អតីតនាយករដ្ឋមន្ត្រីកម្ពុជាដែលកាន់អំណាចយូរជាងគេនៅក្នុងតំបន់អាស៊ាន លោក ហ៊ុន សែន ដែលបច្ចុប្បន្នជាប្រធានឧត្ដមក្រុមប្រឹក្សាផ្ទាល់ព្រះមហាក្សត្រ បានចាកចេញពីកម្ពុជានៅព្រឹកថ្ងៃទី២៧ ខែមីនា នេះ ដើម្បីចូលរួមក្នុងកិច្ចប្រជុំប្រចាំឆ្នាំនៃវេទិកា «បូអាវ» នៅប្រទេសចិន។
ក្រសួងការបរទេសកម្ពុជា ឲ្យដឹងថា បុរសខ្លាំងលោក ហ៊ុន សែន នឹងថ្លែងសុន្ទរកថានៅក្នុងពិធីបើកសន្និសីទក្រោមមូលបទ «អាស៊ី និងពិភពលោក ស្ដីពីបញ្ហាប្រឈម និងការទទួលខុសត្រូវរួម»។
វេទិកានេះមានការចូលរួមពីថ្នាក់ដឹកនាំរដ្ឋាភិបាល ធុរកិច្ច ស្ថាប័នសិក្សាស្រាវជ្រាវ អង្គការអន្តរជាតិ និងអង្គការតំបន់នានា ដើម្បីពិភាក្សាអំពីបញ្ហាសំខាន់ៗដែលកំពុងប្រឈម និងជំរុញកិច្ចសហប្រតិបត្តិការអន្តរជាតិ។
ប្រភពដដែលឲ្យដឹងទៀតថា ក្រៅពីចូលរួមវេទិកា «បូអាវ» ដែលរៀបចំពីថ្ងៃទី២៧ ដល់ថ្ងៃទី២៩ ខែមីនា លោក ហ៊ុន សែន ក៏ជួបជាមួយលោក ចាវ ឡឺជី ប្រធានគណៈកម្មាធិការអចិន្ត្រៃយ៍នៃសភាតំណាងប្រជាជនចិន និងនាយឧត្ដមសេនីយ៍ ហឺ វ័យទុង សមាជិកការិយាល័យនយោបាយមជ្ឈិមបក្ស និងជាអនុប្រធានទី២ នៃគណៈកម្មាធិការយោធាមជ្ឈិមបក្ស និងលោក ហ្វឹង ហ្វី លេខាធិការនៃគណៈកម្មាធិការបក្សកុម្មុយនីស្តចិន ក្នុងខេត្តហៃណាន ផងដែរ។
វេទិកាបូអាវសម្រាប់អាស៊ី (BFA) គឺជាអង្គការក្រៅរដ្ឋាភិបាលអន្តរជាតិដែលមិនស្វែងរកប្រាក់ចំណេញ។ បូអាវ បានក្លាយជាវេទិកាលំដាប់ខ្ពស់មួយសម្រាប់កិច្ចសន្ទនាគ្នាក្នុងចំណោមថ្នាក់ដឹកនាំរដ្ឋាភិបាលកម្រិតជាតិ ក្នុងរង្វង់ថ្នាក់ដឹកនាំវិស័យឧស្សាហកម្ម និងធុរកិច្ចនៃបណ្តាប្រទេសនៅទ្វីបអាស៊ី និងទ្វីបដទៃទៀត។
វេទិកា បូអាវសម្រាប់អាស៊ី មានគោលដៅលើកកម្ពស់ និងធ្វើឱ្យកិច្ចសហប្រតិបត្តិការដោះដូរសេដ្ឋកិច្ច កិច្ចសម្របសម្រួល និងកិច្ចសហប្រតិបត្តិការកាន់តែស៊ីជម្រៅនៅក្នុងតំបន់អាស៊ី រវាងអាស៊ី និងតំបន់នៅជុំវិញពិភពលោក។
វេទិកា បូអាវសម្រាប់អាស៊ី ត្រូវបានស្នើបង្កើតឡើងក្នុងឆ្នាំ១៩៩៨ ដោយអតីតប្រធានាធិបតីហ្វីលីពីន លោក Fidel V. Ramos អតីតនាយករដ្ឋមន្ត្រីអូស្ត្រាលី លោក Bob Hawke និងលោក Morihiro Hosokawa អតីតនាយករដ្ឋមន្ត្រីជប៉ុន តែវេទិកាបូអាវសម្រាប់អាស៊ី ត្រូវបានសម្ពោធជាផ្លូវការនៅថ្ងៃទី២៧ ខែកុម្ភៈ ឆ្នាំ២០០១ និងមានទីស្នាក់ការអចិន្ត្រៃយ៍នៅទីក្រុងបូអាវ ខេត្តហៃណាន ប្រទេសចិន។
នេះជាលើកទី១ ដែលលោក ហ៊ុន សែន ចេញទៅទស្សនកិច្ចក្រៅប្រទេសជាផ្លូវការក្រោយពេលលោកប្រគល់តំណែងជានាយករដ្ឋមន្ត្រីទៅឲ្យកូនប្រុសជាអ្នកកាន់អំណាចបន្ត៕