។){kind=link}
អង្គការអន្តរជាតិចំនួនពីរ ជំរុញឲ្យរដ្ឋាភិបាលកម្ពុជាទម្លាក់ចោលរាល់ការចោទប្រកាន់ជាបន្ទាន់ដែលមិនទទួលស្គាល់ជាលក្ខណៈអន្តរជាតិ បន្ទាប់ពីអាជ្ញាធរកម្ពុជាបានចាប់ខ្លួនមនុស្សចំនួន ៩៤នាក់ តាមអំពើចិត្តចាប់តាំងពីចុងខែកក្កដា ឆ្នាំ២០២៤ ពាក់ព័ន្ធនឹងការរិះគន់កិច្ចសហប្រតិបត្តិការតំបន់ត្រីកោណអភិវឌ្ឍន៍ កម្ពុជា ឡាវ វៀតណាម (CLV-DTA)។
យោងតាមសេចក្តីថ្លែងការណ៍ចុះថ្ងៃទី២៨ ខែសីហា ឆ្នាំ២០២៤ របស់អង្គការឃ្លាំមើលសិទ្ធិមនុស្សអន្តរជាតិ (Human Rights Watch) និងអង្គការលើកលែងទោសអន្តរជាតិ (Amnesty International) បានជំរុញឲ្យរដ្ឋាភិបាលកម្ពុជាឱ្យដោះលែងពួកគេទាំងនោះជាបន្ទាន់។
សេចក្តីថ្លែងការណ៍ដដែលបញ្ជាក់ថា យ៉ាងហោចណាស់មនុស្ស ៥៩នាក់ក្នុងចំណោមអ្នកដែលត្រូវបានចាប់ខ្លួនដែលរួមមានសកម្មជនបរិស្ថាន សិទ្ធិមនុស្ស និងសកម្មជនផ្សេងទៀត ព្រមទាំងកុមារមួយចំនួនទៀត នៅតែត្រូវបានឃុំខ្លួនដោយខុសច្បាប់ និងត្រូវបានចោទប្រកាន់ពីបទបង្ហាញទស្សនៈរបស់ពួកគេដោយសន្តិវិធី។ អង្គការទាំងនេះអះអាងថា អាជ្ញាធរគួរតែទម្លាក់ចោលរាល់ការចោទប្រកាន់ភ្លាមៗ ដែលមិនមានការចោទប្រកាន់ពីអន្តរជាតិ។
អ្នកស្រី Bryony Lau នាយិការងទទួលបន្ទុកតំបន់អាស៊ីនៃអង្គការឃ្លាំមើលសិទ្ធិមនុស្ស បាននិយាយនៅក្នុងសេចក្តីថ្លែងការណ៍ថា ការចាប់ខ្លួនសកម្មជនពាក់ព័ន្ធតំបន់ត្រីកោណអភិវឌ្ឍន៍ (CLV) យ៉ាងច្រើន គឺជាកិច្ចខិតខំប្រឹងប្រែងដោយចេតនា និងសម្របសម្រួលដោយអាជ្ញាធរកម្ពុជា ដើម្បីបំភិតបំភ័យអ្នករិះគន់ និងរារាំងពួកគេមិនឱ្យធ្វើបាតុកម្មនៅក្នុងទីក្រុងភ្នំពេញ ឬចែករំលែកទស្សនៈរបស់ពួកគេនៅលើប្រព័ន្ធផ្សព្វផ្សាយសង្គម។ ការឃុំខ្លួន និងការចោទប្រកាន់ខុសទាំងនេះបង្ហាញពីការមិនគោរពសិទ្ធិពលរដ្ឋកម្ពុជា និងកាតព្វកិច្ចអន្តរជាតិរបស់លោកនាយករដ្ឋមន្ត្រី ហ៊ុន ម៉ាណែត។
ក្នុងព្រឹត្តិការណ៍ទប់ស្កាត់ចលនាធ្វើបាតុកម្មប្រឆាំងគម្រោងតំបន់ត្រីកោណអភិវឌ្ឍន៍ កម្ពុជា ឡាវ និងវៀតណាម (CLV-DTA) អាជ្ញាធរមានសមត្ថកិច្ចនៅរាជធានីភ្នំពេញបានចាប់ខ្លួនយុវជនបីនាក់ចំពោះការសង្ស័យថា បានប៉ុនប៉ងវាយប្រហារមកលើគេហទំព័រក្រសួងស្ថាប័នរដ្ឋាភិបាល និងបានចូលរួមសកម្មភាពគាំទ្របច្ចេកទេសក្នុងចលនាបំផុសបំផុលប្រឆាំងគម្រោងដ៏ចម្រូងចម្រាសនេះ។
ពលរដ្ឋជាង ៦០នាក់ផ្សេងទៀតដែលជាសកម្មជនសង្គម បុគ្គលិកអង្គការក្រៅរដ្ឋាភិបាល និងសមាគមក៏ត្រូវបានចាប់ខ្លួនក្នុងព្រឹត្តិការណ៍នេះដែរ តែមានមួយចំនួនត្រូវដោះលែងក្រោយធ្វើការសុំទោស និងធ្វើកិច្ចសន្យាជាមួយអាជ្ញាធរ។ នេះបើតាមក្រុមអ្នកការពារសិទ្ធិមនុស្សក្នុងស្រុក៕