កាលពីម្សិលមិញ សមាជិកសភាគណបក្សប្រឆាំងមួយរូបបានប្រើប្រាស់សម័យប្រជុំសភា អំពាវនាវឲ្យអនុម័តជំពូកទី៣ និងទី៤នៃច្បាប់ចរាចរណ៍ថ្មី ដោយទាមទារឲ្យលោក ត្រាំ អុីវតឹក រដ្ឋមន្ត្រីក្រសួងសាធារណការ និងដឹកជញ្ជូន ជួសជុលផ្លូវដែលខូចនៅក្នុងប្រទេសកម្ពុជា បើមិនដូច្នោះទេត្រូវលាលែងពីតួនាទីរបស់ខ្លួន។
កាលពីថ្ងៃច័ន្ទ រដ្ឋសភាបានអនុម័តជំពូកពីរដំបូងនៃច្បាប់ចរាចរណ៍ថ្មី ដោយមានសំឡេងឆ្នោតស្ទើរតែឯកច្ឆន្ទមុនពេលជួបជុំម្ដងទៀតកាលពីម្សិលមិញ ដើម្បីពិចារណាជំពូកពីរបន្ទាប់ទាក់ទងនឹងអ្នកបើកបរ និងការប្រើប្រាស់ភ្លើងហ្វា និងស៊ីផ្លេ។
ជំពូកទាំងនេះត្រូវបានអនុម័តស្ទើរតែគ្មានការជំទាស់អ្វីឡើយ ដោយសមាជិកសភា៩៩រូបក្នុងចំណោម១០២រូបបានអនុម័តជំពូកទី៣ ហើយសមាជិកដែលមានវត្តមានទាំង១០១រូបបានអនុម័តជំពូកទី៤។
ប៉ុន្តែនីតិវិធីឈានទៅរកការបោះឆ្នោតនេះ ផ្ដោតទៅលើលោកស្រី លី ស្រីវីណា សមាជិកសភាគណបក្សសង្គ្រោះជាតិ ជាវេជ្ជបណ្ឌិត និងជាសមាជិកសភាគណបក្សប្រឆាំងយូរមកហើយនោះ ដែលបានរិះគន់ចំពោះការស្លាប់នៅតាមដងផ្លូវក្នុងប្រទេសកម្ពុជា។
លោកស្រី ស្រីវីណា បានមានប្រសាសន៍ថា ភាគច្រើននៃបំណុលបរទេសដែលរដ្ឋាភិបាលខ្ចី គឺសម្រាប់ស្ថាបនាផ្លូវថ្នល់ដែលលោកស្រីបានលើកឡើងថា បន្ទាប់មកត្រូវបានខូចភ្លាមៗដែរដោយការប្រើប្រាស់ហួសហេតុដែលមិនបានដាក់កម្រិត។ លោកស្រីបានមានប្រសាសន៍ថា “ប្រសិនបើយើងបណ្ដោយឲ្យគុណភាពផ្លូវត្រូវគេធ្វើអាជីវកម្ម ហើយបណ្ដោយឲ្យរថយន្តកុងតឺន័រធំៗបំផ្លាញផ្លូវដូចនេះ ខ្ញុំគិតថា គ្មានអ្វីបន្សល់ទុកសម្រាប់មនុស្សជំនាន់ក្រោយទេ ក្រៅតែការបន្សល់ទុកនូវបំណុល និងផ្លូវដែលខូចតែប៉ុណ្ណោះ។
លោកស្រី ស្រីវីណា បានអំពាវនាវឲ្យលោក ត្រាំ អុីវតឹក ធានាថា ផ្លូវថ្នល់មិនមែនជាកន្លែងគ្រោះថ្នាក់ដល់ជីវិតសម្រាប់អ្នកបើកបរយានយន្តនោះឡើយ។ លោកស្រីបានមានប្រសាសន៍ថា មានជម្រើសតែពីរប៉ុណ្ណោះសម្រាប់ឯកឧត្ដម គឺជម្រើសទី១គឺថា ឯកឧត្ដមអាចធ្វើជារដ្ឋមន្ត្រីក្រសួងសាធារណការ ហើយឯកឧត្ដមត្រូវតែការពារផ្លូវថ្នល់ ជម្រើសទី២គឺថា ឯកឧត្ដមត្រូវឈប់ធ្វើជារដ្ឋមន្ត្រី”។
លោក ឈាង វុន សមាជិកសភាគណបក្សប្រជាជនកម្ពុជាបាននិយាយការពារលោករដ្ឋមន្ត្រីក្រសួងសាធារណការ និងដឹកជញ្ជូន ដោយលើកឡើងថា ការអំពាវនាវឲ្យស្ថាបនាផ្លូវដែលមានគុណភាពប្រសើរនោះគឺជាការគិតខ្លី ហើយមិនបានពិចារណាអំពីផលប្រយោជន៍នៃការកាត់បន្ថយការចំណាយក្នុងការស្ថាបនាផ្លូវឡើយ។
លោកបានមានប្រសាសន៍ថា “ប្រជាជនរបស់យើងគឺមានជាង១៤លាននាក់ ហើយប្រសិនបើយើងស្ថាបនាផ្លូវខ្លីៗមានគុណភាពល្អតែពីរបីនោះ វានឹងផ្ដល់ប្រយោជន៍ដល់អ្នករស់នៅក្នុងទីក្រុង និងទីប្រជុំជនតែប៉ុណ្ណោះ ចំណែកឯប្រជាជនក្រីក្ររស់នៅតំបន់ជនបទវិញនោះ មិនទទួលបានផលប្រយោជន៍ឡើយ”។ លោកបានបន្ថែមថា “ត្រូវធ្វើឲ្យប្រាកដថា លទ្ធផលដែលយើងទទួលបានពីកំណើនសេដ្ឋកិច្ចត្រូវចែករំលែកជាមួយប្រជាជនរស់នៅតំបន់ជនបទ”។
លោក ត្រាំ អុីវតឹក បានទទួលស្គាល់ការត្អូញត្អែរអំពីផ្លូវដែលខូចនៅក្នុងប្រទេសកម្ពុជា។ លោកបានកត់សម្គាល់ថា ផ្លូវជាតិលេខ៦អា ជាផ្លូវហាយវ៉េពីរាជធានីភ្នំពេញទៅក្រុងកំពង់ចាម កំពុងធ្វើការស្ថាបនាអូសបន្លាយពេលដ៏យូរ ដែលសភាពផ្លូវខូចនេះបានកើតមានគ្រប់រដូវ។ លោកបានមានប្រសាសន៍ថា “យើងបានជួបប្រជុំគ្នាច្រើនលើកមកហើយជាមួយអ្នកស្ថាបនាផ្លូវ ហើយយើងទទួលស្គាល់ថា នៅរដូវប្រាំងដីហុយទ្រលោម ហើយនៅរដូវវស្សាវាសុទ្ធតែភក់មែន”៕ សារុន