33 C
Phnom Penh

គណបក្ស​​​ប្រឆាំង​​​ជួប​​​គណៈប្រតិភូ​​​អាមេរិករឿង​​​​​​វិបត្តិ​​​នយោបាយ​​​​​

ដោយ ឌឹ ខេមបូឌា ដេលី

បទវិភាគ

កាលពីថ្ងៃ​​​សុក្រ​​​ តំណាង​​​មក​​​ពី​​​គណៈ​​​កម្មា​​​ធិការ​​​ព្រឹទ្ធ​​​សភា​​​អាមេរិក​​​ ទទួល​​​បន្ទុក​​​ត្រួត​​​ពិនិត្យ​​​ការ​​​ចំណាយ​​​ បាន​​​ជួប​​​ពិភាក្សា​​​ជាមួយ​​​ថ្នាក់​​​ដឹកនាំ​​​គណបក្ស​​​សង្គ្រោះជាតិ​​​ ដើម្បី​​​ពិភាក្សា​​​ពី​​​ស្ថានភាព​​​នយោបាយ​​​ក្នុង​​​ប្រទេស​​​កម្ពុជា​​​​​​ចាប់​​​តាំង​​​ពី​​​មាន​​​ការ​​​បោះឆ្នោត​​​ជាតិ​​​ដ៏​​​ចម្រូង​​​ចម្រាស​​​កាលពីឆ្នាំ​​​មុន​​​មក​​​។

ថ្នាក់​​​ដឹកនាំគណបក្ស​​​សង្គ្រោះជាតិពិភាក្សា​​​ជាមួយក្រុម​​​​​​តំណាង​​​គណៈកម្មាធិការ​​​ព្រឹទ្ធសភា​សហ​រដ្ឋ​​​​អាេមរិក​​​ទទួល​​​បន្ទុក​​​ត្រួត​​​ពិនិត្យ​​​ការ​​​ចំណាយ​​​ នៅ​​​ទីស្នាក់ការគណបក្ស​​​សង្គ្រោះ​​​ជាតិ​​​​​​នៅ​​​សង្កាត់​​​ចាក់អង្រែ​​​លើ កាល​​​ពី​​​ម្សិល​​​មិញ​​​។ ស៊ីវ ចាន់ណា
ថ្នាក់​​​ដឹកនាំគណបក្ស​​​សង្គ្រោះជាតិពិភាក្សា​​​ជាមួយក្រុម​​​​​​តំណាង​​​គណៈកម្មាធិការ​​​ព្រឹទ្ធសភា​សហ​រដ្ឋ​​​​អាេមរិក​​​ទទួល​​​បន្ទុក​​​ត្រួត​​​ពិនិត្យ​​​ការ​​​ចំណាយ​​​ នៅ​​​ទីស្នាក់ការគណបក្ស​​​សង្គ្រោះ​​​ជាតិ​​​​​​នៅ​​​សង្កាត់​​​ចាក់អង្រែ​​​លើ កាល​​​ពី​​​ម្សិល​​​មិញ​​​។ ស៊ីវ ចាន់ណា

ក្នុង​​​ជំនួប​​​រយៈ​​​ពេល​​​មួយ​​​ម៉ោង​​​នៅ​​​ទីស្នាក់​​​ការ​​​គណបក្ស​​​សង្គ្រោះជាតិ​​​​​​​​​ដែល​​​លោក​​​ Paul Grove គណៈប្រតិភូ​​​អាមេរិក​​​បាន​​​បដិសេធ​​​ពុំ​​​​​​ធ្វើ​​​អត្ថាធិប្បាយ​​​នេះ​​​​​​ លោក​​​ សម រង្ស៊ី បាន​​​ឲ្យ​​​ដឹង​​​ថា​​​ ភាគី​​​ទាំង​​​ពីរ​​​​​​បាន​​​ពិភាក្សា​​​គ្នា​​​អំ​​​ពី​​​វិបត្តិ​​​​​ក្រោយការ​​​​​​បោះ​​​ឆ្នោត​​​​​​ ហើយ​​​​​​ថា លោក​​បាន​​​​​​​​​ប្រាប់​​​​​​លោក​​​ Paul Grove អំពីការដាក់​​​បម្រាម​​​នាពេល​​​ថ្មីៗ​​​នេះ​​​លើ​​​ការ​​​ប្រមូល​​​ផ្ដុំ​​​គ្នា​​​​​​ដោយ​​​សន្ដិវិធី​​​។

លោក​​​  សម រង្ស៊ី​​​  បាន​​​មាន​​​ប្រសាសន៍​​​ថា  “លោក​​​ Paul Grove បាន​​​មក​​​ប្រទេស ​​​កម្ពុជា​​​ដោយ​​​សារ​​​គាត់​​​ចង់​​​តាម​​​ដាន​​​ស្ថានភាព​​​នយោ​​​បាយ​​​​​​នៅ​​​ក្នុង​​​ប្រទេស​​​នេះ​​​។​​​ គាត់​​​ចង់​​​ដឹង​​​​​​ថា តើ​​​ កំពុង​​​​​​មាន​​​ការ​​​បោះជំហាន​​​បែប​​​ណា​​​​​​​​​ក្នុង​​​ដំណើរ​​​ឆ្ពោះ​​​ទៅ​​​រក​​​ការ​​​ទទួល​​​បាន​​​ដំណោះ​​​​​​ស្រាយ​​​ ហើយ​​​យើង​​​បាន​​​ពន្យល់​​​គាត់​​​ឲ្យ​​​បាន​​​យល់​​​អំពី​​បញ្ហា​​​នេះ​​​”។

លោក​ សម រង្ស៊ី​ បាន​ឲ្យ​ដឹង​​​ថាលោក​​​ Paul Grove មិន​​​បាន​​​លើក​​​​​​ប្រធានបទ​​​ពាក់​​​ព័ន្ធ​​​នឹង​​​ការ​​​ផ្ដល់​​​ជំនួយ​​​ដល់​​​ប្រទេស​​​កម្ពុជា​​​ទេ​​​ តែ​​​ថា “ច្បាប់​​​ថវិការបស់​​​សហរដ្ឋ​​​អាមេរិក​​​​​​ គឺ​​​មាន​​​លក្ខខណ្ឌ​​​មួយ​​​ថា លោក​​​ប្រធានាធិបតី​​​ បារ៉ាក់​​​ អូបា​​​ម៉ា ​មិនត្រូវ​​​​​​ផ្ដល់​​​ជំនួយ​​​​​​ ពិសេស​​​គឺ​​​ជំនួយ​​​យោធា​​​​​​ដល់​​​រដ្ឋាភិបាល​​​​​​លោក​​​ ហ៊ុន សែន​​​ ទេ​​​ ប្រសិន​​​បើ​​​រដ្ឋាភិបាល​​​នេះ​​​មិន​​​បើក​​​ការ​​​ស៊ើប​​​អង្កេត​​​ឲ្យ​​​បាន​​​សមស្រប​​​លើ​​​ភាព​​​មិន​​​ប្រក្រតី​​​​​​ក្នុង​​​ការ​​​បោះឆ្នោតជាតិ​​​​​​និង​​​ការ​​​លួច​​​បន្លំ​​​សន្លឹក​​​ឆ្នោត​​​​​​ទេ​​​នោះ​​​”។

កាល​​​ពី​​​ខែ​​​សីហា  រដ្ឋាភិបាល​​​ក​​​ម្ពុជា​​​ បាន​​​​​​ផ្អាក​​​​​​នូវ​​​កម្មវិធី​​​ជំនួយ​​​​​​យោធា​​​អាមេរិក​​​ភ្លាមៗ​​​ក្រោយ​​​ការ​​​បោះឆ្នោត ​​​​​​ក្នុងការ​​​បោះជំហាន​​​មួយ​​​​​​ដែល​​​​​​អ្នក​​​វិភាគ​​​លើកឡើង​​​ថា​​​នឹង​​​ធ្វើឲ្យ​​​ប៉ះពាល់​​​​​​ដល់​​​ទំនាក់ទំន​​​ង​​​ទ្វេភាគី​​​​​​  ប៉ុន្តែ​​​ដែល​​​​​​មន្ត្រី​​​កម្ពុជា​​​បាន​​​បដិសេធ​​​ថា ​ពុំ​​​មាន​​​​​​​​​ការ​​​ជាប់​​​ពាក់​​​ព័ន្ធ​​​​​​នឹង​​​ការ​​​អំពាវនាវ​​របស់​​​​​​​​​សមាជិក​​​សភា​​​អាមេរិក​​​ឲ្យ​​​មាន​​​ការ​​​​​​ផ្ដាច់​​​​​​ជំនួយ​​​​​​យោធា​​​។

ក្រោយ​​​មក​​​នៅ​​​ក្នុង​​​ខែ​​​តុលា សមាជិក​​​ព្រឹទ្ធ​​​សភា​​​អាមេរិក​​​ Lindsey Graham ក៏​​​បាន​​​ដាក់​​​សំណើ​​​មួយ​​​ទៅ​​​គណៈកម្មាធិការ​​​ការ​​​បរទេស​​​ ​​​ជា​​​មួយ​​​នឹង​​​ការ​​​អំពាវនាវ​​​​​​ឲ្យរដ្ឋាភិបាល​​​អាមេ​​​រិក​​​​​​​​​ ផ្អាក​​​ជំនួយ​​​យោធា​​​រហូត​​​ទាល់​​តែ​​​មាន​​​ការ​​​ស៊ើប​​​អង្កេត​​​អំពីភាព​​​មិន​​​ប្រក្រតី​​​​​​អំឡុង​​​​​​ការ​​​បោះឆ្នោត។

លោក​​​ ជាម យៀប សមាជិក​​​សភាគណ​​​បក្ស​​​ប្រជាជន​​​កម្ពុជា ​​​​​​លើកឡើង​​​​​​ថា  គណៈ​​​ប្រតិភូ​​​អាមេរិក​​​នេះ​​​ចាំបាច់ត្រូវ​​​បោះជំហាន​​​ដែល​​​មាន​​​តុល្យភាព​​​ជាង​​​នេះ​​​ ហើយ​​​ថា​​​សមា​​​​​​​​​ជិក​​​ព្រឹទ្ធ​​​សភា​​​មក​​​ពី​​​ប្រទេស​​​ដទៃ​​​​​​គ្មានសិទ្ធិ​​​ប្រាប់​​​កម្ពុជា​​​​​​ពី​​​របៀប​​​ដោះស្រាយ​​​បញ្ហា​​​​​​ជុំវិញ​​​ការ​​​បោះឆ្នោត​​​​​របស់​​​ខ្លួន​​​ទេ​​​។

លោក​​​បាន​​​ថ្លែង​​​ថា “ពួក​​​​​​គេ​​​បាន​​​មកដល់​​​​​​ប្រទេស​​​កម្ពុជា​​​ហើយ​​​ តែ​​​ហេតុ​​​អ្វី​​​បាន​​​ជាពួក​​​គេ​​​​​​​​​ជួប​​​តែ​​​គណបក្ស​​​ប្រឆាំង​​​​​​ ពុំ​​​​​​ជួប​​​រដ្ឋាភិបាល​​​ផង​​​។​​​ សម រង្ស៊ី គ្រាន់តែ​​​ចង់​​​បាន​​​អំណាច​​​តែ​​​ប៉ុណ្ណោះ​​​​​​ ដូច្នេះ​​​គាត់​​​និយាយតែ​​​​​​អំពី​​​រឿង​​​​​​​​​ហ្នឹង​​​ឯង​”។​​​

គណៈកម្មាធិការ​​​​​​ទទួល​​​បន្ទុក​​​ត្រួត​​​ពិនិត្យ​​​ការ​​​ចំណាយ​​​​​​​​​នេះ​​​​​​​​​នៅ​​​មាន​​​​​​អនុគណៈកម្មការ​​​​​​ដោយ​​​ឡែក​​​មួយ​​​ផ្សេង​​​ទៀត​​​​​​ដែល​​​​​​ត្រូវ​​​ទទួល​​​បន្ទុក​​​លើ​​​​​​ប្រតិ​​​បត្តិការ​​​ការ​​​​​​បរទេស​​​​​​ ដែល​​​មាន​​​​​​រូប​​​លោក​​​ ​​Paul Grove ធ្វើ​​​ជា​​​អ្នកតំណាង​​​នៅ​​​​​​ក្នុង​​​ដំណើរ​​​ទស្សនកិច្ច​​​មុនៗ​​​មក​​​កាន់​​​ប្រទេស​​​កម្ពុជា​​​។

លោក​​​ Sean McIntosh ​អ្នក​​​នាំពាក្យ​​​ស្ថានទូត​​​អាមេរិក​​​​​​បាន​​​ឲ្យ​​​ដឹង​​​តាម​​​រយៈ​​​អ៊ីម៉េល​​​មួយ​​​ថាគណៈប្រតិភូ អាមេរិក​​​​​​នេះ ​​​“មាន​​​វត្តមាន​​​នៅ​​​ក្នុង​​​ប្រទេស​​​កម្ពុជា​​​​​​ដើម្បីជួប​​​ពិភាក្សា​​​ជាមួយ​​​អ្នក​​​តំណាង​​​មក​​​ពី​​​​​​​​​​​​​​​ក្នុង​​​ជួរ​​​រដ្ឋា ភិបាល​​​ គណបក្ស​​​ប្រឆាំង ​​​​​​និង​​​សង្គម​​​ស៊ីវិល​​​ និង​​​ដើម្បី​​​ពិនិត្យ​​​គម្រោង​​​អភិវឌ្ឍន៍​​​នានា​​​​​​ដែល​​​បាន​​​​​​ទទួល​​​មូល​​​និធិ​​​ពីសហរដ្ឋ​​​អាមេរិក។

កាល​​​ពី​​​ដើមសប្ដាហ៍​​​នេះ​​​ មន្ត្រី​​គណបក្ស​​​សង្គ្រោះជាតិ​​​និង​​​គណបក្ស​​​ប្រជាជន​​​កម្ពុជា​​​បាន​​​​​​ព្រមព្រៀង​​​គ្នា​​​​​​ជា​​​គោល​​​ការណ៍​​​លើ​​​ការ​​​បង្កើត​​​​​​ស្ថាប័ន​​​រួម​​​មួយ​​​ដែល​​​ទទួល​​​បន្ទុក​​​​​​តាម​​​ដាន​​​​​​​​​​​​កំណែទម្រង់​​​​​​​ការ​​​បោះឆ្នោត​​​​​ ក្នុង​​​បំណង​​​បញ្ចៀស​​​​​​​​​មិន​​​​​​ឲ្យ​​​មាន​​​វិបត្តិ​​​​​​ទៀត​​​​​​​​​៕សេរីវុធ

​(រាយការណ៍​​​បន្ថែម​​​ដោយ​​​ Lauren Crothers)

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស