រយៈពេលពីរខែ បន្ទាប់ពីការបោះឆ្នោតក្រុមប្រឹក្សាឃុំ-សង្កាត់ រួចមក ក្រុមអង្គការសិទិ្ធមនុស្សប្រចាំខេត្តរតនគិរីបានកត់សម្គាល់ឃើញថា មានការខុសប្លែកពីធម្មតា។ នៅក្នុងខេត្តនេះ ឃុំណាមានបញ្ហាជម្លោះដីធ្លីខ្លាំង គឺអាជ្ញាធរមូលដ្ឋានលែងអនុញ្ញាតឲ្យមានការអប់រំស្តីពីសិទិ្ធដីធ្លីទៀតហើយ។
លោកប៉ែនបុ៊ណ្ណារ៍អ្នកសម្របសម្រួលអង្គការអាដហុកប្រចាំខេត្តរតនគិរីបានមានប្រសាសន៍ថា “ យើងបានឃើញមានការរឹតបន្តឹងកាន់តែខ្លាំងឡើង ហើយកម្មវិធីអប់រំទាក់ទងនឹងសិទ្ធិដីធ្លីរបស់យើងមួយចំនួន ត្រូវនគរបាលប្រដាប់អាវុធមករំខាន”។
កាលពីថ្ងៃសុក្រ អាជ្ញាធរមូលដ្ឋានជាច្រើន រួមទាំងមន្ត្រីនគរបាលស្រុកប្រដាប់ដោយអាវុធ និងប្រធានភូមិរបស់គណបក្សប្រជាជនបានបិទកម្មវិធី អប់រំស្តីពីសិទិ្ធដីធ្លីនៅក្នុងឃុំបាតាង ស្រុកលំផាត់។ កាលពីខែមិថុនា គណបក្សសម រង្ស៊ីបានឈ្នះការបោះឆ្នោត ជាលើកដំបូងនៅក្នុងឃុំនេះ ដោយទទួលបានតំណែងជំទប់ថែមទៀត។
ពេលមិនសូវមានរបាយការណ៍ និយាយអំពីករណីបែបនេះ សកម្មជនសិទិ្ធមនុស្សកាលពីម្សិលមិញ បានលើកឡើងថា ការរឹតបន្ដឹងនេះបានកើតឡើងស្របពេលគណបក្សសមរង្ស៊ី បានទទួលសន្លឹកឆ្នោតថែមទៀតនៅតាមតំបន់នោះ។
លោក ប៉ែន បុ៊ណ្ណារ៍បានបន្តថា “ ខ្ញុំបានសង្កេតឃើញថា មានការរឹតបន្តឹងកាន់តែខ្លាំងនៅកន្លែងណា ដែលទ្ធផលបោះឆ្នោតបង្ហាញថាគណបក្សប្រឆាំងបានឈ្នះតំណែងមេឃុំ ឬក៏ក្រុមប្រឹក្សាឃុំ”។ លោកបានបន្ថែមថា ក្រុមអង្គការសិទិ្ធមនុស្សធ្លាប់បានរៀបចំវេទិកាសាធារណៈបែបនេះជាច្រើនឆ្នាំមកហើយដោយមិនមានបញ្ហាអ្វីឡើយ។
លោក ឈឹម សាវុធ មន្ត្រីសម្របសម្រួលគម្រោងរបស់មជ្ឈមណ្ឌលសិទិ្ធមនុស្សកម្ពុជាបានយល់ស្របតាមទស្សនៈរបស់លោកបុ៊ណ្ណារ៍ ដោយលោកបន្ថែមថា “ ការពិត គឺមានការរឹតបន្តឹងកាន់តែខ្លាំងមកលើពួកយើងនៅក្នុងការជួបប្រជុំជាមួយអ្នកភូមិនៅក្នុងឃុំណា ដែលគណបក្សសមរង្ស៊ីទទួលបានសំឡេងឆ្នោតកាន់តែច្រើន។
លោកបានបន្តថាមេឃុំ និងប្រធានភូមិរបស់គណបក្សប្រជាជនកម្ពុជា ដែលក្រុមអង្គការសិទិ្ធមនុស្សបានចោទប្រកាន់ថា លែងអនុញ្ញាតឲ្យពួកគេរៀបចំវគ្គបណ្តុះបណ្តាល ឬកម្មវិធីអប់រំស្តីពីសិទិ្ធដីធ្លីទៀតទេ ពីព្រោះពួកគេជឿថាអង្គការសិទិ្ធមនុស្សបានញុះញង់អ្នកភូមិមិនឲ្យគោរពអាជ្ញាធរមូលដ្ឋាន”។
មជ្ឈមណ្ឌលសិទិ្ធមនុស្សកម្ពុជាបានរៀបចំវេទិកាសាធារណៈមួយ កាលពីម្សិលមិញ នៅក្នុងឃុំសេដា ស្រុកលំផាត់ស្តីអំពី “ សិទិ្ធមនុស្សនិងការអភិវឌ្ឍន៍ “ ប៉ុន្តែ មិនមានការលំបាកទេ។
លោកសាវុធ បានមានប្រសាសន៍បន្តថា“ ទោះបីវេទិការបស់យើងថ្ងៃនេះ មិនមានការរំខានពីនគរបាល ឬអាជ្ញាធរមូលដ្ឋានក៏ដោយ ក៏អ្នកភូមិត្រូវបានប្រធានភូមិដើរពីផ្ទះមួយទៅផ្ទះមួយដោយបញ្ជាពួកគាត់មិនឲ្យទៅចូលរួមវេទិកានៅថ្ងៃនេះទេ”។
នៅក្នុងឃុំសេដាដែលជាឃុំគណបក្សសមរង្ស៊ីបានឈ្នះតំណែងជំទប់ថ្មីម្នាក់ថែមទៀតគឺជាឃុំដែលអ្នកភូមិជនជាតិភាគតិចមានជម្លោះដីធ្លីជាមួយក្រុមហ៊ុន ឌីអឹមគ្រុប អស់រយៈពេលជាងមួយទសវត្សរ៍មកហើយ ។ ក្នុងខេត្តរតនគិរីគណបក្សសមរង្ស៊ីបានឈ្នះអាសនៈ៣០ គឺកើនឡើង២១អាសនៈដែលពួកគេទទួលបានកាលពីឆ្នាំ២០០៧។
ប៉ុន្តែ ទោះជាគណបក្សប្រឆាំងបានកើនសំឡេងក្នុងខេត្តនេះក៏ដោយ បញ្ហាជម្លោះដីធ្លីជាមួយងនឹងក្រុមហ៊ុនដីសម្បទានសេដ្ឋកិច្ចដែលបានកែប្រែដីព្រៃទៅជាចម្ការដ៏ធំល្វឹងល្វើយ។ គណបក្សសមរង្ស៊ីបានលើក ឡើងថា ខ្លួនកំពុងព្យាយាមជួបជាមួយអ្នកភូមិ ដែលមានបញ្ហាដីធ្លី។
លោករិនកញ្ញា ប្រធានក្រុមប្រឹក្សាថ្នាក់ខេត្តរបស់គណបក្សសមរង្ស៊ីបានថ្លែងថា “ការរឹតបន្តឹងបែបនេះ ក៏បានកើតឡើងចំពោះគណបក្សប្រឆាំងផងដែរ។នៅពេលក្រុមប្រឹក្សាឃុំថ្មីៗ ទៅផ្សព្វផ្សាយព័ត៌មានអំពីសិទិ្ធដីធ្លី និងសិទិ្ធបញ្ចេញមតិ ពួកគេត្រូវបានអាជ្ញាធរមូលដ្ឋាន ដែលគាំទ្រគណបក្សកាន់អំណាចមករារាំាង”។ លោកបានថ្លែងបន្តថា “អ្នកភូមិកំពុងទទួលរងការបំភិតបំភ័យពីអាជ្ញាធរកាន់អំណាចនៅពេលពួកគេមកចូលរួមប្រជុំជាមួយពួកយើង”។
មេឃុំមកពីគណបក្សប្រជាជនកម្ពុជាមានមេឃុុំភ្នំកុក បាតាង និងឃុំសេដាបានច្រានចោល ចំពោះការចោទប្រកាន់នេះ ដោយនិយាយថា មិនមានការរឹតបន្តឹងទៅលើអង្គការសិទិ្ធមនុស្សឬសមាជិករបស់គណបក្សប្រឆាំងនោះទេ ។
លោកគិតចែមមេឃុំបាតាងដែលបានបញ្ឈប់កម្មវិធីបណ្តុះបណ្តាលកាលពីថ្ងៃសុក្រមានប្រសាសន៍ថា “ យើងតែងតែបើកចំហឲ្យពួកគេចូលភូមិ ដើម្បីបង្រៀនប្រជាជនរបស់យើង។ ប៉ុន្តែ ក្រុមអង្គការសិទិ្ធមនុស្សចូលឃុំរបស់យើងដោយមិនបានជម្រាបអាជ្ញាធរតាំងពីថ្នាក់ខេត្តរហូតដល់ថ្នាក់មូលដ្ឋានឲ្យបានដឹងជាមុនអំពីកម្មវិធីប្រជុំជាមួយប្រជាជនទេ”។
លោកលី នឿនមេឃុំភ្នំកុកដែលជាឃុំនៅជាប់គ្នានោះ បានយល់ស្របតាមយោបល់ របស់លោកចែមដោយមានប្រសាសន៍ថា អង្គការសិទ្ធិមនុស្សទាំងនោះ គួរតែជម្រាបដំណឹងដល់អាជ្ញាធរជាមុន អំពីប្រធានបទនៃការប្រជុំ។ លោកបានបន្តថា ជាគោលការណ៍យើងត្រូវធានាសន្តិសុខដល់ពួកគេជាមុនដូច្នោះយើងអាចចាត់ចែងការការពារសុវត្ថិភាពជូនពួកគេបាន”។
លោករ៉ាយរ៉ៃស្នងការនគរបាលខេត្តបានជំទាស់ថា នៅពេលណាអាជ្ញាធរចាំបាច់បំបែកការប្រជុំ គឺដើម្បីហេតុផលសន្តិសុខ។លោកបានបន្ថែមថា “ ខ្ញុំសូមបដិសេធដាច់ខាតថាគឺមិនមែនការរឹតបន្តឹងលើសកម្មជនសិទិ្ធមនុស្ស មិនឲ្យប្រជុំជាមួយអ្នកភូមិទេ”។ ក្រុមអង្គការសិទិ្ធមនុស្ស លើកឡើងថា ពួកគេបានជម្រាបដំណឹងជាមុនដល់អាជ្ញាធរខេត្តជាច្រើនដងមកហើយ អំពីផែនការរបស់ ពួកគេ ទោះបីជាមិនមានច្បាប់តម្រូវឲ្យធ្វើដូច្នោះក៏ដោយ៕
ប្រែសម្រួលដោយឃិនណៃ