យោងតាមតួលេខពីមជ្ឈមណ្ឌលជាតិ ប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានឲ្យដឹងថា ការឆ្លងជំងឺគ្រុនឈាមបានកើនឡើងជាង២០០ភាគរយនៅពាក់កណ្ដាលឆ្នាំដំបូងនៃឆ្នាំនេះ ដោយមានមនុស្សជាង១៥.០០០នាក់ បានធ្លាក់ខ្លួនឈឺ និងកុមារចំនួន៦០នាក់ បានស្លាប់ដោយសារជំងឺនេះ នាពេលកន្លងមក។
ក្រសួងសុខាភិបាល បានបង្ហាញថា ជំងឺគ្រុនឈាមឆ្នាំនេះមានការកើនឡើងជាច្រើនករណីក្នុងរង្វង់ប្រាំឆ្នាំ ដែលការឆ្លងនៃជំងឺគ្រុនឈាមនេះភាគច្រើនកើតឡើងនៅក្នុងចំណោមមនុស្សដែលមិនមានភាពស៊ាំ ដូចជាកុមារ ដែលទើបកើត បន្ទាប់ពីជំងឺនេះបានផ្ទុះឡើងយ៉ាងខ្លាំង នៅពេលចុងក្រោយនោះ។ ការឆ្លងជំងឺគ្រុនឈាមចុងក្រោយ បានកើតឡើងនៅប្រទេសកម្ពុជា កាលពីឆ្នាំ២០០៧។
អំឡុង២៧សប្តាហ៍ដំបូង កាលពីឆ្នាំមុន របាយការណ៍បានចេញផ្សាយថា ការឆ្លងជំងឺគ្រុនឈាមមានចំនួន៤.៦០៤ករណី និងមានមនុស្ស២៣នាក់បានស្លាប់។ ក្រសួងក៏បានលើកឡើងដែរថា ការធ្លាក់ភ្លៀងឆាប់ពេកក្នុងឆ្នាំនេះ ការកើនឡើងនៃដង្កូវទឹក និងឪពុកម្តាយបាននាំកូនៗរបស់ខ្លួនទៅកាន់មន្ទីរពេទ្យ ដើម្បីព្យាបាលនោះ ក៏ជាកត្តាបង្ហាញថា មានករណីជំងឺគ្រុនឈាមបានកើនឡើងដែរ។
ខេត្តបន្ទាយមានជ័យ ឧត្តរមានជ័យ សៀមរាប និងខេត្តកំពង់ស្ពឺ គឺជាខេត្តដែលកើតមានជំងឺគ្រុនឈាមខ្លាំងជាងគេ។ ដោយសារតែមានវិធីសាស្រ្តការពារបានល្អ និងការយល់ដឹងពីជំងឺនេះនៅទូទាំងប្រទេស លោក ច ម៉េងជួ ប្រធានមជ្ឈមណ្ឌលជាតិ ប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានលើកឡើងថា ការស្លាប់ដោយសារជំងឺគ្រុនឈាមឆ្នាំនេះ ទំនងជាមិនដូចការស្លាប់ កាលពីឆ្នាំ២០០៧ ដែលមានរបាយការណ៍ចេញផ្សាយថា មានជំងឺចំនួន៤០.០០០ករណី និងមានមនុស្សចំនួន៤០៧ បានស្លាប់នោះទេ។
លោកវេជ្ជបណ្ឌិត ម៉េងជួ បានលើកឡើងថា “ក្រសួងបានជួយផ្តល់ថ្នាំអាបែត ដើម្បីសម្លាប់ដង្កូវទឹក និងជួយអប់រំអំពីជំងឺគ្រុនឈាម ហើយឪពុកម្តាយត្រូវតែយកចិត្តទុកដាក់ពីសុខភាពកូនៗរបស់ខ្លួន”។
លោក ភាតធឺ វ៉ាន ម៉ារ៉ែន (Pieter Van Maaren) តំណាងប្រចាំប្រទេសនៃអង្គការសុខភាពពិភពលោក បានលើកឡើងថា ការកើនឡើងនៃការស្លាប់បានធ្វើឲ្យមានការព្រួយរម្ភយ៉ាងខ្លាំង ប៉ុន្តែ លោកបានព្រមានថា ការឆ្លងនិងការស្លាប់ឆ្នាំនេះអាចឈានដល់កម្រិតមួយដូចកាលពីឆ្នាំ២០០៧។
លោក វេជ្ជបណ្ឌិត វ៉ាន ម៉ារ៉ែន បានលើកឡើងថា “ ច្បាស់ណាស់ យើងរំពឹងថា ករណីមួយចំនួននឹងកើនឡើងនៅរដូវវស្សា ប៉ុន្តែ ថា
តើវាអាចឈានដល់កម្រិតមួយដូចកាលពីឆ្នាំ២០០៧នោះ គឺយើងមិនអាចនិយាយបាននៅឡើយទេ”។ លោកបន្ថែមថា ការឆ្លងនេះ ក៏អាចកើតឡើងដូចការកើតឡើងនៃជំងឺ ជីគុនគុនីយ៉ា (Chikungunya) ដែលជាជំងឺមួយកើតចេញពីមូសខ្លា ដោយវាមានរោគសញ្ញាស្ទើរតែដូចជំងឺគ្រុនឈាមអ៊ីចឹងដែរ។ លោកបានបន្តថា “ សម្រាប់ពេទ្យ វាងាយស្រួលទេ ក្នុងការសម្គាល់ជំងឺនេះ ប៉ុន្តែ សម្រាប់ មនុស្សធម្មតាវិញ វាមិនងាយស្រួលឡើយ។ ហេតុដូច្នេះហើយ បញ្ហានោះ គឺយើងអាចច្រឡំនឹងករណីជំងឺជីគុនគុនីយ៉ា”៕
ប្រែសម្រួលដោយ ស៊ា ស៊ុយឈាង