កូនប្រុសរបស់តំណាងរាស្ត្របក្សប្រឆាំងដែលត្រូវឃាតករបាញ់សម្លាប់ក្នុងប្រទេសថៃ ចោទសួរថា តើរដ្ឋាភិបាលដែលមិនបើកការស៊ើបអង្កេតលើជនសង្ស័យក្នុងសំណុំរឿងឃាតកម្មលោក លិម គិមយ៉ា ព្រោះតែសមត្ថកិច្ចថៃ មិនបានស្នើសុំ ឬមួយត្រកូលហ៊ុនរារាំងមិនឱ្យមានការស៊ើបអង្កេត?
លោក លិម ថូម៉ាស់ កូនប្រុសតំណាងរាស្ត្រគណបក្សសង្គ្រោះជាតិ លោក លិម គិមយ៉ា សរសេរលើគណនីហ្វេសប៊ុករបស់ខ្លួននៅថ្ងៃទី២៨ កុម្ភៈ នេះថា គ្រួសារត្រកូលហ៊ុនកំពុងភ័យខ្លាចការពិតនៃអំពើឃាតកម្មលោក លិម គិមយ៉ា ត្រូវបានលាតត្រដាង បន្ទាប់ពីជនសង្ស័យឈ្មោះ លី រតនៈរស្មី និងឈ្មោះ ពេជ្រ គឹមស្រ៊ិន ត្រូវបានស៊ើបអង្កេតដោយសមត្ថកិច្ចថៃ។
លោកបន្តថា ជនសង្ស័យទាំងពីរនាក់នេះមិនត្រូវគេរកឃើញថាមានគំនុំជាមួយឪពុករបស់លោក ឬមានទំនាក់ទំនងស្គាល់គ្នាក្នុងហេតុផលណាមួយដែលអាចឱ្យពួកគេសមគំនិតគ្នារហូតដល់បាញ់សម្លាប់ឪពុករបស់លោកនោះឡើយ។
លោក លិម ថូម៉ាស់ អះអាងថា ការបដិសេធដែលថាសមត្ថកិច្ចកម្ពុជាគ្មានភារកិច្ចត្រូវស៊ើបអង្កេត ព្រោះឃាតកម្មនេះកើតឡើងនៅប្រទេសថៃ នោះ គឺជារឿងមិនសមហេតុផល ពីព្រោះជនសង្ស័យជាជនជាតិខ្មែរបានជាប់ពាក់ព័ន្ធក្នុងការសម្លាប់អ្នកតំណាងរាស្ត្រខ្មែរ ហើយក៏កំពុងរស់នៅលើទឹកដីខ្មែរដែរសព្វថ្ងៃនេះ ដូច្នេះរដ្ឋាភិបាលកម្ពុជាគ្រាន់តែចូលរួមសហការបញ្ជូនជនសង្ស័យទាំងពីរនាក់នេះឱ្យសមត្ថកិច្ចថៃ ស៊ើបអង្កេតទៅ គឺគ្រប់គ្រាន់ហើយ។
លោក លិម ថូម៉ាស់ បញ្ជាក់ថា សម្រាប់ការដឹកនាំរបស់លោក ហ៊ុន សែន ដែលបន្តមកលោក ហ៊ុន ម៉ាណែត នៅពេលនេះ គ្មានអ្វីផ្លាស់ប្ដូរទេ ព្រោះអ្នកក្រកាន់តែក្រ អ្នកមានកាន់តែមាន ចំណែកអ្នករិះគន់រដ្ឋាភិបាលត្រូវគេចាប់ដាក់គុក ឬត្រូវគេបាញ់សម្លាប់ ហើយឃាតករពិតនៅតែរួចខ្លួនរស់នៅដោយសេរីក្រៅសំណាញ់ច្បាប់គ្រប់ករណីទាំងអស់ ដែលពាក់ព័ន្ធនឹងប្រយោជន៍នយោបាយគ្រួសារហ៊ុន។
ចាប់តាំងពីលោក លិម គិមយ៉ា ត្រូវបានគេបាញ់សម្លាប់កាលពីថ្ងៃទី៧ ខែមករា មក គឺមានរយៈពេលជាង ១ខែហើយ ខណៈជនសង្ស័យក៏ត្រូវបានវែកមុខក្នុងរយៈពេលប្រហាក់ប្រហែលគ្នានេះដែរ ប៉ុន្តែសមត្ថកិច្ចថៃ នៅតែមិនទាន់អាចចាប់ខ្លួនជនសង្ស័យទាំងពីរនាក់នេះដើម្បីបើកការស៊ើបអង្កេតរកអ្នកបញ្ជាពីក្រោយខ្នងនៅឡើយទេ ដោយសារតែគ្មានការសហការពីរដ្ឋាភិបាលត្រកូលហ៊ុន។
កាលពីថ្ងៃទី២៤ ខែកុម្ភៈ ឯកអគ្គរដ្ឋទូតបារាំងប្រចាំកម្ពុជា លោក Jacques Pellet បានជួបជាមួយអគ្គស្នងការរងនៃអគ្គស្នងការដ្ឋាននគរបាលជាតិ លោក ឌី វិជ្ជា ដើម្បីពិភាក្សាអំពីវិធានការរបស់អាជ្ញាធរកម្ពុជា ក្នុងក្របខ័ណ្ឌនៃការស៊ើបអង្កេតរបស់ប្រទេសថៃ ជុំវិញឃាតកម្មលើពលរដ្ឋបារាំង លោក លិម គិមយ៉ា។
ឯកអគ្គរដ្ឋទូតបារាំង លោក Jacques Pellet បញ្ជាក់ថា ប្រទេសបារាំងកំពុងតាមដានយ៉ាងយកចិត្តទុកដាក់អំពីការស៊ើបអង្កេតដែលធ្វើឡើងដោយប្រទេសថៃ ដើម្បីស្វែងរកការពិតចំពោះករណីនេះ៕
© 2025, ឌឹ ខេមបូឌា ដេលី. All rights reserved.