធានវេទិកាពលរដ្ឋរូបនេះបញ្ជាក់ថា ក្នុងគម្រោងតំបន់ត្រីកោណអភិវឌ្ឍន៍នេះមានតែជនជាតិវៀតណាម ប៉ុណ្ណោះ ដែលដើរតួជាឈ្មួញកាន់គម្រោងអភិវឌ្ឍន៍ធំៗលើទឹកដីកម្ពុជា ស្របពេលដែលរដ្ឋាភិបាលខ្មែរបានសម្បទានដីរាប់ពាន់ហិកតាឱ្យពួកគេ ខណៈដីរបស់វៀតណាម ដែលបានដាក់ជាចំណុះក្នុងតំបន់ត្រីកោណនេះដែរនោះ មិនទាន់មានជនជាតិខ្មែរណាម្នាក់មានសិទ្ធិគ្រប់គ្រង ឬរដ្ឋាភិបាលវៀតណាម សម្បទានដីឱ្យឈ្មួញខ្មែរណាម្នាក់ដើម្បីអភិវឌ្ឍលើដីរបស់ពួកគេឡើយ។
លោក ម៉ែន ណាត បញ្ជាក់ថា ចម្ការដំណាំ ដូចជាចម្ការកៅស៊ូ ជាដើម ដែលមានទំហំដីរាប់ម៉ឺនហិកតារបស់វៀតណាម ក្នុងខេត្តខ្មែរទាំងនោះដែលទទួលបានសិទ្ធិកាន់កាប់រាប់សិបឆ្នាំពីរដ្ឋាភិបាលកម្ពុជា គឺជាឱកាសដែលរដ្ឋាភិបាលវៀតណាម រៀបចំឱ្យពលរដ្ឋរបស់ពួកគេទៅរស់នៅលើទឹកដីខ្មែរដោយស្របច្បាប់ ដូច្នេះបើកម្ពុជានៅតែបន្តកិច្ចព្រមព្រៀងលើតំបន់ត្រីកោណអភិវឌ្ឍន៍នេះទាំងដែលខ្លួនមិនទាន់មានឯករាជ្យរឹងមាំដូចសព្វថ្ងៃនេះ កម្ពុជាប្រាកដជាប្រឈមនឹងការបាត់បង់ទឹកដីធ្ងន់ធ្ងរទៅថ្ងៃមុខដោយចៀសពុំរួចឡើយ។
កាលពីថ្ងៃទី២៥ ខែមីនា ឆ្នាំ២០២៤ នាយករដ្ឋមន្ត្រីកម្ពុជាលោក ហ៊ុន ម៉ាណែត បានធ្វើដំណើរទស្សនកិច្ចទៅកាន់ប្រទេសឡាវ ក្នុងនោះលោក ហ៊ុន ម៉ាណែត បានបញ្ជាក់ក្នុងសន្និសីទសារព័ត៌មានជាមួយលោក សនសៃ ស៊ីផាន់ដន នាយករដ្ឋមន្ត្រីនៃប្រទេសឡាវ ថាកម្ពុជានឹងធ្វើជាម្ចាស់ផ្ទះនៃកិច្ចប្រជុំតំបន់ត្រីកោណអភិវឌ្ឍន៍ (CLV) ក្នុងឆ្នាំ២០២៤ ដោយមានការជួបប្រជុំរដ្ឋមន្ត្រីការពារជាតិទាំង ៣ប្រទេស (កម្ពុជា ឡាវ វៀតណាម) ព្រមទាំងការធ្វើលំហាត់សង្គ្រោះគ្រោះមហន្តរាយ និងជំនួយមនុស្សធម៌នៅចុងឆ្នាំ២០២៤ នេះផងដែរ។
តំបន់ត្រីកោណអភិវឌ្ឍន៍ CLV ត្រូវបានបង្កើតឡើងនៅឆ្នាំ១៩៩៩ ដែលប្រទេសទាំង៣ បានដាក់ខេត្តបញ្ចូលគ្នាចំនួន ១៣ខេត្ត ក្នុងនោះ ប្រទេសវៀតណាម មានចំនួន ៥ខេត្ត ប្រទេសឡាវ មានចំនួន ៤ខេត្ត និងប្រទេសកម្ពុជា មានចំនួន ៤ខេត្ត ដូចជាខេត្តរតនគិរី ខេត្តមណ្ឌលគិរី ខេត្តក្រចេះ និងខេត្តស្ទឹងត្រែង។ ខេត្តទាំង៤ របស់កម្ពុជា មានចំនួនប្រជាជនសរុបប្រមាណ ៥០ម៉ឺននាក់ ខណៈខេត្តទាំង ៤ របស់ប្រទេសឡាវ មានប្រជាជនប្រមាណ ៧០ម៉ឺននាក់ រីឯខេត្តទាំង ៥ របស់ប្រទេសវៀតណាម មានប្រជាជនសរុបប្រមាណជាង ៧លាននាក់ឯណោះ។
ក្រុមអ្នកឃ្លាំមើលសង្គមលើកឡើងថា ប្រសិនបើវៀតណាម គ្រាន់តែបញ្ជូនប្រជាជនរបស់ខ្លួនត្រឹមតែ ១លាននាក់ចូលមករស់នៅ ធ្វើការ និងរកស៊ីក្នុងខេត្តទាំង ៤ របស់កម្ពុជានោះ ក៏ជនជាតិវៀតណាម ច្រើនជាងពលរដ្ឋខ្មែរដល់ទៅជាងពាក់កណ្ដាលទៅហើយ ដូច្នេះគឺពិតជាគ្រោះថ្នាក់ខ្លាំងណាស់សម្រាប់កម្ពុជា ខណៈបរទេសឈ្លានពានមួយនេះនៅតែចិញ្ចឹមមហិច្ឆតារំលោភកាន់កាប់កម្ពុជាជាប់មិនដាច់រហូតដល់ពេលនេះ។
កាលពីចុងឆ្នាំ២០២៣ អ្នកជំនាញខាងព្រំដែន បណ្ឌិត ឌី ការ៉េត បានលើកឡើងថា គណបក្សប្រជាជនកម្ពុជា គឺជាគណបក្សដែលត្រូវបានបង្កើតឡើងដោយវៀតណាម ដើម្បីគ្រប់គ្រងប្រទេសកម្ពុជាតាមរយៈនៃការបង្កើតឱ្យមានតំបន់ត្រីកោណអភិវឌ្ឍន៍រវាងកម្ពុជា ឡាវ និងវៀតណាម សព្វថ្ងៃនេះ។
បណ្ឌិត ឌី ការ៉េត អះអាងថា តំបន់ត្រីកោណអភិវឌ្ឍន៍រវាងប្រទេសកម្ពុជា និងវៀតណាម គឺជាផែនការរបស់វៀតណាម ដែលមានចេតនាបង្កប់កងទ័ពរបស់ពួកគេចូលក្នុងទឹកដីខ្មែរ ដើម្បីគ្រប់គ្រងខ្មែរតែប៉ុណ្ណោះ ហើយផែនការរបស់វៀតណាម ក្នុងការគ្រប់គ្រងទឹកដីខ្មែរនេះ គឺជាផែនការសម្ងាត់របស់លោក ហ៊ុន សែន ជាមួយនឹងវៀតណាម ជារហូតមក ព្រោះថាតំបន់ត្រីកោណអភិវឌ្ឍន៍នេះ ត្រូវបានវៀតណាម ដាក់ផែនការពង្រីកបន្តិចម្តងៗតាមរយៈនៃការដាក់ខេត្តខ្មែរចូលក្នុងតំបន់នេះដោយចាប់ផ្តើមពីខេត្តត្រឹមតែ ២ ប៉ុណ្ណោះនៅលើកដំបូង និងរហូតដល់ដាក់ខេត្តចំនួន ៤ ដូចសព្វថ្ងៃនេះ៕