លោកនាយករដ្ឋមន្ត្រី ហ៊ុន សែន បានប្រាប់ម្ចាស់ក្រុមហ៊ុន និងមន្ត្រីរដ្ឋាភិបាលកាលពីម្សិលមិញថា លោកនឹងមិនអត់ឱនចំពោះការធ្វើកូដកម្មខុសច្បាប់ដែលធ្វើឲ្យប៉ះពាល់ដល់វិនិយោទុនទេ ប៉ុន្តែលោកមិនបានពិចារណាពីសំណើសុំឲ្យកម្ពុជាដកខ្លួនចេញពីអនុសញ្ញាមួយរបស់អង្គការសហប្រជាជាតិដើម្បីការពារសិទ្ធិបង្កើតសហជីពរបស់កម្មករនោះទេ។
ថ្លែងនៅឯវេទិការាជរដ្ឋាភិបាល-ផ្នែកឯកជនលើកទី១៧ លោក ហ៊ុន សែន ក៏បានចាត់ទុកគណបក្សប្រឆាំងជាក្រុមជ្រុលនិយមដែលបានបង្កភាពចលាចល ដោយការញុះញង់កម្មកររោងចក្រកាត់ដេរឲ្យចូលរួមនៅក្នុងសកម្មភាពខុសច្បាប់ អំឡុងពេលធ្វើកូដកម្មទូទាំងប្រទេសកាលពីពីរខែមុន។
លោក ហ៊ុន សែន បានមានប្រសាសន៍ថា “ គណបក្សប្រឆាំង និងសហជីពរបស់គេបានប្រើគោលនយោបាយប្រជាភិថុតិ ដោយការយកកម្មករធ្វើជាឧបករណ៍នយោបាយ និងបានញុះញង់ឲ្យមានការធ្វើកូដកម្មខុសច្បាប់ជាពិសេស កូដកម្មទាមទារប្រាក់ខែគោលច្រើនហួសហេតុ ដែលមានបំណងបំផ្លាញបរិយាកាសវិនិយោគ ផលប្រយោជន៍របស់កម្មករ-និយោជក និងឱកាសការងារសម្រាប់យុវជន”។
លោកនាយករដ្ឋមន្ត្រី ហ៊ុន សែន បាន មានប្រសាសន៍ថា “រដ្ឋាភិបាលសូមបញ្ជាក់ជាថ្មីថា ការអនុវត្តសិទ្ធិសេរីភាព ដើម្បីទាមទារអ្វីមួយនោះត្រូវតែធ្វើដោយស្របច្បាប់។ ប្រសិនបើអនុវត្តសិទ្ធិផ្ទុយពីច្បាប់ មិនមានការអត់ឱនទេ”។
កម្មកររោងចក្រកាត់ដេរដែលធ្វើកូដកម្មប្រាំនាក់ត្រូវបានកងរាជអាវុធហត្ថបាញ់សម្លាប់ និងបាញ់ឲ្យរងរបួសជាង៤០នាក់កាលពីដើមខែមករា។ អំពើហិង្សារបស់កងរាជអាវុធហត្ថ និងការព្យួររដ្ឋធម្មនុញ្ញពីសំណាក់គណបក្សកាន់អំណាចដើម្បីហាមឃាត់មិនឲ្យមានការជួបជុំគ្នានោះ បានបញ្ចប់កូដកម្មទូទាំងប្រទេស និងការតវ៉ារបស់គណបក្សប្រឆាំងដើម្បីទាមទារឲ្យមានការបោះឆ្នោតឡើងវិញ។
លោក ហ៊ុន សែន បានសម្រេចដកបម្រាម មិនឲ្យជួបជុំគ្នាជាសាធារណៈនេះកាលពីសប្តាហ៍មុន ប៉ុន្តែ សន្តិសុខខណ្ឌបានបង្ក្រាបការតវ៉ាអហិង្សាកាលពីថ្ងៃច័ន្ទ និងបានរឹបអូសយកស្គររបស់អ្នកតវ៉ាទាំងបង្ខំ។
វេទិកាពាណិជ្ជកម្មកាលពីម្សិលមិញ ដែលលោក ហ៊ុន សែន ចាត់ទុកថា ជាកិច្ចប្រជុំបន្តរបស់ទីស្តីការគណៈរដ្ឋមន្ត្រីមានការចូលរួមពីប្រធានក្រុមការងារចំនួន១០នៃវេទិការាជរដ្ឋាភិបាល-ផ្នែកឯកជន ដែលបានប្រគល់របាយការណ៍និងធ្វើសំណើជូនលោកនាយករដ្ឋមន្ត្រី។
លោក ណាង សុធី ដែលជាប្រធានក្រុមការងារផ្នែកទំនាក់ទំនងឧស្សាហកម្ម និងជាអនុប្រធានគណៈកម្មាធិការប្រឹក្សាការងាររបស់រដ្ឋាភិបាលដែរនោះ បានប្រើរបាយការណ៍របស់លោកសម្រាប់លោក ហ៊ុន សែន ដើម្បីបង្ហាញកង្វល់អំពីការធ្វើកូដកម្មក្នុងឧស្សាហកម្មកាត់ដេរ។
បន្ទាប់មកលោក ណាង សុធី បានស្នើសុំឲ្យលោកនាយករដ្ឋមន្ត្រី ហ៊ុន សែន ពិចារណាពីឋានៈរបស់ប្រទេសកម្ពុជាជាហត្ថលេខីនៅក្នុងអនុសញ្ញាលេខ៨៧របស់អង្គការពលកម្មអន្តរជាតិដែលធានាសិទ្ធិរបស់កម្មករក្នុងការបង្កើត និងចូលរួមនៅក្នុងសហជីព។ អនុញ្ញារបស់អង្គការពលកម្មអន្តរជាតិនេះត្រូវបានកម្ពុជាអនុម័តកាលពីខែសីហាឆ្នាំ១៩៩៩។
លោក ណាង សុធី បានមានប្រសាសន៍ថា “អនុសញ្ញាលេខ៨៧មិនត្រូវបានទទួលស្គាល់ដោយប្រទេសទាំងអស់នៅក្នុងពិភពលោកទេ។ បណ្តាប្រទេសជិតខាងមួយចំនួនអាចផលិតសម្លៀកបំពាក់ និងសម្លៀកបំពាក់កីឡានៅតាមរោងចក្ររបស់ខ្លួនដោយគ្មានការឃ្លាំមើលពីសំណាក់អង្គការពលកម្មអន្តរជាតិឡើយ”។
“ ផ្នែកឯកជន សូមស្នើទៅសម្តេចតេជោថា រដ្ឋាភិបាលគួរតែធ្វើការពិចារណាឡើងវិញអំពីការបន្តធ្វើជាប្រទេសហត្ថលេខីនៅក្នុងអនុសញ្ញាលេខ៨៧របស់អង្គការពលកម្មអន្តរជាតិដើម្បីកំណត់ថា តើវាមានអត្ថប្រយោជន៍ ឬអត់”។
លោក ហ៊ុន សែន មិនឆ្លើយតបដោយផ្ទាល់ចំពោះសំណើនេះទេ។ អ្នកដឹកនាំក្រុមការងារផ្សេងទៀតក៏បានធ្វើសំណើជូនលោកនាយករដ្ឋមន្ត្រីផងដែរ រួមទាំងការលើកទឹកចិត្តថ្មីៗសម្រាប់ការកិនស្រូវនៅក្នុងប្រទេសដើម្បីនាំចេញ និងសម្រាប់ចាត់វិធានការជួយក្រុមហ៊ុននានាឲ្យអនុវត្តច្បាប់អាមេរិកស្តីពីការអនុវត្តពន្ធនៅក្រៅប្រទេស។
ច្បាប់េនះតម្រូវឲ្យប្រជាពលរដ្ឋអាមេរិករាយការណ៍ពីគណនីហិរញ្ញវត្ថុរបស់ខ្លួននៅក្រៅសហរដ្ឋអាមេរិក ជូនទៅផ្នែកសេវាប្រាក់ចំណូលផ្ទៃក្នុង។
បន្ទាប់ពីការធ្វើបទបង្ហាញអំពីសំណើទាំងនេះលោក ហ៊ុន សែន បានជ្រើសរើសយកសំណើចំនួន១៣ ដែលលោកប្រកាសថា លោកនឹងអនុវត្តនៅខែក្រោយ រួមទាំងការលើកលែងពន្ធសម្រាប់ក្រុមហ៊ុនកិនស្រូវ ការលោកទឹកចិត្តសម្រាប់ក្រុមហ៊ុននាំចូលសម្ភារប្រើសម្រាប់ផលិតកាបូប និងការបង្កើតការិយាល័យអន្តោប្រវេសន៍ថ្មីៗនៅតាមច្រកទ្វារព្រំដែន។
លោកបានមានប្រសាសន៍ថា “ ចំពោះសំណើផ្សេងទៀត យើងតម្រូវឲ្យមានការពិភាក្សាបន្ថែមទៀតនៅក្នុងក្រុមការងារទាំងនេះ និងជាមួយរដ្ឋាភិបាល” ។ ប៉ុន្តែ លោក ហ៊ុន សែន មិនបានលើកឡើងអំពីសំណើសុំដកសិទ្ធិរបស់កម្មករមិនឲ្យចូលរួមជាមួយសហជីពទេ។
លោក ហ៊ុន សែន ដែលបានសូមអភ័យទោសចំពោះសុខភាពមិនល្អអំឡុងកិច្ចប្រជុំនៅពេលព្រឹក និងបានសុំក្អកមួយភ្លែតមុនពេលពន្យល់ប្រាប់ថា លោកដេកមិនលក់មួយយប់ដោយសារគ្រុនក្តៅ។ លោកបានមានប្រសាសន៍កំប្លែងលេងថា “ខ្ញុំហាក់ដូចជាមានសុខភាពមិនល្អ ប៉ុន្តែ អ្នកផ្សេងកុំសង្ឃឹមថា ខ្ញុំងាប់ឲ្យសោះ”។
លោក ហ៊ុន សែន បានប្រាប់អ្នកចូលរួមថា “មានអ្នកបន់ឲ្យខ្ញុំងាប់កាន់តែច្រើន ខ្ញុំរស់កាន់តែយូរ។ អ្នកដែលចង់ធ្វើជានាយករដ្ឋមន្ត្រីគឺជាមនុស្សដែលបន់ឲ្យខ្ញុំងាប់ ប៉ុន្តែ កុំសង្ឃឹមខ្លាំងពេក”៕គឹមហឿន