អ្នកវិភាគលើកឡើងថា ការរំលឹកពីប្រវត្តិនៃការបំផ្ទុះគ្រាប់រ៉ុក្កែតនៅខេត្តសៀមរាប កាលពីជាង ២០ឆ្នាំមុនរបស់មេដឹកនាំបក្សកាន់អំណាចលោក ហ៊ុន សែន គ្រាន់តែជាការភូតកុហក និងដើម្បីគំរាមមន្ត្រីជាន់ខ្ពស់របស់គណបក្សប្រជាជនកម្ពុជាណាដែលមិនពេញចិត្តនឹងការរៀបចំអំណាចគ្រួសាររបស់គាត់នៅពេលនេះតែប៉ុណ្ណោះ។
អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ ប្រាប់សារព័ត៌មាន The Cambodia Daily នៅថ្ងៃទី៤ មេសា នេះថា ការលើកឡើងរបស់លោក ហ៊ុន សែន ពីប្រវត្តិនៃការបំផ្ទុះគ្រាប់រ៉ុក្កែតនៅខេត្តសៀមរាប គឺដើម្បីគំរាមមេដឹកនាំគណបក្សប្រជាជនកម្ពុជាផ្សេងទៀត ឲ្យយល់ព្រមទទួលស្គាល់គាត់ជាប្រធានព្រឹទ្ធសភានៅពេលនេះផង និងដើម្បីប្រាប់អ្នកទាំងនោះផងថា គាត់ធ្លាប់ប្រព្រឹត្តទង្វើឧក្រិដ្ឋដើម្បីទម្លាក់កំហុសលើអ្នកដទៃកន្លងមក ដូច្នេះគាត់ក៏អាចប្រព្រឹត្តអំពើឧក្រិដ្ឋដើម្បីទម្លាក់កំហុសលើមន្ត្រីផ្ទៃក្នុងបក្សកាន់អំណាចផ្សេងទៀតបានដែរ ដើម្បីកម្ចាត់អ្នកទាំងនោះ ប្រសិនបើពួកគេនៅតែចិញ្ចឹមចិត្តជំទាស់ទៅនឹងការរៀបចំអំណាចគ្រួសាររបស់គាត់បន្តទៀត។
ប្រភពដដែលបានអះអាងថា លើសពីនេះ ក៏ដើម្បីបង្ហាញនូវសញ្ញាភ័យព្រួយរបស់លោក ហ៊ុន សែន ដែរថា អ្វីៗគាត់ធ្លាប់ប្រព្រឹត្តលើអ្នកដទៃកន្លងមក ជាពិសេសមន្ត្រីផ្ទៃក្នុងរបស់បក្សកាន់អំណាចក៏អាចនឹងធ្វើរឿងបែបនេះដាក់កូនៗរបស់គាត់នៅថ្ងៃណាមួយដែរ។
លោក គឹម សុខ លើកឡើងថា តាមការវិភាគរបស់អ្នកជំនាញយោធាបស្ចិមប្រទេសបង្ហាញថា គ្រាប់រ៉ុក្កែត ៤គ្រាប់ដែលលោក ហ៊ុន សែន អះអាងថាគេរៀបចំប៉ុនប៉ងសម្លាប់គាត់នៅខេត្តសៀមរាប និងការបំផ្ទុះគ្រាប់បែកក្នុងបរិវេណផ្ទះរបស់គាត់នៅទីក្រុងភ្នំពេញ កាលពីឆ្នាំ១៩៩៨ នោះ គឺជាការរៀបចំរបស់លោក ហ៊ុន សែន ទាំងអស់។
លោកបន្តថា គ្រាប់រ៉ុក្កែតទាំងនោះមិនមែនបាញ់ពីចម្ងាយទេ គឺយកទៅដាក់នៅទីនោះ និងកំណត់ម៉ោងឲ្យផ្ទុះប៉ុណ្ណោះ ស្របពេលដែលទីតាំងដាក់គ្រាប់រ៉ុក្កែតនោះ គ្មានអ្នកណាអាចយកទៅដាក់នៅទីនោះបានទេ ក្រៅតែពីមនុស្សរបស់លោក ហ៊ុន សែន ខ្លួនឯងនោះ ព្រោះថាកន្លែងនោះគឺជាទីតាំងយាមកាមដ៏តឹងរ៉ឹងបំផុតពីសំណាក់អង្គរក្សរបស់គាត់។
អ្នកវិភាគរូបនេះបញ្ជាក់ថា រីឯការបំផ្ទុះគ្រាប់បែកនៅក្នុងបរិវេណរបងផ្ទុះរបស់លោក ហ៊ុន សែន នៅទីក្រុងភ្នំពេញវិញ អ្នកជំនាញយោធាបស្ចិមប្រទេសលើកជាសំណួរថា តើអ្នកណាអាចយកគ្រាប់បែកទៅដាក់ក្នុងបរិវេណផ្ទះរបស់គាត់បាន ក្រៅតែពីមនុស្សដែលលោក ហ៊ុន សែន បានរៀបចំទុកនោះ។
លោកបន្តថា ក្នុងបរិវេណផ្ទះរបស់លោក ហ៊ុន សែន គឺជាទីតាំងយាមកាមពីកងកម្លាំងប្រដាប់អាវុធច្រើនណាស់ ហើយគ្រាប់បែកនោះផ្ទុះ គឺចំពេលដែលគ្មានសមាជិកគ្រួសាររបស់លោក ហ៊ុន សែន នៅផ្ទះថែមទៀត ដូច្នេះទាំងការបំផ្ទុះគ្រាប់រ៉ុក្កែត និងការបំផ្ទុះគ្រាប់បែកក្នុងបរិវេណផ្ទះរបស់គាត់ សុទ្ធសឹងតែជាការបង្កចលាចលនយោបាយ ដើម្បីគាបសង្កត់ឲ្យគណបក្សផ្សេងឲ្យសម្របសម្រួលនយោបាយ ទទួលយកគាត់ជានាយករដ្ឋមន្ត្រីនៅពេលនោះប៉ុណ្ណោះ។
ការអះអាងនេះ ធ្វើឡើងបន្ទាប់ពីមេដឹកនាំបក្សកាន់អំណាចលោក ហ៊ុន សែន រំលឹកពីប្រវត្តិនៃការប៉ុនប៉ងធ្វើឃាតរូបលោកកាលពីជាង ២០ឆ្នាំមុន ក្នុងកិច្ចប្រជុំព្រឹទ្ធសភាលើកដំបូង បន្ទាប់ពីលោកត្រូវបានបោះឆ្នោតឱ្យធ្វើជាប្រធានព្រឹទ្ធសភាសម្រាប់អាណត្តិថ្មីនេះ។
មេដឹកនាំបក្សកាន់អំណាចលោក ហ៊ុន សែន ដែលជាប់ឆ្នោតជាប្រធានព្រឹទ្ធសភាសម្រាប់អាណត្តិទី៥ នេះ បានរំលឹកអំពីប្រវត្តិបង្កើតរដ្ឋសភាអាណត្តិទី២ ឆ្នាំ១៩៩៨ ក្នុងកិច្ចប្រជុំព្រឹទ្ធសភាលើកដំបូងកាលពីថ្ងៃទី៣ ខែមេសា ឆ្នាំ២០២៤ នេះថា បើលោកស្លាប់ក្នុងការប៉ុនប៉ងធ្វើឃាតកាលពីចុងខែកញ្ញា ឆ្នាំ១៩៩៨ នោះខេត្តសៀមរាប នឹងក្លាយជាវាលពិឃាត ប៉ុន្តែសំណាងល្អ លោកមិនអស់ជីវិតនៅពេលនោះ។
មេដឹកនាំបក្សកាន់អំណាចរូបនេះរំលឹកថា ក្រោយការបោះឆ្នោតឆ្នាំ១៩៩៨ ការប្រជុំនៅទីក្រុងភ្នំពេញមិនអាចធ្វើទៅបានទេ បើទោះបីជាមានការព្រមព្រៀងថា ការប្រជុំសភាលើកដំបូងត្រូវធ្វើនៅក្នុងព្រះបរមរាជវាំងក៏ដោយ ព្រោះព្រះករុណាព្រះបាទ សម្តេចព្រះ នរោត្តម សីហនុ សព្វព្រះហឫទ័យកោះប្រជុំសភានៅឯខេត្តសៀមរាប វិញ ដែលជាហេតុធ្វើឱ្យរូបលោកត្រូវបានគេប៉ុនប៉ងធ្វើឃាតអំឡុងពេលដែលលោកធ្វើដំណើរទៅខេត្តសៀមរាប នៅពេលនោះ។
លោក ហ៊ុន សែន ព្រមានថា ជាភ័ព្វសំណាងសម្រាប់ប្រទេសកម្ពុជាខ្លាំងណាស់ ហើយក៏ជាភ័ព្វសំណាងសម្រាប់រូបលោកដែរ ដែលលោកមិនស្លាប់នៅពេលនោះ ព្រោះថាបើលោកស្លាប់ក្នុងព្រឹត្តិការណ៍នោះ ខេត្តសៀមរាបទាំងមូល នឹងក្លាយជាថ្លុកឈាម ហើយក៏នឹងក្លាយជាវាលពិឃាតដែរ។
ជុំវិញបញ្ហានេះ អតីតមេដឹកនាំបក្សប្រឆាំងលោក លោក សម រង្ស៊ី ធ្លាប់បានលើកឡើងកាលពីពេលកន្លងទៅថា ករណីបាញ់រថយន្តរបស់លោក ហ៊ុន សែន កាលពីខែកញ្ញា ឆ្នាំ១៩៩៨ គឺជាការរៀបចំរបស់លោក ហ៊ុន សែន ខ្លួនឯង ដើម្បីកម្ចាត់គណបក្ស សម រង្ស៊ី និងដើម្បីទម្លាក់កំហុសលើរូបលោកតែប៉ុណ្ណោះ។
លោក សម រង្ស៊ី បញ្ជាក់ថា ការអះអាងរបស់លោក ហ៊ុន សែន ដែលថាមានគេប៉ុនប៉ងធ្វើឃាតគាត់ សុទ្ធតែជាឆាកល្ខោនដែលគាត់រៀបចំ ដើម្បីទម្លាក់កំហុសមកលើគណបក្ស សម រង្ស៊ី ទាំងអស់ ព្រោះថាលោក សុខ យឿង ដែលលោក ហ៊ុន សែន អះអាងថាជាសកម្មជនគណបក្ស សម រង្ស៊ី ហើយរងនូវការចោទប្រកាន់ក្នុងការប៉ុនប៉ងធ្វើឃាតនោះ គឺលោកមិនដែលស្គាល់ពីមុនមកនោះទេ។
កាលពីចុងខែកក្កដា ឆ្នាំ១៩៩៨ ប្រទេសកម្ពុជាបានរៀបចំឱ្យមានការបោះឆ្នោតសម្រាប់អាណត្តិទី២ ប៉ុន្តែក្រោយការបោះឆ្នោត លទ្ធផលបង្ហាញថា គណបក្សប្រជាជនកម្ពុជារបស់លោក ហ៊ុន សែន ទទួលបានអាសនៈចំនួន ៦៤ ចំណែកគណបក្សហ៊្វុនស៊ិនប៉ិច ទទួលបានអាសនៈចំនួន ៤៣ ខណៈគណបក្ស សម រង្ស៊ី ទទួលបានអាសនៈចំនួន១៥។
យ៉ាងណាក៏ដោយ ក្រោយប្រកាសលទ្ធផលនៃការបោះឆ្នោតនេះ ក៏ផ្ទុះឡើងនូវការតវ៉ាពីពលរដ្ឋយ៉ាងខ្លាំង រហូតឈានដល់ការបោះតង់ស្នាក់នៅមុខរដ្ឋសភាជាតិតែម្តង ដោយចោទថាលោក ហ៊ុន សែន លួចបន្លំលទ្ធផលបោះឆ្នោតនៅពេលនោះ ប៉ុន្តែក្រោយផ្ទុះព័ត៌មានថាលោក ហ៊ុន សែន ត្រូវគេប៉ុនប៉ងសម្លាប់នៅខេត្តសៀមរាប និងការបំផ្ទុះគ្រាប់បែកនៅក្នុងបរិវេណផ្ទះរបស់គាត់ក្នុងទីក្រុងភ្នំពេញ លោក ហ៊ុន សែន ក៏ចាប់ផ្តើមមានលេសបង្ក្រាបហ្វូងបាតុករតែម្តង ខណៈរដ្ឋាភិបាលថ្មីរបស់លោក ហ៊ុន សែន ក៏បានចាប់ដំណើរការផ្លូវការក្រោយការបង្ក្រាបនេះដែរ៕