អតីតនាយករដ្ឋមន្ត្រី ហ៊ុន សែន ដែលទើបតែកាន់តំណែងជាប្រធានព្រឹទ្ធសភាទើបតែបានពីរថ្ងៃដែលស្ទើរតែរៀបឫកមិនទាន់ផងនោះ បានទទួលភារៈបំពេញមុខនាទីជាប្រមុខរដ្ឋស្តីទី បន្ទាប់ពីព្រះករុណាព្រះមហាក្សត្រ ព្រះបាទសម្តេច ព្រះបរមនាថ នរោត្តម សីហមុនី ស្តេចយាងទៅបំពេញព្រះរាជទស្សនកិច្ចនៅប្រទេសជប៉ុន។
នៅក្នុងព្រះរាជសារចុះថ្ងៃទី៤ ខែមេសា ឆ្នាំ២០២៤ ព្រះករុណា ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី ស្តេចមានព្រះរាជចំណារអំពីព្រះរាជដំណើរទស្សនកិច្ចរបស់ព្រះអង្គនៅប្រទេសជប៉ុន ចាប់ពីថ្ងៃទី៥ ខែមេសា។ នៅក្នុងព្រះរាជចំណារនោះ ព្រះអង្គពុំបានបញ្ជាក់អំពីកាលបរិច្ឆេទនៃការយាងវិលត្រឡប់មកមាតុប្រទេសវិញនៅពេលណានោះឡើយ។
ព្រះរាជទស្សនកិច្ចរបស់ព្រះអង្គនៅប្រទេសជប៉ុន នេះ ព្រះមហាក្សត្រនៃព្រះរាជាណាចក្រកម្ពុជា ស្តេចយាងជាព្រះរាជាធិបតីភាពក្នុងពិធីបញ្ចុះបឋមសិលាព្រះវិហារ Homyo-in ស្ថិតលើភ្នំ Muryoju និងជាភ្ញៀវកិត្តិយសអបអរទិវាព្រះពុទ្ធសាសនាអន្តរជាតិនៅ The Royal Grand Hall of Buddhism នាក្រុងអូសាកា។
នៅក្នុងព្រះរាជសារជូនជនរួមជាតិកាលពីថ្ងៃទី៤ មេសា ព្រះករុណាព្រះមហាក្សត្រ សម្តេចព្រះបរមនាថ នរោត្តម សីហមុនី បានបញ្ជាក់ថា នៅក្នុងឱកាសដែលព្រះអង្គអវត្តមានពីមាតុប្រទេសពេលនេះ គឺលោក ហ៊ុន សែន ក្នុងឋានៈជាប្រធានព្រឹទ្ធសភាដែលទើបតែជ្រើសតាំងកាលពីថ្ងៃទី៣ មេសា នឹងទទួលជួយព្រះអង្គក្នុងឋានៈជាប្រមុខរដ្ឋស្តីទីនៃព្រះរាជាណាចក្រកម្ពុជា។
ក្រុមអ្នកឃ្លាំមើលសង្គមបានលើកឡើងថា ក្នុងតំណែងជាប្រមុខរដ្ឋស្តីទី លោក ហ៊ុន សែន អាចចុះហត្ថលេខាលើព្រះរាជក្រឹត្យ តែងតាំង និងដកតំណែងមន្ត្រីជាន់ខ្ពស់ក្នុងជួរថ្នាក់ដឹកនាំស្ថាប័នកំពូលៗ ជាពិសេសនៅក្នុងរាជរដ្ឋាភិបាល។ នៅប្រទេសកម្ពុជា ការដោះដូរ ការដកតំណែង និងការតែងតាំងមន្ត្រីជាន់ខ្ពស់គ្រប់ជាន់ថ្នាក់ គឺស្ថិតនៅលើលោក ហ៊ុន សែន ក្នុងនាមជាអនុប្រធានគណបក្សប្រជាជនកម្ពុជាដែលបានដឹកនាំប្រទេសកម្ពុជាចាប់តាំងពីផ្តួលរំលំរបបខ្មែរក្រហមកាលពីថ្ងៃទី៧ ខែមករា ឆ្នាំ១៩៧៩ មកទល់នឹងសព្វថ្ងៃ។
ក្នុងកិច្ចប្រជុំលើកដំបូងនៃព្រឹទ្ធសភានីតិកាលទី៥ កាលពីព្រឹកថ្ងៃទី៣ ខែមេសា ឆ្នាំ២០២៤ សមាជិកព្រឹទ្ធសភាទាំងអស់សរុបចំនួន ៦២រូប បានបោះឆ្នោតជាឯកច្ឆន្ទគាំទ្រលោក ហ៊ុន សែន ឡើងធ្វើជាប្រធានព្រឹទ្ធសភា។ តាមច្បាប់ លោក ហ៊ុន សែន នឹងត្រូវក្លាយជាប្រមុខរដ្ឋស្តីទីនៅពេលព្រះករុណា ព្រះមហាក្សត្រ យាងចាកចេញទៅក្រៅប្រទេស៕