សកម្មជនសហគមន៍ខ្មែរក្នុងទឹកដីសហរដ្ឋអាមេរិក លើកឡើងថា កម្ពុជាគឺជាប្រទេសដែលកំពុងដឹកនាំដោយឯកបក្ស ប៉ុន្តែមិនមែនមានន័យថា កម្ពុជាជាប្រទេសដែលមានការឯកភាពជាតិទេ ព្រោះកម្ពុជាកំពុងធ្លាក់ទៅក្នុងប្រទេសដែលពុះច្រៀកដោយទំនាស់បុគ្គលដែលជាមេដឹកនាំនយោបាយមិនចេះចប់មិនចេះហើយរាប់ទសវត្សរ៍កន្លងមក។
សកម្មជនសហគមន៍ខ្មែរក្នុងទីក្រុងឡងប៊ិច លោក មួង ណារ៉េត បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី២៨ ខែមីនា នេះថា បើមើលជារួម ដូចជាគ្មានតំបន់អបគមន៍ មានកិច្ចព្រមព្រៀងសន្តិភាពទីក្រុងប៉ារីស គ្មានសង្គ្រាម មេដឹកនាំ និងមន្ត្រីគណបក្សនយោបាយដែលធ្លាប់តែប្រឆាំងនឹងបក្សកាន់អំណាចក៏មានការចុះចូលជាមួយបក្សកាន់អំណាចជាហូរហែ ជាដើម គេអាចសន្មតថា កម្ពុជាពិតជាមានការឯកភាពជាតិយ៉ាងពិតប្រាកដ ប៉ុន្តែបើពិនិត្យឆ្លុះជ្រៅទៅក្នុងបញ្ហានេះ ទើបគេដឹងថា អំណាចនៃការគាបសង្កត់របស់រដ្ឋាភិបាលឯកបក្សសព្វថ្ងៃនេះ ឃោរឃៅដល់កម្រិតដែលមិនអាចឱ្យជនរងគ្រោះទាំងនោះហ៊ានចេញមុខតវ៉ានឹងការដឹកនាំរបស់ពួកគេ។
លោក មួង ណារ៉េត លើកឡើងថា ដែលហៅថាឯកភាពជាតិពិតប្រាកដ គឺមានន័យថា ប្រជាជាតិខ្មែរទាំងមូលមានការរួបរួមគ្នាជាធ្លុងមួយ បើទោះបីជាមានគណបក្សនយោបាយច្រើន ឬមានការប្រកួតប្រជែងគ្នាក្នុងនិន្នាការនយោបាយរៀងៗខ្លួនក៏ដោយ។ លោកបន្ថែមថា ឱ្យតែធ្វើឡើងក្នុងក្របខ័ណ្ឌដើម្បីការពារផលប្រយោជន៍ជាតិ មិនមែនដើម្បីអំណាចបុគ្គល បក្ស ឬក្រុមគ្រួសាររបស់អ្នកដឹកនាំនយោបាយណាមួយនោះទេ ពីព្រោះទឹកដីខ្មែរ ឬប្រទេសកម្ពុជាទាំងមូលជារបស់ពលរដ្ឋខ្មែរគ្រប់រូបដែលពួកគេគ្រប់គ្នាមានសិទ្ធិ និងកាតព្វកិច្ចចូលរួមថែរក្សាការពារពេញមួយជីវិត។
សកម្មជនសហគមន៍ខ្មែររូបនេះបញ្ជាក់ថា ប្រទេសកុម្មុយនីស្តជាប្រទេសដែលតែងតែដឹកនាំដោយឯកបក្ស ប៉ុន្តែក្រោមការដឹកនាំនៃរបបកុម្មុយនីស្តបែបនេះ មិនមែនមានន័យថា ប្រទេសនោះមានការឯកភាពជាតិទេ។ ផ្ទុយទៅវិញ គេតែងរកឃើញនូវការបែកបាក់ជាតិធ្ងន់ធ្ងរក្រោមការគាបសង្កត់ដ៏ឃោរឃៅដែលមិនអាចឱ្យពលរដ្ឋនៃប្រទេសនោះហ៊ានចេញមុខតវ៉ាប៉ុណ្ណោះ ។ចំណែកប្រទេសកម្ពុជាបានប្រកាសកាន់យករបបប្រជាធិបតេយ្យសេរីពហុបក្ស គឺដើម្បីជំរុញឱ្យមានការសម្រុះសម្រួលពីគ្រប់ភាគីនៅលើចំណុចរួមមួយ ដែលមិនមែនជាការគាបសង្កត់ពីភាគីខាងណាមួយដែលជាកត្តានាំទៅរកការឯកភាពជាតិដោយពិតប្រាកដ។
ទាក់ទិននឹងបញ្ហានេះ អ្នកវិភាគនយោបាយ និងជាប្រធានវេទិកាពលរដ្ឋលោក គឹម សុខ លើកឡើងកាលពីពេលកន្លងទៅថា ប្រវត្តិនៃការដឹកនាំប្រទេសជាង ៤០ឆ្នាំរបស់មេដឹកនាំបក្សកាន់អំណាចលោក ហ៊ុន សែន ចាប់តាំងពីកងទ័ពវៀតណាម លើកបន្តុបជានាយករដ្ឋមន្ត្រីកាលពីឆ្នាំ១៩៨៥ មក គឺមានតែការបំបែកបំបាក់ និងបំផ្លាញជាតិខ្មែរប៉ុណ្ណោះ។
ប្រធានវេទិកាពលរដ្ឋរូបនេះលើកឡើងថា ចរិតពិតនៃការដឹកនាំនយោបាយរបស់លោក ហ៊ុន សែន គឺជាការដឹកនាំដណ្តើមអំណាច មិនមែនដឹកនាំដើម្បីរកផលប្រយោជន៍ឱ្យជាតិ ដើម្បីការពារអធិបតេយ្យជាតិ ឬដើម្បីបង្រួបបង្រួមជាតិខ្មែរនោះទេ ហើយមេដឹកនាំខ្មែររូបនេះក៏បានបំផ្លាញធនធានធម្មជាតិខ្មែរពេញផ្ទៃប្រទេស ដើម្បីតែផលប្រយោជន៍ក្រុមគ្រួសារខ្លួនឯងដែរ។
លោក គឹម សុខ អះអាងថា ដើម្បីឱ្យប្រាកដថាលោក ហ៊ុន សែន ដឹកនាំប្រទេសដើម្បីតែបំបែកបំបាក់សាមគ្គីជាតិខ្មែរមែន ឬក៏អត់នោះ គេអាចមើលទៅលើរឿងរ៉ាវខុសច្បាប់ជាច្រើនដែលលោក ហ៊ុន សែន បានប្រព្រឹត្ត ដូចជាការធ្វើរដ្ឋប្រហារបង្ហូរឈាមកាលពីថ្ងៃទី៥ និងទី៦ ខែកក្កដា ឆ្នាំ១៩៩៧ ដែលធ្វើឱ្យផ្ទៃក្នុងជាតិខ្មែរទាំងមូលបែកបាក់រហូតសម្លាប់គ្នាឯងយ៉ាងរង្គាលលើកងទ័ពជាតិរាជានិយមពីសំណាក់កងទ័ពរដ្ឋកម្ពុជាដែលបញ្ជាដោយលោក ហ៊ុន សែន នៅពេលនោះ។
ប្រធានវេទិកាពលរដ្ឋរូបនេះបញ្ជាក់ថា ការរំលាយគណបក្សសង្គ្រោះជាតិ គឺកាន់តែបង្ហាញយ៉ាងច្បាស់ពីអត្តចរិតដឹកនាំរបស់លោក ហ៊ុន សែន ដែលនៅតែមានបំណងបំផ្លាញនូវឯកភាពជាតិរបស់កម្ពុជាយ៉ាងធ្ងន់ធ្ងរថែមទៀត ត្បិតរដ្ឋាភិបាលឯកបក្សរបស់គាត់បានរំលាយបក្សប្រឆាំងដ៏ធំនៅកម្ពុជា ទាំងដែលខ្លួនមិនបានកាត់ទោសមេដឹកនាំបក្សនេះពីបទល្មើសណាមួយនៅឡើយ ដែលជាមូលហេតុធ្វើឱ្យបែកបាក់ផ្ទៃក្នុងជាតិកាន់តែខ្លាំង និងសម្លាប់ប្រជាធិបតេយ្យនៅកម្ពុជាដែលពិបាកនឹងស្រោចស្រង់ឡើងវិញសព្វថ្ងៃនេះ។
ទាក់ទិននឹងបញ្ហានេះ សហភាពអឺរ៉ុប និងបណ្តាប្រទេសលោកសេរីជាច្រើននៅតែជំរុញឱ្យអ្នកនយោបាយខ្មែរ វិលទៅរកការចរចាបញ្ចប់ជម្លោះនយោបាយ ដោយតម្កល់ផលប្រយោជន៍ជាតិឱ្យធំជាងផលប្រយោជន៍បុគ្គល ឬបក្សរបស់ខ្លួន ប៉ុន្តែពន្លឺនៃការចរចានយោបាយដើម្បីស្វែងរកការឯកភាពជាតិនេះ នៅតែត្រូវបានជីកកប់បាត់ស្រមោលសូន្យឈឹងនៅឡើយរហូតដល់ពេលនេះ៕