អ្នកស្រាវជ្រាវផ្នែកអភិវឌ្ឍន៍ផ្នត់គំនិត សេក សុជាតិ អំពាវនាវឱ្យរដ្ឋាភិបាលពិនិត្យសមាសភាពបុគ្គលដែលទទួលបានគោរមងារជាឧកញ៉ា អ្នកឧកញ៉ាកន្លងមកឡើងវិញ ព្រោះថាបុគ្គលមួយចំនួនកំពុងប្រើប្រាស់គោរមងារដ៏ថ្លៃថ្នូរនេះ ប្រព្រឹត្តទង្វើស្មោកគ្រោក ដែលនាំឱ្យអាប់ឱនដល់កិត្តិយសព្រះមហាក្សត្រ និងរាជរដ្ឋាភិបាលយ៉ាងធ្ងន់ធ្ងរ។
លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី០១ ខែមេសា នេះថា ផ្អែកតាមរយៈបទពិសោធន៍ជាបន្តបន្ទាប់ដែលក្រុមឧកញ៉ាមួយចំនួនបានប្រព្រឹត្ត ដូចជា ការបោកប្រាស់លុយពលរដ្ឋតាមរយៈក្រុមហ៊ុនអចលនទ្រព្យ និងការបណ្ដាក់ទុន ឬការប្រព្រឹត្តទង្វើឧក្រិដ្ឋផ្សេងៗ បានបង្ហាញពីកម្សោយរបស់រដ្ឋាភិបាលនៅលើឆាកអន្តរជាតិយ៉ាងខ្លាំងក្នុងការវាយតម្លៃលក្ខណៈរបស់បុគ្គលដែលស័ក្តិសមនឹងទទួលបានគោរមងារជាឧកញ៉ាពីព្រះមហាក្សត្រ។
ប្រភពដដែលត្អូញត្អែរថា រដ្ឋាភិបាលមិនគួរបណ្តែតបណ្តោយឱ្យទឹកលុយខ្មៅងងឹតរបស់ឧកញ៉ាមួយចំនួន បំផ្លាញកិត្តិយស និងសេចក្តីថ្លៃថ្នូររបស់ព្រះមហាក្សត្រ និងរាជរដ្ឋាភិបាលបន្តទៀតឡើយ ព្រោះថាការស្នើសុំទៅព្រះមហាក្សត្រឱ្យផ្តល់គោរមងារជាឧកញ៉ាដល់បុគ្គលណាម្នាក់ មិនមែនផ្អែកតែទៅលើចំនួនទឹកប្រាក់ដែលរាជរដ្ឋាភិបាលបានកំណត់តែមួយមុខនោះទេ ក៏គួរតែផ្ដោតលើស្នាដៃក្នុងការជួយប្រទេសជាតិ កិត្តិនាមដែលពលរដ្ឋទទួលស្គាល់ និងលក្ខណៈសម្បត្តិខាងក្នុង គឺអត្តចរិតឫកពាររបស់បុគ្គលនោះផ្ទាល់ផងដែរ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ទង្វើអមនុស្សធម៌ និងទង្វើឧក្រិដ្ឋរបស់ឧកញ៉ាមួយចំនួនក្នុងសង្គមខ្មែរសព្វថ្ងៃនេះ កំពុងបំផ្លាញគោរមងាររបស់ឧកញ៉ាដែលជាវីរបុរសខ្មែរក្នុងសម័យបុព្វកាលដ៏អសោច ដូចជា ឧកញ៉ា ក្រឡាហោមគង់ ដែលបានបូជាសាច់ស្រស់ឈាមស្រស់ដើម្បីប្រទេសជាតិ ជាដើម ដូច្នេះរដ្ឋាភិបាលមិនគួរទុកឱ្យឧកញ៉ាដែលកំពុងកេងប្រវ័ញ្ចផលប្រយោជន៍ផ្ទាល់ខ្លួនពីពលរដ្ឋ និងប្រទេសជាតិ បន្តប្រព្រឹត្តអំពើទុច្ចរិតដូចដែលពួកគេកំពុងធ្វើជាក់ស្តែងសព្វថ្ងៃនេះបន្តទៀតនោះទេ ព្រោះទង្វើនេះគឺជាទង្វើបំផ្លាញជាតិខ្មែរសុទ្ធសាធ។
ការអះអាងនេះ ធ្វើឡើងស្របពេលដែលមានការផ្ទុះឡើងនូវការតវ៉ាទាមទាររបស់ពលរដ្ឋរងគ្រោះដែលចាញ់បោកក្រុមឧកញ៉ាមួយចំនួន ដែលលក់ផ្ទះល្វែង ដីឡូត៍ និងការបណ្ដាក់ទុនទទួលបានការប្រាក់ ជាដើម សព្វថ្ងៃនេះ។
កាលពីថ្ងៃទី២៩ ខែមីនា ឆ្នាំ២០២៤ ក្រុមតស៊ូមតិកម្ពុជា បានចេញលិខិតចំហមួយថា ឧកញ៉ាក្នុងសម័យតេជោរបស់លោក ហ៊ុន សែន មិនមែនជាឧកញ៉ាល្បីល្បាញខាងការពារទឹកដី ការពារជាតិដូចឧកញ៉ាសម័យមុនទេ ប៉ុន្តែឧកញ៉ាទាំងនោះល្បីល្បាញតែខាងប្រព្រឹត្តអំពើឆបោក ខាងរំលោភដីធ្លី និងខាងការគាបសង្កត់សិទ្ធិសេរីភាពរបស់ពលរដ្ឋប៉ុណ្ណោះ ហើយក្នុងពេលដំណាលគ្នានេះ ឧកញ៉ាទាំងនោះក៏ត្រូវឱ្យមានតួនាទីខ្ពស់ៗទាំងក្នុងជួររដ្ឋាភិបាល និងក្នុងជួរមន្ត្រីជាន់ខ្ពស់របស់គណបក្សប្រជាជនកម្ពុជាថែមទៀត។
ប្រភពដដែលលើកឡើងថា ផ្អែកតាមលក្ខខណ្ឌច្បាប់ រដ្ឋាភិបាលត្រូវតែទទួលខុសត្រូវចំពោះទង្វើបោកប្រាស់របស់ឧកញ៉ាទុច្ចរិតទាំងនោះទាំងស្រុង ព្រោះថាសព្វថ្ងៃនេះ មានឧកញ៉ាជាច្រើនកំពុងរំលោភដីធ្លីរបស់ពលរដ្ឋស្ទើរតែគ្រប់ទីកន្លែង ជាពិសេសឧកញ៉ាដែលទទួលបានសិទ្ធិវិនិយោគលើដីដែលទទួលបានការសម្បទានពីរាជរដ្ឋាភិបាល ខណៈពលរដ្ឋរងគ្រោះមិនដឹងទៅពឹងស្ថាប័នណា ស្របពេលដែលរដ្ឋាភិបាលក៏មិនអើពើពីសុខទុក្ខរបស់ពលរដ្ឋផងនោះ។
ទាក់ទិននឹងបញ្ហានេះ ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជា បណ្ឌិត គិន ភា បានលើកឡើងកាលពីពេលថ្មីៗនេះថា គិតតែឆ្នាំ២០២៣ មួយគត់ កម្ពុជាមានឧកញ៉ាចាស់ថ្មីចំនួន ២៤២នាក់។ ឧបមាថា ឧកញ៉ាម្នាក់ដាក់ទុនរកស៊ីក្នុងស្រុក ១០លានដុល្លារ ដូច្នេះទុនវិនិយោគក្នុងស្រុកនឹងមានចំនួន ២៤២០លានដុល្លារក្នុងឆ្នាំ២០២៣។ ទំហំនេះមិនតិចប៉ុន្មានទេ ប៉ុន្តែច្រាសមកវិញ បើឧកញ៉ាម្នាក់បោករាស្ត្រ ១០លានដុល្លារ ទំហំនេះកាន់តែសម្បើមដែរ។
យោងតាមបញ្ជីឈ្មោះសមាគមឧកញ៉ាកម្ពុជា បង្ហាញថា ចាប់តាំងពីឆ្នាំ១៩៩១ រហូតដល់ដើមឆ្នាំ២០២២ រដ្ឋាភិបាលបានស្នើព្រះមហាក្សត្រឱ្យផ្តល់គោរមងារជាឧកញ៉ាដល់អ្នកបានបង់ថវិកាតាមចំនួនកំណត់របស់រដ្ឋាភិបាលជាង ១ពាន់នាក់ហើយ (១១៣២នាក់) ខណៈរយៈពេលត្រឹមតែ ៧ខែដោយគិតចាប់ពីថ្ងៃទី២៦ ខែមិថុនា ដល់ថ្ងៃទី២៦ ខែធ្នូ ឆ្នាំ២០២៣ នាយករដ្ឋមន្ត្រីកម្ពុជា បានស្នើឱ្យព្រះមហាក្សត្រផ្តល់គោរមងារជាឧកញ៉ា និងអ្នកឧកញ៉ារហូតដល់ ២៤២នាក់ឯណោះ៕