ប្រធានព្រឹទ្ធសភា លោក ហ៊ុន សែន ប្រកាសឱ្យពលរដ្ឋខ្មែរចូលប្រើសេវាកម្មស្ថានីយប្រេងឥន្ធនៈ PTT ឡើងវិញ ដោយសារតែក្រុមហ៊ុននេះបានផ្លាស់ប្ដូរការនាំចូលប្រេងមកពីប្រទេសសិង្ហបុរី។
មេដឹកនាំបក្សកាន់អំណាច លោក ហ៊ុន សែន លើកឡើងក្នុងពិធីបើកអនុសំវច្ឆរៈមហាសន្និបាតមន្ត្រីសង្ឃទូទាំងប្រទេសលើកទី៣៣ នៅថ្ងៃទី១៧ វិច្ឆិកា នេះថា ស្ថានីយប្រេងឥន្ធនៈ PTT ថ្វីត្បិតតែប្រភពរបស់ក្រុមហ៊ុនមកពីប្រទេសថៃ ក៏ពិតមែន ប៉ុន្តែនៅក្នុងប្រទេសកម្ពុជា នាពេលបច្ចុប្បន្ននេះ ក្រុមហ៊ុននេះមិនបាននាំចូលប្រភពប្រេងមកពីប្រទេសថៃ ទៀតទេ ពោលគឺនាំចូលមកពីប្រទេសសិង្ហបុរី ដូច្នេះប្រជាពលរដ្ឋអាចប្រើប្រាស់បានធម្មតា ក្រៅពីនេះ ដូចជា ក្រុមហ៊ុន CP ក្រុមហ៊ុនផលិតស៊ីម៉ងត៍ ខេ ស៊ីមេន ជាដើម ក៏ពលរដ្ឋខ្មែរអាចប្រើប្រាស់ដូចធម្មតាដែរ។
លោកថា ទោះបីក្រុមហ៊ុនរបស់ថៃ ឬថៅកែជាជនជាតិថៃ ក៏ដោយ បើសិនផលិតនៅក្នុងប្រទេសកម្ពុជា នោះមានន័យថា ទំនិញ ឬផលិតផលទាំងអស់នោះគឺជារបស់ខ្មែរ មិនមែនរបស់ថៃ ទេ។
លោក ហ៊ុន សែន លើកឡើងទៀតថា លោកតែងប្រឆាំងដាច់ខាតចំពោះរាល់សំណើណាមួយរបស់ភាគីកម្ពុជា ដែលស្នើដើម្បីបើកព្រំដែនគោកកម្ពុជា-ថៃ ឡើងវិញ ដើម្បីងាយស្រួលក្នុងការនាំចូលទំនិញថៃ ប៉ុន្តែមិនត្រូវពហិការជ្រុលហួសហេតុ ទាំងដែលទំនិញរបស់ក្រុមហ៊ុនថៃ ខ្លះ កំពុងផលិតនៅក្នុងប្រទេសកម្ពុជា នោះទេ។
លោក ហ៊ុន សែន អះអាងថា ការធ្វើពហិការឈប់ប្រើផលិតផលក្រុមហ៊ុនថៃ ផលិតនៅកម្ពុជា គឺស្មើនឹងពហិការសម្លាប់សេដ្ឋកិច្ចជាតិខ្លួនឯង។
កាលពីថ្ងៃទី១៤ ខែវិច្ឆិកា អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា លោក គុណ ញឹម បានប្រកាសទាត់ចោលការទាមទារឱ្យបញ្ឈប់ការនាំទំនិញថៃ ចូលក្នុងប្រទេសកម្ពុជា របស់ប្រជាពលរដ្ឋខ្មែរមួយចំនួនដែលកំពុងពហិការឈប់ប្រើប្រាស់ទំនិញថៃ ក្រៅពីទំនិញយុទ្ធសាស្ត្រ ៤ប្រភេទដែលរាជរដ្ឋាភិបាលបានហាមឃាត់។
ជុំវិញបញ្ហានេះ អ្នកស្រាវជ្រាវអំពីការអភិវឌ្ឍសង្គម បណ្ឌិត មាស នី បានលើកឡើងកាលពីពេលថ្មីៗនេះថា ជុំវិញជម្លោះព្រំដែនកម្ពុជា-ថៃ ពិតមែនតែការប្រកួតប្រជែងដោយអាវុធត្រូវបានបញ្ឈប់ ប៉ុន្តែសង្គ្រាមសេដ្ឋកិច្ចរវាងប្រទេសទាំងពីរកំពុងតែបន្ត ព្រោះថាកម្ពុជា បានធ្វើពហិការមិនប្រើទំនិញថៃ រីឯថៃ ក៏អាចនឹងធ្វើពហិការមិនទិញផលិតផលរបស់ខ្មែរដែរ ដូច្នេះមានន័យថា ល្បែងជ្រមុជទឹកប្រណាំងគ្នានេះមិនដឹងថាចប់ពេលណានោះទេ។
កាលពីថ្ងៃទី១៦ ខែកក្កដា ឆ្នាំ២០២៥ អគ្គនាយកដ្ឋានគយ និងរដ្ឋាករកម្ពុជា បានហាមប្រាមការនាំចូលបន្លែ ផ្លែឈើ ប្រេងឥន្ធនៈ និងឧស្ម័នឥន្ធនៈពីប្រទេសថៃ ជាកំហិត ខណៈប្រធានព្រឹទ្ធសភា លោក ហ៊ុន សែន បានប្រកាសបញ្ឈប់ការនាំចូលមុខទំនិញយុទ្ធសាស្ត្រពីប្រទេសថៃ ផងដែរ ដូចជា អគ្គិសនី អ៊ីនធឺណិត ប្រេងឥន្ធនៈ និងឧស្ម័ន រួមទាំងបញ្ឈប់ការចាក់បញ្ចាំងភាពយន្តថៃ ថែមទៀត៕
© 2025, ឌឹ ខេមបូឌា ដេលី. All rights reserved.